Ka ichiko iti e weche ma a e pinje koni gi kocha, nyaka bed ni iseneno kaka ji timo gik maricho gi nying din. Nyasaye mar adier ne ok ochako dinde duto manie piny. (Mathayo7:15) Adiera en ni ji mang’eny osewuond.—Som 1 Johana 5:19.

Kata kamano, Nyasaye mor gi joma ohero gik mabeyo kendo mohero adiera. (Johana 4:23) Nyasaye dwaro ni joma kamago opuonjre adiera kokalo kuom Muma.—Som 1 Timotheo 2:3-5.

Jehova Nyasaye miyo joma ne nie dinde mopogore opogore bedo e winjruok achiel kuom puonjogi adiera kendo puonjogi mondo giherre ng’ato gi ng’ato. (Mika 4:2, 3) Omiyo, inyalo fwenyo joma nie din madier kuom neno kaka gitimo ne jowetegi.—Som Johana 13:35.

Yie ma joma lamo Nyasaye gadier nigo kod timbegi otenore kuom Muma. (2 Timotheo 3:16) Bende, gimiyo nying Nyasaye luor. (Zaburi 83:18) E wi mano, gilando Pinyruoth Nyasaye ni e geno mar adier ne dhano duto. (Daniel 2:44) Giluwo ranyisi mar Yesu kuom weyo mondo ‘ler margi orieny’ kendo kuom timo gik mabeyo ne jowetegi. (Mathayo 5:16) Omiyo, Jokristo madier ifwenyo gi chenro ma gin-go mar limo ji e mier mondo ginyisgi wach maber mar Pinyruodh Nyasaye.—Som Mathayo 24:14; Tich Joote 5:42; 20:20.