Toib buñguieeu raibybu xiimbu ni nap gatz íz: «Ma godudy xidal, per xidal íz, Dios bisaʼ Gudxlio né guirá cós ni noʼ loni né láaca bisaʼbu Govitz, Beʼo né vitzón». Nidxiyen reʼ rony pensary tipratien né ranabdiitzbu: «Pa... ¿chú bisaʼ a Dios?».

Bixiosbu raiby láabu: «Ni toib buñ. Dios maca noʼbu». Xiingaʼnbu ma diti rony stipnés galrranabdiitz, ma riaʼanbu conforma. Per laʼga caniʼsbu nainy láabu ganbu chú bisaʼ a Dios, rasac naganbu guiembu que diti noʼ chú bisaʼ a Dios. Ronybu pensary: «¿Ximod labúu gacni scú? Dada guirá ni noʼ lainy guibá né ni noʼ ló Gudxlio goyoʼ ni bisaʼ láani». Diti noʼ chú ma cuapy galrranabdiitz reʼ: ¿chú bisaʼ a Dios?.

¿Xí ná la Biblia? Modca goniʼ bixios nidxiyen reʼ ni ma bisetlano. Moisés gochbu Jehová: «Dzú yása nasaʼlo dainy, o nasaló nasaʼlo gudxlio né layoo ni radudy xcaa, desde tipzó né dada por tipzó, looy ngú Dios» (Salmo 90:​1, 2). Profeta Isaías láaca moda scúca goni’: «¿Xí diti ma nanlo la? ¿Xí diti ma bicadiaglo la? Jehová, ni Bisaʼ guidopynac gudxlio, nacbu toib Dios ni nabany por tipzó» (Isaías 40:​28). Né carta de Judas raniʼ que Dios «nabany por tipzó» (Judas 25).

Versículos reʼ raslooyni lóono que Dios nac «Rey por tipzó», xomod goniʼ apóstol Pablo láani (1 Timoteo 1:17). Ná guisetnaladxno guirá íz ni ma godudy, Dios maca noʼbu. Né dipa saitybu (Apocalipsis 1:8). Desde tipzó de desde por tipzó Dios maca noʼ; por ngú diti noʼ toib ni rigaʼl a Dios.

¿Xigony rasac naganno guienno ndeʼ? Portín lóono rabanyno tidxósi tiemp, por ngú diti rabiʼno tiemp xomod rabiʼ Jehová láani. Por ejemplo, par láabu tipmil íz nacni toibsi dzú, portín láabu maca noʼbu (2 Pedro 3:8). Guienno láani modreʼ. Xomod toib goxar rabany 50 dzú. ¿Labúu ñenyimu xí radudy diitz guibany buñ midid 70 u 80 íz la? Nagan par guienyimu láani, scúca lóono nacno xomod goxar órni rac compararno Jehová, ni Bisaʼ guirá ni noʼ. Diti noʼ chú rigaʼl xpensary Jehová (Isaías 40:22; 55:8, 9). Por ngú, wal diti rientzaayno guirá ni rony Jehová.

Ná rasac naganno guienno que Jehová noʼbu por tipzó, labúu guienno que scú nacni. Pal ñoʼ toib buñ ni nasaʼ a Dios, buñcu nadxin ñac ni Bisaʼ guirá cós ni noʼ. Per la Biblia ná que Jehová ngú ni bisaʼ guirá cós ni noʼ (Apocalipsis 4:11). Láaca lóono nanno que goyoʼ toib tiemp que Gudxlio né guibá diti goyoʼni (Génesis 1:​1, 2). ¿Ximod goyoʼni? Portín ni Bisaʼ láani maca noʼ. Láaca nír goyoʼbu antes que stipnés, xomod xiimbu né ángeles (Job 38:​4, 7; Colosenses 1:15). Riendxichno que antes ni nasaʼ Jehová guirá cós ni noʼ, goyoʼbu toibbu. Diti goyoʼ ni bisaʼ láabu, portín antes de láabu diti goyoʼ ni toib buñ.

Ni lóono nabanyno né guirá ni noʼ lainy guibá né ni noʼ ló Gudxlio nacni toib prueby que noʼ toib Dios ni nabany por tipzó. Dios ni bisaʼ guibá né Gudxlio né ni bisaʼ toib ley ni rony mandary guirá ni noʼ, maca noʼbu por tipzó. Nosi láabu bidudybu vida a guirá ni nabany (Job 33:4).