Je David itso je én xi kiski: “Nisañandiajinla ʼbe tsa njiotokon jngo chjota xi kixi, kʼoa tsa tsínle jme xi tjíokjine je xtile” (Sal. 37:25). Nga kʼoakitso je David kui kinchja̱ni jme kjoa xi jesoa jaʼatojin. Nʼio nda be nga je Jeobá kisikuindantsjai. Tonga je én xi kitso je David alikui xi tsonile tsa tsínkʼia kjoa kjoaʼatojin jngo choʼndale Jeobá.

Sakʼoaa nʼio tse kjoa jaʼatojin David. Jngo koya je kjoa xi jaʼatojin kʼiaa nga tsakangale je Saúl. Choaa tsojmi tjínle David xi ski̱ne kʼoa kisijé nioxtila xi koakje̱n kʼoa kao xi koakje̱n je chjota xi tjenkao (1 Sam. 21:1-6). Nga kʼia, je David tsínle jme xi tíkjine. Ninga nʼio tse kjoa tíjnajin, bení nga tsín tsjiónkon je Jeobá. Kʼoa ya Biblia alijña kʼoatso tsa ya yandiaa tsakʼamjeya David nga kisijé xi kʼoéjnakonni.

Ya Mateo 6:33, je Jesús kʼoakitso nga je Niná tsjoále jmeni xi machjénle je choʼndale xi kui títjon sikʼéjna xi tʼatsʼe Chjotaxále. Je Jesús i kitso: “Títjon tijnyísjao je kjoatéxomale Niná, kao kjoakixile, kʼoa ngayije kjoa jebi [xi chine, xi ʼyoá kʼoa xi chʼakjá] kʼoasʼin kʼoaisonno”. Tonga je Jesús kʼoati kitso nga kjinrá kjoaʼa je ndsʼe̱ xi totʼatsʼe nga chjota koaitjenngike (Mat. 25:35, 37, 40). Kʼoakoan je pastro Pablo. Sakʼoaa kjinrá tsakjaʼá kʼoa koantsínle xi tsakʼi (2 Cor. 11:27).

Je Jeobá kʼoatso nga nʼio nkjín koya josʼin koaitjenngikená je chjota. Je Niná kuinga tsjoáʼndeni nga sakʼoa ñʼai machonná nga̱ kʼoasʼin ʼyanile tsa kjoaixi jmeni xi kitso je Na̱i nga tokui nixánilee Niná nga je tísíkuindaná (Job 2:3-5). Tobʼelañá, nʼio nkjín ndsʼee xi ya kinikatíoʼyanʼio ya ʼnde jñani kjoañʼai kisikjaʼá je chjota nazi, nʼio xkón tsakatío nga kʼoasʼin chjota kitjenngike. Nʼio tochoa tsojmi tsakʼaile xi kiskine tojoni nga yátsʼi̱n kuinyale Niná, kʼoa kjoa jebi tʼatsʼe Na̱i kinroani. Je testigole Jeobá kixi kitʼale Niná, kʼoa Niná alikui kitsjionkon. Je Niná kitsjoaʼnde nga kjoañʼai jaʼatojin, tojo ma ngatsʼi je chjotale Cristo nga kjaʼaí kjaʼaí kjoa faʼatojin. Tonga alikui jao tjínná nga je Jeobá tsjoánganʼiole ngatsʼi xi kjoañʼai faʼá xi totʼatsʼe jaʼaínle (1 Cor. 10:13). Si̱kjaʼaitsjeen jmeni xi tso ya Filipenses 1:29: “Jon tsakʼaino xi totʼatsʼe Cristo, ali tsa tokui kjoan nga makjainno, tonga kʼoati koa̱nno jéentjaile xi tsʼe”.

Je Jeobá kʼoatso nga tsjoánganʼiole je choʼndale. Isaías 54:17 itso: “Nijngojin ki̱cha̱ xi kjuinroaneli xi kuinje̱le”. Je én jebi kʼoa kao xi kjaʼaísanile kui tsoyaná nga tsín tsjoáʼnde Niná nga jme xi koa̱nle je naxinandále. Tonga jngo chjotale Cristo toxá kjoa kjoaʼatojinni kʼoa tsakui nichxin saʼnda ni̱kʼien.