Muaj ib leej txiv hais rau nws tus me tub tias, “Puag thaum ub, Vajtswv tsim ib puas tsav yam, nws tsim lub ntiaj teb, lub hnub, lub hli, thiab tej hnub qub.” Tus me tub xav ntev loo ces nws txawm hais rau nws txiv tias, “Iv, leej twg tsim Vajtswv?”

Leej txiv txawm teb tus me tub tias, “Vajtswv yeej ib txwm muaj nyob los, tsis muaj leej twg tsim nws.” Ces tus me tub cia li zoo siab thiab nyob ntsiag to lawm. Tiam sis thaum tus tub loj hlob tuaj nws xav tias, neeg twb txawj yug txawj tuag thiab lub qab ntuj khwb los twb muaj qhov pib. Ua li leej twg yog tus tsim Vajtswv tiag?

Phau Vajlugkub qhia li cas? Nyob hauv Phau Ntawv Nkauj 90:1, 2 Mauxes hais tias, ‘Au Yehauvas, . . . ua ntej uas toj roob hauv pes tsis tau tshwm los, thiab koj tsis tau tsim lub ntiaj teb thiab lub qab ntuj, koj yeej yog Vajtswv ib txwm thaum ub los mus ib txhis tsis kawg.’ Yaxayas tus uas cev Vajtswv lus kuj hais tias, ‘Nej tsis tau paub dua li los? Nej tsis tau hnov dua li los? Yehauvas yog Vajtswv tus uas muaj sia nyob mus ib txhis, nws tsim tag nrho lub ntiaj teb no.’ (Yaxayas 40:28) Tsis tas li ntawd, Yudas tau hais tias Vajtswv yeej ib txwm muaj nyob los.​—Yudas 25.

Phau Vajlugkub qhia tias Vajtswv yog ‘tus Vajntxwv uas kav mus ib txhis.’ (1 Timaute 1:17) Yog li, Vajtswv tus uas muaj hwj chim loj kawg nkaus yeej tsis muaj qhov pib qhov xaus, nws yeej ib txwm muaj nyob los thiab yuav nyob mus ib txhis li. (Tshwmsim 1:8)

Ua li cas nyuaj ua luaj rau peb nkag siab txog qhov no? Muab xav txog tus kooj txig, nws tsuas nyob txog li 50 hnub xwb. Tiam sis koj hais rau nws tias, tib neeg nyob txog 70 rau 80 xyoo. Nws puas nkag siab qhov uas koj hais? Nws yeej yuav tsis to taub li. Rau Vajtswv ib txhiab xyoo tsuas ntev li ib hnub xwb. (2 Petus 3:8) Peb tib neeg los ib yam nkaus, peb zoo li tus kooj txig uas nyob tsis ntev. Yuav kom peb nkag siab txog qhov uas Vajtswv nyob mus ib txhis yeej tsis yooj yim. (Yaxayas 40:22; 55:8, 9)

Yog tias muaj ib tug tsim Vajtswv, ces tus ntawd kuj yog tus tswv tsim lawm. Tiam sis tsis yog li ntawd, phau Vajlugkub qhia tias Yehauvas yog tus “tsim ib puas tsav yam.” (Tshwmsim 4:11) Qhov no qhia rau peb tias yeej tsis muaj leej twg tsim Vajtswv a. Nws yeej ib txwm muaj nyob los ua ntej nws tsim Yexus, cov tub txib saum ntuj thiab lub qab ntuj khwb. (Yauj 38:4, 7; Kaulauxais 1:15; Chivkeeb 1:1, 2)

Qhov uas muaj lub qab ntuj khwb, muaj tib neeg, thiab muaj ib puas tsav yam uas ciaj sia, qhia tias yeej muaj Vajtswv tus uas nyob mus ib txhiab ib txhis. Nws yog tus tsim txhua tsav txhua yam.​—Yauj 33:4.