CWINY Fernando * ugam udhongo lee dit kinde ma judong cokiri moko ario gikwayu nia gikegiwec kugi i amung’. Tek jaliew mi twodiri migi uai uliewo cokiri migi ci judong cokiri gikoro ni Fernando kamaleng’ gin m’ukwayu etim pi ninwang’u rwom dupa i cokiri. Calu ma nindo ucikukadhu, Fernando ucaku nipenjere ka nyo andha jucopo ng’iye nidoko jadit cokiri. Nindo ma ceng’ini eni, jaliew mi twodiri uai uliewo cokiri migi kendo. Wang’uni ke judong cokiri gibiyero ang’o?

Jadit cokiri acel ucaku niweco i bang’ Fernando. Jadit cokirine upoyo wiye i kum 1 Timoteo 3:1 man eyero ni Fernando nia judong cokiri ginwang’ barua ma nia en e Fernando edoko jadik cokiri. Wi Fernando utiyo ngo man epenjo kumae: “Iyero ang’o?” Umegone dwogo kendo iwi wecne, e Fernando caku nivonjo. I ng’eye, anyong’a nego cokiri bende kinde ma jutwong’o pi rwom m’enwang’une kamaleng’.

Nyo etie rac niyenyo ninwang’u rwom dupa i cokiri? Ungo nyanok de. I 1 Timoteo 3:1, Biblia uyero kumae: “Tek ng’atu moko ubeyenyo edok jadit cokiri, nwang’u eyenyo tic ma ber.” Ju ma coo ma dupa i cokiri giketho wec maeno mi kethocwiny i timo man gitimo mediri i thenge mi tipo, eno ketho ginwang’u rwom ma tung’ tung’ i cokiri. Kud adwogi ma kani? Tin junwang’u judong cokiri ku jukony elufu swa dit i kind dhanu pa Mungu. Ento, yeny mir umego ma gibeyenyo nidoko judong cokiri utie asu pilembe wend cokiri ubemedere ameda. Ng’atini copo yenyo nidoko jadit cokiri i ayi ma ber nenedi? M’umedo maeno, nyo ju m’ubeyenyo rwom maeno gicikiri nibeparu saa ceke nia gibidoko judong cokiri awene, calu ma Fernando utimo?

Juloko wec mi Biblia ma nia “niyenyo” kud i wec moko mi dhu Jugiriki ma thelembene tie nibedo kud ava piny moko lee dit. Copere wecne uketho ibeparu pi ng’atu moko m’ubeng’adere i kadhiri ceke m’ecopo pi nipono nying yen moko ma leng’. Niyenyo rwom i cokiri thelembene tie ngo nisayu reke reke ‘nidoko jadit cokiri.’ Pirang’o kumeno? Pilembe ju ma gibeyenyo andhandha nidoko judong cokiri gibesayu ngo dito ento kende kende “tic ma ber.”

Jukwanu lembe ma pol m’ubekwayere pi nitimo tic ma ber eno i 1 Timoteo 3:2-7 man bende i Tito 1:5-9. Lembe m’ubekwayerene gitie lembe ma pigi tek akeca. Eno uketho jadit cokiri moko ma nyinge Raymond, m’utimo tijene pi oro ma dupa, ukoro kumae: “An aparu nia gin ma pire tek utie nia watie dhanu ma nenedi. Pire tie tek niweco man niponjo ma ber. Ento, copo maeno gidwoko ngo ng’atini nidoko ni ng’atu m’adote mbe i wiye, ng’atu ma kadhu ngo mukero i kwo pare, ng’atu ma wiye tiyo ma ber, ma pangu lembe kakare kakare, jajol man ma i lembe pare tek ungo.”

Kara umego m’ubeyenyo andhandha ninwang’u rwom maeno unyuthere ni ng’atu ma adote mbe i wiye, ecikere nikoc cen kud i kum timo ceke ma dwokojo atira ngo man ma cidojo. Bende, ukwayu jung’eye ni ng’atu ma kadhu ngo mukero i kwo pare, ng’atu ma wiye tiyo ma ber, ma pangu lembe kakare kakare man ma i lembe pare tek ungo. Eno ketho juyic mange de giwinje calu jatel wi cokiri i mandha man gikoro ire lembe ma gibekadhu kud i iye. Calu m’e jajol, etielo cwiny Jukristu m’aradu man cwiny ju ma fodi ugalu ngo i lemandha. Ekonyo man eliewo ju m’ubetwoyo man ju m’uteng’ini pilembe emaru gin ma ber. Ecego ngo kite maeno pi ninwang’u rwom ento pi nitimo bero ni ju mange. *

Anyong’a nego guriri mi judong cokiri ka gibemiyo juk man tielocwiny ni umego; ento ng’atu m’ubeyenyo nidoko jadit cokiri pong’o lembe m’ubekwayere en gire. Jadit cokiri moko m’uteng’ini ma nyinge Henry uyero kumae: “Tek ng’atu moko ubeyenyo edok jadit cokiri, ecikere nitimo ku tego pi ninyutho nia eromo.” Nimakere ku lembe ma nwang’ere i Eklizia 9:10, ekoro kumae: “‘Gin ceke ma tek cingi nwang’u mir atima, time ku tegoni ceke.’ Tek judong cokiri miyo iri tic moko, time i kadhiri ceke m’icopo. Mar tic ceke ma jumiyo itim i cokiri, kadok etie tic mi weyo i Ot Ker. Yo yo, jubineno tic ma tek m’ibetimo.” Tek ibemito idok jadit cokiri nindo moko, bed itim tic ma tek man bed ni ng’atu ma jugeno pi kodhi tic ma leng’ ceke. Ukwayu ngo ibed ku thama, ento ibed ng’atu ma jwigere.​—Mat. 23:8-12.

Umego moko ma gibeyenyo ginwang’ rwom i cokiri gicopo nyutho lembene i ayi ma ngbeng’ ungo konoke gicopo timo lembe moko ma kara ya ucwal judong cokiri nimiyo igi rwom. Ju mange ke lundo gidagu ka judong cokiri bekonyogi. Ng’atuman ucikere nipenjere ku penji ma e: ‘Nyo abemito yeny para re m’utimere kunoke nyo abemito kendekende nigwoko rombe pa Yehova ku molo?’

Ubekwayere nia judong cokiri “[g]ibed ni lapor ni udul rombe.” (1 Pet. 5:1-3) Ju m’ubeyenyo gidok judong cokiri gicikiri ngo niwil i kum lembe maeno nyanok de. Ng’atu ma tie ni lapor i cokiri ebedo ngo ku paru man timo ma reco. Tek etie jadit cokiri kunoke ngo de pare ecego kite mi cirolembe man mi mwonyo lembe. Utie ngo nia ng’atini udoko jadit cokiri ci dong’ ecopo timo ngo lembe ma reco. (Wel 12:3; Zab. 106:32, 33) Bende, umego copo ‘nwang’u ngo nia etimo gin moko ma rac’; ento ju mange copo bedo ku paru ma rac i wiye pi thelembe moko. (1 Kor. 4:4) Dong’ ka judong cokiri gibemii juk moko m’ujengere iwi Biblia, tim kero iwinjgi m’umbe nimaku ng’eicwiny. Keth jukne i timo.

Umego ma pol gikuro pi nindo ma dupa pi ninwang’u rwom mi doko jadit cokiri. Nyo saa moko ikoso cirocir pilembe idaru ‘yenyo idok jadit cokiri’ pi oro ma dupa? Ka kumeno, gwok wec ma e ma tipo ma leng’ uyuyo i wiye: “Genogen ma galu remo adunde; Ento kinde ma gin ma cande nuti wok, en e yen mi kwo.”​—Rie. 13:12.

Ka ng’atini ubetundo ngo i kum lembakeca moko ma cwinye ni wiye, adundene copo remo. Abraham de ugam uwinjere kumeno. Oro kadhu lee dit ma ginwang’u ngo nyathin giku Sara i ng’ei ma Yehova uciko nia ebimiyo igi nyathin moko ma nico. (Tha. 12:1-3, 7) Kinde ma dong’ oro pa Abraham udoko lee, ewacu ni Yehova kumae: “E Rwoth Yehova, ibimiyo ira ang’o ma nwang’u nyathin umbe kuda . . . Imiyo ira kodhi moko ngo.” Yehova uketho cwiny Abraham nia lembang’ola Pare ma nia ebimiyo ire nyathin moko ma nico bipong’o kakare kakare. Ento oro 14 zoo m’udog ukadhu ka Yehova pong’o lembe m’eng’olone.​—Tha. 15:2-4; 16:16; 21:5.

Nyo Abraham ubayu anyong’a pare mi timo ni Yehova kinde m’ebino kuro pong’o mi lembang’ola maeno? Ungo. Ebedo mbe ku jiji nyanok de iwi lembang’ola pa Mungu. Emedere pare niketho wiye zoo i kum lembe ma ber ma bibino. Jakwenda Paulo ukiewo kumae: “I ng’ei ma Abraham unyotho twiyocwiny, enwang’u lembang’ola pare.” (Ebr. 6:15) I ajiki, Mungu ma Jatego kpo umiyo ni Abraham mugisa m’usagu m’egeno. Lapor pa Abraham ubemiyo iwa ponji ma kani?

Mediri asu nigeno Yehova kadok nwang’u nindo daru kadhu doko lee ma fodi inwang’u ngo rwom m’ibesayu mi doko jadit cokiri de. Kud ibay anyong’a m’ibenwang’u i tic pa Mungu. Pirang’o? Warren, m’ugam ukonyo umego dupa nidoko judong cokiri, udwoko wang’ penji maeno kumae: “Bekwayere nia nindo moko ukeukadhi kara junen nia umego moko uromo andha ninwang’u rwom. Copo man kurayung p’umegone nyuthere nok nok nikadhu kud i timo pare man i kite m’ebetimo ko tic ma jumiyo ire. Ju moko paru nia tic ma gibetimo re ma nyutho nia gitie dhanu ma beco. Eno tie paru ma rac man ma copo cero ng’atini nitimo lembe m’ukwayu etim. Ng’atini bedo ku valer nwang’u ebetimo ni Yehova ku cwinye ceke nik’ebed ebetimo kakani kunoke tijang’o de.”

Umego moko ukuro pi oro apar ku wiye pi nidoko jadit cokiri. Ekoro pi ponji m’enwang’u nikadhu kud i cirocir maeno nimakere ku lembe ma nwang’ere i buku pa Ezekiel 1. Ewacu kumae: “Yehova telo wi magali pare, niwacu wi dilo pare i alir m’efoyo en. Gin ma pire tek utie saa pa Yehova, saa mwa re ngo. Ng’atu m’ubedoko jadit cokiri ngo re ma pire tek​—niwacu gin m’ebemito kunoke kite m’ebemito ebed i iye. Saa moko nwang’u abemito gin ma Yehova nwang’u nia ambe ku yenyne.”

Tek ibeparu nia saa moko ibitimo tic ma ber pa jadit cokiri, tim pi bero mi cokiri pi ninyutho nia ibeyenyo tije andha. Kan ibenwang’u nia lembene ubewotho yo, nyeg i kum adieng’a m’akeca man koso cirocir. Raymond, ma judaru weco pire i wang’e, uwacu kumae: “Ng’atu ma piny romo wang’e ngo cwinye cungo ngo kum piny m’etie ko. Ju ma gidieng’ ni kadhu mukero gikoso anyong’a ma jurutic pa Yehova gitie ko.” Mediri peri nicego nying tipo ma tung’ tung’ pa Mungu, asagane mwonyolembe hai. Tim kero mi timo mediri i thenge mi tipo nikadhu kud i ponji peri ma segi mi Biblia. Tim mediri i tic mi rweyo lembanyong’a man mi ponjo Biblia. Tel wi juruot peri i lembe ma tung’ tung’ mi thenge mi tipo man i thier mi juruot. Nwang’ bero mi bedo karacelo kud umego ku nyimego. Eno zoo biketho ibinwang’u anyong’a ma yawe mbe i tic pa Yehova man ibimediri ma ber pi nitundo i kum lembakeca peri mi nwang’u rwom.

Nitimo mediri pi ninwang’u rwom ma tung’ tung’ i dilo pa Yehova tie mugisa m’uai i bang’ Yehova ne en gire. Eno uketho En kadi dilo pare de mito ngo nia ava lembe uai kud i kum ju m’ubeyenyo tic ma ber kadi mutoro migi de kud uthum i tic pa Mungu ne ma gibetimo. Ju m’ubetimo ni Yehova ku pidoic ma cuu ci ekonyogi man emiyo igi mugisa. Man calu ma wang’eyo, mugisa pare ceke ‘medo can moko ngo nyanok de.’​—Rie. 10:22.

Wacopo timo lembe dupa pi dwoko mer mwa ku Yehova udok tek kadok nwang’u wadaru yenyo rwom pi nindo ma dupa ento wanwang’e ngo de. Calu ma ibewil ungo ku juruot peri kinde m’ibeii nicego kurayung ma tung’ tung’ man m’ibetimo tic ma tek i cokiri, ng’ey nia Yehova biwil ungo nyanok de. Nwang’ anyong’a i tic pa Yehova nikadhu ku i kodhi tic ceke ma jumiyo iri.