1. Dahme kahrehda sapwellimen Koht ladu kan pahn lelohng “soangen kahpwal tohto”?

 IA DUWE, kitail kin pwuriamweiki me kitail pahn lelohng “soangen kahpwal tohto” mwohn atail ale kisakis en mour soutuk? Mwein soh. Sohte lipilipil uwen werei atail miehier nan padahk mehlel, kitail koaros kin lelohng soangen kahpwal kan. Dahme kahrehda? Ehu kahrepe iei me kitail mi nan ahn Sehdan sampah.​—Kaud. 12:12.

2. (a) Soangen kahpwal dah kan me Kristian kan kin lelohng likin kahpwal me aramas soh unsek koaros kin ahneki? (Menlau kilang tepin kilel.) (b) Ihs me kin kahrehda kalokolok, oh ia duwen atail ese met?

² Aramas soh unsek koaros kin lelohng kahpwal kan nan arail mour. Ahpw pil mie soangen kahpwal teikan me Kristian kan kin lelohng. (1 Kor. 10:13) Ehu soangen kahpwal me re kin lelohng iei kalokolok laud pwehki arail koasoanehdi teng en kolokolte arail loalopwoat ong Koht. Sises mahsanihong sapwellime tohnpadahk kan: “‘Sohte ladu men kin laudsang eh soumas.’ Ma irail kalokeieier, re pil pahn kalokei kumwail.” (Sohn 15:20) Ihs me kin kahrehda  soangen kalokolok pwukat? Sehdan. Paipel mahsanih me e duwehte “laion emen me kin weriwer, raparapahki ihs me e pahn kadallehla,” me iei sapwellimen Koht aramas akan. (1 Pit. 5:8) Sehdan pahn doadoahngki soahng koaros me e kak pwehn kauwehla atail lelepek ong Siohwa. Kitail pahn kilang dahme wiawiong wahnpoaron Pohl.

3-5. (a) Soangen kahpwal dah me Pohl lelohng nan Listra? (b) Ia duwen eh lokaia ko me pid kahpwal kan eh kakehlakahda tohnpadahk ko?

³ Pwehki eh loalopwoat ong Koht, pak tohto Pohl kin lelohng kalokolok. (2 Kor. 11:23-27) Ehu pak, nan kahnimw en Listra, Pohl kamwahwihala ohl emen me sohte kak alu. Pwehki manaman wet, aramas ako medewe me Pohl oh Parnapas wia koht kei. Ira anahne peki rehn pokono ren dehr kaudokiong ira. Ahpw sohte pwand, kaun en pelien lamalam en Suhs ko leledo wasao oh tepida kauwe Pohl oh Parnapas. Pokono kamehlele koasoi likamw pwukat. Irail eri kate Pohl lao re leme me e melahr.​—Wiewia 14:8-19.

⁴ Mwurin ara mwemweitla nan kahnimw en Derpe, Pohl oh Parnapas “pwuralahng Listra, oh douluhllahng Aikoniomw oh Andiok en Pisidia. Ira eri kakehlakahda me pwoson akan, oh koangngoangehkin irail en loalopwoatohngete arail pwoson. Ira eri nda, ‘Kitail uhdahn pahn powehdi soangen kahpwal tohto pwe kitail en kak pedolong nan Wehin Koht.’” (Wiewia 14:21, 22) E sohte pahn kaperen ong irail en medewe me irail pahn lelohng “soangen kahpwal tohto.” Eri ia duwen Pohl oh Parnapas ara “kakehlakahda me pwoson akan” ni ara ndaiong me arail kahpwal kan pahn laudla?

⁵ Kitail kak diar pasapengo sang dahme Pohl nda. E nda: “Kitail uhdahn pahn powehdi soangen kahpwal tohto pwe kitail en kak pedolong nan Wehin Koht.” E sohte ndahte: “Kitail anahne dadaur pahn kahpwal tohto.” Ahpw, Pohl kasalehda ni sansal duwen keting kaselel ong irail kan me kin kolokol arail lelepek ong Koht. Keting wet kaidehn ouraman ehu. Sises mahsanih: “Me pahn dadaurete lel ni imwi, ih me pahn mourla.”​—Mad. 10:22.

6. Keting dah me pahn kohwong irail kan me kin lelohng kahpwal?

⁶ Ma kitail dadaurete pahn kahpwal kan, kitail pahn ale ketingpatail. Ong Kristian keidi kan, ketingparail iei en ahneki mour me sohte kak mehla nanleng rehn Sises nin duwen nanmwarki kei. Ong “sihpw teikan,” ketingparail iei mour soutuk nin sampah popohl ehu. (Sohn 10:16, NW; 2 Pit. 3:13) Ahpw ahnsou wet, kitail pahn lelohng “soangen kahpwal tohto.” Kitail pahn koasoiapene soangen kahpwal riau me kitail ele pahn lelohng.

7. Soangen kalokolok dah kan me kin sansal?

⁷ Sises ketin kohpada: “Aramas akan pahn salihkumwaildi oh pangkumwaillahng ni mwoalen kopwung kan. Kumwail ahpw pahn wowoki nan sinakoke kan; kumwail pahn wisikdohng mwohn kaun akan oh nanmwarki kan.” (Mark 13:9) Eri Sises mahsanih me ekei Kristian kan pahn lelohng kalokolok kan me sansal. Ekei pak, kaun en pelien lamalam kan de kaun en koperment kan ele pahn kahrehda kalokolok pwukat. (Wiewia 5:27, 28) Pwurehng medewe kahlemeng en Pohl. Ia duwe, e masakada soangen kalokolok pwukat? Uhdahn soh.​—Wadek Wiewia 20:22, 23.

8, 9. Ia duwen Pohl eh kasalehda me e koasoanehdi teng en dadaurete? Ia duwen ekei brother kan ar dadaur pahn kalokolok kan me sansal rahnpwukat?

⁸ Ni eimah, Pohl pelianda ahn Sehdan kalokolok kan oh nda: “I sohte katapaniki ei mour; ihte I men kapwaiada pwaisei doadoahk me Kaun Sises ketikihong ie, me iei I en kalohkiseli Rongamwahu duwen kalahngan en Koht.” (Wiewia 20:24) Pohl sohte masak eh lelohng kalokolok kan. E koasoanehdi teng en  dadaurete. Eh mehn akadei iei en “kalohkiseli” rongamwahu mendahki eh kin lokolongki kahpwal kan.

⁹ Rahnwet, riatail Kristian tohto kin kolokolte arail lelepek erein ahnsoun kalokolok. Nan ehu sahpw, ekei Sounkadehde kan mihmikiher nan imweteng kereniong sounpar 20 ahpw re sohte ale mweimwei en repen pwung. Dahme kahrehda? Pwehki re sohte kin iang pidada mwekid kan en koperment. Sohte mweimwei arail peneinei en kohla mwemweit rehrail nan imweteng oh ekei me selidi ko ale kamakam oh kalokolok laud.

10. Dahme kahrehda kitail en dehr masak kahpwal kan me kitail sohte kasik?

¹⁰ Nan ekei wasa, riatail Kristian kan kin dadaur kahpwal kan me wiawihong irail ni arail sohte kasik. Ma met wiawihong uhk, dehr mweidohng omw masak en poweiukedi. Tamataman Sosep. Rie ko netikihla ih pwe en wiahla lidu men ni eh sohte kasik. Ahpw Siohwa “ketin doarehla sang nan kahpwal akan koaros.” (Wiewia 7:9, 10) Siohwa pil kak ketin doareiukala. Tamataman ahnsou koaros me Siohwa “ketin mwahngih kapitasang me poadidi kan nan ar apwal akan.” (2 Pit. 2:9) Ke ahneki kahrepe mwahu ken likih Siohwa oh eimah dadaur pahn kalokolok. Koapworopworki me Siohwa kak ketin doareiukala sang sampah suwed wet oh ketikihong uhk mour soutuk.​—1 Pit. 5:8, 9.

11. Ia duwen kalokolok kan me sohte sansal ar weksang kalokolok kan me sansal?

¹¹ Ele kitail pil anahne dadaur pahn kalokolok kan me sohte sansal. Ia duwen kalokolok pwukat eh weksang soangen kalokolok kan me sansal? Kalokolok kan me sansal kin duwehte melimel ehu me wiawi ni soh kasikpe oh mwadangete kauwehla imwomwo. Ahpw kalokolok kan me sohte sansal kin duwehte loangenmwet kan ar kin ekisekis kauwehla tuhkehn imwomwo. Ni ahnsou me ke tehkada dahme loangenmwet ko wiahda, e pwandalahr pwehki ihmwo kereniongehr pwupwudi.

12. (a) Ia ehu soangen kalokolok me sohte sansal me Sehdan kin doadoahngki, oh dahme kahrehda e kin pweida mwahu? (b) Dahme kahrehda Pohl ahneki pepehm en mworusala?

¹² Sehdan kin men kauwehla omw nanpwungmwahu rehn Siohwa. Ele e kin doadoahngki kalokolok kan me sansal de kalokolok kan me sohte sansal. Ehu wiepen kalokolok kan me sohte sansal me e kin doadoahngki me keieu pweida mwahu iei pepehm en mworusala. Dahme kahrehda? Pwehki pepehm en mworusala kak ekisekis kauwehla atail nanpwungmwahu rehn Koht. Ekei pak, wahnpoaron Pohl kin mworusala. Ehu pak, e pil ndahki pein ih me ih “uhdahn aramas paisuwed men.” (Wadek Rom 7:21-24.) Dahme kahrehda Pohl kakete ahneki pepehm en mworusala? E seu ahneki nanpwungmwahu rehn Siohwa oh iang kisehn pwihn me kin apwalih mwomwohdiso pwon ahnsowo? Pohl ahneki pepehm pwukat pwehki eh soh unsek kan. E men wia dahme pwung ahpw e sohte kin mengei ahnsou koaros. Eri ma ke ahneki soangen pepehm pwukat, e mwahu en ese me Pohl pil ahneki soangen kahpwal kohte.

13, 14. (a) Dahme kahrehda ekei sapwellimen Koht aramas akan kin mworusala? (b) Ihs me men atail pwoson en ohla, oh dahme kahrehda?

¹³ Ekei pak, brother oh sister tohto ahneki pepehm en mworusala, pwunod, oh mwein re pil pehm me sohte kateparail. Karasepe, emen sister me wia pioneer ngoang men nda: “I kin pwurepwurehng medemedewe duwen sapwung ehu me I wiahda oh kin mworuskihla ahnsou koaros. Ni ei medewe duwen soahng koaros me I wiahda sapwung, e kak kahrehiong ie en pehm me sohte emen kak poakohng ie, pil kaidehn Siohwa.”

¹⁴ Dahme kahrehda ekei sapwellimen Siohwa ladu kan me kin kasalehda ngoang, duwehte sister menet, kin mworusala? Ele mie kahrepe  tohto. Mwein pwehki arail medewehki pein irail de arail irair en mour sohte kin mwahu. (Mel. 38:8) Ekei ele kin nsensuwed pwehki mie arail soumwahu me kahrehda soangen pepehm pwukat. Sohte lipilipil soangen kahrepe dah, tamataman ihs me men doadoahngki soangen pepehm pwukat pwehn uhwong kitail. Ihs me men kahrehda kitail en uhdahn nsensuwedla oh uhdihsang papah Siohwa? Iei Sehdan. E koasoandier me e pahn mehla oh e men ken pil pehm me sohte omw koapworopwor. (Kaud. 20:10) Sehdan men kapwunode kitail oh kaluwetehla atail ngoang. Sohte lipilipil ma e doadoahngki soangen kalokolok kan me sansal de sohte sansal, eh mehn akadei iei me kitail en uhdihsang atail papah Koht. Dehr manokehla, sapwellimen Koht aramas akan kin wie mahmahwen pwehn pere arail lelepek ong Siohwa.

15. Nin duwen me 2 Korint 4:16, 17 kasalehda, dahme kitail en koasoanehdi teng en wia?

¹⁵ Ken koasoanehdi teng en dehr uhdi peiki omw pwoson. Kilangwohngete keting me mi mwowe. Pohl ntinglahng Kristian kan nan Korint: “Ih met kahrepen at sohte kin loaltikla. Pwe ma paliwarat kin luhluwetala, a [“loalat,” NW] kin kekehlailla rahn koaros. Pwe kisin apwal tikitik wet me se lokolongki, pahn kahrehiong kiht lingan soutuk oh lapalap ehu, me siksang mehlel apwal akan en sampah.”​—2 Kor. 4:16, 17.

16. Dahme kahrehda e kesempwal kitail en kaunopada met ong kahpwal kan?

¹⁶ Mie soangen “widing suwed” tohto me Sehdan kin doadoahngki pwehn uhwong kitail. (Ep. 6:11) Ihme kahrehda kitail en idawehn kaweid en 1 Piter 5:9 me mahsanih: “Kumwail tengeteng ni amwail pwoson oh kehlail ong ih.” Pwe kitail en tengeteng, kitail anahne kaunopada atail madamadau oh mohngiong met pwe kitail en onopada oh men  wia dahme pwung. Pwehn karasahda: Ahnsou laud mwohn sounpei kan ar kin kohla mahwen, irail kin ale kaiahn tohrohr pwehn kaunopada irail ong mahwen. Met pil duwehte kitail. Kitail sohte ese soangen mahwen dah me kitail pahn wia ni ahnsou kohkohdo. Eri kitail anahne kaiahn laud ahnsou wet ni eh wie meleileite. Wahnpoaron Pohl kangoange Kristian kan: “Kumwail kalelapak oh wia keseupen pein kumwail ma kumwail weweidki pwoson.”​—2 Kor. 13:5.

17-19. (a) Ia duwen atail kak wia keseupen pein kitail? (b) Ia duwen me pwulopwul kan ar kin kaunopada pwehn pere arail pwoson nan sukuhl?

¹⁷ Ehu ahl me kitail kak idawehn ahn Pohl kaweid iei en wia keseupen pein kitail oh idek soangen peidek pwukat: ‘I kin kaukaule kapakap? Ni meteikan ar kangoange ien wia dahme sapwung, I kin peikiong Koht nin duwen ei kaun a kaidehn aramas? I kin kaukaule iang towehda mihting kan? I kin eimah en koasoia dahme I kin kamehlele? I kin mahkohng sapwung kan me riei Kristian kan wiahda, duwehte ei men irail en mahkohng ie? I kin peikiong elder kan nan ei mwomwohdiso oh pil irail kan me kin apwalih mwomwohdiso kan sampah pwon?’

¹⁸ Kitail mi nanpwungen aramas akan me kin song en wekidala atail madamadau. Brother oh sister pwulopwul tohto nan sukuhl kin anahne ni eimah koasoia duwen dahme irail kamehlele. Oh re sohte kin namenengki de masak en wia met. Dahme sewese me pwulopwul pwukat en koasoi ni eimah? Irail doadoahngki soangen sawas kan me dierek nan neitail kisin pwuhk kan. Karasepe, Kahn Iroir en November 1, 2010 kihda sawas me koasoia me ma emen tohnsukuhl kasonge iuk en simoak, ke kak ndahng, “Soh, menlau” oh pil nda, “I wiahki me ke me nohn loalokong oh sohte pahn simoak.” Pahpa nohno kan, kumwail tehk mwahu me kumwail en koasoiaiong noumwail seri kan ia duwen arail kak pere arail pwoson pwe re pahn onopada en wia met ni arail mi nan sukuhl.

¹⁹ Mehlel, e sohte kin ahnsou koaros mengei en uhki dahme kitail kamehlele de wia dahme Siohwa ketin kupwurki kitail en wia. Karasepe, mwurin atail doadoahk rahn ehu pwon, ele kitail anahne nantihong pwehn kohla iang mihting. De ele e kin apwal en pirida ni menseng pwehn kohla kalohk. Ahpw tamataman: Ma ke ahnla wia soahng pwukat ahnsou wet, ke pahn kaunopada ong kahpwal laud kan me pahn wiawi ni ahnsou kohkohdo.

20, 21. (a) Ia duwen atail doudouloale meirongo eh kak sewese kitail en powehdi atail pepehm en mworusala? (b) Dahme kitail anahne koasoanehdi teng en wia?

²⁰ Ahpw ia duwen kalokolok kan me sohte sansal? Karasepe, ia duwen atail kak powehdi atail pepehm en mworusala? Ehu ahl me keieu mwahu iei en doudouloale sapwellimen Sises meirong. Iei met me wahnpoaron Pohl wia. Ekei pak e kin uhdahn nsensuwed laud. Ahpw e ese me Krais ketin pwoula kaidehn ong aramas unsek ahpw ong me dipan kan duwehte ih. E ntingihedi: “I momourki sang ni ei pwoson sapwellimen Koht Iehroso, me ketin loalloale ie oh meirongkihong Koht pein ih pwehki ngehi.” (Kal. 2:20) Ei, Pohl pwoson meirongo oh kamehlele me meirongo kin kadoadoahk ong pein ih.

²¹ Ke pil kak paiekihda laud ma ke pwoson meirongo nin duwen kisakis ehu ong pein uhk sang rehn Siohwa. Met sohte wehwehki me pepehm en mworus pahn mwadang sohla mie. Ele ekei anahne dadaur soangen pepehm wet ekei ahnsou lao sampah kapw pahn leledo. Ahpw tamataman me ketingo pahn kohwong irail kan me sohte uhdihsang papah Koht. Rahn koaros kitail kin kerenlahng ahnsou me Wehin Koht pahn pweida. Ahnsou me met pahn wiawi, popohl pahn mi nin sampah oh aramas koaros pahn unsekla. Koasoanehdi teng pwe ken pedolong nan Wehio, mehnda ma ke anahne wia met ni omw lelohng kahpwal tohto.