Daavi allappoq takusimanngisaannarluni “iluartumik qimagaasumik qitornaanilluunniit nerisassanik qinnuuloortunik”. Taamaattorli nammineq misilittakkani tunngavigalugit arlalitsigut ilumoortumik allagaqarpoq. Taassuma Guutip isumassuiuarnera nalunngilluinnarpaa. (Tuss 37:25) Daavilli oqaasii Jehovamik pallorfiginnittut pisariaqartitaminnik amigaateqanngisaannarnissaattut paasisariaqanngillat.

Daavi ilaanneeriarluni erloqinartorsiortarpoq. Assersuutigalugu Saulimit qimarngunerminni nerisassaatitik ikilimmata timiusanik tuneqquvoq. (1 Sam 21:2-7) Pisumi tamatumani Daavi ‘nerisassanik qinnuuloorpoq’. Artornartorsiornerminili Jehovamit imminiiginnarneqarsimannginnini nalunngilaa. Biibilimilu allassimanngilaq Daavi inuuinnarumalluni nerisassanik qinnuuloortariaqartarsimasoq.

Matthæusip allagaa 6:33-mi Guutip kiffani naalagaaffimmut attuumassuteqartunik salliutitsisut pisariaqartitaannik isumaginnikkumaarnera Jiisusip neriorsuutigeqqissaarpaa. Jiisusi ima kajumissaarivoq: “[Guutip] naalagaaffia iluarneralu ujaqqaarsigit, taava tamakku tamarmik [soorlu nerisassat, imigassat atisassallu] ilanngullutik ilissinnut tunniunneqarumaarput.” Jiisusili aamma oqamisaarpoq ‘qatanngutini’ malersugaaneq pissutigalugu ilaannikkut kaalertarsinnaasut. (Matt 25:35, 37, 40) Apustili Paulusi taamatut misigisaqarpoq. Ilaannikkut perlilertarlunilu qilalertarpoq. — 2 Kor 11:27.

Jehovap oqarfigaatigut assigiinngitsutigut malersugaasarumaartugut. Diaavulup unnerluussutaata akineqarnissaanut ikiuunnitsinni arlaatigut amigaateqarnissarput akuerisinnaavaa. (Job 2:3-5) Assersuutigalugu kristumioqativut nazistit tigusanut inissiarsuiniissimasut malersorneqarnertik pissutigalugu ulorianartorsiortarput. Diaavulu nalunaajaasunik assuarnaakkunnaarsitsiniarnermini ilaatigut nerisassaaleqisitsisarpoq. Nalunaajaasut aalajaatsut naalammata Jehovap imminiiginnanngilai. Kristumiut tamarmik assigiinngitsutigut misilinneqartarnissaannik akuersisimanermisut taakkua misilinneqarnissaat akueraa. Jehovalli atini pillugu naalliuttunik tamanik tapersersuisarnera qularutiginngilarput. (1 Kor 10:13) Filippimiunut allakkat 1:29-mi allaatigineqartut eqqaamasinnaavavut: “[Ilissi] Kristusi pissutigalugu tunineqarpusi saammaannermik Kristusimik upperfiginnittussatut piinnarnasi, kisianni aammattaaq taanna pillugu naalliuttussaasutut.”

Jehovap kiffani najorumaarlugit neriorsorpai. Assersuutigalugu Esajap allagai 54:17-imi ima allassimavoq: “Sakkut ilinnut sakkuaatissatut saffiukkat atorsinnaassuseqassanngillat.” Tamanna neriorsuutillu tamatumunnga assingusut Guutip innuttaasa eqimattatut isumannaatsumik atugaqarumaarnerannut uppernarsaataapput. Kristumiulli ataasiakkaat, allaat toqumut, misilinneqartarput.