Davidi wasonekeli nindi kanda ‘yamonañahu dehi hashiyilawu muntu waloña, hela anyanindi nakulomba yakudyaku.’ Wahosheli awa mazu muloña wayuma yamweneniyi muchihandilu chindi. Welukili chikupu Nzambi chakamenañayi. (Mas. 37:25) Hela chochu, mazu aDavidi hiyaya mukwila nawu kwosi mukwakudifukula waYehova wabulahu dehi kukabakana hela wakabula kukabakanaku.

Mpinji yikwawu Davidi wahitileña mukukala chikupu. Kukala kumu kwamweniyi kwamwekeni hampinji yamutemukileñayi Sawulu. Davidi hadiña nayakudyaku, dichi walombeli yakudya yindi niyawantu jindi. (1 Sam. 21:1-6) Dichi hayina mpinji Davidi ‘walombeleña yakudya.’ Ilaña, hampinji yadiñayi mukukala, welukili nindi Yehova hamushiyiluku. Walala wudi wakwila nawu kanda tutañeñahu dehi hasonekawu nawu Davidi walembeleli kulonda amwinki yakudya.

HaMatewu 6:33, hekala mazu aYesu atulejaña chikupu nawu Nzambi wayinkaña yuma yakaankilañawu ambuñindi ashinshika atwamijañaku mudimu waWanta muwumi wawu. Yesu wahosheli nindi, “Sambilenu kukeña wanta windi nikuloña kwindi, niyuma yejimiyi [kubombelahu yakudya, yakunwa niyakuvwala] akayishilaku.” Hela chochu, Yesu wahosheli cheñi nindi muloña wamakabisha, ‘ana kwindi’ anateli kufwa nzala. (Mat. 25:35, 37, 40) Chumichi chamumwekeneni kapostolu Pawulu. Mpinji yikwawu wafwileña nzala nimpwila.—2 Kor. 11:27.

Yehova watulejaña nindi akatukabisha munjila jashiyashana. Nateli kutwiteja kukaankila yuma hampinji yitunakumwekesha netu yuma yahosheliyi Diyabolu yamakudi. (Yoba 2:3-5) Chakutalilahu, akwetu akwaKristu amakwawu, chidi neyi ana ashiluwu muyilombu yakuyandishila yawaNazi, adiña muwubanji weneni muloña wakuyiyandisha. Kubula kuyinka yakudya yashikila diyi njila yazatishileña Diyabolu kulonda yafumpi kashinshi kawaYinsahu. A Yinsahu ashinshika atwalekeluhu kumwovwahila Yehova nawa wayishili wanyi. Nzambi wayitejeli kumona iku kweseka neyi chetejañayi akwaKristu ejima kumona kukala kwashiyashana. Hela chochu, twajinokaña wanyi netu Yehova wakwashaña antu ejima ayandaña muloña wakukeña ijina dindi. (1 Kor. 10:13) Tunateli kwanuka mazu ekala haAfwilipi 1:29 akwila nawu: “Anayiteji hansañu yaKristu, bayi kukumina dakumukuhwelela hohuku, chiña nikumumwena ihuñu nawa.”

Yehova wayikana ambuñindi nindi wukuyikwashaña. Chakutalilahu, haIsaya 54:17 hahosha nawu: “Hikwakekala chitwa, chakachilawu nawu akukatishi nachu, chakakolaku.” Ichi chikaninu niyikaninu yikwawu yamwekeshaña nawu Nzambi wakiñaña antu jindi ejima hamu neyi izanvu. Hela chochu, mukwaKristu wudi wejima hamuntu hamuntu anateli kumweseka hela tuhu kumujaha.