Shu yaya paihua churira canzhis huatara charijta nin: “Ashca ashca timpuuna huashama, Dios Allpara, tucui Allpai tiaj cosasgunara rurashca. Shinallara indira, quillara, estrellagunaras rurarca”. Cai huahua iyarisha saquirin shu ratu, shinajpi tapun: “Yaya... ¿pita Diosta rurashca?”.

“Mana pis” yaya cutipan, “Dios huiñaimanda causashca”. Cuna, cai ahualla cutipashca cai huahuara cushi saquichin. Shinajpi iñasha catiushcai caimanda chara yachana munan. Shinzhi an intindingaj imarasha maican mana callarinara charica. “¿Imasnara chi pasashca? Tucui ña callarina tiaca”. Chara tapurisha an: “¿maimanda Dios shamuca?”.

Biblia ¿imara nin? Ñaupa yaya rimashca cuintallara intindichin. Moisés Jehovara nica: “Urcuuna manara tiashcallaira, allpara, sumaj muyura cuj allparas can manara rurashcallaira, unai timpumanda huiñai huiñaigama, can Dios angui” (Salmo 90:1, 2). Profeta Isaías shina cuintallara nica: “¿Mana yachashcanguichu? ¿mana uyashcanguichu? Jehová tucui allpara Ruraj huiñaigama Diosmi an” (Isaías 40:28). Judas carta ricsichin Dios ña tiashcara ñaupa timpumanda “huiñai huiñaigamas” (Judas 25).

Cai versiculoguna ricuchinun Dios ‘huiñaigama causaj Rey apu’ ashcara, imasna apóstol Pablo nishca cuinta (1 Timoteo 1:17). Tucui timpui tiashca, timpura huashama tigrachijpis. Tucui huras tiangami (Ricuchina [Apocalipsis] 1:8). Dios callarinara tucurinaras mana charinzhu, chimi an pai shina ashca.

¿Imarasha shinzhi an chi iyaira alira intindingaj? Ñucanchi causai mana suni an, shinajpi timpura ricunchi shuj tunu mana Jehová cuinta. Shu ejemplo, paihuaj shu huaranga huatauna shu punzha cuinta an, tucui hurasmanda tiashca (2 Pedro 3:8). Ricushun shu ejemplora: shu rucu iji causan 50 punzhauna. Shinajpi ¿pai intindinzhu 70, 80 huatauna causanara, ñucanchi cuinta? ¡Shinzhi an intindingaj! Chi ijiuna cuinta anchi tucui Rurajhua pariju cuinta ricurisha. Ñucanchi iyaiguna mana pai cuinta an (Isaías 40:22; 55:8, 9). Alimi an mana intindisha imasna Jehová ajta.

Imasna huiñai tiaj Diosmanda intindingaj shinzhi ajpis, chibi quirina ushanchi. Maican Diosta rurashca ajpi, chi Ruraj anmaca. Shinajpis Biblia ricuchin Jehovami tucui cosasgunara rurashca (Apocalipsis 4:11). Shinallara ñucanchi yachanchi shu timpu mana ahua pachas, Allpas tiacachu (Génesis 1:1, 2). ¿Imasnara ricurica? Shu ruraj ñaupa timpumanda ña tiashcanga. Shinajpi ña tiashcamanga ñaupamanda mana pis tiajllaira imasna paihua punda Churi angelguna cuinta (Job 38:4, 7; Colosenses 1:15). Alira intindichin manara tucuira rurashcallaira Yaya Dios pailla tiaca. Pai mana pis rurashca ashcanga, mana imas mana pihuas tiacachu paimanda chican.

Ñucanchi causashcamandas ahua pacharas Allparas rurashcamandas ricuchin imasna huiñaigama Yaya Dios causashcara. Ahua pachara Allparas cuyuchij, leygunaras churaj caita cuirangahua, unaimanda causashca anga. Shinallara pailla causaira cuna ushaca tucui causajcunara (Job 33:4).