1. Nitre Ngöbö mikaka täte kisete kukwe tare tä nemen ye ngwane, ¿ñobätä kukwe ye ñaka mrä kräketre?

NITRE Ngöbö mikaka täte metre käkwe “ja tare nikadre” nüna kärekäre jämi nemen kwetre ye känenkri, ¿ye kukwe mrä mä kräke? Ñakare. Mä niena kirabe kukwebätä o mätä bitinkä kukwebätä, akwa gare mäi kä gobrainta Satanakwe nete nita ja tuin kukwe keta kabre ñaka nuäre ben (Apoc. 12:12).

2. a) Kukwe keta kabre tä nakainkä ni jökräbätä akwa, ¿kukwe medenbe nitre kristiano tä ja tuin? (Üai bämikani kena mikadre ñärärä.) b) ¿Nire köböite nitre kristiano rüeta nakaninkä, aune ñokänti ye gare nie?

² “Kukwe kämekäme tä kite ni jökrä nuente ja käne”, ñodre, kukweta nakainkä nibätä ni ngite yebätä, kukwe ye ñan aibe ben ni kristiano tä ja tuin, ñakare aune nita ja tuin kukwe madabe (1 Cor. 10:13). ¿Kukwe meden? Nita kukwe ükaninte Ngöbökwe mike täte yebätä ni rüeta nakainkä krubäte. Jesukwe niebare nitre ja tötikaka ben ie: “Ni klabore ye abko ñakare bäri ütiäte niara bkänkäbti ta [...]. Ne aisete ni ruäre tä näin kisere ti jiebti ti mikakäre ja tare nike, ye kwrere arato nändi mun jiebti kwetre mun mikakäre ja tare nike” (Juan 15:20). ¿Nire tä nitre töi mike ja mike ni rüere? Satana. Biblia tä niara bämike “kwra lion [...] tä niken ngwäne krikri” ye kwrere aune niara tö ni Ngöbö mikaka täte “kweta[i]” (1 Ped. 5:8). Kukwe ye nuainkäre tä kukwe keta kabre mike ni jiete ne kwe nikwe  ñaka ja ngwandre jankunu metre. Ñodre, dre namani bare apóstol Pablo yebätä ye ani mike gare jai.

3-5. a) ¿Kukwe meden tare ben Pablo ja tuani juta Listra yekänti? b) Pablo aune Bernabé niebare nitre ja tötikaka ja tuadi kukwe tare ben akwa, ¿ñokänti niaratre nitre ye mikani dite kukwe yebiti?

³ Pablo nämene tödeke yebätä rüe nakaninkä bä kabre (2 Cor. 11:23-27). Bati, kukwe namani barebätä juta Listra yete. Ni bren mikaninta kwin kwe ye bitikäre, nitre kwati namani Pablo aune Bernabé käikitekä krubäte aune mikani tuin kwetre jai ngöbö erere. ¡Ñaka niaratre mikadre ngöböre jai namani ribere kisere nitre ie! Akwa, nitre Judea ruäre nükani kukwe ngwarbe niekäre niarabätä nitre töi mikakäre ja mike rüere. ¡Drekebe ngwarbe nitre ja töi mikani niara rüere! Nitre kwati käkwe Pablo täkäni jäbiti aune niara ye krütani namani ruin ietre (Hech. 14:8-19).

⁴ Pablo aune Bernabé käkwe juta Derbe tuaninbiti, ye bitikäre “nikaninta Listra, Iconio aune Antioquía. Juta yete nitre ja tötikaka töi mikani dite kwetre, aune mäträbare kwetre nitrebätä krörö: Nitrekwe tödekadre käre Ngöböbiti, niebare kwetre ietre. Angwane nänkäre Ngöbö gobraen käite ja tare nikadre kri nikwe” (Hech. [Sribebare] 14:21, 22, Ngöbö Täräe [NGT], tärä okwä ükaninte). Kukwe niebare kwe ye raba tuin jene nie, ñobätä ñan aune “ja tare nikadre kri” ye ñan raba kä mike juto nibätä. Pablo aune Bernabé niebare nitre ja tötikaka ja tuadi kukwe tare ben, ¿se ñokänti kukwe ye niaratre mikani dite?

⁵ Kukwe ye mikakäre nüke gare kwin jai, ani ja tötike kwin kukwe niebare Pablokwe yebätä. Niarakwe ñaka niebare: “Mun rabadre kä ngwen nüke jai ja tare nikadre kri yebätä”, ñakare aune niebare kwe: “Nänkäre Ngöbö gobraen käite ja tare nikadre kri nikwe”. Aisete, nitre ja tötikaka ye mikakäre dite Pablokwe mikani gare, ja ngwandi metre kwetre angwane kukwe kwin rabadi kwetre. Kukwe kwin rabadi kwetre ye ñan jondron ngwarbe ie nämenentre tö ngwen. Jesukwe mikani gare arato: “Nire nire käkwe nünandikä dite jabtä [...] ye abko Ngöbökwe dianditari” (Mat. 10:22).

6. ¿Nitre käkwe kä ngwandi nüke jai nememe mrä yekwe dre kwin rabai?

⁶ Nikwe kä ngwandi nüke jai angwane kukwe kwin rabai nikwe. Nitre kristiano dianinkä nänkäre kä kwinbiti yekwe ja nire käre rabai kä kwinbiti aune gobrandi kwetre Jesube. “Obeja mda mda” abokän nünain kärekäre Kä tibienbätä “känti kukwe metre aibe nuain rabai” (Juan 10:16; 2 Ped. 3:13). Akwa, Pablo niebare ye erere, kukwe kwin ye känenkri nikwe ja tuai kukwe keta kabre tare ben. Kukwe ketebu tare ben nitre kristiano tä ja tuin ye ani kädriere.

7. ¿Nitre tä kukwe meden tare nuainne metre ja mikakäre ni rüere?

⁷ Jesukwe mikani gare: “Mun kitadi ngise sinagoga yete nitre kritoboreye. Ne känti mun kwata metadi kwetre. Erere arato, jrei kri amne gobran kri ñakare israelita, ye ngwärekri mun jänäin ngite” (Mar. 13:9). Kukwe niebare Jesukwe ye tä mike gare nitre kristiano ruäre nuaindi tare, gobrantre o nitre ji ngwanka kukwe madabätä ye köböite (Hech. 5:27, 28). Ani töbiketa Pablo yebätä. ¿Niara rüe rakadikä namanina gare ie yebätä kä jürä ngwani kwe jabätä? Ñakare (ñäkädre Hechos 20:22, 23 yebätä).

8, 9. a) ¿Pablo rüe nämene nakainkä ye ngwane töi nämene kwatibe kä ngwanbätä nüke jai ye bämikani ño kwe? b) ¿Kä nengwane nitre kristiano ruäre tä ja töi mike ño niara ye erere?

⁸ Satana ja mikani metre Pablo rüere, akwa niara ñaka kä jürä ngwani jabätä. Niarakwe niebare: “Ti ñaka ja nire mike bäri ütiäte ja kräke, ne kwe kukwe kwin ñaka nuain bä ni kräke akwa Ngöböta nuainne ni kräke ye tikwe mikadre gare ni jökrä ie ye sribi biani tie Jesukwe abokän tikwe nuaindre täte” (Hech. 20:24, TNM). Erametre, Pablo rüe rakaikä ye  jürä ñaka namanibätä. Niarakwe ja töi mikani kwatibe kä ngwen nüke jai. Dre dre rabadre bare akwa yebiti ta ja töi mikani kwe metrere kukwe “mik[e] gare ni jökrä ie ie”.

⁹ Kä nengwane ja mräkätre kwati tä ja töi mike ye erere. Ñodre, nitre Testiko juta ruäre te ñaka ja mikani kukwe gobrankwe yete, yebätä kä nikanina 20 ta niaratre tä ngite aune tä kä ngwen nüke jai. Gobrantre ñaka kukwe ükete niaratre kräke, ñobätä ñan aune niaratre töita ñaka kukwe ruäre nuainbätä ye gobrantre ñaka kain ngäbiti. Nitre mada aune mräkätre kwe tuanmetre ñaka niken tuinbiti, aune ruäre metani aune nuainbare tare jondron keta kabrebiti.

10. Kukwe ruäre tä nemen bare drekebe ngwarbe nibätä ye ngwane, ¿ñobätä ni ñaka rabadre kä jürä ngwen jabätä?

¹⁰ Kä madakänti, ja mräkätre tä ja tuin kukwe ruäre tä nakainkä drekebe ngwarbe yebe. Kukwe ye erere rakadrekä mäbätä drekebe ngwarbe angwane, mäkwe ñaka kä jürä ngwan jabätä. Töbike José yebätä. Niara rürübäinbare ni klabore erere, akwa Jehovakwe “die mikani ja tare nikabtä” (Hech. 7:9, 10). Ye erere raba nuainne mä kräke. Mäkwe ñaka kukwe ne käi kwitaka jabiti: “Ni jökrä nünanka era metre Ngöbökrä abko Ngöbökwe diandretari ño kukwe taretare ngäniene, ye abko gare kuin Ngöböye” (2 Ped. 2:9). Kukwe keta kabrebätä ni raba tö ngwen niarai aune ñaka kä jürä ngwen jabätä ja tuakäre kukwe mikata ni rüere yebe. Gare nie niara raba ni mike kwäre kä käme nete aune ni tuenmetre nüne kärekäre Gobran kwe yete (1 Ped. 5:8, 9).

11. Kukwe tä ni rüere abokän ni ñaka gain, ¿ye ñobätä ñaka ja erebe nitre tä ja mike metre ni rüere yebe?

¹¹ Kukwe mada tare ben ni raba ja tuin ye abokän kukwe nuainta ni rüere o gore aune ni ñaka gain. ¿Ñobätä kukwe ne ñaka ja erebe nitre tä ja mike metre ni rüere yebe? Nitre tä ja mike metre ni rüere ye bämika raba murie dite tä dä nikwite bolore ta aune tä mate drekebe ngwarbe ye kwrere aune raba ju dikente batibe. Akwa kukwe tä ni rüere ye bämika raba kri ue ye kwrere, jondron nire ye tä niken kri ju ketatekäre yete angwane bätärekä jatäri tä ju ye juen tibien. Kukwe tare raba nemen bare aune ni ñan raba ngitie käne.

12. a) ¿Satana tä kukwe meden mike ni rüere abokän ni ñaka gain? b) ¿Ñobätä tä nuainne bäri kukwe yebiti? c) ¿Ñobätä Pablo namani di nekä?

¹² Satana ñaka tö ni tuai ja mäke jankunu Jehovabe, yebätä tä nitre töi mike ja mike ni rüere o kukwe tä ni rüere abokän ni ñaka gain, yebiti tä tödeka nikwe mike di nekä bätärekä bätärekä. Kukwe keteiti abokänbiti tä nuainne bäri aune ni ñaka gain jire ye abokän nita nemen di nekä ye ngwane. Apóstol Pablo ie ja nämene nemen ruin di ñakare ruäre ngwane niebare kwe (ñäkädre Romanos 7:21-24 yebätä). Pablo nämene “dite kri” kukwe ja üaire yebiti aune nämene sribire Nitre Braibe Konkrekasion Jökrä Ngübabitikä siklo kena yebe raba ruin nie. Akwa, ¿ñobätä niarakwe niebare “ti bobre jakän”? Ja nämene ruin kore ie niebare kwe, ñobätä ñan aune därebare ngite: tö nämene kukwe kwin nuain, akwa kukwe mada nämene niara töi mike kukwe bä jene nuainne. Pablo namani di nekä nibi gare mäi, ¿ye raba mä dimike mätä nemen di nekä ye ngwane?

13, 14. a) ¿Ñobätä nitre Ngöbö mikaka täte ruäre tä nemen di nekä? b) ¿Nire tö tödeka nikwe ye tuai di nekä aune ñobätä?

¹³ Ja mräkätre kwati ie jata nemen ruin di nekä, tätre töbike krubäte o tätre nemen töbike ñaka kwin jabätä. Ñodre, meri sribikä prekursor abokän nibike kädeke Débora, tä niere: “Kukwe naninte tie ye ti ñaka käi kwitekä jabiti angwane, batire batire jata nemen ruin bäri käme tie. Kukwe ñaka kwin nuainbare tikwe yebätä tita nemen töbiketa angwane, ni mada ñaka raba ti tarere tä nemen ruin tie, Jehová bäri ñaka raba ti tarere jire tä nemen ruin tie arato”.

¹⁴ ¿Ñobätä nitre Ngöbö mikaka täte ruäre  Débora ye erere tä nemen di nekä? Kukwe keta kabrebätä. Niaratre ruäre ye nierare ñaka töbike kwin jabätä aune kukweta nakainkäbätä ye tä töi mike kore (Prov. 15:15). Nitre mada abokän tä bren yebätä tätre nemen töbike ñaka kwin jabätä. Kukwe ruäre ben mätä ja tuin angwane nire töta nemen krai mäbätä köböite jata nemen ruin kore mäi ye mäkwe ngwan törö jai. ¿Nire abokän kräke kukwe kwin ñaka jire abokän tö mä mikai töbike ja erere? (Apoc. 20:10.) ¿Nire tö mä tuai ñaka näin ja käne? Erametre ye Satana. Niara tä nitre mike metre ni rüere o kukwe tä ni rüere abokän ni ñaka gain yebiti tä ni mike töbike krubäte, ni mike di nekä ne kwe ni ñaka nändre jire ja käne. Juta Jehovakwe tä rüre kukwe ja üaire yebiti. Mäkwe ñaka kukwe ne käi kwitaka jabiti.

15. ¿Nikwe ja töi mikadre kwatibe dre nuainne?

¹⁵ Mäkwe ñaka ja di ngwan nekä. Jondron kwin tä ja käne yebätä mäkwe ja töi mika käre. Pablo tikabare nitre kristiano Corinto ie: “Ne mden kisete, nun naente ñakare sribi nuene Ngöbökrä. Nun ngrabare ye abko kite niken ngwarbe janknu mentokwäre, akwa nun üai abko Ngöböta kwite bäri btin köbö kwatirekwatire. Ne aisete, nunta nüne kä nebtä angwane, nunta ja tare nike, akwa ye jötrö amne ñakare tare, aisete gwä näin ta. Ja tare nika kore, ye ütiäre abko jändrän bäri ütiäte kri Ngöbökwe rabadi kärekäre nunkwe” (2 Cor. 4:16, 17).

16. ¿Ñobätä ütiäte krubäte nikwe ja mikadre juto biare kä nengwane kukwe tare ye känenkri?

¹⁶ Nibira gare nie ye erere, kukwe keta kabre tä Satanakwe “ni ngöka[käre]” (Efes. 6:11). Aisete, kukwe nieta 1 Pedro 5:9 ye ni itire itire mikadre täte: “Munkwe tödeka kwatibe Ngöböbti amne munkwe nünanka dite jabtä rükäre mun rüe Satanabe”. Ye nuainkäre ni rabadre ja brukwä aune ja töi ükete biare kä nengwane, ne kwe ni tädre juto kukwe meden kwin ye erere nuainkäre. Nitre rükä tä  ja kite krubäte käne rükäre. Ye erere ni rabadre ja mike juto biare. Kukwe meden rüere nikwe rüdi ja känenkäre ye ñaka gare nie. Ye medenbätä, ni täbe nüne jäme ngwane nikwe biare ja mikadre juto ye rabadre bäri kwin, ¿ñan ererea? Ngöbö üai köböire Pablo mäträbare nitre Corinto yebätä: “Munta tödeke kwatibe Kristobti ya, ñakare ya, yebtä munkwe ja trä tua kuin au amne, munta tödeke kuin metre ya, ñakare ya, ye munkwe mika ñäräre kuin jabtä” (2 Cor. 13:5).

17-19. a) ¿Ni raba ja trä tuinta ño? b) ¿Monsotre bati raba ja mike juto ño blitakäre kukwe mikata täte kwetre yebätä?

¹⁷ Kukwe keteiti ni raba nuainne ja trä tuakäre Pablo niebare ye erere, ni rabadre töbiketari bökän jabätä. Ñodre, ni raba ngwentari jai: “¿Tita orare käre? ¿Tita blite metre kukwe mikata täte tikwe yebätä? Nitre mada tä nemen ti töi mike ja dibiti kukwe nuainne ye ngwane, ¿tita Ngöbö mike täte bäri ni yebiti ta? ¿Tita käre näin gätäbätä? ¿Ja mräkätre mada ie kukweta nainte ye ngwane tita ngübare bätärekä niaratre tä nuainne tibe ye erere? ¿Nitre umbre aune nitre konkrekasion kä jökräbiti jie ngwanka ye tita kukwei mike täte?”.

¹⁸ Kukwe ketebu ngwantarita abokän tä ni töi mike blite ñaka kä jüräbe kwärä kukwe mikata täte nikwe yebätä, aune nitre mada tä ni töi mike ja dibiti kukwe nuainne ye ñaka kukwei mikadre täte ye ani mike ñärärä. Monsotre bati kwati nikwe tä ye erere nuainne kwelate. Niaratre tä ñaka kä jürä ngwen jabätä aune ñaka ja gaire kukwe mikakäre gare kukwe mikata täte kwetre yebätä, aune ye köböire tätre ñaka kä jürä ngwen jabätä kukwe driekäre. Täräkwata Ni Mikaka Mokre o ¡Despertad! yebätä kukwe kwin nieta ni dimikakäre. Ñodre, monso iti kwelate käkwe kukwe ngwandretari monso bati kukwebätä ie kukwe mikata täte kwe yebätä, ye ngwane niara raba blite ño töi jämebiti ye mikata gare Ni Mikaka Mokre 15 mayo 2013, página 6 yekänti. Monsotre tärä munkwe angwane, munkwe ja kita niaratre yebe ne kwe monsotre mada nänkä kwelate ben kukwe ye erere ngwandretari ietre angwane, dre niedre kwetre ye rabadrera gare ietre.

¹⁹ Erametre, ñaka nuäre blitadre kukwe metre mikata täte nikwe yebätä o jondron meden Jehovata nuainmana nie ye ñan nuäre nuaindre arato. Nita sribire ja dibiti köböiti akwa nita ja di ngwen niken gätäbätä. Köböta nemen kwin nie jänbiti akwa nänkäre kukwe driere dekä nita nüke krö. Ni rabadre ngwen törö jai: ni töi tädi käre kukwe ja üaire yebätä angwane, ni tädi juto biare ja tuakäre kukwe rabai bare ja känenkäre yebe.

20, 21. a) Nita nemen di nekä ye ngwane, ¿töbikadretari ni kökanintari yebätä ye käkwe ni dimikai ño? b) ¿Nikwe ja töi mikadre kwatibe dre nuainne?

²⁰ ¿Kukwe tä ni rüere abokän ni ñaka gain yebätä ni raba dre niere? Ñodre, ¿nita nemen di nekä yebe ni raba ja tuin ño? Ni kökanintari yebätä nikwe töbikadretari ye raba ni dimike. Pablo kukwe ye erere nuainbare. Niara nämene ngite yebätä ruäre ngwane ja nämene nemen ruin bobre ie, akwa Kristo ja nire biani ni ngite Pablo erere kökatarikäre aune ñan nuainbare kwe ni ñaka ngite kräke ye nämene gare ie. Niarakwe tikabare: “Tita nüne tödekare kwärä Ngöbö Odeibti. Niara käkwe ti ara jire tarebare amne ja biani müre ketadre kwe tikrä” (Gál. 2:20). Ni kökanintari ye Pablo kani ngäbiti aune kukwe ye nämene niara mike kwäre ye nükani gare ie.

²¹ Ni kökanintari ye jondron biani ni itire itire ie rabadre tuin nie ye raba ni dimike krubäte. Akwa, ye ñan tä mike gare nita nemen di nekä ye riaikä drekebe ngwarbe. Ni ruäre käkwe ja tuadi kukwe yebe nememe kä mrä rükai ye ngwane. Akwa, ¡ñaka ja di ngwan nekä! Ngwen törö jai nire nire käkwe kä ngwandi nüke jai nememe mrä yekwe jondron kwin rabai. Gobran Ngöbökwe jatai kä jäme ngwena ye ken nita nökrö bäri aune Gobran ye nitre jökrä ja mikaka täte metre dimikai nemen ñaka ngite Ngöbö okwäkänti. Ja töi mike kwatibe näin Gobran yete kukwe keta kabre tare yebiti ta.