1. Ngaa indi na makapakibot sa mga alagad sang Dios nga makaatubang sila sang mga kapipit-an?

NAKIBOT ka bala kay mahimo ka makaatubang sang “madamo nga kapipit-an” antes mo matigayon ang padya nga kabuhi nga wala sing katapusan? Ayhan wala. Bag-uhan ka man sa kamatuoran ukon madugay na nga alagad ni Jehova, nahibaluan mo nga ang kabudlayan bahin na sang kabuhi sa kalibutan ni Satanas.—Bug. 12:12.

2. (a) Luwas sa mga problema nga nagaapektar sa tanan nga indi himpit nga katawhan, ano nga sahi sang kapipit-an ang ginaatubang sang mga Cristiano? (Tan-awa ang piktyur sa umpisa sini nga artikulo.) (b) Sin-o ang sa likod sang aton mga kapipit-an, kag paano naton ini nahibaluan?

² Bisan pa sang mga kabudlayan nga “kinaandan sa mga tawo”—mga problema nga nagaapektar sa tanan nga indi himpit—ang mga Cristiano makaatubang sing isa pa ka sahi sang kapipit-an. (1 Cor. 10:13) Ini amo ang grabe nga pagpamatok bangod sa ila malig-on nga pagtuman sa mga kasuguan sang Dios. Ginsilingan ni Jesus ang iya mga sumulunod: “Ang ulipon indi daku pa sa iya agalon. Kon ginhingabot nila ako, hingabuton man nila kamo.” (Juan 15:20) Sin-o ang sa likod sini nga pagpamatok? Wala na sing iban, kundi si Satanas, nga ginalaragway sang Biblia subong “nagangurob nga leon” nga nagapangita sing kahigayunan nga matukob  ang katawhan sang Dios. (1 Ped. 5:8) Gamiton ni Satanas ang tanan nga paagi para mabungkag ang integridad sang mga disipulo ni Jesus. Binagbinaga ang natabo kay apostol Pablo.

3-5. (a) Ano nga kapipit-an ang gin-atubang ni Pablo sa Listra? (b) Sa ano nga paagi makapabakod ang iya mensahe parte sa magaabot nga mga kapipit-an?

³ Madamo nga beses nga ginhingabot si Pablo bangod sang iya pagtuo. (2 Cor. 11:23-27) Ang isa sini natabo sa Listra. Pagkatapos niya maayo ang isa ka tawo nga nabun-ag nga lupog, si Pablo kag ang iya kaupod nga si Bernabe ginpadunggan subong mga dios. Kinahanglan nila pangabayon ang nagkinalipay nga kadam-an nga indi sila pagsimbahon! Pero wala madugay, nag-abot ang Judiyo nga mga manughingabot, kag ginhiluan nila ang hunahuna sang mga tawo. Gulpi lang nagbaliskad ang sitwasyon! Ginbato na karon sang mga tawo si Pablo kag ginbiyaan nga daw patay na.—Binu. 14:8-19.

⁴ Pagkatapos maduaw nanday Pablo kag Bernabe ang Derbe, “nagbalik sila sa Listra kag sa Iconio kag sa Antioquia, nga nagapabakod sa mga disipulo, nagapalig-on sa ila nga magpabilin sa pagtuo kag nagasiling: ‘Dapat kita magsulod sa ginharian sang Dios paagi sa madamo nga kapipit-an.’” (Binu. 14:21, 22) Sa umpisa, daw matingala kita sa ila ginsiling. Kay man, ang pag-atubang sa “madamo nga kapipit-an” indi makapalig-on, kundi makapaluya. Gani, paano sanday Pablo kag Bernabe ‘nagpabakod sa mga disipulo’ paagi sa mensahe nga nagapatalupangod sang dugang nga kapipit-an?

⁵ Mahibaluan naton ang sabat sini kon usisaon naton sing maayo ang ginsiling ni Pablo. Wala sia nagsiling: “Dapat naton batason ang madamo nga kapipit-an.” Sa baylo, nagsiling sia: “Dapat kita magsulod sa ginharian sang Dios paagi sa madamo nga kapipit-an.” Gani ginpabakod ni Pablo ang mga disipulo paagi sa pagpadaku sang positibo nga resulta sang katutom. Ini nga padya indi ilusyon lamang. Si Jesus nagsiling: “Sia nga nagabatas tubtob sa katapusan amo ang maluwas.”—Mat. 10:22.

6. Ano nga padya ang nagahulat sa mga nagabatas?

⁶ Kon nagabatas kita, matigayon naton ang padya. Para sa hinaplas nga mga Cristiano, ang padya amo ang imortal nga kabuhi sa langit subong kaupod nga mga manuggahom ni Jesus. Para sa “iban nga mga karnero,” padyaan sila sing kabuhi nga wala sing katapusan sa duta diin “magapuyo ang pagkamatarong.” (Juan 10:16; 2 Ped. 3:13) Pero subong sang ginsiling ni Pablo, makaatubang kita anay sing madamo nga kapipit-an. Binagbinaga ang duha ka sahi sang pagtilaw nga mahimo naton maatubang.

7. Ano nga sahi sang kapipit-an ang makabig nga direkta nga mga pag-atake?

⁷ Si Jesus nagtagna: “Itugyan kamo sang mga tawo sa mga hukmanan, kag bunalon kamo sa mga sinagoga kag magatindog kamo sa atubangan sang mga gobernador kag mga hari.” (Mar. 13:9) Ginapakita sa iya ginsiling nga ang pila ka Cristiano makaatubang sing isa ka sahi sang kapipit-an nga amo ang pisikal nga paghingabot, ayhan bangod sang pagsugyot sang mga lider sang relihion ukon pulitika. (Binu. 5:27, 28) Pero binagbinaga liwat ang halimbawa ni Pablo. Hinadlukan bala sia bangod makaatubang sia sini nga paghingabot? Wala gid.—Basaha ang Binuhatan 20:22, 23.

8, 9. Paano ginpakita ni Pablo nga determinado sia nga magbatas, kag paano ang iban sa karon nagpakita sing amo man sini nga determinasyon?

⁸ Si Pablo maisugon nga nagpanindugan batok sa direkta nga mga pag-atake ni Satanas kag nagsiling: “Wala ko ginakabig ang akon kalag nga mahal sa akon, agod lamang matapos ko ang akon dalaganon kag ang ministeryo nga akon nabaton kay Ginuong Jesus, nga magpanaksi sing maid-id sa maayong balita tuhoy sa wala tupong nga kaayo sang Dios.” (Binu. 20:24) Maathag nga wala nahadlok si Pablo sa paghingabot. Determinado sia nga  magbatas, ano man ang matabo. Ang importante gid sa iya amo ang ‘pagpanaksi sing maid-id’ bisan pa may mga kapipit-an.

⁹ Sa karon, amo man sini ang determinasyon sang madamo naton nga kauturan. Halimbawa, ang pila ka Saksi sa isa ka pungsod nagbatas sing halos 20 ka tuig sa prisuhan bangod sa pagpabilin nga neutral. Ang ila kaso wala ginbista, kay ina nga pungsod wala sing probisyon para sa mga nagapangindi bangod sa ila konsiensia. Wala sila gintugutan nga bisitahon sa prisuhan bisan sang mga miembro sang ila pamilya, kag ang pila sa ila ginkastigo kag ginpabudlayan sa lainlain nga paagi.

10. Ngaa indi kita dapat mahadlok sa mga kapipit-an nga hinali lang nga nagautwas?

¹⁰ Ang aton mga kauturan sa lainlain nga lugar nagabatas sa mga kapipit-an nga hinali lang nga nagautwas. Kon matabo ini sa imo, indi magpadala sa kahadlok. Dumduma si Jose. Ginbaligya sia sa pagkaulipon, pero si Jehova ‘nagluwas sa iya sa tanan nga kapipit-an.’ (Binu. 7:9, 10) Himuon man ini ni Jehova sa imo. Indi pagkalimti nga “nahibaluan ni Jehova kon paano luwason ang mga tawo nga may diosnon nga debosyon gikan sa pagtilaw.” (2 Ped. 2:9) Padayon ka bala nga magasalig kay Jehova, kay nahibaluan mo nga maluwas ka niya sa sining malauton nga sistema sang mga butang kag tugutan ka nga magkabuhi sing wala katapusan sa paggahom sang iya Ginharian? May rason ka gid sa pagsalig sa sini kag sa pag-atubang sing maisugon sa mga paghingabot.—1 Ped. 5:8, 9.

11. Paano ang indi hilmunon nga mga pag-atake ni Satanas tuhay sa iya direkta nga mga pag-atake?

¹¹ Ang isa pa ka kapipit-an nga mahimo naton maatubang amo ang indi hilmunon nga mga pag-atake. Ano ang kinatuhayan sini sa direkta nga mga pag-atake paagi sa pisikal nga paghingabot? Ang direkta nga mga pag-atake mapaanggid sa isa ka buhawi nga nag-agi sa inyo lugar kag nagguba dayon sang inyo balay. Ang indi hilmunon nga mga pag-atake mapaanggid sa mga anay nga amat-amat nga nagaut-ot sang inyo balay asta nga marumpag ini. Sa indi hilmunon nga pag-atake, ang isa mahimo nga indi makatalupangod sang katalagman asta nga ulihi na ang tanan.

12. (a) Ano ang isa sa indi hilmunon nga mga taktika ni Satanas, kag ngaa epektibo gid ini? (b) Paano nakaapektar kay Pablo ang pagluya sing buot?

¹² Luyag ni Satanas nga gub-on ang imo kaangtanan kay Jehova, sa direkta man nga mga pag-atake paagi sa paghingabot ukon sa indi hilmunon nga mga pag-atake paagi sa pag-ut-ot sang imo pagtuo. Ang isa sa pinakaepektibo nga indi hilmunon nga mga taktika ni Satanas amo ang pagluya sing buot. Gin-aku ni apostol Pablo nga naluyahan sia kon kaisa. (Basaha ang Roma 7:21-24.) Ngaa si Pablo—nga mabakod sa espirituwal kag mahimo nga miembro sang nagadumala nga hubon sang unang siglo—nagtawag sa iya kaugalingon nga ‘kailo nga tawo’? Nagsiling si Pablo nga nabatyagan niya ini bangod sa iya di-kahimpitan. Gusto gid niya nga himuon ang husto, pero nabatyagan niya ang isa pa ka puersa nga nagapanghikot batok sa iya. Kon amo sini ang imo nabatyagan kon kaisa, indi bala nga malugpayan ka kay nahibaluan mo nga bisan si apostol Pablo nakabatyag man sing subong sini?

13, 14. (a) Ano ang kabangdanan sang pagluya sang buot sang pila sa katawhan sang Dios? (b) Sin-o ang gusto nga maguba ang aton pagtuo, kag ngaa?

¹³ Kon kaisa, madamo sa aton mga kauturan ang naluyahan, nagakabalaka, kag ayhan nagabatyag pa gani nga wala sing pulos. Halimbawa, ang isa ka makugi nga payunir nga tawgon lang naton kay Deborah nagsiling: “Pirme ko madumduman ang akon sala, kag sa sina nga mga tion nagabatyag ako nga wala sing pulos. Kon pamensaron ko ang tanan ko nga sala, nagabatyag ako nga wala na sing magapalangga sa akon, bisan si Jehova.”

¹⁴ Ngaa ang pila sa makugi nga mga alagad ni Jehova, kaangay ni Deborah, naluyahan sing buot? Mahimo nga madamo ini sing kabangdanan. Ayhan ang iban may huyog  nga magbatyag sing negatibo sa ila kaugalingon kag sa ila mga sirkunstansia sa kabuhi. (Hulu. 15:15) Ang iban naman mahimo may balatian nga nagaapektar sa ila emosyon. Ano man ang kabangdanan, dapat naton dumdumon kon sin-o ang nagapamentaha sa sini nga mga balatyagon. Sin-o gid ang gusto nga maluyahan kita sing sobra asta mangampo? Siempre, si Satanas. Ginhukman na sia sing kamatayon kag gusto niya nga magbatyag ka man nga wala sing paglaum. (Bug. 20:10) Ang matuod, direkta man ini nga pag-atake ukon indi hilmunon, isa lang ang tuyo ni Satanas—magkabalaka kita, paluyahon ang aton kakugi, kag mag-untat. Pero indi gid pagkalimti, ang katawhan sang Dios nadalahig sa espirituwal nga pagpakig-away!

15. Paano naton mapakita nga determinado kita nga indi madaug sang pagluya sang buot?

¹⁵ Mangin determinado nga indi mangampo sa pagpakig-away. Magtulok sa padya. Si Pablo nagsulat sa mga Cristiano sa Corinto: “Wala kami nagapangampo, apang bisan ang amon lawas nagaluya, pat-od gid nga ang amon pagkatawo sa sulod ginabag-o adlaw-adlaw. Kay bisan pa ang kapipit-an umalagi kag mamag-an, nagahatag ini sa amon sang himaya nga may labaw pa nga kabug-aton kag wala sing katapusan.”—2 Cor. 4:16, 17.

16. Ngaa importante nga karon pa lang handaan na naton ang kapipit-an?

¹⁶ Subong sang nakita naton, madamo sing “pahito” si Satanas. (Efe. 6:11) Kinahanglan nga sundon naton tanan ang laygay sa 1 Pedro 5:9: “Magtindog kamo batok sa iya, nga malig-on sa pagtuo.” Para mahimo ini, dapat naton ihanda ang aton hunahuna kag tagipusuon, nga hanason ang aton kaugalingon karon sa paghimo sing husto. Sa pag-ilustrar: Ang isa ka tropa sang mga soldado masami nagabaton sing mabudlay katama nga paghanas bisan wala pa sing inaway. Mapaanggid man sa sini ang espirituwal nga mga soldado ni Jehova. Wala naton mahibaluan kon ano ang nadalahig sa aton pagpakig-away sa ulihi.  Gani sa wala pa ini, indi bala nga maalamon gid nga maghanas na kita? Si Pablo nagsulat sa mga taga-Corinto: “Padayon nga tilawi kon yara kamo sa pagtuo, padayon nga pamatud-i kon ano kamo.”—2 Cor. 13:5.

17-19. (a) Sa ano nga mga paagi matilawan naton ang aton kaugalingon? (b) Paano ang mga pamatan-on makahanda sa pagpangapin sang ila pagtuo kon yara sa eskwelahan?

¹⁷ Ang isa ka paagi nga matuman ang laygay ni Pablo amo ang paghimo sing serioso nga pag-usisa sa kaugalingon. Pamangkuta ang imo kaugalingon: ‘Nagapadayon bala ako sa pagpangamuyo? Kon ginaipit ako sang akon mga katubotubo, ginatuman ko bala ang Dios subong manuggahom sa baylo sang mga tawo? Nagatambong bala ako sing regular sa mga miting? Maisugon ko bala nga ginasugid ang akon mga pagpati? Ginatinguhaan ko gid bala nga batason ang mga kakulangan sang akon mga masigkatumuluo—subong nga ginahimo man nila ini sa akon? Mapinasakupon bala ako sa mga nagapanguna sa amon kongregasyon kag sa mga nagapanguna sa kongregasyon sa bug-os nga kalibutan?’

¹⁸ Talupangda nga ang duha sa mga pamangkot nagapatuhoy sa maisugon nga pagpangapin sa aton mga pagpati kag sa pagpakigbato sa mga pag-ipit. Kinahanglan ini himuon sang madamo naton nga pamatan-on samtang yara sila sa eskwelahan. Natun-an nila nga indi pag-ikahuya ang ila mga pagpati. Sa baylo, nagahambal sila nga may kaisog. Ang mapuslanon nga mga suhestyon sa sini nga bahin ginbalhag sa aton mga magasin. Halimbawa, ang Hulyo 2009 nga Magmata! nagapanugda nga kon ang isa ka klasmeyt nagpamangkot sing, “Ngaa wala kamo nagapati sa ebolusyon?” mahimo ka magsabat: “Ngaa dapat ako magpati sa ebolusyon? Bisan gani ang mga sientipiko wala nagapati sa sini. Indi bala mga eksperto man sila?” Mga ginikanan, pat-ura nga praktison ninyo ini upod sa inyo kabataan agod mangin handa sila sa pag-atubang sini nga mga pag-ipit sang ila mga katubotubo sa eskwelahan.

¹⁹ Matuod, indi pirme mahapos nga pangapinan ang aton pagtuo ukon himuon ang ginapangabay ni Jehova sa aton. Pagkatapos sang malawig nga adlaw sang pagtrabaho, mahimo nga kinahanglan naton piliton ang aton kaugalingon sa pagtambong sa mga miting. Mahimo ginapanikasugan naton ang pagbangon sa aga para makigbahin sa ministeryo bisan nanamian pa kita magtulog. Pero dumduma: Kon napalambo mo na nga daan ang maayo nga rutina sa espirituwal, mangin mas handa ka sa pag-atubang sa magaabot nga mga pagtilaw.

20, 21. (a) Paano ang pagpamalandong sa gawad makabulig sa aton nga mabatuan ang negatibo nga mga balatyagon? (b) Ano dapat ang aton determinasyon parte sa mga kapipit-an?

²⁰ Kamusta naman ang indi hilmunon nga mga pag-atake? Halimbawa, paano naton mabatuan ang pagluya sing buot? Ang isa sa pinakaepektibo nga mga paagi amo ang pagpamalandong sa gawad. Amo sini ang ginhimo ni apostol Pablo. Kon kaisa, nagabatyag sia sa iya kaugalingon nga kailo sia. Pero nahibaluan niya nga ang Cristo napatay, indi para sa himpit nga mga tawo, kundi sa mga makasasala, kag isa sia sa ila. Ang matuod, nagsulat sia: “Ang kabuhi nga ginakabuhi ko . . . ginakabuhi ko sa pagtuo sa Anak sang Dios, nga naghigugma sa akon kag nagtugyan sang iya kaugalingon para sa akon.” (Gal. 2:20) Huo, ginbaton ni Pablo ang gawad. Nahibaluan niya nga ang gawad maaplikar mismo sa iya.

²¹ Ini nga pagtamod—nga ang gawad isa ka personal nga regalo halin kay Jehova—makabulig sing daku sa imo. Indi buot silingon sini nga madula gilayon ang pagluya sing buot. Ang iban sa aton mahimo kinahanglan makigbato sa sining indi hilmunon nga pag-atake asta sa bag-ong kalibutan. Pero dumduma: Ang padya mabaton sang mga wala nagapangampo. Malapit na gid kita sa mahimayaon nga adlaw sa tion nga pahanabuon na sang Ginharian sang Dios ang paghidait kag ibalik sa kahimpitan ang tanan nga matutom. Mangin determinado nga magsulod sa sini nga Ginharian—bisan pa may madamo nga kapipit-an.