1. Apay a saan a pakasdaawan dagiti adipen ti Dios no agpasarda iti rigat?

PAKASDAAWAM kadi no agpasarka iti “adu a rigat” sakbay a magun-odmo ti gunggona a biag nga agnanayon? Nalabit saan. Kabbaroka man iti kinapudno wenno nabayagkan nga agserserbi ken Jehova, ammom a ti rigat ket paset ti biag iti lubong ni Satanas.—Apoc. 12:12.

2. (a) Malaksid iti parparikut a mangap-apektar iti amin nga imperpekto a tattao, ania pay a rigat ti mapaspasaran dagiti Kristiano? (Kitaen ti ladawan iti rugi ti artikulo.) (b) Asino ti adda iti likudan dagiti mapaspasarantayo a rigat, ken kasanotayo nga ammo dayta?

² Malaksid iti rigat a “kadawyan kadagiti tattao”—dagiti parikut a mangap-apektar iti amin nga imperpekto a tattao—maipaspasango pay dagiti Kristiano iti sabali pay a kita ti rigat. (1 Cor. 10:13) Ania dayta? Isu ti nakaro nga ibubusor gapu iti panagtulnogda kadagiti linteg ni Jehova. Kinuna ni Jesus kadagiti pasurotna: “Ti adipen saan a dakdakkel ngem iti apona. No indadanesdak, idadanesdakayto met.” (Juan 15:20) Asino ti adda iti likudan ti kasta nga ibubusor? Awan sabali no di ni Satanas, a deskribiren ti Biblia kas “leon a ngumerngernger” nga “agsapsapul iti alun-onenna” nga adipen ti Dios. (1 Ped. 5:8) Ar-aramiden ni Satanas ti amin a kabaelanna tapno madadael ti kinatarnaw  dagiti adalan ni Jesus. Usigentayo ti napasamak ken apostol Pablo.

3-5. (a) Ania a rigat ti napasaran ni Pablo idiay Listra? (b) Kasano a makapabileg ti imbagana maipapan kadagiti masanguanan a rigat?

³ Namin-adu a naidadanes ni Pablo gapu iti pammatina. (2 Cor. 11:23-27) Maysa kadagita ti napasamak kenkuana idiay Listra. Idi pinaimbagna ti maysa a lalaki a nayanak a pilay, ni Pablo ken ti kaduana a ni Bernabe ket indaydayaw dagiti tattao kas didios. Impakaasida iti bunggoy a saanda nga aramiden dayta. Di nagbayag, dimteng dagiti bumusbusor a Judio, ket pinadakesda da Pablo ken Bernabe tapno masabidongan ti isip dagiti umili. Dagus a nagbaliw ti reaksion ti bunggoy! Inuborda ni Pablo ket pinanawanda idi impagarupda a natayen.—Ara. 14:8-19.

⁴ Kalpasan ti ibibisita da Pablo ken Bernabe idiay Derbe, “nagsublida idiay Listra ken idiay Iconio ken idiay Antioquia, a pinabpabilegda . . . dagiti adalan, a pinarparegtada ida nga agtalinaed iti pammati ket kunkunada: ‘Masapul a sumrektayo iti pagarian ti Dios babaen iti adu a rigat.’”(Ara. 14:21, 22) Nalabit masdaawtayo kadagita a sasao. Kinapudnona, makapaupay, imbes a makaparegta, ti agpasar iti “adu a rigat.” Ngem kasano a ‘napabileg dagiti adalan’ iti imbaga da Pablo ken Bernabe maipapan kadagiti dumteng nga ad-adu pay a rigat?

⁵ Masarakantayo ti sungbat no usigentayo a naimbag ti sasao ni Pablo. Saanna nga imbaga: “Masapul nga ibturantayo ti adu a rigat.” Imbes ketdi, kinunana: “Masapul a sumrektayo iti pagarian ti Dios babaen iti adu a rigat.” Isu a napabileg ni Pablo dagiti adalan babaen ti panangipaganetgetna iti nasayaat a pagbanagan ti kinamatalekda. Saan nga arapaap laeng dayta a gunggona. Kinapudnona, kinuna ni Jesus: “Ti nakapagibtur agingga iti panungpalan isunto ti maisalakan.”—Mat. 10:22.

6. Ania dagiti gunggona para kadagiti makapagibtur?

⁶ Adda agur-uray a gunggona kadatayo no agibturtayo. Ti gunggona para kadagiti napulotan a Kristiano ket immortal a biag idiay langit kas kakadua ni Jesus nga agturay. Ti met gunggona para iti “sabsabali a karnero” ket ti agnanayon a biag ditoy daga a ‘pagtaenganto ti kinalinteg.’ (Juan 10:16; 2 Ped. 3:13) Ngem kas kinuna ni Pablo, agpasartayo pay laeng ita iti adu a rigat. Usigentayo ti dua a kita ti pakasuotan a mabalin a pakaipasanguantayo.

7. Ania a kita ti rigat ti maibilang a direkta nga iraraut?

⁷ Impadto ni Jesus: “Dagiti tattao iyawatdakayto kadagiti lokal a pangukoman, ket mababautkayto kadagiti sinagoga ket maisaklangkayo iti sanguanan dagiti gobernador ken ar-ari.” (Mar. 13:9) Kas ipakita dagita a sasao, mapasaran ti dadduma a Kristiano ti pisikal a pannakaidadanes, nalabit gapu iti panangisungsong dagiti lider ti relihion wenno agtuturay. (Ara. 5:27, 28) Usigentayo manen ti ulidan ni Pablo. Nagbuteng kadi iti kasta a pannakaidadanes? Saan.—Basaen ti Aramid 20:22, 23.

8, 9. Kasano nga impakita ni Pablo a determinado nga agibtur? Kasano nga ipakpakita ti dadduma a kakabsat ita ti kasta met laeng a determinasion?

⁸ Situtured a sinaranget ni Pablo dagiti direkta nga iraraut ni Satanas. Kinunana: “Diak ilalaen ti kararuak a kas napateg kaniak, maturposko la ketdi ti tarayek ken ti ministerio nga inawatko ken Apo Jesus, tapno naan-anay a mangsaksiak iti naimbag a damag ti di kaikarian a kinamanangngaasi ti Dios.” (Ara. 20:24) Nalawag a saan a nagbuteng ni Pablo iti agur-uray kenkuana  a pannakaidadanes no di ket determinado nga agibtur, aniaman ti mapasamak. Ti kangrunaan a pakaseknanna ket ti panangipaayna iti ‘naan-anay a panangsaksi’ aniaman a rigat ti mapasaranna.

⁹ Adu kadagiti kakabsattayo ita ti nangipakita iti kasta met laeng a determinasion. Kas pagarigan, iti maysa a pagilian, adda dagiti Saksi a naibalud iti gistay 20 a tawen gapu iti panagtalinaedda a neutral. Saan a pulos nayuli dagiti kasoda iti korte gapu ta saan a maipaayan iti eksepsion dagiti agkedked nga agsoldado. Bayat a nakabaludda, naparitan a bumisita kadakuada uray dagiti kapamiliada. Sumagmamano a balud ti nakabkabil ken naglak-am iti nagduduma a kita ti pannakaparigat.

10. Apay a ditay pagbutngan dagiti di mapakpakadaan a rigat?

¹⁰ Iti nagduduma a lugar, ib-ibturan met dagiti kakabsattayo dagiti di mapakpakadaan a rigat. No mapasamak dayta kenka, dika agbuteng. Panunotem ni Jose. Nailako kas adipen, ngem “inispal [ni Jehova] kadagiti amin a rigatna.” (Ara. 7:9, 10) Kasta met laeng ti aramiden ni Jehova kenka. Laglagipem nga “ammo ni Jehova no kasano ti mangispal kadagiti tattao nga addaan nadiosan a debosion manipud iti pannakasuot.” (2 Ped. 2:9) Itultuloymo kadi ti agtalek ken Jehova, a kabaelannaka nga ispalen iti daytoy dakes a lubong ken ipaayan iti agnanayon a biag iti sidong ti Pagarianna? Wen, rumbeng laeng nga agtalekka kenkuana ken situtured a sanguem ti pannakaidadanes.—1 Ped. 5:8, 9.

11. Ania ti pagdumaan ti nasikap nga iraraut ni Satanas ken ti direkta nga irarautna?

¹¹ Ti maysa pay a kita ti rigat a mabalin a mapasarantayo ket ti nasikap nga iraraut. Kasano a naiduma daytoy iti direkta a pannakaidadanes? Ti direkta nga iraraut ket kas iti allawig a mamimpinsan a mangperdi iti balaymo. Ngem ti nasikap nga iraraut ket mayarig kadagiti anay nga in-inut a mangdadael iti tarikayo ti balaymo agingga a rumukop ken madadaelen dayta. Daytoy nga iraraut ket mabalin a saan a madmadlaw ti maysa a tao agingga a naladawen ti amin.

12. (a) Ania ti maysa kadagiti nasikap a pamay-an nga us-usaren ni Satanas, ken apay nga epektibo dayta? (b) Kasano a naapektaran ni Pablo iti pannakaupay?

¹² Kayat ni Satanas a dadaelen ti relasionmo ken Jehova, babaen man iti pannakaidadanes wenno iti in-inut ken nasikap a panangrautna iti pammatim. Ti pannakaupay ket maysa kadagiti kaepektibuan a nasikap a pamay-anna. Inadmitir ni apostol Pablo nga adda dagiti gundaway a naupay. (Basaen ti Roma 7:21-24.) Ngem apay a ni Pablo—a natibker ti espiritualidadna ken nalabit kameng ti bagi a manarawidwid idi umuna a siglo—imbilangna ti bagina a ‘nakaay-ay-ay’? Kasta ti imbagana a nariknana gapu ta imperpekto. Kayatna nga aramiden ti umiso, ngem nariknana nga adda sabali a linteg a makigubgubat kenkuana. No adda lablabanam a kasta a rikna no dadduma, saan kadi a makaliwliwa kenka a kasta met idi ti napasaran ni apostol Pablo?

13, 14. (a) Ania ti makagapu a maupay ti dadduma nga adipen ti Dios? (b) Asino ti maragsakan a makakita a madadael ti pammatitayo, ken apay?

¹³ No dadduma, adu a kakabsattayo ti maup-upay, madanagan, ken nalabit makarikna nga awan serserbida. Kas pagarigan, maysa a naregta a payunir nga awagantayo iti Deborah ti nagkuna: “Nakadagdagsen idi ti barukongko gapu ta diak maikkat iti panunotko ti maysa a kamali a naaramidak. Ad-adda manen no pampanunotek ti amin a basolko. Mariknak nga awanen ti mayat a mangipateg kaniak, uray ni Jehova.”

¹⁴ Apay a maupay ti dadduma a naregta nga adipen ni Jehova, kas ken Deborah?  Adda sumagmamano a posible a makagapu. Mabalin nga adda tendensia ti dadduma a mangay-ay iti bagida ken iti kasasaadda. (Prov. 15:15) Adda met dagidiay addaan iti negatibo a rikrikna kas epekto ti pisikal a sakitda. Aniaman ti makagapu, laglagipentayo koma no asino ti mayat a manggundaway iti kasta a rikrikna. Asino a talaga ti maragsakan no maupay ken sumukotayo? Asino ti maragsakan no mariknam a nakondenarkan a kas iti dandanin mapasamak kenkuana? (Apoc. 20:10) Siempre, ni Satanas. Kinapudnona, direkta man wenno nasikap ti iraraut ni Satanas, maysa laeng ti panggepna—kayatna nga agdanagtayo, bumaaw ti regtatayo, ken sumardengtayo nga agserbi. Laglagipentayo a maipaspasango dagiti adipen ti Dios iti naespirituan a pannakidangadang!

15. Kasanotayo a maipakita a determinadotayo a mangsaranget iti pannakaupay?

¹⁵ Determinadoka koma a di sumuko. Itultuloymo nga ipamaysa ti panunotmo iti gunggona. Insurat ni Pablo kadagiti Kristiano idiay Corinto: “Saankami a sumuko, ngem uray pay no ti kinataomi iti ruar ket kumapkapuy, pudno unay a ti kinataomi iti uneg mapabpabaro iti inaldaw-aldaw. Ta nupay ti rigat ket apagkanito ken nalag-an, pataudenna kadakami ti dayag a naringringbaw pay ti dagsenna ken agnanayon.”—2 Cor. 4:16, 17.

16. Apay a napateg a saganaam itan ti rigat?

¹⁶ Kas naammuantayo, agus-usar ni Satanas iti nadumaduma a kita ti “pangallilaw.” (Efe. 6:11) Nasken ngarud nga iyaplikar ti tunggal maysa kadatayo ti pammalagip a masarakan iti 1 Pedro 5:9: “Agtakderkayo a bumusor kenkuana, natibker iti pammati.” Tapno maaramidtayo dayta, masapul nga isaganatayo ti isip ken pusotayo, ken sanayentayo itan ti bagbagitayo nga agaramid iti umiso. Kas panangyilustrar:  Masansan nga aglasat dagiti soldado iti naririgat a training sakbay a mapanda iti gubatan. Kasta met laeng kadagiti naespirituan a soldado ni Jehova. Saantayo nga ammo no anianto a pannakidangadang ti pakaipasanguantayo. Gapuna, saan kadi a nainsiriban nga ag-training-tayo itan bayat nga awan pay ti gubat? Insurat ni Pablo kadagiti taga-Corinto: “Itultuloyyo a suboken no addakayo iti pammati, itultuloyyo a paneknekan no aniakayo.”—2 Cor. 13:5.

17-19. (a) Kasanotayo a mausig ti bagitayo? (b) Kasano a makapagsagana dagiti agtutubo a mangidepensa iti pammatida idiay eskuelaan?

¹⁷ Ti maysa a pamay-an a masurottayo ti balakad ni Pablo ket ti napasnek a panangusigtayo iti bagitayo. Isaludsodmo iti bagim: ‘Regular kadi nga agkarkararagak? No pilpilitendak dagiti kapatadak, agtultulnogak kadi iti Dios kas agturay imbes a kadagiti tattao? Regular kadi a tumabtabunoak kadagiti Nakristianuan a gimong? Naturedak kadi a mangiranud kadagiti patpatiek? Agpaspasakupak kadi kadagiti mangidadaulo iti kongregasionmi ken iti sangalubongan nga organisasion?’

¹⁸ Paliiwentayo ta dagiti dua a saludsod ket maipapan iti situtured a panangidepensa kadagiti patpatientayo ken panangsaranget iti impluensia dagiti kapatadan. Adu kadagiti agtutubotayo ti mangar-aramid iti dayta bayat nga ages-eskuelada. Saanda nga ibain dagiti patpatientayo no di ket situtured nga idepdepensada dagita. Adda dagiti makatulong a singasing a naipablaak kadagiti magasintayo. Kas pagarigan, isingasing ti Hulio 2009 nga Agriingkayo! a no saludsoden ti maysa a kaklasem: “Apay a saanka a mamati iti ebolusion?” mabalin a kunaem laeng: “Apay koma a mamatiak iti ebolusion? Dinto pay agtutunos ti kapanunotan dagiti sientista idinto ta ekspertoda!” Nagannak, sanayenyo dagiti annakyo tapno nakasaganada a mangsango kadagiti kasta a situasion iti eskuelaan.

¹⁹ Pudno, saan a kanayon a nalaka ti mangasaba wenno mangaramid iti dadduma pay a banag a kidkiddawen ni Jehova kadatayo. Kalpasan ti agmalmalem a panagtrabahotayo, nalabit masapul a pilitentayo ti bagitayo a mapan makigimong. Mabalin a marigatanka a bumangon iti nasapa tapno makiraman iti ministerio. Ngem laglagipem: Nasaysayaat ti panangsangom kadagiti tumaudto a daddadakkel a pakasuotan no addaanka itan iti nasayaat a naespirituan a rutina.

20, 21. (a) Kasano a ti panangmennamenna iti subbot tulongannatayo a mangparmek iti negatibo a rikrikna? (b) Ania koma ti determinasiontayo?

²⁰ Kasanotayo met a masaranget dagiti nasikap nga iraraut ti Diablo a kas iti pannakaupay? Ti maysa kadagiti kaepektibuan a pamay-an ket ti panangmennamenna iti subbot. Kasta ti inaramid ni apostol Pablo. Adda dagiti gundaway a nariknana nga isu ket nakaay-ay-ay. Ngem ammona a natay ti Kristo, saan a para kadagiti perpekto a tattao no di ket para kadagiti managbasol. Ket maysa ni Pablo kadagidiay a managbasol. Kinapudnona, insuratna: ‘Agbibiagak babaen ti pammati a maiturong iti Anak ti Dios, a nangayat kaniak ken nangyawat iti bagina maipaay kaniak.’ (Gal. 2:20) Wen, inawat ni Pablo ti subbot. Imbilangna nga agpaay a mismo dayta kenkuana.

²¹ Dakkel met ti maitulongna no ibilangmo ti subbot kas sagut kenka ni Jehova. Saanna a kayat a sawen daytoy a dagus a maikkat ti pannakaupaymo. Mabalin a sumagmamano kadatayo ti agtultuloy a makidangadang iti daytoy nasikap nga iraraut agingga iti baro a lubong. Ngem laglagipem: Magunggonaan dagidiay saan a sumuko. Nakaas-asidegen ti nadayag nga aldaw inton ipasdek ti Pagarian ti Dios ti talna ken isublina ti kinaperpekto iti amin a matalek a tattao. Determinadoka koma a sumrek iti dayta a Pagarian—uray no agpasarka iti adu a rigat.