MATAUPU I TE ‵KAVA | E MATA, E FIAFIA TONU TE ATUA KI A KOE?
E Mafai o Fakamafanafana Koe ne te Atua
“Ne fakamafanafana matou ne te Atua telā e fakamafanafana ne ia a tino loto vāi‵vai.”—2 KOLINITO 7:6.
“Te Tama a te Atua, telā ne alofa mai ki a au kae tuku mai foki tena ola ke ola ei au.”—KALATIA 2:20
TE POGAI E FAKALOTOLOTOLUA EI A NISI TINO: Kafai foki eiloa e ma‵nako malosi latou ki se fakamafanafanaga, e mafau‵fau a nisi tino me se uiga kaimanako ke fesili atu ki te Atua kae fesoasoani atu ke fa‵ki i olotou fakalavelave. “Kafai e onoono au ki te aofaki kātoa o tino i te lalolagi—mo fakalavelave faiga‵ta e fe‵paki mo latou,” e fai mai se fafine e igoa ki a Raquel, “ne foliga fo‵liki mai fua oku fakalavelave telā ne seki fia fakamolemole atu au ki te Atua mō se fesoasoani.”
FAKAMATALAGA MAI TE TUSI TAPU: Ko oti eiloa ne fesoasoani mai a te Atua i se auala fakaofoofogia kae fakamafanafana atu foki ki tino. A tino katoa i aso nei—e se mafai ne latou o fakafetaui katoatoa olotou olaga ki mea e manako te Atua ki ei. Kae ko te Atua “ne uga mai ne ia tena Tama [Iesu Keliso] ke fai mo fai te taulaga mō ‵tou agasala.” (1 Ioane 4:10; fakamatalaga mai lalo) E auala i te mate o Iesu e pelā me se taulaga, ne mafai ei o fakamagalo ne te Atua ‵tou agasala, maua se loto lagona ‵ma, mo te fakamoemoega ki te ola se-gata-mai i te lalolagi fou kae filemu. * Kae e mata, ne fai te taulaga tenā mō tino e pelā me se potukau, io me e fakaasi mai a te fia saga tonu atu o te Atua ki a koe?
Mafaufau ki te apositolo ko Paulo. Ne fakaosofia tou tagata ne te taulaga a Iesu telā ne tusi mai ei a ia: “E ola eiloa au i te fakatuanaki ki te Tama a te Atua, telā ne alofa mai ki a au kae tuku mai foki tena ola ke ola ei au.” (Kalatia 2:20) E tonu, ne mate a Iesu a koi tuai o fai a Paulo mo fai se Kelisiano. Kae ne kilo atu a Paulo ki te taulaga tenā e pelā me se meaalofa totino a te Atua ki a koe.
A te mate o Iesu e pelā me se taulaga se meaalofa totino foki a te Atua ki a koe. E fakamaoni mai ne te meaalofa tenā a te tāua o koe ki te Atua. E mafai o tuku atu i ei a te “fakamafanafanaga se-gata-mai mo te fakamoemoega gali,” kae “fakama‵losi atu foki ki a koutou i so se galuega mo so se pati e fai ne koutou.”—2 Tesalonia 2:16, 17.
Kae ne ofo atu ne Iesu tena ola e pelā me se taulaga i tausaga toeitiiti ko kātoa te 2,000 ko ‵teka atu nei. Se a te fakamaoniga me e taumafai eiloa te Atua ke fesoasoani atu ki a koe i te aso nei?
^ pala. 5 Ke tauloto e uiga ki te togiola a Iesu, ke onoono ki te mataupu e 5 o te tusi Ne a Mea e Akoako ‵Tonu Mai i te Tusi Tapu? telā ne ‵lomi ne Molimau a Ieova.
