OWARE NỌ U GBE BI RO MU AHWO JỌ ẸRO HO: Ahwo jọ a tẹ maki wo ẹbẹbẹ dede, a re roro nọ re a yare Ọghẹnẹ kẹ obufihọ yọ uruemu oriobọ, keme ae ọvo a wo oghẹrẹ ebẹbẹ itieye na ha. Aye jọ nọ a re se Raquel, ọ ta nọ: “Me te rri oghẹrẹ ebẹbẹ nọ ahwo buobu a be rẹriẹ ovao dhe evaọ akpọ na, oma o rẹ gbẹ wọ omẹ re mẹ lẹ se Ọghẹnẹ hẹ, keme o rẹ jọ wọhọ ẹsenọ ebẹbẹ mẹ i gbe te oware ovo ho.”

OWARE NỌ EBAIBOL NA O WUHRẸ: Ọghẹnẹ ọ gbẹ edhere nọ o ti ro fiobọhọ kẹ ahwo-akpọ no. Fikinọ mai ahwo-akpọ kpobi yọ erahizi, ma rẹ sai koko izi Ọghẹnẹ gbagba ha. Rekọ, Ọghẹnẹ “o you omai, o je vi Ọmọ riẹ kere ọ ze jọ okiofu izieraha mai.” (1 Jọn 4:10) Ọghẹnẹ ọ rẹ rọ izieraha mai vrẹ omai ẹkwoma idhe ẹtanigbo Jesu, je wo emamọ obroziẹ-iroro, gbe ẹruore uzuazọ ebẹdẹ bẹdẹ evaọ akpọ ọkpokpọ nọ udhedhẹ o te jọ. * Kọ fikinọ ahwo-akpọ a gwọlọ idhe ẹtanigbo na oyejabọ nọ Ọghẹnẹ ọ rọ kẹ omai ẹtanigbo na manikọ yọ edhere nọ Ọghẹnẹ o ro dhesẹ nọ o you omai omomọvo?

Roro kpahe Pọl ukọ na. Fikinọ idhe ẹtanigbo Jesu na e da riẹ ẹro gaga, o kere nọ: “Me bi yeri [uzuazọ] eva orọwọ, orọwọ nọ o rọ eva Ọmọ Ọghẹnẹ, ọnọ o you omẹ, nọ ọ [jẹ] rehọ oma riẹ kẹ omẹ.” (Ahwo Galesha 2:20) Jesu o whu no taure Pọl o te ti kurẹriẹ, rekọ Pọl ọ rehọ idhe ẹtanigbo na wọhọ okẹ nọ u no obọ Ọghẹnẹ ze rọkẹ ọyomariẹ.

Idhe ẹtanigbo Jesu na yọ okẹ nọ u no obọ Ọghẹnẹ ze rọkẹ owhẹ re. Okẹ yena u dhesẹ epanọ Ọghẹnẹ o rri owhẹ ghare te. O rẹ sae kẹ owhẹ ‘oghọghọ ebẹdẹ bẹdẹ gbe emamọ ẹruore, je ru owhẹ ga eva iruo iwoma gbe ẹme owoma.’—2 Ahwo Tẹsalonika 2:16, 17.

Rekọ u te enwenọ ikpe idu ivẹ (2,000) no nọ Jesu ọ rọ rehọ oma riẹ dheidhe na. Eme ọ kẹ owhẹ imuẹro inọ Ọghẹnẹ ọ gwọlọ nọ who wo emamọ usu kugbei nẹnẹ?