1. ¿Jamüsü nnojotka ponuin paaʼin weʼrüinjanain wamüliala?

NNOJOTSÜ ponuin paaʼin weʼrüinjanain wamüliala süpülapünaa wasaʼwatüin tü kataakalü oʼuu waneepia. Jaʼitaichi jekechin jee kakaliaichin pia sünain anoujaa, pütüjaa aaʼu weʼrüin wamüliala süka niain Satanaa aluwataain saaʼu tü Mmakat (Alat. Map. 12:12).

2. (1) ¿Jarat tü wanee kasa weʼrakalü anainjee wamüliala? (Piirakaa sümüin tü ayaakuaakat.) (2) ¿Jarai chi weʼrakai atuma wamüliala? ¿Jamüsü watüjaaka saaʼu tia?

² Nnojotsü alatüin neʼe wamüin tü kasa mojusü alatakat sümüin wayuu maʼleekalia, weʼrüin wamüliala sutuma wanee kasayaa (1 Cor. 10:13). ¿Jarat shia? Weʼrüin wamüliala sünainjee waaʼinrüin tü nümakat wamüin Maleiwa. «‹Wane wayuu eekai achepchieein, nnojoishi alanaain nuulia chi kachepchiakai›. [...] Je maa aka eein wayuu eekai niʼrüin wayümüin tamüin, akaweenia jiakana atümaʼaya», müshi Jesuu namüin na nikirajüinkana (Juan 15:20). ¿Jarai chi weʼrakai atuma wamüliala? Nia Satanaa. Saashin tü Wiwüliakat, müshi nia maʼaka naaʼin wanee wasashi shiiʼiree nikajaain na anoujüshiikana (1 Ped. 5:8, NM). Nüchajaain sukuwaʼipa süpüla weʼrüin wayumüin nümüin Jeʼwaa. Anuu tü alatakat nümüin chi aluwataaushikai Pablo.

3-5. (1) Püküja süchiki tü müliaa niʼrakat Pablo chaa Listra. (2) ¿Jamüsü katsüinjatka naaʼin na anoujüshiikana sümaa neʼrüinjanain namüliala naashin Pablo?

³ Kojuyatua niʼrüin Pablo nümüliala sünainjee nunoujüin (2 Cor. 11:23-27). Jamüshijaʼa wanaa sümaa chajachin nia nümaa Bernabé chaa Listra, naʼwaajeein nia na wayuukana sutuma niiyajüin wanee wayuu masaʼasai. Nüküjakalaka Pablo mojushiin namüin tia. Shiasaʼa joo nantapaatakalaka wanee judíoinnua sümaa naʼwanajeʼerüin naaʼin na wayuukana nooʼomüin Pablo nümaa Bernabé. Naʼinaʼatkalaka Pablo süka ipa jee ouktayaashi nia naaʼinruʼu (Aluw. 14:8-19).

⁴ Süchikijee chajachin Pablo nümaa Bernabé chaa Derbe, aleʼejüshii naya nachikuaʼa Listramüin, Iconiomüin jee Antioquíamüin. Nükatsüinrüin Pablo naaʼin na anoujüshiikana süpüla icheinjanain naya sünain anoujaa. Anuu nünüiki namüin: «Eʼrüinjanaʼaya waya wamüliala süpülapünaa wekerolüin suluʼumüin nuluwataaya Maleiwa» (Aluw. 14:21, 22, NM). Müsü nnojotkai saaʼin pansaain tü nümakat Pablo. ¿Jamüsü katsüinjatka naaʼin wanee anoujüshi sutuma niʼrüinjachin nümüliala?

⁵ Süpüla watüjaain saaʼu tia, jülüja waaʼin tü nümakat Pablo. «Wachecherüinjatü waaʼin suʼunnaa weʼrüin wamüliala», nnojoishi müin neʼe nia. «Eʼrüinjanaʼaya waya wamüliala süpülapünaa wekerolüin suluʼumüin nuluwataaya Maleiwa», müshi nia. Tü nüküjeekalü achiki shia jülüjüinjatüin naaʼin na anoujüshiikana tü kasa anasü eejeetkat waneepiale naya nümaa Maleiwa. ¿Jamüsü nnojotka alawaain tia? Süka nümüin paala Jesuu: «Müleka jüchecherüle jaaʼin suʼunnaa tü müliaa jiʼrakat, ayateena jia oʼtteʼennüin tatüma» (Mat. 10:22).

6. ¿Kaseerü aapünaka namüin na achechetkana naaʼin sünain anoujaa?

⁶ Nachecherüle naaʼin na anoujüshii chainjanakana iipünaa, aapüneerü namüin kataa oʼuu süpüla kaʼika süpüshuaʼa jee aluwataajeena naya nümaa Kürisüto. Akaʼaya wayakana, aapüneerü kataa oʼuu waneepia wamüin yaa saaʼu tü Mmakat jee loteerü wakuwaʼipa (Juan 10:16; 2 Ped. 3:13). Süpülapünaa weʼrüin tia, eʼrüinjanaʼaya waya wamüliala. Wekirajaa sünain piamasü kasa weʼraka atuma wamüliala.

7. ¿Jarat tü müliaa jaʼyakat weʼrüin?

⁷ Müshi Jesuu: «Jalia jia, süka jütaʼülinneenain süpüla aapünaa ekii namüin na laülaayuukana je süka jiʼyaatinneenain suluʼu tü ekirajüleekat tü judíokolüirua. [...], ashaʼwaleʼenneena jia namülatuʼu na sülaülashiikana mma ooʼulaka namülatuʼu na aluwataashiikana saaʼu wayuu» (Mar. 13:9). Naashin Jesuu ataʼüninneena na wawalayuukana sümaa naʼyaatünüin natuma na shikiipüʼükana poliitika jee na shikiipüʼükana tü iküleesiakalüirua (Aluw. 5:27, 28). ¿Ayoʼujaasüche naaʼin Pablo sutuma tia? Nnojo. Nüchecherüin naaʼin (paashajeʼera Aluwataaushikana 20:22, 23).

8, 9. (1) ¿Kasa naainjaka Pablo süpüla nüchecherüin naaʼin suʼunnaa tü müliaa niʼrakat? (2) ¿Kasa naainjaka waneeinnua wawalayuu maaʼulu yaa süpüla nashatüin nukuwaʼipa Pablo?

⁸ Yalayalasü naaʼin Pablo jee nnojoishi nia aawalaain sutuma tü müliaa niʼitaakat Satanaa. «Jaʼitakajaʼa ouktüin taya, meemasat tamüin. Müleka shialeje tainküin tekeraajüin tü aʼyatawaa niʼitaakat chi Senyotkai tajapuluʼu sünain taküjain süchikü tü pütchi anasükat nüchikü Maleiwa sünain anamiain nia sümüin wayuu, talateerü taaʼin tekeraajapeena shia», müshi nia (Aluw. 20:24). Nüchecherüin naaʼin Pablo jee meimmoluinsai nia. Jaʼitasü kasain alatüin nümüin, nüküjüinya süchiki tü pütchi anasükat.

⁹ Maaʼulu yaa, wainma wawalayuu  makana akuwaʼipa maʼaka naaʼin Pablo. Suluʼu wanee mma, eetaairü maʼaka piama shikii juya püreesain na wawalayuukana sutuma nnojoliin sünainpünaain naya poliitika. Nnojoishii aikkaleʼennayaain naya süpüla süküjünüin namüin tü aainjünajatkat naka. Nnojoishii kachipünaain naaʼin na aluwataashiikana. Nnojotsü ooʼulaanüin sülatüin wayuu nanainmüin, jaʼitainna neʼe nayain na napüshikana. Eeshii naʼyaajünüle jee müliale naya atumaa süka waneeirua kasa.

10. ¿Jamüshii nnojoliinjanaka mmoluin waya weʼrüle wamüliala sutuma sülatalaʼa sümüin kasa wamüin?

¹⁰ Suluʼu waneeirua mma, eʼrüshii namüliala na wawalayuukana sutuma sülatalaʼa sümüin kasa namüin. Nnojo mmoluin pia sülatalaʼa sümüle kasa pümüin. Jülüja paaʼin tü alatakat nümüin José, oikkünüshi nia süpüla achepchieein chaa Egipto. Niasaʼa Jeʼwaa, «niyuʼlüin nia suulia nümüliala» (Aluw. 7:9, 10). Meeria nutuma Jeʼwaa tü naainjakat püpüleerua. Soto paaʼin «nuuntüin Maleiwa niyuʼlüin waya saʼakajee ooʼulakünaa aaʼin, waya aaʼinrakana tü anasükat» (2 Ped. 2:9). Weʼitaainjatü waaʼin nünain Jeʼwaa otta yalayalainjatü waaʼin wapüleeruaanüle aaʼin. Nükaaliinjeena waya noulia na mojulaashiikana jee kepieena waya waneepia suluʼu tü Nuluwataayakat (1 Ped. 5:8, 9).

11. ¿Kasa maka aka saaʼin tü kasa müliakalü atuma waya, tü weʼrakat jee tü nnojotkat weʼrüin?

¹¹ Eeshii müliale waya sutuma tü kasa nnojotkat weʼrüin. ¿Kasa makaʼa aka saaʼin tia suulia tü kasa weʼrakat? Tü kasa weʼrakat, müsü aka saaʼin wanee waaʼale akumajaajaaka, suʼwalakajeʼerüin motsomüin wanee piichi. Aluʼusaʼa tü kasa nnojotkat weʼrüin, müsü aka saaʼin tü rulumakat, shikajachoin shiʼipaʼaya suuʼui wanee piichi, sujuttira sümüsia shia sajaʼttiraleepa. Nnojotsü weʼrüin rurumain suuʼui wanee piichi, weʼraleein neʼe sujuttapa.

12. (1) ¿Jarat tü wanee kasa niʼitaakat wapüleerua Satanaa? (2) ¿Jamüsü sujutuuka maʼin wayuu suluʼu tia? (3) ¿Jamüsü sümalajaaka naaʼin Pablo?

¹² Nükataleein waya Satanaa nuulia Jeʼwaa. Niʼitaain wapüleerua tü kasa jaʼyakat, maʼaka saaʼin müliain waya atumaa jee nümalajeʼerüin wanoula shiʼipaʼaya sükajee tü kasa nnojotkat weʼrüin. Süpüshi tia, shia sümalajaale waaʼin. Eesü sümalajaapuʼule naaʼin Pablo naashin (paashajeʼera Roma 7:21-25). «Aluʼutaʼaleeshija maʼi taya süchepchiaka taainjala», ¿jamüshi nümaka sümaa anain maʼin nunoula jee niain wanee laülaashi jülüjaka aaʼin na anoujüshiikana? Naashin Pablo, amalajaasü naaʼin sükajee ayatüin naaʼinreein tü kasa mojusükat sümaa naaʼinreein tü kasa anasükat. Sülatüle pümüin tia, nnojo mojuin paaʼin, alatüsia shia nümüin chi aluwataaushikai Pablo.

13, 14. (1) ¿Jamüshii eeka na wawalayuu amalajaakana aaʼin? (2) ¿Jarai chi ooʼuleʼereekai pia suulia anoujaa? ¿Jamüsü keeʼireeka naaʼin tia?

¹³ Wainma wawalayuu amalajaaka aaʼin, shapaaka aaʼin jee nnojoishii kasain anain apüla naya naashin. Anuu sünüiki wanee wawala Débora münüsü, pürekutsoot shia: «Jülüjakuʼu müsü taaʼin tü kasa mojusü taaʼinrakat. Mojushaatasü taaʼin sutuma tia. Sutuma jülüjüin maʼin taaʼin shia, antüsü tekiiruʼumüin nnojoleerüin jaralüin alin apüla taya jee nnojoleerüin alin taya nüpüla Jeʼwaa».

¹⁴ ¿Jamüshii eeka na wawalayuu mojukana maʼin aaʼin maʼaka saaʼin Débora? Eesü shiale sutuma mojuin tü jülüjakat naaʼin nachiki otta süchiki tü nakuwaʼipakat (Prov. 15:15). Eesü shiale sutuma ayuulin naya. Soteesü paaʼin nümalajeʼereein punoula Satanaa sükajee mojuin tü jülüjakat paaʼin püchiki. Shapaweesü paaʼin nutuma maʼaka  shapaain naaʼin sutuma sülüʼülüin nükalia süpüla ataʼünaa (Alat. Map. 20:10). Nuuʼuleʼereein pia suulia anoujaa sükajee sümalajaain paaʼin. Tü keeʼireekat maʼin naaʼin Satanaa sükajee tü kasa niʼitaakat wapüleerua shia shapaainjatüin waaʼin, sümalajaainjatüin waaʼin otta wooʼulaainjanain suulia anoujaa. Nnojotsü motuinjatüin waaʼin eejiraain waya waneepia nümaa.

15. ¿Kasa waaʼinrajatka waneepia?

¹⁵ Ayata püchecherüin paaʼin. Jülüja paaʼin waneepia tü kasa anasü eejeetkat sünainjee. Anuu nünüiki Pablo namüin na anoujüshii chajanakana Corinto: «Nnojoleechi taya ooʼulaain suulia aʼyatawaa nümüin chi Senyotkai. Jaʼitairü ashakajüin sütsüin teʼiruku, shieerü kooʼomüinka tamüin sütsüin taaʼin [...]. Motsomüin neʼe saaʼin tamüin tü müliaa teʼrakat maaʼulu yaa, [...] süka tatüjaain saaʼu sümaa nümaajeechin taya Cristo [...], alanaʼaleejeeria maʼi sünain anasüin shia suulia tü müliaa teʼrapüʼükat» (2 Cor. 4:16, 17).

16. ¿Jamüsü anaka wekettaajüle wakuwaʼipa jooluʼuleʼeya süpülapünaa tü kasa eejiraajeenakalü amaa waya mapeena?

¹⁶ Wainma tü kasa mojusü nüchekakat wapüleerua Satanaa (Éf. 6:11). Jülüjüinjatü maʼin waaʼin waneʼewai wakua tü pütchi sümakat 1 Pedro 5:9: «Anakaja ayatüle jia sünain katsüin jaaʼin sünain anoujaa [...], süpüla nnojolüinjatüin jaaʼinrüin tü nüchekakat jüpüleerua Satanás». Wekettaajüinjatü jooluʼuleʼeya tü kasa weʼitaainjatkat suluʼu waaʼin süpüla waaʼinrüinjatüin tü kasa anasükat. Jamüshiijaʼa na surulaatkana, aainjüshii maʼin ejercicio süpüla kettaajüin naya napüla naʼünüü. Müinjanaʼaya waya. Nnojotsü watüjaain aaʼu kasain eejiraajeenain amaa waya mapeena. Makalaka wekettaajüinjatüin wakuwaʼipa jooluʼuleʼeya nnojoluiwaʼaya kasain alatüin.  Müshi Pablo namüin na anoujüshii chajanakana Corinto: «Anakaja müleka jiyaawatüle saaʼu tü jaaʼinrakat waneʼewaire jukua süpüla jütüjaainjatüin saaʼu müleka shiimüinre sünain jaaʼinrüin tü nüchekakat Cristo jüpüleerua» (2 Cor. 13:5).

17-19. (1) ¿Kasa waaʼinrajatka süpüla watüjaain saaʼu shiimainre wanoujüin? (2) ¿Kasa eeka süpüla naaʼinrüin na tepichikana süpüla nasouktüin saaʼu nanoula suluʼu nakoleejiase?

¹⁷ Süpüla pütüjaain saaʼu shiimainre pünoujüin, püsakirüinjatü paaʼin mayaa: «¿Oʼuraajüshiche taya waneepia? ¿Meimmoluinsaiche taya sünain asouktaa saaʼu tanoula? ¿Niache neʼe Maleiwa toonooka amaa tapüleeruaanüle aaʼin? ¿Motusüche taaʼin naainjala wanee tawala maʼaka motuin naaʼin tü taainjalakat? ¿Taaʼinrüinche tü namakat na laülaashiikana jee tü namakat na oʼunirakana nupueulose Jeʼwaa?».

¹⁸ Saʼakajee tü pütchi wasakireʼerüinjatkalü anain waaʼin, eesü piamasü aashajaaka süchiki meimmoluinjanain waya sünain asouktaa saaʼu wanoula jee woonooinjanain nümaa Maleiwa süpüleeruaanüle waaʼin. Wainma wawalayuu tepichi meimmoluinka jee nnojoliika japülin sünain asouktaa saaʼu nanoula suluʼu nakoleejiase. Aküjünüsü tü anakat süpüla naaʼinrüin suluʼu tü rewiisüta weitajakat. Suluʼu tü ¡Despertad! ojuʼitakat juulioʼu 2009, aküjünüsü tü eekat süpüla naaʼinrüin wanee jintüi nümünüle: «¿Jamüshi nnojoika punoujüin sünain sünainjeejatüin alaʼala süpüshuaʼa wayuu?», eeshijaʼa süpüla nümüin mayaa: «¿Jamüshi tanoujüinjachika sünain wanee kasa mayaawatujuka aaʼu? Eeyaain neʼe wanaawain tü namakat na ekirajakana süchiki tia». Jiakana kachonshiikana, jikirajaa namaa jüchonnii sünain tü nanüikinjatkat nasakinnapa sünain tia natuma na koleejiajiraakana namaa.

¹⁹ Eesü kapüleere maʼin wamüin wasouktüin saaʼu wanoula jee waaʼinrüin wanee kasa nuluwataaka anain waya Jeʼwaa. Eeshii woʼunüle sünain tü outkajawaakat sümaa nnojoliin woʼuneein sutuma tü mapüsaakat. Eeshii wojuʼitüle sünain aküjaa pütchi wattaʼa maalü sümaa nnojoluin watamaweein suluʼujee woʼula. Soto waaʼin tüü: müleka wekirajaale maʼin paala, yapeena waya süpüla walatirüin wanee müliaa weʼreetka mapeena.

20, 21. (1) ¿Jamüsü aneetka paaʼin jülüjüle paaʼin ouktüin Jesuu paaʼu? (2) ¿Kasa püchecheraainjatka achiirua?

²⁰ ¿Kasa waaʼinrajatka nuuʼulaküle waaʼin Satanaa sükajee sümalajaain waaʼin? Jülüjeesü waaʼin ouktüin Jesuu saaʼu waainjala. Shia naainjaka Pablo tia. Eesü mojule maʼin naaʼin sutuma kaainjaralin nia. Akatsaʼa jülüjüin naaʼin ouktüin Jesuu naaʼu na wayuu kaainjaraliikana, nnojoishi ouktüin nia naaʼu na maainjalakana. Anuu tü nümakat: «Süpüshua tü taaʼinrakat, taaʼinrüin sükajee tanoujain nünain Cristo, chi Nüchonkai Maleiwa, chi aikai apüla taya sümaa naapajiraain nikii süpüla ouktüin taaʼujee» (Gal. 2:20). Nunouja anainrü Pablo naapajiraain nikii Jesuu süpüla ouktüin nia naaʼu.

²¹ Aneerü paaʼin punoujüle sünain naapajalain Jeʼwaa chi Nüchonkai süpüla ouktüin nia paaʼu. Nnojotpejeʼe yüüʼülaa sümeerüin puulia tü amalajawaakalü aaʼin. Eeshii na eejiraajeenakana sümaa tia süntaleepa tü mma jeketkat. ¡Ayata püchecherüin paaʼin! Müle shia putuma, naapeerü pümüin Jeʼwaa tü kasa paʼatapajakat. Alüʼütsü maʼin süpüla eein jimataa aaʼin sutuma Nuluwataaya Jeʼwaa otta süpüla lotuin maʼin nakuwaʼipa na anoujüshiikana nünain. Püchecheraa maʼin süchiirua pikerolüin suluʼumüin Nuluwataaya Maleiwa, jaʼitaichi eʼrüin maʼin pia pümüliala.