Huk taytam qanchis watayoq warmachanman nin: “Unay-unay ñawpaq watapiraqmi Diosqa unancharqa kay Pachata chaynataq chaypi tukuy imakunatapas. Paymi unancharqa Intita, Killata chaynataq lucerokunatapas”, nispa. Warmachanñataq upallalla uyarayasqanmanta nin: “Papay, ¿pitaq Diostaqa unancharqa?”, nispa.

Taytanñataq contestanpan nin: “Diostaqa manam pipas unancharqachu, payqa karqañam”, nispa. Chayna nisqanwanmi warmachaqa manaña imatapas tapunñachu. Ichaqa wiñasqanman hinam warmachaqa yachayta munan Dios imayna rikurimusqanmanta. Chaymi sonqonpi kaynata piensan: “Imaynamá universo nisqankupi otaq hanaq pachapipas kay Pachapipas lliw kaqkuna unanchasqa kaptinqa Diosqa kikillanmanta rikurimurqa. ¿Pitaq Diostaqa unancharqa?”, nispa.

¿Imanintaq Bibliaqa? Chay warmachapa taytanpa nisqan kaqllatam nin. Moisesmi Jehova Diosta mañakuspan nirqa: ‘Orqokunata manaraqpas rikurichichkaspaykim, allpa pachata manaraqpas rikurichichkaspaykim, tukuy imanta manaraqpas rikurichichkaspaykim wiña-wiñaypaq qamqariki Diosllapuni kanki’, nispa (Salmo 90:1, 2). Diosmanta willakuq Isaiaspas nirqam: “¿Manachum qamkunaqa yacharqankichik? ¿Manachum qamkunaqa uyarirqankichik? Tayta Diosmi wiña-wiñaypaq kawsaq Diosqa. Tayta Diosmi enteron kay pacha unanchaqqa”, nispa (Isaias 40:28). Jesuspa wawqen Judaspas qellqasqanpim nirqa Diosqa ‘wiña-wiñaypaq’ kasqanmanta (Judas 25).

Chay textokunam apostol Pablopa nisqanman hina qawachiwanchik Jehova Diosqa “wiña-wiñaypaq” kamachiq kasqanta (1 Timoteo 1:17). Payqa wiña-wiñaypaq kawsaq kasqanraykum imayna rikurisqanmantaqa hayka watayoq kaspanchikpas mana entiendeyta atinchikchu (Apocalipsis 1:8). Diosqa wiñaypaq kawsaq kasqanwanmi reqsichikun.

¿Imanasqataq chayna kasqanta mana entiendeyta atinchikchu? Pisi tiempolla kawsaq kasqanchikraykum mana entiendenchikchu Jehova Dios wiña-wiñaypaq kawsaq kasqanmanta. Chaymi paypaqqa waranqa watapas huk punchaw hinalla (2 Pedro 3:8). Astawan entiendenapaq kay rikchanachiyta qawasun. Huk chillikucham kawsan 50 punchawllata. Chay urucha, ¿entiendenmanchu runaqa 70 otaq 80 watakuna kawsasqanmanta? Manachusmi aw, Bibliapim runakunata Jehova Dios tupachiwanchik chilliku hinalla kasqanchikwan. Chaymi runapa piensasqanqa mana haypanchu Diospa piensasqanwanqa (Isaias 40:22; 55:8, 9). Chaywanmi cuenta qokunchik Diosqa wiñaypaq kasqanmanta mana entiendey atisqanchikta.

Wiña-wiñaypaq kawsaq kasqanta sasata entiendespanchikpas cuentatam qokunchik chayna kasqanmanta. Pipas Diosta unanchaq kaspanqa paychá tukuy imata unanchaq kanman. Ichaqa Bibliam willawanchik tukuy imata Jehova Dios unanchasqanmanta (Apocalipsis 4:11). Chaymantapas yachanchikmi hanaq pachapi kaqkuna chaynata kay Pachapi kaqkunapas qallariypiqa manaraq kasqanmanta (Genesis 1:1, 2). ¿Imaynataq chaykunaqa rikurimurqa? Unanchaqnin kaptinmi. Jehova Diosqa karqañam Churin Jesusmanta chaynataq angelkunamantapas ñawpaqtaraq (Job 38:4, 7; Colosenses 1:15). Diosqa imatapas manaraq unanchaspanqa sapallanmi karqa. Payqa manam unanchasqachu karqa, paymanta ñawpaqtaqa manam pipas nitaq imapas karqaraqchu.

Cielopipas kay pachapipas tukuy ima kasqanmi qawachiwanchik Diosqa wiñay-wiñaypaq kasqanta. Tukuy imam ordenninpi sumaq ruwasqa kachkan, kay pachapi kawsaqkunapas sumaq ruwasqam kachkan; chaykunataqa unancharqa wiña-wiñaypaq kawsakuqmi (Job 33:4).