Mazinn enn papa pe koz avek so garson set-an. Li dir so garson: “Bien, bien lontan, Bondie ti kree later ek tou seki ena lor la, ek Li’nn kree soley, lalinn, ek bann zetwal.” Garson-la reflesi enn ti moman, apre sa li dir: “Be Pa, kisannla inn kree Bondie?”

Papa-la reponn: “Personn pa’nn kree Bondie. Li finn touletan existe.” Pou asterla, sa ti fraz-la li ase pou sa garson-la. Me amezir li grandi, sa kestion-la kontign fatig li. Li pa arive konpran kouma enn kikenn kapav pena enn koumansman. Mem liniver ena enn koumansman. Li demann limem: ‘Kot Bondie sorti?’

Kouma Labib reponn sa kestion-la? An realite, parey kouma sa papa dan nou lexanp la. Moïse ti ekrir: “O Jéhovah, . . . avan ki bann montagn ti ne ouswa ki to ti kree later ek later ki prodir, depi touletan ek pou touletan, tomem Bondie.” (Psaume 90:1, 2) Profet Isaïe osi ti dir: “Eski zot pa kone? Eski zot pa’nn tande? Jéhovah Limem Kreater later, pran depi enn bout ziska lot bout. Li enn Bondie ki existe pou touletan”! (Isaïe 40:28) Dan let ki Jude ti ekrir, li osi li dir ki Bondie existe “pou tou leternite ki’nn pase.”​—Jude 25.

Sa bann verse-la montre nou ki Bondie Li “Lerwa leternite,” parey kouma lapot Paul dekrir li. (1 Timothée 1:17) Savedir ki Bondie finn touletan existe, mem ki kantite lwin nou panse kapav ale dan lepase. Ek Li pou touletan existe dan lavenir. (Révélation 1:8) An realite, enn laspe bien inportan ki kalifie Tou-Pwisan, se ki Li existe pou touletan.

Kifer nou trouv sa lide-la difisil pou konpran? Dabor, lefe ki nou lavi bien kourt, fason ki nou konsider letan, li bien diferan avek Jéhovah. Ek osi parski Bondie Li eternel, alor pou Li, enn zour li kouma mil an. (2 Pierre 3:8) Pou nou konpran sa, anou pran enn lexanp. Enn sotrel adilt viv zis apepre 50 zour. Alor, eski li kapav konpran kouma nou bann imin nou arive viv 70-80 an? Difisil! Pourtan, Labib dir ki nou kouma bann sotrel konpare ar nou Gran Kreater. Mem nou kapasite pou rezone, bien-bien limite konpare ar pou Li. (Isaïe 40:22; 55:8, 9) Alor, nou pa etone ki ena plizir laspe lor Jéhovah Limem ki nou bann imin, nou pa reisi konpran.

Mem si li pa tro fasil pou konpran ki Bondie Li eternel, sa lide-la fer sans. Si ti ena enn lot kikenn ki ti kree Bondie, sa lot kikenn-la ki ti pou Kreater. Pourtan, parey kouma Labib explike, Jéhovah Limem ki’nn “kree tou kitsoz.” (Révélation 4:11) Anplis, nou kone ki enn lepok, liniver pa ti existe. (Genèse 1:1, 2) Alor, kot li sorti? Fode ki so Kreater inn existe avan. Li’nn existe avan ki ti ena bann lezot kreatir intelizan, kouma par exanp so Garson ki Li’nn kree direk ek bann anz. (Job 38:4, 7; Colossiens 1:15) Li kler alor, ki avan tou kitsoz, Bondie ti existe Li tousel. Personn pa’nn kree Li; pena nanye ki ti existe ki ti kapav kree Li.

Nou lexistans ek lexistans liniver an antie prouve ki ena enn Bondie eternel ki existe. Sa Kikenn ki’nn met nou gran liniver an mars, sa Kikenn ki’nn etabli bann lalwa pou kontrol li, inn bizin touletan existe. Zis Li tousel ki’nn kapav donn tou lezot kitsoz lavi.​—Job 33:4.