Elenganyini pali Isi aakulanzyanya nu mwanakwe umulumendo uwa myaka 7. Wanena umwana wati, “Mpiti sana Leza waumvile insi na vyonsi ivyayamo, nupya wapanzile ilanzi nu mwezi alino ni ntanda.” Umwana welenganya panono pa mazwi yayo alino uzya isi wati, “Tata, a weni uwapanzile Leza?”

Isi wasuka umwana wati, “Kutaaya uwapanzile Leza, wene wayako lyonsi.” Pa nsita iyo umwana watemwa icasuko. Lelo lino umwana akuya akukula watwalilila ukwelenganya api uzyo lilyo. Camutalila ukuzumila ndi cakuti umwi angayako ukwaula intandikilo. Pano nanti sile i vintu vya mwi yulu vyakwata intandikilo. Lyene welenganyapo nu kuzya ukuti, ‘Aekwi kuno Leza wafumile?’

Uzye Baibo ikalandapo uli? Ikalanda wakwe vino isi waswike umwana umu cilangililo cino itulandapo. Mose walemvile ati: ‘We Yeova, lino imyamba itacili ipangwe ni nsi yonsi itacili iyeko, wemo we Leza akuno wali, nupya ulayelelela.’ (Masamu 90:1, 2) Vikwene ali vino na kasesema Ezaya walanzile, watiile: ‘Uzye fwandi mwemo mutamanya? Uzye mwemo mutuvwapo? Ala Yeova ali Leza wa pee’! (Ezaya 40:28) Vikwene avino na kalata wakwe Yuda akalanda ukalozya kuli Leza ukuti wayako “ukufuma manda pe.”—Yuda 25.

Malembo yayo yakatunena ukuti Leza u “Mwene wa manda pe,” wakwe vino umutumwa Paulo walondolwile. (1 Timoti 1:17) Cii cikupiliula ukuti Leza wayako ukufuma lyonsi asi mulandu ni nsita ino tungelenganya iyapitapo. Nupya alatwalilila ukuyako lyonsi. (Kusokolola 1:8) Fwandi vino wayako amanda pe cikalangilila ukuti Uwa Maka Yonsi.

U mulandu ci uno cikatutalila ukuvwikisya icisinka cii? Pano imyaka inono iya umi witu ikalenga twalola insita ukupusana na vino Yeova akailola. Pa mulandu wakuti Leza uwa manda pe, kuli aliwe imyaka 1000 yaaya wa wanda onga. (2 Petulo 3:8) Katulangilile: Uzye icipaso icikaikala sile amanda 50, cinguvwikisya imyaka ya muntu 70 nanti 80? Awe cumi citanga cuvwikisye. Lelo Baibo ikalanda ukuti twaya wa vipaso ngu kutulinganya kuli Kaumba Witu Umukalamba. Nanti sile amaka itu akwelenganya yaya anono sana ngu kuyalinganya kuli aliwe. (Ezaya 40:22; 55:8, 9) Fwandi tutanga tuzunguke ukuti kwaya imiyele imwi yakwe Yeova ino antunze yatanga yuvwikisye.

Nanti icakuti limwi cingatutalila ukwiluka ukuti Leza uwa pe, itusininkizya ukuti vivyo kwene avino caya. Ndi cakuti kwali uwaumvile Leza, ale umuntu kwene wiyo aangaya ali Kaumba. Nomba, wakwe vino Baibo ikalondolola, Yeova aliwe “waumvile vintu vyonsi.” (Kusokolola 4:11) Nupya twamanya ukuti pa nsita imwi kutaali iyulu. (Utandiko 1:1, 2) Aekwi kuno iyulu lyafumile? Uwaumvile iyulu u wali nu kutandikilapo ukuyako. Nupya akuno wali lino kutatala kwaya iviumbwa ivicenjele, wa Mwana wakwe uwavyalwa wenga sile na ya malaika. (Yobo 38:4, 7; Kolose 1:15) Fwandi u waliko wenga sile pa kutandika. Ataali nu kuumbwa; kutali icili consi icali nu kumuumba.

Ukuyapo kwitu ni vintu vyonsi ivyaya umwi yulu, uusininkizyo wakuti kwaya Leza uwa manda pe. Uwalenzile ukuti ivintu ivyaya umwi yulu vyazinguluka, uwisileko na masunde aakuti vyalondela, afwile akuno wali lyonsi. Aliwe wapeezile umi uku vintu vyonsi ivyasyala.—Yobo 33:4.