UDavida wabhala ukuthi ‘wayengazange abone abalungileyo bedelwa loba abantwababo becela isinkwa.’ Wayesitsho lokho ayezibonele khona empilweni yakhe. Wayekwazi mhlophe ukuthi uNkulunkulu uhlala ebanakekela abantu bakhe. (Hubo. 37:25) Kodwa amazwi kaDavida kawatsho ukuthi akulanceku kaJehova engakaze iswele njalo kawatsho lokuthi asisoze safa saswela.

Kwezinye izikhathi uDavida laye wayeke athwale nzima. Ngokwesibonelo ngesikhathi ebalekela uSawuli wayengaselakudla, yikho wacela izinkwa ukuze yena labantu ayelabo bathole okuya ethunjini. (1 Sam. 21:1-6) Kuyakhanya-ke ukuthi uDavida laye wake ‘wacela isinkwa.’ Lanxa wayephakathi kwelitshe lembokodo, wayekwazi ukuthi uJehova kamtshiyanga. Umcijo oqakathekileyo nanku: Akulandawo lapho esibala khona ukuthi uDavida wayephila ngokucela ukudla.

Amazwi kaJesu akuMathewu 6:33 asenza singathandabuzi ukuthi uNkulunkulu uzazinakekela izinceku zakhe ezithembekileyo njalo eziqakathekisa uMbuso wakhe ukwedlula loba kuyini. Wathi: “Funani kuqala umbuso wakhe lokulunga kwakhe, kuzakuthi-ke zonke lezizinto [okugoqela ukudla, okunathwayo, kanye lezigqoko] liziphiwe lazo.” Kodwa uJesu waphinda watshengisa ukuthi “abazalwane” bakhe babengalamba ngenxa yokuhlukuluzwa. (Mat. 25:35, 37, 40) Lokhu kwake kwenzakala kumphostoli uPhawuli. Kwezinye izikhathi wayeke azwe indlala lokoma.—2 Khor. 11:27.

UJehova usitshela ukuthi sizahlukuluzwa ngezindlela ezitshiyeneyo. Angavumela ukuthi siswele ukuze kukhanye ukuthi okwakhulunywa nguDeveli kungamanga. (Jobe. 2:3-5) Abanye abazalwane bethu bayake bahlukuluzwe kabuhlungu. Ngokwesibonelo kulabazalwane abafakwa emajele amaNazi lapho ababehlukuluzwa khona. Enye indlela uSathane ayeyisebenzisa ukuze azame ukwenza ukuthi oFakazi badele ubuqotho babo kwakuyikwenza ukuthi bancitshwe ukudla emajele la. OFakazi ababethembekile baqhubeka bemlalela uJehova njalo kazange abalahle. Wavuma ukuthi balingwe njengoba nje evumela ukuthi wonke amaKhristu ehlelwe yizilingo ezitshiyeneyo. Loba kunjalo, akuthandabuzwa ukuthi uJehova uyabasekela bonke abahlupheka ngenxa yebizo lakhe. (1 Khor. 10:13) Kumele sihlale sikhumbula amazwi akuFiliphi 1:29 athi; “Kunikelwe kini ngenxa kaKhristu kungasikukholwa kuye kuphela, kodwa lokumhluphekela.”

UJehova uthembisa ukuthi kasoze azilahle izinceku zakhe. Ngokwesibonelo u-Isaya 54:17 uthi: “Akulasikhali esikhandelwe wena esizaphumelela.” Isithembiso lesi kanye lezinye zenza sibe leqiniso lokuthi uNkulunkulu uzabavikela abantu bakhe. Lanxa kunjalo kungenzakala ukuthi umKhristu munye ngamunye ehlelwe yizilingo, mhlawumbe aze afe sibili.