អ្នកអានសួរថា...
តើអ្នកណាបង្កើតព្រះ?
សូមស្រមៃគិតអំពីឪពុកម្នាក់ដែលកំពុងនិយាយជាមួយកូនប្រុសគាត់អាយុប្រាំពីរឆ្នាំ។ គាត់និយាយថា៖«យូរណាស់មកហើយ ព្រះបានបង្កើតផែនដីនិងអ្វីៗទាំងអស់នៅផែនដី ហើយលោកបង្កើតព្រះអាទិត្យ លោកខែ និងដួងតារា»។ កូនប្រុសគិតមួយភ្លែតអំពីរឿងនេះ រួចសួរថា៖«ប៉ា តើអ្នកណាបង្កើតព្រះ?»។
ឪពុកឆ្លើយតបថា៖«គ្មានអ្នកណាបង្កើតព្រះទេកូន។ លោកតែងតែមានជីវិតរហូត»។ ចម្លើយដ៏ខ្លីនេះធ្វើឲ្យកូនលេងឆ្ងល់នៅពេលនោះ។ ក៏ប៉ុន្តែ កាលដែលកូនធំឡើង កូនចាប់អារម្មណ៍កាន់តែខ្លាំងចំពោះសំណួរនេះ។ គាត់ពិបាកយល់ថា បុគ្គលម្នាក់អាចមានជីវិតយ៉ាងដូចម្ដេចបានបើគាត់មិនមានដើមកំណើត? ព្រោះសូម្បីតែសកលលោកក៏មានដើមកំណើតដែរ។ ដូច្នេះគាត់ឆ្ងល់ថា៖«តើព្រះមកពីណា?»។
តើគម្ពីរឆ្លើយយ៉ាងណា? តាមពិតចម្លើយក្នុងគម្ពីរគឺដូចអ្វីដែលឪពុកម្នាក់ខាងលើនេះបានឆ្លើយ។ ម៉ូសេបានសរសេរថា៖«ឱព្រះអម្ចាស់អើយ...មុនដែលអស់ទាំងភ្នំបានកើតឡើង ក្នុងកាលដែលទ្រង់មិនទាន់បង្កើតផែនដី នឹងមនុស្សលោកនៅឡើយ ចាប់តាំងពីអស់កល្ប រៀងទៅដល់អស់កល្បជានិច្ច នោះគឺទ្រង់ហើយជាព្រះ»។ (ទំនុកតម្កើង ៩០:១, ២) ដូចគ្នាដែរ អ្នកប្រកាសទំនាយអេសាយលាន់មាត់ថា៖«តើឯងមិនបានដឹង តើមិនបានឮទេឬអី ថាព្រះដ៏គង់នៅអស់កល្បជានិច្ច គឺព្រះយេហូវ៉ា ជាព្រះដែលបានបង្កើតផែនដីរហូតដល់ចុងបំផុត»។ (អេសាយ ៤០:២៨) ស្រដៀងគ្នាដែរ សំបុត្រយូដាសក៏បានរៀបរាប់ថាព្រះបាន«ស្ថិតស្ថេរជានិច្ចកាល»ឬស្ថិតស្ថេរតរៀងមកដល់ឥឡូវនេះ។—យូដាស ២៥
បទគម្ពីរទាំងនេះបង្ហាញយើងថាព្រះជា«ស្ដេចដែលរស់ជារៀងរហូត» ដូចសាវ័កប៉ូលបានរៀបរាប់។ (ធីម៉ូថេទី១ ១:១៧) នេះមានន័យថា នៅអតីតកាលមិនដែលមានពេលមួយដែលព្រះគ្មានជីវិតនោះឡើយ ហើយលោកនឹងរស់នៅជារៀងរហូតតទៅទៀត។ (ការបើកបង្ហាញ ១:៨) ដូច្នេះ ការរស់នៅជារៀងរហូតគឺជាលក្ខណៈពិសេសមួយរបស់ព្រះដែលមានឫទ្ធានុភាពខ្លាំងក្លាបំផុត។
ហេតុអ្វីយើងពិបាកយល់គំនិតដែលថាព្រះរស់ជារៀងរហូត? គឺដោយសារយើងមានជីវិតខ្លី ហើយនេះនាំឲ្យយើងមានទស្សនៈខុសគ្នាឆ្ងាយពីព្រះយេហូវ៉ាអំពីពេលវេលា។ ប៉ុន្តែ ដោយសារព្រះមានជីវិតជារៀងរហូត មួយពាន់ឆ្នាំគឺស្មើនឹងមួយថ្ងៃចំពោះលោក។ (ពេត្រុសទី២ ៣:៨) ជាឧទាហរណ៍ តើសត្វកណ្ដូបដែលគ្រាន់តែរស់នៅប្រហែល៥០ថ្ងៃប៉ុណ្ណោះ អាចយល់អំពីអាយុកាលរបស់យើងដែលមាន៧០ឬ៨០ឆ្នាំបានទេ? ពិតជាមិនអាចយល់បានទេ! ប៉ុន្តែ គម្ពីរបានពន្យល់ថា បើប្រៀបធៀបនឹងអ្នកដែលបង្កើតដ៏ឧត្ដមរបស់យើង នោះយើងគឺប្រៀបដូចជាសត្វកណ្ដូប។ ម្យ៉ាងទៀត លោកក៏មានសមត្ថភាពវែកញែកខ្ពង់ខ្ពស់ជាងយើងឆ្ងាយណាស់ដែរ។ (អេសាយ ៤០:២២; ៥៥:៨, ៩) ដូច្នេះ គឺមិនចម្លែកទេដែលមនុស្សយើងមិនអាចយល់អ្វីៗទាំងអស់អំពីព្រះយេហូវ៉ា។
ទោះជាយើងពិបាកយល់គំនិតដែលថាព្រះរស់ជារៀងរហូតក្ដី តែគំនិតនេះគឺសមហេតុផល។ បើមានអ្នកបង្កើតព្រះ អ្នកនោះទៅជាអ្នកបង្កើតវិញ។ ប៉ុន្តែ ដូចគម្ពីរពន្យល់ ព្រះយេហូវ៉ាគឺជាអ្នកដែល«បានបង្កើតអ្វីៗទាំងអស់»។ (ការបើកបង្ហាញ ៤:១១) ណាមួយទៀត យើងដឹងថា នៅគ្រាមួយមិនមានសកលលោកទេ។ (លោកុប្បត្តិ ១:១, ២) តើសកលលោកមកពីណា? មុនមានសកលលោក ត្រូវមានអ្នកបង្កើត។ មុនមានបុត្ររបស់ព្រះនិងបណ្ដាទេវតា ក៏ត្រូវមានព្រះដែលជាអ្នកបង្កើតដែរ។ (យ៉ូប ៣៨:៤, ៧; កូឡុស ១:១៥) ច្បាស់ណាស់ នៅដើមដំបូងមានតែព្រះយេហូវ៉ាប៉ុណ្ណោះទេ។ គ្មានអ្នកណាអាចបង្កើតលោកបានទេ ព្រោះក្រៅពីលោក គ្មាននរណាទៀតឡើយ។
សកលលោកទាំងមូលនិងជីវិតរបស់យើងបញ្ជាក់ថា ពិតជាមានព្រះដែលរស់ជារៀងរហូតមែន។ អ្នកដែលធ្វើឲ្យសកលលោកដ៏ធំធេងរបស់យើងមានចលនា និងអ្នកដែលបង្កើតច្បាប់ដើម្បីគ្រប់គ្រងវា ត្រូវតែរស់ជារៀងរហូត។ មានតែលោកប៉ុណ្ណោះដែលអាចបង្កើតអ្វីៗទាំងអស់។—យ៉ូប ៣៣:៤
លោកអ្នកក៏ប្រហែលជាចូលចិត្តដែរ
សេចក្ដីបង្រៀនសំខាន់ៗពីគម្ពីរ
តើសកលលោកនេះមានអ្នកបង្កើតឬទេ?
មនុស្សជាច្រើនយល់ច្រឡំអំពីអ្វីដែលគម្ពីរបរិសុទ្ធរៀបរាប់ស្ដីអំពីដើមកំណើតសកលលោកនេះ ឬក៏គិតថានោះជារឿងព្រេងវិញ។ តើយើងពិតជាអាចជឿអ្វីដែលគម្ពីរបរិសុទ្ធរៀបរាប់អំពីដើមកំណើតសកលលោកឬ?
សេចក្ដីបង្រៀនសំខាន់ៗក្នុងគម្ពីរ
តើព្រះមាននាមឬទេ?
ព្រះមានឋានៈជាច្រើនដូចជា ព្រះដ៏មានគ្រប់ព្រះចេស្តា ព្រះដែលជាអ្នកបង្កើត និងព្រះអម្ចាស់ជាដើម។ វីដេអូនេះបង្ហាញអំពីនាមរបស់ព្រះផ្ទាល់ដែលបានត្រូវប្រើជាង៧.០០០ដងក្នុងគម្ពីរបរិសុទ្ធ។