David nerqa: “Ni jaykʼajpis kʼacha runataqa wijchʼusqata rikorqanichu, nitaj wawasnintapis khuyayta mañakojtaqa”, nispa. Chayta nerqa kausayninpi imatachus rikusqanmanta parlaspa. Paytaj sumajta yacharqa Jehová mana saqerparinawanchejta (Sal. 37:25). Davidpa nisqanqa mana ninayanchu Jehovata yupaychajkuna ni jaykʼaj mikhunamanta pisinankuta.

Davidpis wakin kutis yarqhaypi rikukorqa. Uj kuti rey Saulmanta ayqeshajtin mikhunan pisiyayta qallarerqa. Chayraykutaj paypaj, kamachisninpaj ima tʼantata mañakorqa (1 Sam. 21:1-6). Chay kutipeqa, David khuyayta purisharqa. Chay jina llakiypi kashaspapis yacharqa Jehová mana saqerparisqanta. Chaywanpis Bibliapi mana niwanchejchu David khuyayta mañakuspa purisqanta.

Jesusqa Mateo 6:33 versiculopi, Reinota kausayninkupi ñaupajman churajkunaman, Dios necesitasqankuta qonanta nerqa. Pay nerqa: “Ñawpajtaqa Diospa reinonta, cheqan kaynintawan maskʼaychej, chay tukuy imatataj [nisunman mikhunata, pʼachata, waj imasta ima] yapata jina Dios qosonqachej”, nispa. Nillarqataj yachachisqasnin khatiykachasqas kashaspa ichá yarqhaymanta ñakʼarinankuta (Mat. 25:35, 37, 40). Ajinapitaj apóstol Pablo rikukorqa. Wakin kutis ‘yarqhaywan, yaku chʼakiywan’ ima karqa (2 Cor. 11:27).

Jehovaqa imaymanamanta qhatiykachasqa kananchejta niwanchej. Wakin kutistaj ichapis ñakʼarinanchejta saqenqa, Kuraj Supay llulla kasqanta rikuchinanchejpaj (Job 2:3-5). Wakin hermanosninchej Hitlerpa kamachiyninpi carcelespi wisqʼasqas kasqankupi tʼukurina. Paykunamanqa, Diosta wasanchanankuta munaspa mana mikhuyta qorqankuchu. Chaytaj Satanaspa ujnin tojllan karqa. Cheqa sonqo cristianosqa Jehovata kasukullarqankupuni, chayraykutaj Jehová paykunata mana saqerparerqachu. Chaywanpis Jehovaqa imaynatachus kay tiempopi imaymana llakiykunapi rikukunanchejta saqewanchej, ajinallatataj chay hermanosta llakiykunapi rikukunankuta saqerqa. Sutinrayku ñakʼarejtinchejtaj, chay llakiykunata aguantanapaj yanapawanchej (1 Cor. 10:13). Imatachus Filipenses 1:29 nisqanta yuyarikuna. Chaypi nin: “Diosqa qosunkichej mana Cristopi creeyllatachu, manachayqa payrayku ñakʼariyta atinaykichejtapis”, nispa.

Jehovaqa mana saqerparinawanchejta niwanchej. Sutʼincharinapaj Isaías 54:17 nin: “Mana mayqen arma ruwasqankupis qanta chinkachisunampaj jina kanqachu”, nispa. Kay versículo, waj versículos ima rikuchiwanchej, Jehová llajtanta jarkʼanantapuni. Chaywanpis ichá kamachisninmanta ujnin cheqa sonqo kasqanrayku, ñakʼariyta, wañuyta ima atinman.