E koreia Tawita bwa e “tuai men nora te aomata ae raoiroi ae kitanaki, Ma natina aika bububuti te amarake.” Mangaia are e taekina ana taeka ae boto man te baere rinanona. E ataia raoi bwa e teimatoa ni mwannanoaki iroun te Atua. (Taian Areru 37:25, BG) Ma e ngae n anne, e aki nanonaki n ana taeka Tawita bwa akea te tia taromauria te Atua are e aki reke irouna baike e kainnanoi n taai akekei ke nakon taai aika imwaira naba.

Iai taai ake e rinanon iai Tawita rawawata aika rangi ni kangaanga. E rinanon naba anne n te tai teuana ngke e birinako mairoun Tauro. E bon aki tau kanan Tawita n te tai anne ao e bubutii te amwarake i bon ibukina ao ibukia naba raona. (1 Tamuera 21:1-6) Ngaia are e a “bububuti te amarake” Tawita n te tai anne. Ma e ngae ngke e aitara ma te rawawata ae rangi ni kangaanga anne, e ataia ae e bon aki kitanaki iroun Iehova. Ni koauana, bon akea te tai ae warekaki iai taekan Tawita bwa e bubutii te amwarake bwa e aonga ni maiu.

Ni Mataio 6:33 ao ti nora iai ana kabebetenano Iesu bwa e na boni karekei te Atua baike a kainnanoi ana toro aika kakaonimaki ake a moanibwaia te Tautaeka n Uea ni maiuia. E taku Iesu: “Ukoukora moa ana tautaeka n uea te Atua ma ana raoiroi, ao a na karekeaki baikai nakoimi [n ikotaki naba ma te amwarake, te moi ao te kunnikai].” Ma e kaotia naba Iesu bwa ibukini bwainikirinaia, a bae n rinanon naba te baki ‘tarina.’ ( Mataio 25:35, 37, 40) Anne naba ae riki nakon te abotoro Bauro. N taai tabetai ao e namakina te baki ao te taka.—2 I-Korinto 11:27.

E tuangira Iehova bwa ti na bwainikirinaki n aanga aika kakaokoro. E bae n aki tuka te rawawata man akeani baike ti kainnanoi ngkai ti a buoka kaekaan ana bukibuki ni kewe te Riaboro. (Iobi 2:3-5) N te katoto, a a tia n ruanikai maiuia tabeman raora ni Kristian n aroia naake a kainaki n aia tabo ni kaikain kaain te Nazi ibukini bwainikirinaia. Te mwakuri n ribuaka teuana are e kabonganaaki ibukin uruani kakaonimakia n te aro ae eti taani Kakoaua, bon aki tauni kanaia. A teimatoa taani Kakoaua aika kakaonimaki n ongeaba nakon Iehova ao e bon aki kitania. E bon aki tuka rikin te kataaki aei, n aron naba are e karaoia nakoia Kristian ni kabane ake a aitara ma kataaki aika kakaokoro nako. Ma e ngae n anne, akea te nanokokoraki bwa e a tia Iehova ni boutokaiia ni kabane naake a karawawataaki ibukin arana. (1 I-Korinto 10:13) Ti kona n iaiangoi taeka aika n I-Biribi 1:29 aikai: “Kam anganaki te kakabwaia, ae tiaki tii onimakinani Kristo ma te maraki naba ibukina.”

E berita Iehova bwa e na memena irouia ana toro. N te katoto e taekinaki ae kangai n Itaia 54:17 (BG): “Bon akea te kai-ni-buaka teuana ae karaoaki n ekiko nako ae na tokanikai.” E na boni kakoroa bukin te berita aei te Atua ao aika titeboo naba ma aei ibukini kamanoaia ana aomata ni kabane. Ma a na bon rinanoni kataaki Kristian n tatabemania nako ni karokoa naba mateia.