TÜ MANOULAKALÜ ATUMA WAYUU: Eeshii wayuu achajaakana maʼin sümüliajünüin naaʼin, akatsaʼa nnojoluin nachuntüin nümüin Maleiwa kaaliinwaa süka eein na wayuu mojuleeka akuwaʼipa noulia naashin. Müsü wanee wayuu Raquel sünülia: «Süka teʼrüin wainmain maʼin tü kasa mojusü alatakat sümüin wayuu sainküin mmaka, machuntüinsat taya nümüin Maleiwa, müsü japüikai taaʼin süka nnojoluin mojuin maʼin tü alatakat tamüin».

TÜ SHIKIRAJAKALÜ ANAIN TÜ WIWÜLIAKAT: Kaainjalashii waya wapüshuaʼa, müsüjeseʼe isain wachiki waaʼinrüin tü nümakat wamüin Maleiwa. Nükaaliinjüin sümaa nümüliajüin wayuu, «nuluwataainjese [Jesukürisüto] chi Nüchonkai süpüla ouktüinjachin saaʼu waainjala süpüla nülaʼajaainjatüin woulia» (1 Juan 4:10). Süka müichipain nia nutuma Maleiwa nülatirüitpa woulia waainjala, wulesü waaʼin jee kateerü woʼu süpüla kaʼikat süpüshuaʼa suluʼu wanee mma anasü. * ¿Jamüshi naapaka Maleiwa chi Nüchonkai süpüla ouktaa waaʼu? ¿Nükaaliinjeeiche pia sükajee tia?

Anuu tü nüshajakat chi aluwataaushikai Pablo nüchiki Jesuu: «Chi Nüchonkai Maleiwa, chi aikai apüla taya sümaa naapajiraain nikii süpüla ouktüin taaʼujee» (Galacia 2:20). Kojutüsü maʼin nümüin Pablo tü naainjakat Jesuu nüpüleerua mayaapejeʼe ouktüin nia süpülapünaa nunoujüin. Müshi naapakaijaʼa Maleiwa nümüin Pablo wanee kasa anashaatasü.

Kojutüshi maʼin pia nümüin Maleiwa, müshijeseʼe naapüin chi Nüchonkai süpüla ouktaa paaʼu. Müshi naapakaijaʼa Maleiwa pümüin wanee kasa anashaatasü. Sünainjee tia nüsülajakat pümüin, nütütüleʼerüin paaʼin, pütüjaa aaʼu naaʼinrüinjatüin tü nüküjakalü achiki otta katchinsü paaʼin sünain aaʼinraa tü anasükat jee sünain püküjüin tü shiimüinkat (2 Tesalónica 2:​16, 17).

Eeirü maʼaka 2.000 juya süchikijee ouktüin Jesuu. ¿Jamüsü watüjaaka saaʼu ayatüin naaʼinmajüin waya Maleiwa maaʼulu yaa?