1. Ka uagu maweiridun tubéi hanigi lubúeingu Bungiu luagu mosu lan hásügürün lénrengunga?

 WÉIRITU san hanigi lau hasubudiruni mosu lan hásügürün lubúeingu Bungiu lídangiñe ‘saragu asufuriruni’ lubá hibihini afayeiruahaü lánina ibagari magumuchaditi? Uá, háfuga subudi humaali ítara luba lan. Dandu anhein málügili lubéi hasubudiruni inarüni o lǘhadün lan lidan, subudi humuti anihein lan lénrengunga luma asufuriruni lidan ibagari lidan ubóu le lábugiñebei lubafu Satanási (Aruf. 12:12).

2. a) Amu luéi sun turóbuli le hasufurirubei sun gürigia, ka óuchawaguni hasufurirubei kristiánugu? (Ariha huméi dibuhu le lídanbei lagumeseha arütíkulu.) b) Ka san lanagangiñebei sun éibaahouni le hasufurirubei kristiánugu, ani ida liña wasubudiruni?

² Bóugudin luéi “óuchawaguni” le hasufurirubei sun gürigia gafigountiña, wagía kristiánugu inarünitiña gagibuguatiwa luma ábanya óuchawaguni (1 Ko. 10:13). Ka san luwuyeri? Lanarime éibaahouni le wasufurirubei ladüga gaganbadi wamá lun lilurudun Bungiu lau úaraguni. Ariñagati Hesusu houn lani disipulugu: “Úati musu íñuguti luéi liyubudiri. Anhein éibaaha hamaadina lubéi, héibaahabadün giñe” (Huan 15:20). Katei san lanagangiñebei éibaahouni ligía? Satanási, le uágubei tariñaga Bíbülia ítara liña lan kei aban “liñún gáñiti” le áluahabei ‘lagünrinchaguniña’ lubúeingu  Bungiu (1 Fe. 5:8). Keisi liñún, yúsuti furumiñeguarügü katei lun ladügün lun wachararun lun Bungiu. Ariha waméi le asuseredubei lun apostolu Pábulu.

3-5. a) Ka éibaahouni lasufurirubei Pábulu Lístüra? b) Ida liña meha san líchugun Pábulu erei houn disipulugu lau uganu luagu anite lan lanwoun asufuriruni?

³ Éibaahouati Pábulu saragu wéiyaasu ladüga lafiñen (2 Ko. 11:23-27). Aban lídangiñe éibaahouni ligía súfuri lumuti uburugu Lístüra. Lárigiñebei lareidaguagüdüni aban wügüri le nasiruabei lau danimaü, aba meha hagumeserun gürigia íchiga uéiriguni lun Pábulu luma lun Berünawé, le lumada, kamá hamuga búngiugu. Mosu meha hamuriahan hama lun máhuduragun hamá houn! Gama lumoun, aba hachülürün fiú huríu ha ayanuhabaña iyeeni lun hagarabaagun gürigia luagun Pábulu luma luagun Berünawé. Ma loufun lasansiragun katei! Aba hachamuragun gürigia hagía dübü luagun Pábulu ítagaraü yebe lounwen (Adü. 14:8-19).

⁴ Lárigiñebei lidin Pábulu luma Berünawé Dérübe, “aba hagiribudun; aba houdin Lístüra, Ikoniu luma Antiokía. Rútiña gurasu houn afiñetiña ha lídanbaña burí fulasu ligía, ariñaga hagía houn lun hasigirun deregüdagu lidan hafiñen, ariñageina hagía houn luagu lunti lan wasufurirun saragu lun gayara lan webelurun lidoun larúeihan Bungiu” (Adü. 14:21, 22). Dan le waliihani dimurei burí le, gayarati amu lan warihini, lugundun dan le waliihan mosu lan “wasufurirun saragu” míchuti gurasu woun. Ida liñati líchugun Pábulu luma Berünawé dǘgüdaguaü houn disipulugu lau aban awisahani luagu anite lan lanwoun asufuriruni?

⁵ Lun gunfuranda wamani, akutiha waméi dimurei burí le lariñagubei Pábulu buidu. Mama ariñagarügüti: “Mosu wawandun saragu asufuriruni”. Ariñagati “lunti lan wasufurirun saragu lun gayara lan webelurun lidoun larúeihan Bungiu”. Ruti lubeiti Pábulu erei houn disipulugu lau lafuranguagüdüni kaba lan hibiha ánhaña awanda. Ani mama meha aban uénedü afayeiruahaü le lunbei habihini. Ariñagaali meha Hesusu: “Le áfaaguti darí lumoun lagumuhóun, ligíaba asalbara” (Mat. 10:22).

6. Kaba afayeiruahaü hibiha ha awandutiña darí lumoun lagumuhóun?

⁶ Ánhawa awanda, wibihiba aban afayeiruahaü. Kristiánugu anuadirúaaña hawinwanduba sielu lun harúeihan úara luma Hesusu ani móunwedadihaañame. Ánhañati “amu mudún”, hibihiba ibagari magumuchaditi ubouagu lidan ‘richaguaü’ (Huan 10:16; 2 Fe. 3:13). Gama lumoun, ariñagati Pábulu wasufuriruba lan saragu lubaragiñe lachülürün dan ligía. Akutiha wamá biama luwuyeri lénrengunga le úmabei hagagibudagua kristiánugu.

7. Ka burí lénrengunga gayarabei wariñagun furangu lan?

⁷ Ariñagati meha Hesusu: “Hederegerúaba lun lúrudu, ábame habuleseirunün tidan burí haligilisin huríu; hanügǘba lun haguseragüdüniwa hagibugiñe gumadimatiña luma hagibugiñe urúeigu” (Mar. 13:9). Kei larufuduni dimurei burí le, héibaahouba fiú kristiánugu, ladüga háfuga híchuguba lábutigu polítika luma relihión lúrudu lun héibaahoun (Adü. 5:27, 28). Saminaya wamá luagun lani Pábulu hénpulu. Aba san lanufudedagun dan le lasaminarun luagu gayara lan léibaahoun ítara? Uá (aliiha huméi Adügaü 20:22, 23).

8, 9. a) Ida liña meha larufuduni Pábulu luagu desidírühali lan lawandun éibaahouni? b) Ida liña harufuduni fiú kristiánugu ligiaméme igaburi uguñe weyu?

⁸ Ganigiti meha Pábulu ani aba lararamun lun lagayuahan Satanási. Ariñagati: “Ni nibagari guánarügü, mebegiti ni kata nun, adügarügü naali ligía le uágubei lóunahana [Nabureme Hesukrístu, TNM] lau ugundani darí lumoun lagumuhóun, lun nadimurehani uganu buiti luáguti línsiñehabu  Bungiu” (Adü. 20:24). Furanguti manufudeti lan meha Pábulu luéi léibaahoun. Aranseñu liña meha lun lawandun. Meberesenga kaba lan asusereda saminati meha Pábulu “[l]adimurehani uganu buiti”.

⁹ Uguñe weyu, gíbetiña íbirigu arufuduti ligiaméme igaburi. Kei hénpulu, añahein fiú íbirigu lidan aban ageiraü barühaña yarafa lun wein irumu furisunrugu ladüga mádaragun hamá houngua lidoun polítika. Manügǘnwagili hakesin ligibugiñoun lúrudu ladüga lidan lilurudun ageiraü ligía mebegiti bariñagun luagu mígirun lániña hasaminan lun hadügüni. Migirúnwagiña ni lun houdin haduheñu arihaña, ani fiú hádangiñe buleseiwatiña ani súfuri hagía lidan amu burí igaburi.

10. Ka uagu moun lumuti lubéi wanufudedun luéi wasufurirun éibaahouni sódini?

¹⁰ Lidan amu burí fulasu, súfuritiña wíbirigu éibaahouni le sódiniti. Ánhadün agagibudagua luma somu óuchawaguni sódini, manufudeda humá. Samina humá luagun Hosé. Alugurúati idamunime, gama lumoun “aba lesefuruni [Heowá] lídangiñe sun lidiheri” (Adü. 7:9, 10). Gayarati giñe ladügüni Heowá ligiaméme huagu. Maweiyasun humá abulieidei “salba lumutiña [lan] Bungiu ha deregeguabaña houngua lun luéi óuchawaguni” (2 Fe. 2:9). Gíbeti resun wama lun wafiñerun luagu Bungiu luma lun wagagibudagun luma éibaahouni lau ganigi. Subudi wamuti gayarabei lan lesefuruniwa lídangiñe ubóu wuribati le ani ígira ligíame lun wawinwandun lun súnwandan lábugiñe Larúeihan (1 Fe. 5:8, 9).

11. Ida liña amu lan aban éibaahouni le furanguti luéi le aramudaguarügüti?

¹¹ Gayarati giñe wasufurirun éibaahouni le aramudaguarügüti. Ka idan amu lan luwuyeri éibaahouni le luéi le furangubei? Éibaahouni le furanguti ítara liña kei aban hiriri le ñǘbuinti sódini ani gayarati lagünrinchagun aban muna lidan murusun oura. Ánheinti éibaahouni aramudaguarügüti, ítara liña kei hamutiri ha éigibalin tufulansun aban muna murusun murusun darí lun tábürühan muna. Gayarati míchugun humá fe luagu darí dan le létihali.

12. a) Ka san aban sádara aramudaguarügütu layusuruboun Satanási? b) Ka uagu tíchiga sádara tuguya buiti resultóu lun? c) Ka meha san uagu leferidirei Pábulu luguraasun?

¹² Hínsiñeti hamuga lun Satanási lun lagumuchun lau wamadagua luma Heowá, dandu lau éibaahouni le furanguti o lau ladügün lun edebilideina lan wafiñen lau éibaahouni le aramudaguarügüti. Maguraasuni aban lídangiñe katei aramudaguarügüti le íchugubei buiti resultóu lun. Ariñagati meha apostolu Pábulu anihein lan dan leferidiruni luguraasun (aliiha huméi Rómana 7:21-24). Ka meha san uagu lariñaga Pábulu luougua “fugiabu” lau sun aban lan meha wügüri wéiriti lafiñen ani háfuga hádanñein lan meha ha alidihabalin damuriguaü lidan furumiñeti sígulu? Ariñagati meha sandigua lan lungua ítara ladüga figóu le lídanbei: busenti meha ladügüni le buídubei, gama lumoun anihein meha amu erei le ádahabalin lun ladügün amu katei. Anhein anihein lubéi dan háfaagun kóntüra maguraasuni, ma ruti gurasu hun hasubudiruni íbini lan meha Pábulu susereti ligiaméme lun?

13, 14. a) Ka san uagu heferidirei fiú lubúeingu Bungiu haguraasun? b) Ka busenbei lun weferidiruni wafiñen, ani ka uagu?

¹³ Añahein saragu íbirigu chülüti oura lun heferidiruni haguraasun luma lun hasandirun íruni. Kei hénpulu, ariñagatu aban prekursora gíritu Débora: “Súnwandan nerederun asaminara luagun somu charati le nadügübei ani eibu dan wuribatimati nasandiragun nungua. Dan le nasaminarun luagun sun katei wuribati le nadügübei, genegeti nun úati lan lunti lasandirun ínsiñeni nuagu, ni Heowá”.

¹⁴ Ka san uagu heferidirei fiú lubúeingu Heowá ha úaraguatiña, kéiburi Débora, haguraasun? Luagu saragu resun. Añahein  fiú héchutiña asaminara wuriba hawougua luma luagu gádantiña (Ari. 15:15). Añahein amu saminatiña wuriba hawouguoun ladüga somu sandi le adügüti lun hasandiragun houngua ítara. Anhein anihein lubéi maguraasuni huagu ladüga somu turóbuli, haritagua huméi katei lan busenbei layusuruni luriban saminaü le huágubei. Ka funa san busenbei lun hasandiragun hungua memeniginga kei ligía? (Aruf. 20:10.) Ka san busenbei lun labuchadun huagu? Furanguti Satanási lan. Dandu lau éibaahouni le furanguti kei lau le aramudaguati, busenti lasufuriragüdüniwa, lun weferidiruni waguraasun ani lun masigirun wamá wabaruaguóun. Mabulieida huméi lídanñanu lan aban wuribu lumutuniña Bungiu kóntüra sífirigu.

15. Ka lunbei desidírü wamá wadügüni?

¹⁵ Mígira waméi wáfaagun. Samina humá luagun afayeiruahaü súnwandan. Abürühati Pábulu houn kristiánugu korintuna: “Ligía mábürühan lubéi warüna. Labu sun agumuchagueina liña lan wágubu murusun murusun; iseridagueina waña múnadagiñe wabiti sagü weyu. Le wasufurirubei lidan ibagari le mahürüti ani fureseti lásügürün, gama lumoun uéiriguni le magumuchaditi lanügübei woun; wéiriti ani gíbetimati” (2 Ko. 4:16, 17).

16. Ka uagu súdini lubéi waranserun guentó lubá lénrengunga le gayarabei liabin ámuñegü?

¹⁶ Kei aubei warihei, gíbeti ‘iyeeni’ luma Mafia (Efe. 6:11). Kada aban wádangiñe lunti waritaguni adundehani le lídanbei 1 Féduru 5:9: “Mígiraguagüda humá hungua lun; deregüdagu humá lidan hafiñen”. Lun wadügüni ítara, mosu waranseruni wasaminan tuma wanigi guentó, ítara luba aranseñu wamá lun wadügüni le buídubei. Gíbeti ehersísiu hadügün súdara saragu dan lubaragiñe houdin awuribuha. Ligía giñe lunbei wadügüni. Ibidiñeti woun kaba burí lan wuribu wageindagua ámuñegü. Ma  lunti waranserun buidu guentó lau anihagua lan murusun darangilaü? Abürühati Pábulu houn korintuna lau lídehan Bungiu: “Aríagua humá hungua anhein derebuguñu hiña lubéi lidan hafiñen; hóuchagua humá hungua” (2 Ko. 13:5).

17-19. a) Ida liña gayara lan wóuchagun woungua? b) Ida liña gayara lan haranserun nibureintiña lun hóunabun luagu hafiñen leskuelarugu?

¹⁷ Lun wóuchagun woungua kei lariñagun Pábulu, mosu wálügüdagun woungua: “Furíeitina san sun dan? Ayanuhatina san luagu nafiñen? Gaganbaditina san lun Bungiu sügǘ lau houn wügüriña dan le lidan nan óuchawaguni? Hádangiñetina san ha ñǘdünbaña adamuridagua súnwandan? Gaguraasuntina san lun nawanduni hachara níbirigu, ítara kei gaguraasun hamá nubá? Falá numuti san hadundehan wéiyaaña lidan afiñeni ha lídanbaña damuriguaü luma hadundehan ha arihibaña lau sun damuriguaü lidan sun ubóu?”.

¹⁸ Ariha huméi luagu layanuhaña lan bián lídangiñe álügüdahani le luagu wóunabun luagu wafiñen lau ganigi luma lun mígiraguagüdün wamá woungua dan le héredun amu wawagu. Saragu nibureintiña mosu hadügüni katei le leskuelarugu. Furendeihaña lun manufudedun hamá ani masandirun hagíame busiganu luagu hafiñen, ani ligía hapurichihanbei lau ganigi. Furihali adundehani le huuti tidan burí wani garüdia. Kéiburi tidan ¡Despertad! to lánina sedü-hati irumu 2009 rúati adundehani luagu anhein lan ñüdün lani aban nibureinti paaná leskuelarugu álügüdei: “Ka san uagu mafiñen bubéi luagu ewolusión?”, gayarati lóunabun: “Kaba hamugagia uagu nafiñera luagu? Ni aturiahatiña siensia múaranti hasaminan luagu katei le, ani hagía nege sásaamubaña”. Agübürigu, asayaha huméi hama hisaanigu kaba lan hóunaba danme le ladügǘn álügüdahani burí libe le houn.

¹⁹ Furanguti mama lan sun dan lun ménrengunbei lan wóunabun luagu lufulesein inarüni o wadügün amu burí katei le lamuriahabei Heowá wama. Lárigiñe wawadigimaridun sun weyu, háfuga fósuguarügadiwa woungua lun woudin adamuridagua. Ani lun wáfuridun apurichiha binaafin, háfuga mosu wáfaagun lun wiñuragun tuéi gabana. Gama lumoun, haritagua humá: ánhawa áyeiha lubuidun igaburi guentó lidan weseriwidun, aransetimabadiwa lun wararamun lun óuchawaguni le wéinamutimati ámuñegü.

20, 21. a) Ka uagu seriwi lubéi wasaminarun luagu lebegi asalbaruni lun wiñuragun lídangiñe maguraasuni? b) Ka lunbei desidírü wamá wadügüni?

²⁰ Agia óuchawaguni le úati furangu lan? Kei hénpulu, ida luba méiguadun wamá lidoun maguraasuni? Líderagubadiwa wasaminarun luagun lebegi asalbaruni. Ligía meha ladügübei Pábulu. Anihein burí meha dan lasandiragun lungua wuriba ladüga gafigoun lan, gama lumoun, subudi lumuti meha mounwen lan Kristu hawagu gürigia mafigountiña, hawagu gafigountiña lounwen. Ligía labürühanbei: “Ibagari le nabagaridubei lidan núgubu, nabagariduñein lau sun nafiñen luagu Liráü Bungiu le hínsiñehabubei nun, aba lederegeragun lungua lun lounwen nuagu” (Gal. 2:20). Afiñeti Pábulu luagu lebegi asalbaruni ani afiñeti meha luagu sefu lani.

²¹ Anhein wariha lebegi asalbaruni kei aban idewesei le líchugubei Heowá lun kada aban wádangiñe, líderagubadiwa saragu. Úati mini lan lira luagu lagidaruba lan maguraasuni wawéi sunsuinagubei. Saragu wádangiñe háfuga mósume wageindagun luma katei le darime lachülürün iseri ubóu. Gama lumoun, mabuchadalá huagu! Haritagua huméi luagu hibihibei lan ha awandutiña darí lumoun lagumuhóun afayeiruahaü. Eibu dan yarafatimahadiwa lun luéyuri lanügüni Larúeihan Bungiu darangilaü ani íderagua láñame gürigia lun mafigoun hamá. Desidírü humá lun hebelurun lidoun Larúeihan Bungiu íbini mosu lan hasufurirun saragu.