Fwanyikizhai nsemi wamulume ubena kwamba na mwananji wamulume uji na myaka itanu na ibiji. Wamwambila’mba, “Kala kene, Lesa walengele ntanda ne byonse bijimo, kabiji walengele juba, ñondo ne tubangabanga.” Uno mwana walanguluka pa ka kimye kacheche ne kwipuzha’mba, “Tata, ñanyi walengele Lesa?”

Bashanji bakumbula’mba, “Kafwako walengele Lesa ne.” Aye “waikalako myaka ne myaka.” Nsemi byo amubula bino byambo, mwananji waumvwa. Nangwa byonkabyo, byo akoma watwajijila na kulangulukapo pa buno bwipuzho. Kyamukatazha bingi kumvwisha kuba’mba kafwako muntu wabula ntendekelo ne. Mambo ntanda iji na ntendekelo. Walanguluka’mba, pano nga ‘Lesa wafumine pi?’

Nga Baibolo waambapo mba ka pa buno bwipuzho? Byonka byaambile uno nsemi ku mwananji, Mosesa naye wanembele’mba, ‘Anweba Yehoba, . . . mitumba byo yaji ikyangye kulengwa, ne byo mwaji mukyangye kulenga mushiji ne ntanda, Kufuma ku kala ne kala ne kufika ku myaka ya pe, anweba sa muji Lesa.’ (Salamo 90:1, 2) Kabiji ngauzhi Isaya waipwizhe’mba: “Kechi mwikiyuka nenyi? Kechi mwikyumvwinepo nenyi? Yehoba ye Lesa wa myaka ne myaka, ye Mulenga wa pano pa ntanda ponse.” (Isaya 40:28) Yuda naye mu nkalata yo anembele waamba pe Lesa amba waikalako “myaka ne myaka.”—Yuda 25.

Bino binembelo bimwesha’mba Lesa “Mfumu wa myaka,” byonkatu Paulo byo amulumbulwile. (1 Timoti 1:17) Kino kilumbulula’mba Lesa waikalako kikupu, wajingako kufumatu ne kala kene. Kabiji ukatwajijila kwikalako. (Lumwekesho 1:8) Kwikalako kwanji kwa myaka ne myaka ko kumwesha’mba Wabulume bonse.

Mambo ka o kitukatezha kumvwisha kino? Mambo kwipipa kwa bumi bwetu kwitulengela kubula kumona kimye byonka Yehoba byo ekimona. Byo aji Lesa wa myaka ne myaka umona myaka kiumbi kimo nobe juba jimo. (2 Petelo 3:8) Akifwanyikizhai tete wikalatu moba 50, nanchi wakonsha kwesakana ne atweba bantu twikala myaka 70 nangwa 80 nyi? Ine! Popamotu ne atweba, Baibolo walumbulula’mba tujitu nobe batete inge twiesakanya kwi aye Mulenga wetu Mukatampe. Nangwatu maana etu akepa bingi inge twiyesakanya na maana anji. (Isaya 40:22; 55:8, 9) Onkao mambo, kechi twafwainwa kukumya pa kuyuka kuba’mba kuji mbaji ya bwikalo bwa Yehoba ibula kumvwisha bantu ne.

Nangwa kya kuba kechi twakonsha kumvwisha ne, pano bino kyailamo kwamba’mba Lesa waikala myaka ne myaka. Inge kuji walengele Lesa ko kuba’mba awo ye Mulenga. Pano bino byonka byalumbulula Baibolo, Yehoba ye ‘walengele bintu byonse.’ (Lumwekesho 4:11) Kabiji twayuka’mba kala kene bilengwa byonse kechi byajingako ne. (Ntendekelo 1:1, 2) Pano bilengwa byaishileko byepi? Mulenga wafwainwa kwikalako patanshi. Aye wajiko saka kukyangye ne kwikala bilengwa bya maana, nabiji Mwananji yenkawa umo ne bamalaika. (Yoba 38:4, 7; Kolose 1:15) Kyamwekeshatu patoka kuba’mba patanshi aye wajingatu bunke bwanji. Inge kafwako bilengwa byajingako pa kyo kimye ne, ko kuba kafwako wafwainwe kumulenga ne.

Bilengwa byonse kubikapotu ne atweba bantu bimwesha’mba, Lesa wa myaka ne myaka ko aji. Kya kine waikala myaka ne myaka, mambo ye walengele ntanda ne bya mwiulu bizhokoloka juba ne kubikako mizhilo yo bilondela. Kyokyo apaina bumi ku bilengwa byonse.—Yoba 33:4.