1. Morwasinke vakareli vaKarunga ava ligwanekerere nomaudigu?

AYO kukutetukisa asi ngo pita “momaudigu gomanzi” komeho zokukagwana mfeto zomwenyo gwanarunye ndi? Hawe. Yi kare asi o mu pe mousili ndi nare wa karera Jehova, wa yi diva asi maudigu kuna kara ruha rweparu mouzuni ou waSatana.—Ehor. 12:12.

2. (a) Kugusa ko maudigu aga ga hwa kugwana vantu navenye, maudigu musinke gapeke ava ligwanekere nago Vakriste? (Tara efano.) (b) Yilye ogu a retesa po mahepeko, ntani ngapi tuna yi diva?

² Kugusa ko maudigu aga ‘ga hwa kugwana vantu’ navenye morwa kudira kusikilira mo, Vakriste kuligwanekera hena nomaudigu gamwe gapeke. (1 Kol. 10:13) Maudigu musinke? Mahepeko, morwa kulimburukwa nompango daKarunga. Jesus kwa tanterere vasikuli vendi asi: “‘Mukareli kapi ga pita hekurwendi.’ Nsene va hepeka nge, none hena nava mu hepeka.” (Joh. 15:20) Yilye ogu a retesa po mahepeko ogo? Satana, ogu za singonona Bibeli asi: ‘Nyime gokununga, ogu a papara nompito dokulipapagwira’ vantu vaKarunga. (1 Pet. 5:8) Satana nga ruganesa nkenye mpito mokuhetekera ko kuteza po ulimburukwi  wovarongwa vaJesus. Koneka eyi ya horokerere mupositoli Paurusa.

3-5. (a) Maudigu musinke ga ligwanekerere nago Paurusa moLisitira? (b) Monkedi musinke mbudi zokuhamena maudigu azi nkondopeke?

³ Morwa ulimburukwi wendi kwaKarunga, Paurusa ngava mu hepeke. (2 Kol. 11:23-27) Sihorokwa simwe kwa horokerere moLisitira, apa Paurusa ga verwire mugara gomondambo. Morwa sitetu oso, vantu kwa gazarere asi Paurusa naBaranabasa vakarunga. Awo kwa likwamberere mbunga mokudira kuvakarera. Vampitisili woVajuda yipo va wizire nokuyazedagwira vantu. Morwa mazedagwiro aga goyimpempa, ndjorongani tazi tameke. Ngoyitundwamo, vantu tava tameke kutoona Paurusa nomamanya.—Yirug. 14:8-19.

⁴ Konyima zokudingura Derube, Paurusa naBaranabasa kwa tengwire koLisitira nokoIkoniya ntani koAntiyokiya. Awo kwa zire va ka nkondopeke varongwa nokukavakorangeda va kare mepuro pokutanta asi: “Mokuza moUntungi waKarunga, nyose kupita momaudigu gomanzi ntani.” (Yirug. 14:21, 22) Nonkango odo kuvhura di kutetukise. “Kupita momaudigu” gomanzi kapisi nonkango dokukorangeda. Ngapi nye omu Paurusa naBaranabasa va ‘korekere varongwa’ pokuvatantera asi ngava pita momaudigu gomanzi?

⁵ Ose kuvhura kugwana elimbururo mononkango daPaurusa. Age kwa tente asi: ‘Mokuza moUntungi waKarunga, nyose kupita momaudigu gomanzi ntani.’ Nye kapi ga tente asi: “Twa hepa kulididimikira maudigu gomanzi.” Yipo nye, Paurusa kwa nkondopekere mfeto ezi ava gwana ava ava limburukwa ngorooro kwaKarunga. Mfeto ozo kapisi ngwendi nzodi. Jesus kwa tente asi: ‘Ogu nga didimika dogoro nokouhura, yige nga yoworoka.’—Mat. 10:22.

6. Mfeto musinke zina kundindira owo ava lididimikire?

⁶ Nsene tu lididimikira, ose ngatu gwana mfeto. KoVagwavekwa, mfeto ozo kuna kara mwenyo gwa ha fu ogu ngava ka gwana meguru apa ngava ka pangera naJesus. ‘Kononzwi dapeke,’ kuna kara mwenyo gwanarunye apa pevhu, apa ngapa “kara uhungami.” (Joh. 10:16; 2 Pet. 3:13) Ngomu ga yi tumbura Paurusa, ose ngatu pita momaudigu gomanzi. Ngesi tatu ka zogera maudigu gavali aga natu vhura kuligwanekera nago.

7. Maudigu musinke va singonona gomahomono gokuvhura kumona?

⁷ Jesus kwa pumbire asi: “Ngava mu twara konombangwiliro, ngava mu toona monosinagoge, tava mu twara komeho zovapangeli nohompa.” (Mar. 13:9) Ngomu dina yi likida nonkango odo, Vakriste vamwe ngava ligwanekera nomahomono gokuvatoona, mahepeko gokutundilira kovampitisili womaukarelikarunga ndi wovanapolitika. (Yirug. 5:27, 28) Tu konakoneni sihonena hena saPaurusa. Age ga tjilire mahepeko ogo ndi? Hawe.—Resa Yirugana 20:22, 23.

8, 9. Ngapi omu Paurusa ga yi likidire asi ga tokomenene kulididimikira, ntani ngapi vamwe womosiruwo setu va likida etokomeno lyokulifana?

⁸ Nouradi, Paurusa ga lididimikire mahomono gaSatana gokuvhura kumona ntani ga tente asi: “Ame nombili si zayo ndi asi ni ruve mwenyo gwange. Sinene tani sikisa mo nehafo rugendo rwange nosirugana esi ga pa nge Hompa Jesus asi ani sanseke Mbudi zoNgwa zonkenda zaKarunga.” (Yirug. 20:24) Paurusa kapi ga mu tjilisire mahepeko aga ga mu ndindilire. Nye age kwa tokomenene kulididimikira,  mwankenye mahepeko aga ga ligwanekerere nago. Sinka sosinene saPaurusa kwa kere ‘sokusanseka mbudi zongwa’ nampili ngomu ga ligwanekerere nomahepeko gomanzi.

⁹ Naina, vanavazinyetu wovanzi kwa likida etokomeno ngwendi lyaPaurusa. Pasihonena, mosirongo simwe Nombangi dimwe kwa kere modorogo konyara nomvhura 20 morwa kudira kulihameka moyita. Kapi va va twere kompanguro, morwa sirongo kapi sa kwatesere ko etokoro lyawo lyokudira kulihameka moyita. Apa va kere modorongo, kwa va nyokesere kuvadingura nampili vekoro lyawo, ano vanadorongo vamwe kwa va toonene nokuvahepeka.

10. Morwasinke natu dilira kukara nowoma?

¹⁰ Moyirongo yimwe, vanavazinyetu kulididimikira maudigu aga aga horoka hararasi. Nsene yi kuhorokera oyo, wa kara noutjirwe. Diworoka Josefa. Josefa kwa mu randesere koupika, nye Jehova “ta mu yoworora momaudigu gendi nagenye.” (Yirug. 7:9, 10) Jehova kuvhura a rugane yokulifana koge. Diworoka asi Jehova “ga diva omu a yoworora vatjilikarunga momaheteko gawo.” (2 Pet. 2:9) Wa kara nokonda zongwa zokuhuguvara mwaJehova nokulididimikira nouradi mahepeko. Huguvara asi Jehova kuvhura a ku yoworere mouzuni ou woudona ntani nga ka kupa mwenyo gwanarunye.—1 Pet. 5:8, 9.

11. Ngapi omu mahomono gaSatana gokuhorama ga lisiga naga gokuvhura kumona?

¹¹ Mahomono gamwe natu vhura kuligwanekera nago kwa horama. Ngapi ga lisiga nomahomono gokuvhura kumona? Mahomono gokuvhura kumona kwa fana ngwendi ekundungu lina kukundunga modoropa nokuzonagura hararasi nzugo zoge. Mahomono gokuhorama kwa fana ngwendi nongundi donzugo dina kutukwa kanunu-kanunu dogoro nzugo tazi ya zunguruka. Apa ngo ka yi dimbwilira nzugo zina hara kugwa.

12. (a) Ehomono musinke limwe lyaSatana lyokudira kumoneka, ntani morwasinke azi mu tompokere? (b) Ngapi omu Paurusa lya mu kundamene edombo mutjima?

¹² Satana ana hara kuzonagura elikwatakano lyetu naJehova, yi kare asi kupitira momahomono gokumona mokutuhepeka ndi kuzonagura kanunu-kanunu epuro lyoge nomahono gokudira kumona. Ehomono limwe eli a ruganesa Satana a li mu tompoka kuna kara edompeso mutjima. Mupositoli Paurusa ga yi tambwire asi poyiruwo yimwe nga dompo mutjima. (Resa Varoma 7:21-24.) Morwasinke Paurusa ogu ga kere muhameni gombungagendesi zokuhova ga uyungilire asi ‘oru ruhepo rwange rureru oru’? Paurusa kwa lizuvhire ruguwo morwa kudira kusikilira mo kwendi. Age ga here kurugana youhunga nye simpe udona kwa kere mwendi. Nsene nove poyiruwo yimwe kukondja nomalizuvho gangoso, ayo kuvhura yi ku hengagwide pokudiva asi Paurusa nage ga ligwanekerere noukaro wokulifana.

13, 14. (a) Yisinke ayi ninkisa vantu vaKarunga vamwe va dompe mutjima? (b) Yilye ogu ana tu harere tu zumbe epuro lyetu, ntani morwasinke?

¹³ Poyiruwo noyiruwo, vanavazinyetu kudompa mutjima, kukara nosinka ntani kulizuvha kudira mulyo. Pasihonena, muzuvhisi gomukadi gedina Deborah kwa tanta asi: “Nkenye apa ame kugazara kuhamena mapuko gange nokulizuvha udona. Apa ani gazara mapuko nagenye aga na rugana, kuninkisa nge ni lizuvhe asi kwato ogu na hara nge, nampili Jehova.”

¹⁴ Yisinke ayi ninkisa vakareli vaJehova womupampi ngwendi Deborah va dompe mutjima? Kuvhura pa kare nokonda dokulisiga-siga. Vamwe nampo kwa kara  nonkareso zokuligazara vene momudona ntani ukaro weparu lyawo. (Yisewe 15:15) Vamwe kukara nomagazaro gomadona morwa va kara noudigu woukanguki. Yi kare asi konda musinke, twa hepa kudiworoka asi yilye ogu ana tu harere tu lizuvhe ngoso. Yilye ogu ana tu harere asi tu dompe mutjima nokuhageka kukarera Jehova? Yilye ogu ana ku harere o lizuvhe asi o mudona ntani asi ngava ka kuzonagura po? (Ehor. 20:10) Age kuna kara Satana. Usili kuna kara asi yi kare asi kupitira mehomono lyokumona ndi lyokudira kumona, sitambo saSatana simwe tupu, sokutuninkisa tu kare nosinka nosesupika uradi wetu ntani nokutuninkisa tu hageke. Diworoka asi vantu vaKarunga kuna kurwa yita yopampepo!

15. Ngapi omu natu tokomena mokudira kudompa mutjima?

¹⁵ Wa ha pulisira yininke yangoso yi ku horokere. Demenena komfeto. Paurusa kwa tjangerere Vakriste womoKolinte asi: “Ose nokufa si unye. Nampili ga zonauke aga marutu getu, nye nomwenyo tadi kara nompe nkenye ezuva. Udigu wetu ou woureru wangapa katu popi, tau tu retere uyerere wanarunye, wokudira kuvhura kutanta.”—2 Kol. 4:16, 17.

16. Morwasinke ya wapera kuliwapaikira ngesi maudigu?

¹⁶ Ngomu tuna yi mono, Satana kuruganesa “makoto” gokulisiga-siga. (Efe. 6:11) Nkenye gumwe gwetu ga hepa kukwama epukururo lya kara mwa-1 Peturusa 5:9 eli asi: “Kareni muna koro mepuro, mu mu rwise.” Pokurugana oyo, twa hepa kuwapaika nondunge nomutjima gwetu pokulideura nyamwetu ngesi tu rugane youhunga. Moyifanekesa: Komeho yi ka horoke yita, vakwayita kuvadeura mokuvawapaikira yita. Mokulifana, ose kapi tuna diva  eyi ngayi ka hamena mo moyita. Eyi yiyo twa hepera kuliyomberesa. Ayo ya lifana novakwayita vaJehova wopampepo. Twa hepa kulideura unene paapa yina dili kuhoroka simpe. Mupositoli Paurusa kwa tjangerere Vakolinte asi: “Likonakoneni nsene asi mepuro muna kara; lihetekeni nyamweni.”—2 Kol. 13:5.

17-19. (a) Mononkedi musinke natu vhura kuliheteka nyamwetu? (b) Ngapi omu vanona nava liwapaikira mokukapopera epuliro lyawo kosure?

¹⁷ Mokulikonakona nyamoge, lipura mapuro aga asi: ‘Ame kukanderera narunye ndi? Nsene tani ligwanekere nomakondjeso govakaume, ame kulimburukwa unene Karunga kupitakana vantu ndi? Ame kuza komapongo nkenye apa ndi? Ame kuuyunga nouradi kuhamena eyi na pura ndi? Ame kuhetekera ko kulididimikira mapuko govapuli vakwetu ngwendi moomu ava yi rugana awo ndi? Ame kulimburukwa kowo ava pitisire mombungakriste zetu ntani ava ava pitisire nombungakriste mouzuni mudima ndi?’

¹⁸ Ose kwa tu kundurukida vantu ava ava hetekere ko kupukisa magazaro getu. Sinzi sovanavazinyetu kuuyunga nouradi kosure kuhamena epuliro lyawo. Awo kapi ava lifu nomuga ndi va kare nowoma mokuyirugana oyo. Yisinke ya vatera vadinkantu owo va uyunge nouradi? Awo kuruganesa magano aga ava gwana moyifo yetu. Pasihonena, Awake! zaPembankuru 2009 kwa gava egano asi nsene munasure mukweni a ku pura asi: “Morwasinke wa dilira kupura melisinto? Kuvhura o uyunge asi: “Morwasinke nani pulira melisinto? Vadiviunsitwe kapi va yi kwatesa ko, nampili ngomu va kara asi va diva yoyinzi!” Vakurona, diviliseni asi mu zogere novana veni nonkedi omu nava vhura kupopera epuliro lyawo yipo va kare vana liwapaikire mokukayirugana kosure.

¹⁹ Yosili, kapisi ureru kuuyunga kuhamena eyi twa pura ndi yininke yimwe eyi ana tu harere Jehova tu rugane. Pasihonena, konyima zoyirugana ezuva nalinye, twa hepa kulisininika nyamwetu mokuza kepongo. Ndi kuvhura yi kare udigu mokupinduka ngurangura tu ze moyirugana yokuzuvhisa. Nye diworoka asi: Nsene o yika kurugana yininke oyo, ove ngo kara ono liwapaikire apa ngo ligwanekera nomaudigu gomanene aga gana kara komeho.

20, 21. (a) Ngapi omu kuteda ko kosizoweseso ayi tu vatere tu funde po madompeso? (b) Yisinke tuna tokomene kurugana?

²⁰ Ngapi kuhamena mahomono gemehoramo? Pasihonena, ngapi omu natu funda po madompeso? Nkedi zimwe zomulyo po natu vhura kuyirugana oyo kuna kara pokuteda ko konzambo zaJesus zosizoweseso. Eyi yiyo ga rugene mupositoli Paurusa. Poyiruwo yimwe kwa lizuvhire ngwendi kwato mulyo. Nye ga yi divire asi Jesus kwa fira vananzo kapisi vantu wokusikiliramo. Age kwa tjenge asi: ‘Ogu ga hara nge, yiyo ga gavera nge mwenyo gwendi panzambo.’ (Gar. 2:20) Paurusa ga tambwire sizoweseso ntani nokuyipura asi nage sa mu zowora.

²¹ Nove kuvhura o gwanene mo uwa nsene o yi tambura asi sizoweseso kuna kara uhwi wokutunda kwaJehova ou wa ku zowora. Eyi kapi yina kutanta asi madompeso ngaga dongonoka po usimbu-simbu. Vamwe va hepa kulididimikira madompeso poyiruwo noyiruwo dogoro ngau wize uzuni woupe. Diworoka asi: Mfeto kwa hamena tupu kowo ava lididimikire. Nkenye ezuva siruwo kuna kuhedera pepi apa Uhompa waKarunga ngau retesa po mbili pevhu ntani nokukatengwidira vantu wovalimburukwi kokusikilira mo. Tokomena mokukahwilira moUhompa owo, nampili o pite momaudigu gomanzi ngesi.