1. Muloñadi lukadi chilwabulaña kuhayamisha ambuña Nzambi?

 KOMANA kwiluka nenu mwatela kumona “lukadi lwaluvulu” henohu kanda muheti wumi wahaya nyaka kwayihayamishaña? Hadaha kwayihayamishaña wanyi. Chili wudi kambuña Yehova wamuha muchalala hela wunashimbuli muchalala, weluka neyi mukaayi kaSatana mwekala makabi.—Chim. 12:12.

2. (a) Kubombela hamakabi amonaña antu ejima abula kuwanina, lukadinyi lwambukaku lwamonañawu akwaKristu? (Talenu mwevulu wakutachikilahu.) (b) Hinyi wakojejaña lukadi lutwamonaña, nawa tweluka ñahi?

² Kubombela hamakabi amonaña ‘antu ejima,’ dikwila nawu kukala kwakabishaña antu ejima abula kuwanina, akwaKristu amonaña cheñi lukadi lwambukaku. (1 Kor. 10:13) Hilukadinyi? Ayidimbululaña chikupu muloña afwilaña kwovwahila nshimbi jaNzambi. Yesu wayilejeli atumbanji twindi nindi: “Nduñu habadikaña nkaka yinduku. Chankabishiluwu ami, ninenu nawa akayikabisha.” (Yow. 15:20) Hinyi wakojejaña makabi wenawa? Chakadi  nikujina, hiSatana atenañawu muBayibolu nawu wudi neyi “mutupa wabulumaña” ‘wakeñakeñaña kudya’ antu jaNzambi. (1 Pet. 5:8) Satana wazatishaña njila jidi jejima kulonda yafumpi kashinshi kawatumbanji twaYesu. Shinshikenu chuma chamumwekeneni kapostolu Pawulu.

3-5. (a) Pawulu wamweni lukadinyi muLisitira? (b) Indi mazu aPawulu ahosheliyi halukadi lwakumbidi akolesheli ñahi atumbanji?

³ Pawulu amukabishili kakavulu kukola chikuhwelelu chindi. (2 Kor. 11:23-27) Amukabishili muLisitira. Hanyima yakuuka muntu wadiña chifwayi kufuma hakuvwalika, Pawulu niibwambu dindi Baranaba ayihamekeli neyi akishi. Pawulu naBaranaba alembeleli izaza dazañaleli nawu dileki kudifukula kudi wena. Chakubula nikuumba mpinji, aYudeya akwakudimbulula enjili nakuhosha nsañu yakuyitwambila aPawulu naBaranaba. Izaza detejeli mwatwambiluwu aYudeya. Antu atachikili kumwasa Pawulu malola nakumushiya nawu nafwi.—Yil 14:8-19.

⁴ Hanyima yakwendela musumba waDeribi, aPawulu naBaranaba ‘afuntili cheñi kuLisitira, nikuIkoniyumu, nikuAntiyoki. Hiyakukolesha atumbanji nakuyikonkomwena nawu akakeli muchikuhwelelu, nawu kwiñila muWanta waNzambi chiña tusambila kumona lukadi lwaluvulu.’ (Yil 14:21, 22) Awa mazu hiyanateli kumwekana neyi akukolesha antuku. Kafwampi, nhoshelu yakwila nawu kumona “lukadi lwaluvulu” yinateli kuneñesha antu, bayi kuyikoleshaku. Hanu dinu, aPawulu naBaranaba ‘akolesheli ñahi atumbanji’ namazu akutena halukadi lwaluvulu?

⁵ Tunateli kuwana ñakwilu neyi tushinshika nakanañachima mazu ahosheliyi Pawulu. Hahosheli hohu nindi: “Chiña tuumika lukadi lwaluvuluku.” Ilaña wahosheli nindi: ‘Kwiñila muWanta waNzambi chiña tusambila kumona lukadi lwaluvulu.’ Dichi Pawulu wayikolesheli atumbanji kuhitila mukukonkomwena hayuma yayiwahi yafumaña mukwikala washinshika. Iwu wuloku wadiña walala. Eñañi, Yesu wahosheli nindi: ‘Muntu wakomika nikunsa diyi wakahanda.’—Mat. 10:22.

6. Wulokwinyi wukatambwila antu omikaña?

⁶ Neyi tuumika akatwinka wuloku. AkwaKristu awayishewa akatambwila wuloku wawumi wabulaña kufwa mwiwulu nawa akayuulaña hamu naYesu. “Anyikoku acheñi” akatambwila wumi wahaya nyaka hamaseki ‘hakekala kuloña.’ (Yow. 10:16; 2 Pet. 3:13) Neyi chahosheliyi Pawulu, chayinu mpinji tukumonaña lukadi lwaluvulu. Shinshikenu lukadi luyedi lutunateli kumona.

7. Lukadinyi lutwatela kutena netu kulukuka kwamwekanaña hatooka?

⁷ Yesu washimwineñahu dehi nindi: ‘Akayitwala muyota, akayetela nimumasinagogi; mwakemana kumesu awanguvulu nawanyanta.’ (Maku 13:9) Awa mazu anakumwekesha nawu akwaKristu amakwawu akamona lukadi kuhitila mukuyeta, hadaha nikuyitwambila kudi anlomboli amukwitiya hela akapolitiki. (Yil. 5:27, 28) Shinshikenu cheñi chakutalilahu chaPawulu. Komana watiyili woma chelukiliyi nindi akamukabisha munjila yamuchidiwu? Kwakulehi.—Tañenu Yililu 20:22, 23.

8, 9. Indi Pawulu wamwekesheli ñahi nindi wafwilileña kuumika, nawa amana kwetu amakonu omikaña ñahi?

⁸ Pawulu walwishili kulukuka kwaSatana kwamwekanaña hatooka nakuhosha nindi: ‘Wumi wami hinawumoni kulemaku mwaka niwukeñi; chakala nakamanishi njila yami, nimudimu wanyinkeliyi Mwanta Yesu kukalakala, nikushimuna nsañu yayiwahi yaluwi lwaNzambi.’ (Yil. 20:24) Mwamweni, Pawulu hatiyili woma chelukiliyi nindi wukamona lukaduku. Ilaña, wafwilileña kuumika hichikweti muloña nakukala kwamweniyuku. Washili muchima ‘hakushimwina wunsahu chikupu’ hela chakwila wamweni lukadi.

 ⁹ Makonu, amana kwetu niahela amavulu niwena omikaña. Chakutalilahu, mwituña dimu aYinsahu anomiki kwakwihi nayaaka 20 nakuyisha mutuleya muloña wakubula kudiñija munsañu yamatuña nachiyuulu. Nsañu yawu ayitwalili kuchota wanyi, muloña munidi ituña himwekala nshimbi yahosha hadi antu akaanaña kwiñila wushidikaku. Hampinji yadiñawu mukaleya, ayitejeli wanyi kuyendela chili kudi antaña jawu, nawa atuyili amakwawu ayeteleña nikuyikabisha munjila jashiyashana.

10. Muloñadi wutwatela kubulila kuchiina lukadi lwamwekanaña mukukasumwisha?

¹⁰ Amana kwetu kumatuña amakwawu omikaña lukadi lwamwekanaña chakukasumwisha. Neyi chuma chamuchidiwu chiyimwekena, bayi mutiya womaku. Toñojokenu chuma chamumwekeneni Yosefu. Amulandishili muwuduñu, ilaña Yehova ‘wamupulwishili mumakabi indi ejima.’ (Yil. 7:9, 10) Yehova nateli kuyilila chuma chochimu. Bayi mulalamena nenu ‘Yehova weluka kupulwisha antu amwakamaña kufuma mukwesekaku.’ (2 Pet. 2:9) Komana mukutwalekahu kumukuhwelela Yehova chineli muneluki nenu nateli kuyipulwisha mukanu kaayi katama nikuyinka wumi wahaya nyaka muchiyuulu chaWanta windi? Mwatela kumukuhwelela Yehova nikuumika lukadi chakadi woma.—1 Pet. 5:8, 9.

11. Munjilanyi kulukuka kwaSatana kwabulaña kumwekana chikwambukilaku nakulukuka kwamwekanaña hatooka?

¹¹ Lukadi lukwawu lutunateli kumona hikulukuka kwabulaña kumwekana. Iku kulukuka kwambukaku ñahi nakulukuka kwamwekanaña hatooka kudi neyi lukadi lwakutweta? Kulukuka kwamwekanaña hatooka kudi neyi kankundunkundu keneni kahitaña mumukala nakukisañana itala denu hohenohu. Kulukuka kwabulaña kumwekana kudi neyi mukanka wamakenyi watachikaña kudya chipamba chepulanga chetala denu chovu-chovu sampu nichidikuhumuka. Muntu nateli kwiluka wanyi iku kulukuka kwabulaña kumwekana sampu yuma yinatami.

12. (a) Kafutanyi kakwawu kazatishañayi Satana, nawa muloñadi wukazatikilaña chiwahi? (b) Indi kudishona kwamuleñeleli Pawulu kutiya ñahi?

¹² Satana nakukeña kukisañana wulunda weyi naYehova, chili nakuzatisha kulukuka nalukadi lwamwekanaña hatooka hela kudya chikuhwelelu cheyi chovu-chovu kuhitila mukulukuka kwabulaña kumwekana. Kafuta kazatishañayi Satana chiwahi hikudishona. Kapostolu Pawulu niyena wetejeli nindi mpinji yikwawu wadishoneneña. (Tañenu Aroma 7:21-24.) Hanu dinu, muloñadi Pawulu wadiña wakola kuspiritu nawa watela wadiña mwizanvu dalombolaña datachi chaditeneniyi nindi “ami nshona”? Pawulu wahosheli nindi watiyileña mwenimu muloña wadiña wabula kuwanina. Wakeñeleña chikupu kwila yuma yaloña ilaña chamukalilili. Neyi mpinji yikwawu watiyaña muniyi njila, komana hiwatiyaña kuwahaku hakwiluka neyi kapostolu Pawulu niyena wamweni kukala kwokumu?

13, 14. (a) Chumanyi chakojejaña antu jaNzambi amakwawu kudishona? (b) Hinyi wakeñaña kukisañana chikuhwelelu chetu, nawa muloñadi?

¹³ Mpinji yikwawu, amana kwetu niahela amavulu adishonaña, kwakamena, hadaha nikutiya neyi ashikilamu wanyi. Chakutalilahu, payiniya wadikita itukutena netu Deborah wahosheli nindi: “Kapampa kakavulu natoñojokaña hayiluwa yinakoñi nikudimona neyi nashikilamu wanyi mpinji yejima. Neyi nitoñojoka hayuma yejima yinaluwañesheli, yinateli kunleñela kutiya neyi kwiji kwosi muntu wunateli kunkeña hela tuhu Yehova.”

¹⁴ Chumanyi chaleñela ambuña Yehova amakwawu adikita adi neyi Deborah kuneña? Kwekala yuma yayivulu yayileñela kutiya muniyi njila. Antu amakwawu ekala nachaaku chakudimona munjila yatama niyuma yayimwekenaña muchihandilu. (Yish. 15:15) Amakwawu, anateli kwikala nayitoñojoka yatama muloña  akweti yikatu yayileñelaña kuneña. Hichikweti muloña nachuma chayileñelaña kutoñojoka hayuma yatamaku, twatela kwanuka netu kudi muntu wakeñaña nindi twikali nayitoñojoka yamuchidiwu. Hinyi wakeñaña nindi tudishoneña chakwila tuleki nikumukalakela Yehova? Hinyi wakeñaña nindi wutiyeña neyi hiwukweti kuchiñejaku, muloña niyena akamujaha? (Chim. 20:10) Wacheñi kwosi, Satana diyi. Walala wudi wakwila nawu, chili nazatishi kulukuka kwamwekanaña hatooka hela kwabulaña kumwekana hatooka, kafuta kaSatana kekala kokamu, wakeñaña nindi twakameneña, nikubula kwikala neyena kulonda tuleki kumuzatila Nzambi. Bayi mudidimbaku, antu jaNzambi alwaña njita kulonda ahembi kashinshi kawu kudi Yehova.

15. Tunateli kumwekesha ñahi netu twafuukulahu kubula kudishona?

¹⁵ Bayi muzeya nakulwa njitaku. Twalekenuhu kushinshika hawuloku. Pawulu wayisonekeleli akwaKristu amuKorinda nindi: ‘Dihu hafuma kubula kuzeya; muloña hela muntu wetu wahanzi wudi nakuya nakunoña, muntu wetu wamukachi wudi nakuya nakubalumuka wamwiha hefuku hefuku. Muloña lukadi lwetu lwakatataka lwapepela, lwatukoñelaña lubanji lwakulema kwahaya nyaka lwakubadika nankashi.’—2 Kor. 4:16, 17.

16. Muloñadi chichalemena kudiloñesha yinu mpinji halukadi ludi kumbidi?

¹⁶ Neyi chitunamoni, Satana wukweti ‘tufuta’ twatuvulu twazatishañayi. (Efwes. 6:11) Wejima wetu twatela kulondela kufumba kwekala ha 1 Petulu 5:9 kwakwila nawu: “Dikañenu nindi, nakukola mukukuhwelela kwenu mbe.” Hakwila twili mwenimu, twatela kuloñesha yitoñojoka nimuchima wetu kulonda twinjilili kwila yuma yaloña yinu mpinji. Chakutalilahu: Henohu kanda ayi nakulwa njita, amashidika ayidizishaña chiwahi kulonda adiloñeshi  chakulwa. Niamashidika aYehova adiloñeshaña munjila yoyimu. Tweluka wanyi njita yitwakalwa kumbidi. Dichi chikusweja kuwaha neyi tudiloñeshela chadimu yoyinu mpinji yikuchidi kwamwena. Pawulu wayisonekeleli Akorinda nindi: ‘Desekenu ntahi, mutali neyi mudi nachikuhwelelu; dishinshikenu.’—2 Kor. 13:5.

17-19. (a) Munjilanyi mutunateli kudeseka etu aweni? (b) Indi atwansi anateli kudiloñesha ñahi kulonda ahakwiluku yuma yakuhwelelawu neyi adi hashikola?

¹⁷ Tunateli kwovwahila iku kufumba kwaPawulu neyi tudishinshika etwaweni chikupu. Dihulenu malwihu adi neyi: ‘Komana nakakelaña mukulomba? Neyi akwetu ankakeja kwila yuma yatama, komana namwovwahilaña Nzambi neyi nyuuli kubadika antu? Komana nayaña kukupompa kwawakwaKristu mafuku ejima? Komana nahoshaña hayuma yinakuhwelela chakadi woma? Komana nanakenaña akwetu akwakwitiya yiluwa yawu neyi chañanakenañawu ninami? Komana novwahilaña antu alombolaña muchipompelu chetu ninana alombolaña yipompelu yamukaayi kejima?’

¹⁸ Ilukenu nenu awa malwihu ayedi anakuhosha hakuhakwilaku yuma yitwakuhwelela chakadi woma nikuumika ikakeja. Atwansi amavulu elaña mwenimu neyi adi hashikola. Hiyatiyaña woma hela kutiya nsonyi hakuhosha yuma yakuhwelelawuku. Ilaña ahoshaña chakadi woma. Mumagazini etu mwekala njila jinateli kukwashana hansañu yamuchidiwu. Chakutalilahu, Awake! yaJuly 2009 yashimuna nawu neyi mukwenu mukashikola nakukwihula nindi: “Muloñadi chiwabulila kukuhwelela neyi yuma yadileñeli yayeni?” wunateli kwakula neyi: “Muloñadi wunatela kukuhwelela nami yuma yadileñeli yayeni? Asayantisiti hiyaditejaña haniyi nsañuku, henohu ahoshaña nawu diwu ankuluñaña!” Anvwali, hitulukenuña muyuma yimwadizishaña anyanenu kulonda elukeña chakwakula neyi amona ikakeja damuchidiwu kudi akwawu akashikola.

¹⁹ Hela chochu, chapela wanyi kuhakwilaku yuma yitwakuhwelela hela kwila yuma yikwawu yatulejañayi Yehova. Hanyima yakuzata maora amavulu kumudimu, twatela kudinkaku hakwila tuyi nakupompa. Kuhinduka budidi nakuya mumudimu wakushimwina chakeñekaña kudinkaku hakwila nawu tufumi mukadidi. Ilaña anukenu nenu: Neyi mwikala nachaaku chakwila iyi yuma chayinu mpinji, mukazeya wanyi chimukamona kukala kweneni kumbidi.

20, 21. (a) Indi kutoñojoka hefutu danyiloña kunatweshi kutukwasha ñahi kuumika yitoñojoka yatama? (b) Chumanyi chitwatela kufuukulahu halukadi lutwamonaña?

²⁰ Chumanyi chitunateli kwila nakulukuka kwabulaña kumwekena? Chakutalilahu, chumanyi chinateli kutukwasha kulonda tuleki kudishona? Njila yimu yasweja kulema yinateli kutukwasha hikutoñojoka hefutu danyiloña. Chumichi dichi chelili kapostolu Pawulu. Welukili nindi mpinji yikwawu watiyileña neyi hinshona. Ilaña welukili cheñi nindi Kristu hafwilili antu awaninaku, ilaña wafwilili akwanshidi. Pawulu wadiña hakachi kanana akwanshidi. Kafwampi wasonekeli nindi: ‘Nahandaña nakukuhwelela kwaMwana kaNzambi, wankeñeli, wadiheni kunkoolami.’ (Ŋal. 2:20) Eñañi, Pawulu wetejeli ifutu danyiloña. Welukili nindi ifutu danyiloña damukwashili chikupu.

²¹ Neyi twikala nayitoñojoka yoyimu yakumona ifutu danyiloña netu hichawana chatwinkawu kudi Yehova halwetu, chumichi chikutukwasha hama. Chumichi hichinayi mukwila nawu kudishona kukumana hohenohuku. Etu amakwawu tukatwalekahu kulwisha iku kulukuka kwabulaña kumwekana sampu tuneñili mwituña dadiha. Ilaña anukenu nenu: Antu abulaña kuzeya diwu akatambwila wuloku. Tudi dehi kwakwihi nefuku dalema dikaleta Wanta waNzambi, kuwunda nikuleñela antu ejima ashinshika kwikala awanina cheñi. Fuukulenuhu chikupu kwiñila muWanta hela chakwila twamonaña lukadi lwaluvulu.