1. ¿Tuku xlakata ni kaks lilakawankgo xlakskujnin Dios xlakata titaxtukgo taʼakglhuwit?

¿KAKS malakawaniyan pi xlakskujnin Dios pulana “lhuwa nalipatinankgo” xlakata namakglhtinankgo latamat nema ni kgalhi xlisputni? Max ni chuna. Maski makgasa tekgsnita xaxlikana takanajla o nina makgas, wix katsiya pi kgalhiyaw tapatin chu taʼakglhuwit kxkakilhtamaku Satanás (Apocalipsis [Revelación] 12:12).

2. 1) Xlakata lhuwa tuku tuwa nema putum titaxtukgo latamanin, ¿tuku atanu nema na lu tuwa titaxtukgo xlakskujnin Dios? (Kaʼakxilhti xapulana dibujo.) 2) ¿Tiku tlawa pi nakaputsastalanikan kstalaninanin Cristo chu tuku likatsiyaw?

² Na wi atanu tuku tuwa titaxtuyaw kstalaninanin Cristo, ni kajwatiya tuku putum «kalakgchin latamanin» makglakgalhinanin (1 Cor. 10:13, TNM). ¿Tuku uma? Wa lu lhuwa taputsastalanit nema patiyaw xlakata liwana kgalhakgaxmataw xlimapakgsin Dios. Jesús kawanilh xtamakgalhtawakgen: «Skujni, ni mpala wa ntlakg tlan namaxkikan nkakni, wa lantla xmalana. Lapi kintalatlawakanit nkit, na nakatalatlawakanatit» (Juan 15:20). ¿Tiku tlawa pi nakinkaputsastalanikanan? Wa Satanás. Biblia lichuwinan pi la «xatsinksni [león]» tiku putsa la “nakaway” kskujnin Dios (1 Ped. 5:8). Lhuwa tuku limaklakaskin xlakata namakgatsankgananiyaw Jehová. Kaʼakxilhwi tuku akgspulalh apóstol Pablo.

3-5. 1) ¿Tuku tuwa titaxtulh Pablo kListra? 2) ¿Tuku xlakata Pablo xkalimatliwakglhma natalan akxni xwan: “Talakaskin napatiyaw [...] lhuwa tapatin”?

³ Pablo makglhuwa putsastalanika xlakata xtakanajla (2 Cor. 11:23-27). Lakatum niku chuna titaxtulh anta kListra. Akxni xmapaksanitta chatum chixku tiku nila xtlawan lata akxni lakachilh, Pablo chu Bernabé lu kamalankika, la dioses kaʼakxilhka. ¡Xlakan kaskinikgolh latamanin pi ni xkakakninanika! Pero akxni chankgolh makgapitsi judíos tiku lixkajni tsukukgolh kalichuwinakgo Pablo chu Bernabé, tlawakgolh pi ni xkaʼakxilhputunka. ¡Lu lakapala lakgpalikgolh xtapuwankan! Lhuwa latamanin aktalamikgolh Pablo chu lakpuwankgolh pi xmakgnikgonit (Hech. 14:8-19).

⁴ Akxni xkilakgonitta kDerbe, Pablo chu Bernabé «titas[pi]tkgolh kListra, chu kʼIconio, chu kʼAntioquía. [Xmatliwakglhmakgo] limakgalhtawakgat, kstakyawamakgoka lantla natapalhinikgoy kxtakanajlakan, chu xwankgoy mpi na xlakaskinka napatiya[w] [...]lhuwa tapatin, lakimpi chuna nalitanuya[w] kxtapakgsin Dios» (Hech. 14:21, 22). Uma ni lilakgatit la xtakgaxmata. Akxni xwankgo pi talakaskin “napatiyaw [...] lhuwa tapatin”, uma tachuwin ni xmatliwakglhnan. ¿Tuku xlakata Pablo chu Bernabé xkalimatliwakglhmakgolh natalan akxni xkawanikgo pi xʼamakgolh patinankgo?

⁵ Xlakata naʼakgatekgsaw, liwana kaʼakxilhwi xtachuwin Pablo. Ni kajwatiya wa: «Talakaskin natayaniyaw lhuwa tapatin». Wata wa: “Talakaskin napatiyaw [...] lhuwa tapatin, lakimpi chuna nalitanuyaw kxtapakgsin Dios”. Xlichuwinama tuku xkitaxtulh komo xtayanikgolh tapatin. Tuku xʼamakgolh makglhtinankgo ni kaj tamanaxnat. Jesús xwanit: «Wanti lu[...] akgstitum nakilipawan asta akxni natitaxtukgoy yuma ni tlan kilhtamaku, pus wa xla tama nalakgmaxtuy [xlatamat]» (Mat. 10:22, Hua Xasasti Talaccaxlan, TXS, 1999).

6. ¿Tuku namakglhtinankgo tiku natayanikgo?

⁶ Komo natayaniyaw, namakglhtinanaw tuku tlan. Wantiku kalaksakkanit nema naʼankgo kʼakgapun nialhla nanikgo chu natamapakgsinankgo Jesús. Chu “amakgapitsi borrego”, nakgalhikgo latamat nema ni katikgalhilh xlisputni kKatiyatni niku «akgstitum nalatamakan» (Juan 10:16; 2 Ped. 3:13, TXS, 1999). Pero chuna la lichuwinalh Pablo, lhuwa tuku napatikgoyaw. Kaʼakxilhwi pulaktiy tuku patikgoyaw kstalaninanin Cristo.

7. ¿Tuku kilhchanima taputsastalanit?

⁷ Jesús wa: «Nakamakamastakgoyan kxpumapakgsinkan, chu kxpukgalhtawakgakan nakasnokgkgoyan; [...] nchu kxlakatinkan laktlanka mapakgsinanin, chu reyes, nakatasanikanatit» (Mar. 13:9). Chuna la wan uma texto, makgapitsi kstalaninanin Cristo xʼamaka kaputsastalanikan, max xlakata tiku pulalinkgo takanajla chu política chuna xlimapakgsinankgolh o xwankgolh taʼakgsanin xpalakatakan (Hech. 5:27, 28). Kalilakpuwamparaw tuku titaxtulh Pablo. ¿Pekualh akxni lakpuwa pi chuna xʼamaka putsastalanikan? Ni pekualh (kalikgalhtawakga Hechos 20:22, 23).

8, 9. 1) ¿La limasiyalh Pablo pi chuntiya xlakapastaknit natayani? 2) ¿La nachuna limasiyakgonit makgapitsi xlakskujnin Dios la uku?

⁸ Pablo ni xpekuan chu tayanilh tuku liputsastalanilh Satanás. Wa: «Ni mpala klakgkatsan nkilatamat nakniy, xman wa lapi xakmasputulh nkintaskujut lu[...] nakpaxuwaj, chu wa ntu nkintililaksakli ntaskujut nkimPuchinakan Jesús naktlaway, yuma mpi nakliakgchuwinan xatlan tamakatsinin xla xlipaxkatsinit Dios» (Hech. 20:24). Liwana tasiya pi Pablo ni xpekuani taputsastalanit. Wata liwana xlakpuwanit natayani. Maski lhuwa tuku tuwa xtitaxtulh, tuku tlakg xlakaskinka xʼakxilha wa “naliʼakgchuwinan xatlan tamakatsinin”.

 ⁹ La uku, lhuwa natalan na liwana lakpuwankgonit natayanikgo. Kʼakgtum país, makgapitsi xtatayananin Jehová atsinu ni chan puxam kata tayanikgonit kpulachin, xlakata ni makgtanukgo kpolítica. Mapakgsinanin ni lakputsakgo la nakatalakkaxtlawakgo xtaʼakglhuwitkan xlakata ni wi limapakgsin nema kamakgtaya tiku nitlan limakgkatsikgo xtalakapastaknikan komo namakgtanukgo kpolítica. Niti maxkikan talakaskin nakalakgapaxialhnankgo, nipara xfamiliajkan chu makgapitsi na kasnokgkan chu tanu tanu la kamapatinikan.

10. ¿Tuku xlakata ni napekuanaw komo natitaxtuyaw tuku laktuwa nema kaj lakapala nachinkgo?

¹⁰ Kʼamakgapitsi kachikinin, kinatalankan na tayanikgo tuku tuwa nema kaj lakapala kalakgchin. Komo wi tuku tuwa nalakgchinan, ni kapekuanti. Kalakpuwanti tuku titaxtulh José. Staka xlakata skujni xlitaxtulh, pero Jehová «tilakgmaxtulh xlipaks kxtalakgaputsit» (Hech. 7:9, 10). Na tlan chuna namakgtayayan. Putum kilhtamaku kakatsi pi Jehová «katsiy [...] lantla malakgtaxtikgoy [...] nti maxkikgoy nkakni» (2 Ped. 2:9). Pulaklhuwa tuku tlawa pi nalipawanaw Jehová chu ni napekuanaw maski nakinkaputsastalanikanan. Katsiyaw pi Jehová tlan nakinkalakgmaxtuyan kʼuma xalixkajni kakilhtamaku chu tlan putum kilhtamaku nalatamayaw akxni namapakgsinan (1 Ped. 5:8, 9).

11. ¿Tuku litalakgpali akxni kinkaliputsastalanikanan nema akxilhaw chu akxni kaj xatsekg?

¹¹ Atanu tuku na limaklakaskin Satanás, wa akxni kaj xatsekg wi tuku kinkatlawanikanan. ¿Tuku litalakgpali akxni kinkaliputsastalanikanan nema akxilhaw? Umakgolh chuna la akxni kaj lakapala min lanka un, chu tlan kaj lakapala namalakgsputu akgtum chiki. Pero akxni kaj tsekg wi tuku kinkatlawanikanan kitaxtu la akxni lhuwa laktsu luwa tsinu tsinu lakwakgo xlakkiwi akgtum chiki asta akxni nialh tlan wan. Max akinin ni tunkun katikatsiw pi wi tuku nitlan lama, max nakatsiyaw asta akxni nialhla nakaxtlawayaw.

12. 1) ¿Tuku maklakaskin Satanás nema kaj xatsekg? 2) ¿Tuku xlakata lu tlan kitaxtuni? 3) ¿Tuku xlakata xmin kilhtamaku Pablo kxlajwanan xtakanajla?

¹² Satanás lu lakxtlawaputun la tlan talalinaw Jehová akxni kinkaliputsastalanikanan tuku akxilhaw o akxni xatsekg tlawa pi tsinu tsinu nasputa kintakanajlakan. Pulaktum nema ni akxilhaw wa akxni tlawa pi wi tuku nalilipuwanaw chu lu tlan kitaxtuni. Apóstol Pablo wa pi milh kilhtamaku na lu xlipuwan (kalikgalhtawakga Romanos 7:21-24). Pablo lu «tliwakga» xwi xtakanajla, max xlitaxtu kgolotsin tiku xmakgpulalin kstalaninanin Cristo kxapulana siglo. ¿Tuku xlakata wa «kgoxuta nkit»? Wa pi chuna xmakgkatsi xlakata makglakgalhina xwanit: xtlawaputun tuku tlan, pero atanu tuku xmatlawiputun tuku nitlan. Komo min kilhtamaku makgkatsiya pi xlajwanampat, ¿makgtayayan akxni akxilha pi Pablo na chuna titaxtulh?

13, 14. 1) ¿Tuku xlakata makgkatsikgo pi xlajwanama xtakanajlakan makgapitsi xlakskujnin Dios? 2) ¿Tiku lakaskin pi nalakxla kintakanajlakan chu tuku xlakata?

¹³ Lhuwa natalan makgkatsikgo pi xlajwanan xtakanajlakan, nialh katsikgo tuku natlawakgo o asta makgkatsikgo pi ni kaminini naskujnanikgo Dios. Akgtum liʼakxilhtit, chatum precursora tiku ni makgxtakga Dios tiku nalimapakuwiyaw Débora, wan: «Watiya watiya klakapastaka tuku nitlan ktlawanit chu tlakg nitlan klimakgkatsi. Akxni klakpuwan putum tuku nitlan ktlawanit, klakpuwan pi ni kiminini wi tiku nakimpaxki, nipara Jehová».

¹⁴ ¿Tuku xlakata makgapitsi xlakskujnin Jehová, la Débora, lu lipuwankgo? Pulaklhuwa tuku tlawa pi nalipuwankgo. Makgapitsi chuna lismanikgonit pi nitlan nalakpuwankgo xpalakatakan chu xlakata la titaxtumakgolh kxlatamatkan (Prov. 15:15). Makgapitsi nitlan makgkatsikgo xlakata kgalhikgo tajatat nema tlawa pi nalilipuwankgo. Komo wix wi tuku  lilipuwampat, kalakapastakti tiku lu lakgati pi chuna nalakpuwana. ¿Tiku lakaskin pi chuna namakgkatsiya chuna la makgkatsi, xlakata kxlatamat nialhla tuku nalakkaxtlawa? (Apoc. 20:10.) ¿Tiku lu lakaskin pi naxlajwanan mintakanajla? Wa Satanás, tiku limaklakaskin tuku nitlan nema akxilhaw, chu nema kaj xatsekg, pero kaj pulaktum tuku tlawaputun, wa pi lu nitlan namakgkatsiyaw, natlawa pi naxlajwananaw chu tlawaputun pi nialhtu natlawayaw. Kalakapastakti pi xkachikin Jehová wi kʼakgtum guerra xlakata takanajla.

15. ¿Tuku kajwatiya kililakpuwanatkan natlawayaw?

¹⁵ Ni kamasta talakaskin natlajayan Satanás. Kajwatiya kalakpuwanti tuku namakglhtinana. Pablo katsokgnanilh natalan xalak Corinto: «Ni ktalaktuwajaw; maski wa yuma nkimaknikan ntu ntasiyuj, sputtilhama, wampi wa nkianimajkan, wa ntu ni tasiyuj, kax kgalhi litliwakga nchali chali. Sampi wa ntu nchu nkaj tsinu ntapatin ntu nkaj xatlankaliya mpatiyaw, kinkalimakaxman ntu [kgalhi] tlanka kakni wa ntu ni anan [xlisputni]» (2 Cor. 4:16, 17).

16. ¿Tuku xlakata xlakaskinka pi la uku nalismaniyaw la tlan natitaxtuniyaw taʼakglhuwit xlakata tuku nitlan nema max namin alistalh?

¹⁶ Chuna la akxilhnitaw, Satanás lhuwa tuku “liʼakgskgawinan” (Efes. 6:11). Chatunu akinin lu xlakaskinka kiliʼakxilhatkan tastakyaw nema wi 1 Pedro 5:9: «Ntliwakglh kalilakgapaxtokgtit mintakanajlakan». Uma wamputun pi la uku nakaxwiliyaw kintalakapastaknikan chu kinakujkan, chu chuna skgalalh natawilayaw xlakata natlawayaw tuku tlan. Soldados lismanikgo la natlawakgo guerra maski lhuwa kilhtamaku tsankga xlakata naʼankgo kʼguerra. Nachuna titaxtuyaw. Ni katsiyaw tuku tuwa natitaxtuyaw alistalh. Wa xlakata, lu tlan komo nalismaniyaw  la tlan natitaxtuniyaw taʼakglhuwit xlakata la uku tsinu tlanku wilaw. Dios malakpuwanilh Pablo pi xkastakyawalh corintios: «Chuntiya kakaliʼakxilhkantit komo xlikana kgalhiyatit takanajla, chuntiya kalimasiyatit tiku wixin» (2 Cor. 13:5, TNM).

17-19. 1) ¿La tlan naʼakxilhaw la wi kintakanajlakan? 2) ¿La nakatsinikgo tuku nakgalhtinankgo kamanan akxni nakatlawanikan takgalhskinin xlakata xtakanajlakan kʼescuela?

¹⁷ Pablo stakyawanalh pi kiliʼakxilhatkan la wi kintakanajlakan chu pulaktum la tlan natlawayaw, wa akstu nakinkakgalhskinkanan umakgolh takgalhskinin: «¿Makglhuwa ktlawa oración? ¿Ni kpekuan akxni talakaskin pi naktataya kintakanajla? ¿Wa Dios kkgalhakgaxmata chu ni wa lakchixkuwin akxni amakgapitsi kimatlawiputunkgo pi ni nakkgalhakgaxmatni? Tamakxtumit nema tatlawa, ¿ni kmakgatsankga? ¿Ni tunkun kkasitsini kinatalan, chuna la xlakan ni tunkun kisitsinikgo? ¿Kkakgalhakgaxmata lakgkgolotsin xalak congregación chu tiku pulalinkgo xkachikin Dios xlikalanka katiyatni?».

¹⁸ Kaʼakxilhti pi akgtiy takgalhskinin nema lichuwinaw, wan pi ni napekuanaw xlakata natatayayaw kintakanajlakan chu ni wa kuenta nakatlawaniyaw amakgapitsin. Lhuwa lakgkgawasan chu laktsuman chuna tlawakgo kʼescuela. Lismanikgonit ni napekuankgo chu ni limaxanankgo tuku kanajlakgo, wa xlakata ni pekuankgo la lichuwinankgo Dios. Anta kkirevistaskan taxtukgonit tastakyaw nema makgtayanankgo. La krevista Makatsinina 15 xla mayo kata 2013, kpágina 6, lichuwinalh la kamanan tlan nakalitachuwinankgo xtakanajlakan xcompañeros xalak xʼescuela chu nakatlawani takgalhskinin nema nakamalakpuwani. Natlatni, kakamakgtayatit minkamanankan nakatsinikgo la nakgalhtinankgo akxni xcompañeros nakatlawanikgo takgalhskinin.

¹⁹ Xlikana, min kilhtamaku tuwa makgkatsiyaw la nakgalhtinanaw xlakata natatayaw xaxlikana takanajla chu tuwa makgkatsiyaw natlawayaw tuku Jehová kinkaskiniyan. Akxni lhuwa horas skujaw max ni naʼamputunaw ktamakxtumit. Chu xlakata naʼanaw lichuwinanaw Dios tsisa, max natalakaskin pi natakiyaw maski lu tlan jaxmaw. Pero kalakapastakti pi komo nalismaniyaw namatliwakglhaw kintakanajlakan la uku, tlakg ni tuwa namakgkatsiyaw akxni nakinkalakgchinan tuku tlakg tuwa.

20, 21. 1) ¿Tuku xlakata nakinkamakgtayayan natayaniyaw talipuwan akxni nalilakpuwanaw pi Jesús kinkalakgmaxtun? 2) ¿Tuku chuntiya kilitlawatkan?

²⁰ ¿Tuku tlan nawanaw xlakata akxni Satanás kaj xatsekg kinkatlawaniputunan tuku nitlan? Akgtum liʼakxilhtit, ¿la natayaniyaw akxni wi tuku lilipuwanaw? Pulaktum tuku nakinkamakgtayayan wa nalilakpuwanaw pi Jesús kinkalakgmaxtunitan. Wa tuku tlawalh Pablo. Xmin kilhtamaku lu nitlan xmakgkatsi xlakata makglakgalhina xwanit, pero xkatsi pi Jesús ni nilh xlakata nakalakgmaxtu tiku ni kgalhikgo talakgalhin, wata nilh xlakata xkalakgmaxtulh tiku makglakgalhinanin xwankgonit. Uma tuku tsokgli: «Klilama ntakanajla ntu kkgalhiniy xKam Dios, wa nti nkintipaxkilh na tiʼakstutamastalh nkintipalakanilh» (Gál. 2:20). Pablo makgamakglhtinalh pi xtalakgmaxtut Jesús xlakgmaxtuma.

²¹ Talakgmaxtut wa tuku Jehová kinkamaskiwiyan chatunu akinin, komo chuna akxilhaw, uma lu nakinkamakgtayayan. Uma ni wamputun pi tunkun nasputa kintalipuwankan. Max lhuwa akinin chuntiya nakinkamamakgkatsiniyan Satanás asta akxni nachin xasasti kakilhtamaku. Pero ¡ni kamasta talakaskin natlajayan! Kalakapastakti pi tiku natayanikgo, lhuwa tuku namakglhtinankgo. Tlakg talakatsuwinit xatlan kilhtamaku akxni xTamapakgsin Dios natlawa pi ni naʼanan taʼakglhuwit chu nakamakgtaya nialh nakgalhikgo talakgalhin tiku ni namakgxtakgkgo. Katlawa tuku natalakaskin xlakata anta nalatapaya akxni natawila xTamapakgsin Dios maski lhuwa tuku tuwa natitaxtuya.