TAMACHTILIS ITECH IPEUJYAN AMAIX: ¿MOKA MOTEKIPACHOUA DIOS?
Dios mitsonyolseuia
“Dios [akin] nachipa kinyoltalia [oso kinyolseuia] nekes ten moyolkokojtinemij [...] techyekyoltalij.” (2 CORINTIOS 7:6)
“IKonetsin Dios [...] nechtasojtak uan noka momikilij.” (GÁLATAS 2:20, TNM)
KEYEJ SEKIN OMEYOLOUAJ: Miakej kitelnektokej maj kinyolseuikan, sayoj ke kinemiliaj ke komo kitajtaniaj Dios maj kinpaleui maj kiixnamikikan kuejmolmej tein kipiaj, kinextijtoskiaj ke kitayekanaltiaj inintanejnekilis. Se siuat akin monotsa Raquel, kijtoua: “Keman niknemilia ke tel miakej moajsij noyampa taltikpak uan ke kipiaj uejueyi kuejmolmej, nikita ke kuejmolmej tein nejua nikpia amo semi uejueykej uan nejon kichiua maj amo niktajtani Dios maj nechpaleui”.
TONI TAMACHTIA BIBLIA: Dios kichiuak se taman tein kitelpia ipatiuj tein ika kinpaleuia uan kinyolseuia taltikpakneminij. Tinochin tiyolij ika tajtakol, tein kemej yeskia se “kokolis tein nochipa ika tinemij”. Yejua ika amo ueli senkis tiktakamatij itanauatiluan Dios. Sayoj ke, Dios “techtasojtak tejuan. Uan Yejuatsin techualtitanilij Nikonetsin yojtsin [Jesucristo] para ma [...] technekixtiltiki ka in mikilis den totajtakoluan” (1 Juan 4:10). Ika inemilis Jesús tein kitemakak, Dios ueli techtapojpoluia totajtakoluan, ueli tikpiaj se tanemilil chipauak uan uelis tinemiskej nochipaya nikan taltikpak kampa Dios tayektalis uan kampa onkas yolseuilis. * Sayoj ke ika inemilis Jesús tein kitemakak ¿kinextia Dios ke ininka motekipachoua senolochmej taltikpakneminij, oso sejsemej?
Maj tikitakan ineskayo tatitanil Pablo. Yejua semi kitasojkamatia inemilis Jesús tein kitemakak, yejua ika kijkuiloj: “IKonetsin Dios [...] nechtasojtak uan noka momikilij” (Gálatas 2:20, TNM). Maski Jesús momikilij achto ke Pablo mochiuaskia itatojtokakauj, Pablo kiitaya ke ijkuak kitemakak inemilis katka kemej se netetayokolil tein Dios kimakaka yejua.
Inemilis Jesús tein kitemakak no se netetayokolil tein Dios mitsonmakani tejuatsin uan ijkon mitsonnextilia ke semi mitsonpatiuita. Nejin netetayokolil uelis mitsonmakas “yolseuilis ten amo keman tamis. Uan [...] se kuali takuautamatilis” uan mitsonmakas chikaualis tein tapaleuia maj se ‘kijtojtinemi uan kichiutinemi nochi ten kuali’ (2 Tesalonicenses 2:16, 17).
Sayoj ke, Jesús kitemakak inemilis kemej ome mil xiujmej achto. ¿Keniuj tikmatij ke Dios kisentoka toka motekipachoua axkan?
^ párr. 5 Komo tikonneki tikonmatis okachi ika inemilis Jesús tein kitemakak, xikonita capítulo 5 itech amaix ¿Toni yekmelauj tamachtia Biblia?, tein kichijchiujkej itaixpantijkauan Jiova.
