Naʻe tohi ʻe Tēvita “kuo teʻeki te u mamata ki ha maʻoniʻoni kuo liʻaki, pe ko hono hako ʻoku nofo ke kole meʻakai.” Ko ia naʻá ne fai ha fakamatala fakalūkufua ʻo makatuʻunga ʻi heʻene hokosiá tonu. Naʻá ne ʻiloʻi lelei ʻa e tokanga hokohoko ʻa Sihová. (Saame 37:25) Kae kehe, ko e ngaahi lea ʻa Tēvitá, ʻoku ʻikai ʻuhinga iá kuo ʻikai ʻaupito masiva ha tokotaha lotu ʻi ha meʻa pe ʻe faifai ange ʻo pehē.

Naʻe ʻi ai ʻa e ngaahi taimi naʻe hokosia tonu ai ʻe Tēvita ʻa e ngaahi tuʻunga faingataʻa ʻaupito. Ko e taha ʻo e taimi peheé ko e taimi naʻá ne hola ai meia Saulá. Naʻe siʻisiʻi ʻa e meʻakai ʻa Tēvitá, pea naʻá ne kole mā mo ʻene kau tangatá. (1 Sām. 21:1-6) Ko ia ʻi he tuʻunga ko iá, naʻe “kole meʻakai” ʻa Tēvita. Ka, ʻi he tuʻunga mātuʻaki faingataʻa ko iá, naʻá ne ʻiloʻi kuo teʻeki ke liʻaki ia ʻe Sihova. Ko hono moʻoní, ʻoku ʻikai ha feituʻu ia te tau lau ai naʻe pau ke kole ʻe Tēvita ha meʻakai koeʻuhí ke ne moʻui.

ʻI he Mātiu 6:33, ʻoku tau ʻiloʻi ai ʻa e tuipau ʻa Sīsū ʻe fakalato ʻe he ʻOtuá ʻa e ngaahi fiemaʻu ʻa e kau sevāniti faitōnunga ʻoku nau fakamuʻomuʻa ʻa e ngaahi meʻa ʻo e Puleʻangá ʻi he moʻuí. “Ko ia ai, hanganaki fuofua kumi ki he Puleʻangá mo e māʻoniʻoni ʻa e ʻOtuá,” ko e lau ia ʻa Sīsuú, “pea ʻe tānaki atu kiate kimoutolu ʻa e toe ngaahi meʻá ni kotoa [kau ai ʻa e meʻakai, inu, mo e vala].” Kae kehe, naʻe toe fakahaaʻi ʻe Sīsū koeʻuhí ko e fakatangá, ko hono “fanga tokouá” te nau hokosia nai ʻa e fiekaia. (Māt. 25:35, 37, 40) Naʻe hoko ia ki he ʻapositolo ko Paulá. ʻI he taimi ʻe niʻihi naʻá ne hokosia ʻa e fiekaia mo e fieinua.—2 Kol. 11:27.

ʻOku tala mai ʻe Sihova ʻe fakatangaʻi kitautolu ʻi he ngaahi founga kehekehe. Te ne fakaʻatā nai kitautolu ke hokosia ʻa e faingataʻa ʻi heʻetau tokoni ke tali ʻa e ngaahi tukuakiʻi ʻa e Tēvoló. (Siope 2:3-5) Ko e fakatātaá, ko e niʻihi hotau kaungā-Kalisitiané, hangē ko e faʻahinga naʻe tuku ʻi he ngaahi kemi fakamamahi Nasí, naʻa nau ʻi he tuʻunga fakatuʻutāmaki koeʻuhí ko e fakatangá. Ko e ʻikai ha meʻakai feʻunga ki he Kau Fakamoʻoní ko e taha ia ʻo e ngaahi founga kovi taha naʻe ngāueʻaki ke maumauʻi ʻaki ʻenau anga-tonú. Naʻe nofoʻaki talangofua ʻa e Kau Fakamoʻoni faitōnungá kia Sihova; naʻe ʻikai ke ne liʻaki kinautolu. Naʻá ne fakaʻatā kinautolu ke hokosia ʻa e ʻahiʻahi ko ení, hangē pē ko ʻene fakaʻatā ʻa e kotoa ʻo e kau Kalisitiané ke nau fehangahangai mo e ʻahiʻahi kehekehe. Kae kehe, ʻoku ʻikai ha veiveiua ʻoku poupouʻi ʻe Sihova ʻa e faʻahinga kotoa ʻoku faingataʻaʻia koeʻuhí ko hono huafá. (1 Kol. 10:13) ʻE lava ke tau manatuʻi ʻa e ngaahi lea ʻi he Filipai 1:29: “Kuo foaki atu kiate kimoutolu ʻa e monū tuʻunga ʻia Kalaisi, ke ʻikai ngata pē ʻi hoʻomou tui kiate iá, ka ke mou faingataʻaʻia foki koeʻuhi ko ia.”

ʻOku talaʻofa ʻe Sihova te ne kau mo ʻene kau sevānití. Ko e fakatātaá, ʻi he ʻAisea 54:17, ʻoku pehē ai: “ʻIlonga ha mahafu ʻoku faʻu ke fai ʻaki ha kovi kiate koe, ʻe ʻikai siaʻa.” Ko eni mo e ngaahi talaʻofa meimei tatau ʻoku fakapapauʻi mai ai ʻa e malu ʻa e kakai ʻa e ʻOtuá ʻi he tuʻunga fakalūkufuá. Neongo ia, ʻi he tuʻunga taautahá, ko ha Kalisitiane te ne fou nai ʻi he ngaahi ʻahiʻahi, naʻa mo e aʻu ki he maté.