Sel morrenges a chais er a beluulechad e nglocha sebechem el mtebengii el kmo a lebebil er a taem e a mekngit el omeruul a meketmokl el klechelid a uchul. Me ngdiak el rokui el klechelid a mla er a Dios el mei. (Mateus 7:15) Me ngmera el tekoi, a rebetok el chad a mla mecheblad er a Satan.​—Monguiu er a 1 Johanes 5:19.

Me nguaisei, engdi a Dios a sebechel el omes er a remelemalt a rengrir el chad el tir a sorir a llemalt me a klemerang. (Johanes 4:23) Ngmengemedaol er tir el mo mesuub a klemerang el ngar er a Tekingel el Biblia.​—Monguiu er a 1 Timothy 2:3-5.

A Jehovah el Dios a oldak er a rechad el mle chedal a betok el kakerous el klechelid el okiu sel lolisechakl er tir er a klemerang me a rolel a bo lekaubltikerreng er a delongelir. (Mika 4:2, 3) Me ngsebechem el dongcheterir tirke el ngar er a mera el klechelid el okiu a rolel a lekaukerreu.​—Monguiu er a Johanes 13:35.

A rokui el tekoi el loumerang a mengai a uchetemel er a Biblia e te melasem el oltirakl a osisecheklel er a chelsel a klengar er tir. (2 Timothy 3:16) Te mengebkall er a ngklel a Dios. (Psalm 83:18) * Te dirrek el oumerang el kmo a Rengedel a Dios a di ta el tekoi el mo sumechokl a mondai er a klechad. (Daniel 2:44) Te oukerebai er a Jesus “el dmiich er mederir a rokui,” el oeak sel loruul a ungil el mo er a retonari er tir. (Mateus 5:16) Me ngdirrek el sebechem el dongcheterir a remera el Kristiano e le te merael el oldingel er a retonari er tir el ouchais er a ungil chais el kirel a Rengedel a Dios.​—Monguiu er a Mateus 24:14; Rellir 5:42; 20:20.