FERNANDO woli ti bʌqʼuen * come chaʼtiquil anciano tiʼ subeyob chaʼan mi caj i chaʼleñob tʼan yicʼot. Jajayajl jiñi superintendente i chaʼan circuito miʼ ñumel ti julaʼ, jiñi ancianojob miʼ subeñob chuqui yom miʼ mel chaʼan miʼ ñumen taj i yeʼtel ti congregación. Fernando an i teche i cʼajtiben i bʌ mi mucʼʌch caj i yochel bajcheʼ anciano come añix ora cajel i pejcʌntel. Jiñi superintendente i chaʼan circuito tsaʼ jaxto ñumi ti julaʼ ti jiñi congregación. Jin chaʼan, ¿chuqui mi caj i chaʼ subentel ti jiñi ancianojob?

Juntiquil anciano miʼ taj ti tʼan 1 Timoteo 3:1 i miʼ suben chaʼan tsaʼix waʼchoconti bajcheʼ anciano. Fernando woliyʌch i wen ñʌchʼtan chuqui woliʼ yʌjlel, jin chaʼan toj sajtel i pusicʼal miʼ yʌl: «¿Chuqui? ¿Bajcheʼ tsaʼ?». Jiñi ancianojob miʼ chaʼ subeñob, i Fernando wen tijicña miʼ yubin i bʌ. I cheʼ bʌ miʼ yʌjqʼuel jiñi anuncio ti congregación, wen tijicña miʼ yubiñob.

¿Mulil ba cheʼ bʌ la com lac taj la queʼtel ti congregación? Maʼañic. Jiñi apóstol Pablo tiʼ tsʼijbu: «Mi juntiquil wiñic woliʼ chaʼlen wersa chaʼan miʼ sujtel ti anciano, weñʌch jiñi eʼtel yom bʌ i taj» (1 Tim. 3:1). Ili tʼan tac an i colta cabʌl hermanojob chaʼan miʼ chaʼleñob wersa tiʼ chaʼan bʌ Dios. Jin chaʼan, ti jiñi i tejclum Jehová an cabʌl anciano yicʼot siervo ministerial wen chajpʌbiloʼ bʌ. Come jiñi congregación tac woli i wen colel, bej yomto chaʼan jiñi hermanojob miʼ chaʼleñob wersa chaʼan miʼ sujtelob ti anciano. Pero ¿bajcheʼ miʼ mejlel i melob ti wen? ¿Yom ba miʼ cʌlʌx ñaʼtañob yicʼot miʼ cʌlʌx cʼajtiñob jala mi caj i sujtelob ti anciano cheʼ bajcheʼ tsiʼ mele Fernando?

Jiñi tʼan am bʌ ti griego «chaʼlen wersa» mucʼʌch i yʌcʼ ti ñaʼtʌntel chaʼan mi lac sʌtsʼ lac bʌ chaʼan an chuqui mi lac taj. Ili miʼ yʌqʼueñonla lac ñaʼtan cheʼ bʌ juntiquil miʼ sʌtsʼ i cʼʌb chaʼan miʼ taj i tucʼ i wut teʼ. Pablo mach yomic i yʌl chaʼan mi lac tech la cotsan ti lac pusicʼal jiñi i cʌlʌx mulʌntel eʼtel bajcheʼ anciano. ¿Chucoch maʼañic? Come jiñi yom bʌ ochel ti anciano chaʼañʌch «weñʌch jiñi eʼtel yom bʌ i taj» i mach chaʼañic miʼ qʼuejlel ti ñuc.

Jiñi principio tac am bʌ ti 1 Timoteo 3:2-7 yicʼot Tito 1:5-9 jiñʌch yom bʌ miʼ tsʼʌctesañob chaʼan miʼ mejlel i tajob jiñi eʼtel ti congregación. Juntiquil anciano i cʼabaʼ Raymond tsiʼ yʌlʌ iliyi chaʼan jiñi principio tac: «Jiñi ñuc bʌ i cʼʌjñibal chaʼañon jiñʌch bajcheʼ yilalonla. Ñucʌch i cʼʌjñibal cheʼ la cujilʌch tʼan yicʼot cʌntesa, pero ñuc i cʼʌjñibal jaʼel cheʼ wen jiñi lac melbal, pʼisbil jach chuqui mi lac mel, an wem bʌ lac ñaʼtʌbal, toj bajcheʼ chumulonla, mi laj coltan yañoʼ bʌ yicʼot maʼañic mi lac tsʌtsʼesan lac bʌ ti tʼan».

Jiñi hermano yom bʌ sujtel ti anciano yomʌch miʼ pʌs ti wen i melbal, yom chaʼan maʼañic miʼ yʌjlel mach bʌ weñic tiʼ tojlel, yom cʌmbil ti wen tiʼ tojlel jiñi mach bʌ xñoptʼañobic, yom pʼisbil jach chuqui miʼ mel, yom an wem bʌ i ñaʼtʌbal, mach yomic miʼ tsʌtsʼesan i bʌ tiʼ tʼan yicʼot yom toj bajcheʼ chumul. Cheʼ bajcheʼ ili, jiñi congregación mi caj i ñopob chaʼan mucʼʌch caj i cʌntʌntelob ti wen. Mucʼʌch i coltan jiñi xcolelob yicʼot jiñi tsijiʼobto bʌ. Cheʼ jaʼel, miʼ mulan i mel chuqui wen, miʼ yʌcʼ ñʌchʼtʌlel, miʼ coltan jiñi cʼamoʼ bʌ yicʼot jiñi añobix bʌ i jabilel. Pejtelel ili miʼ chaʼlen wersa i mel come yom i coltan jiñi yañoʼ bʌ, i mach chaʼañic jach miʼ yotsʌntel ti anciano. *

Jiñi ancianojob miʼ mejlel i ticʼob yicʼot i ñuqʼuesʌbeñob i pusicʼal jiñi woli bʌ i chaʼleñob wersa i taj i yeʼtel ti congregación. Pero chaʼan miʼ mejlel i taj i yeʼtel jiñi hermano, añʌch tiʼ wenta chaʼan miʼ jacʼ jiñi principio tac. Juntiquil hermano i cʼabaʼ Henry, añix bʌ ora an bajcheʼ anciano, miʼ yʌl: «Mi a wom ochel bajcheʼ anciano, chaʼlen wersa a tsʼʌctesan jiñi principio tac». Cheʼ jiñi, tsiʼ yʌlʌ muʼ bʌ lac taj ti Eclesiastés 9:10: «Tiʼ pejtelel chuqui maʼ mel, mele bajcheʼ yom melol», yom bʌ i yʌl, yicʼot pejtelel a pʼʌtʌlel. Mi jiñi ancianojob miʼ subeñetob chaʼan an chuqui yom maʼ mel, chaʼlen wersa a mel ti wen. Mele ti utsʼat jiñi eʼtel muʼ bʌ a wʌqʼuentel ti congregación, jinto jaʼel cheʼ maʼ chaʼlen misujel. Pejtelel eʼtel muʼ bʌ a mel mach toʼolic jach». Mi a wom ochel bajcheʼ anciano, yom wen a wujil eʼtel yicʼot maʼ jacʼ pejtelel muʼ bʌ a subentel. Jiñi yom bʌ maʼ pʌs ti a cuxtʌlel jiñʌch pecʼlel, mach jiñic cheʼ maʼ chanʼesan a bʌ yicʼot cheʼ cojach maʼ wotsan ti a pusicʼal i cʌlʌx mulʌntel jiñi eʼtel (Mat. 23:8-12).

Tajol an yomoʼ bʌ i taj i yeʼtel ti congregación muʼ bʌ i yʌlob tʼan tac mach bʌ weñic o miʼ ñop i qʼuextʌbeñob i pensar jiñi ancianojob. An muʼ bʌ i michʼañob cheʼ miʼ yʌqʼuentelob ticʼojel ti ancianojob. Muʼ bʌ i melob bajcheʼ ili, yom miʼ cʼajtibeñob i bʌ: «¿Woli ba c bajñel sʌclan c wenlel o com j cʌntʌben i tiñʌmeʼ Jehová yicʼot c pecʼlel?».

Yambʌ principio yom bʌ miʼ tsʼʌctesañob jiñi ancianojob jiñʌch chaʼan miʼ pʌsob i bʌ «bajcheʼ wem bʌ ejemplo chaʼan jiñi tiñʌmeʼ tac» (1 Ped. 5:1-3). ¿Bajcheʼ miʼ mejlel lac mel iliyi? Mach yʌlʌyic mi ancianojonla o maʼañic, mach yomic lac mel mach tac bʌ weñic yicʼot yom mi lac pʌs lac pijt i mi lac lʌtʼ chuqui tac mi lac ñusan. Tiʼ sujm, cheʼ an majqui miʼ taj i yeʼtel bajcheʼ anciano mach yomic i yʌl chaʼan maʼañix i sajtemal (Nm. 12:3; Sal. 106:32, 33). Tajol jiñi hermano miʼ ñaʼtan chaʼan sʌc an i conciencia, pero tajol jiñi yañoʼ bʌ mach cheʼic miʼ qʼuelob i añʌch i sujmlel chucoch (1 Cor. 4:4). Cheʼ jaʼel, yom maʼ ñʌchʼtan i mach yomic maʼ michʼan cheʼ bʌ jiñi ancianojob miʼ yʌqʼueñetob ticʼojel chucul bʌ ti Biblia, i chaʼlen wersa a mel bajcheʼ tsaʼ subentiyet.

An hermanojob muʼ bʌ i ñaʼtañob chaʼan wen jalix woli i pijtañob. Mi jatet añix ora woli a ñaʼtan sujtel bajcheʼ anciano, ¿muʼ ba a cʌlʌx cʼojoʼtan? Mi cheʼi, cʼajtesan muʼ bʌ i yʌl ili proverbio: «Cheʼ jal miʼ tilel lac pijtaya wocol jax mi lac pijtan. Cheʼ miʼ tilel chuqui la com lajalʌch bajcheʼ cuxul bʌ teʼ muʼ bʌ i yʌqʼueñonla laj cuxtʌlel» (Pr. 13:12).

Cheʼ bʌ jiñi muʼ bʌ lac wen mulan maʼañic mi lac taj ti ora, jiñi lac pusicʼal miʼ mejlel ti cʼamʼan. Abrahán cheʼʌch tsiʼ ñusa. Jehová tiʼ sube chaʼan mi caj i yʌqʼuen juntiquil i yalobil, pero abrahán yicʼot Sara jal tsiʼ pijtayob (Gn. 12:1-3, 7). Cheʼ bʌ Abrahán wen añix i jabilel tsiʼ yʌlʌ: «¿Chuqui miʼ mejlel a wʌqʼueñon? Come cʼʌlʌl wʌle maʼanic calobil. [...] Maʼanic tsaʼ wʌqʼueyon c pʼolbal». Jehová tsaʼʌch i chaʼ sube Abrahán muʼ bʌ caj i mel, pero tsaʼto i chaʼ pijta 14 jab chaʼan miʼ qʼuel ti tsʼʌctiyel (Gn. 15:2-4; 16:16; 21:5).

Tsaʼ ba i sʌtʌ Abrahán i tijicñʌyel ti melol i yeʼtel Jehová cheʼ tsiʼ wen chaʼle pijt? Maʼañic. Abrahán maʼañic ba ora tsiʼ ñaʼta chaʼan Jehová maʼañic mi caj i tsʼʌctesan i tʼan, jin chaʼan tsiʼ bej pijta. Jiñi apóstol Pablo tiʼ tsʼijbu: «Cheʼ bʌ Abrahán tsiʼ pʌsʌ i pijt, tsaʼ aqʼuenti jiñi tʼan» (Heb. 6:15). Jehová tsaʼʌch i yʌqʼue Abrahán mach bʌ pijtʌbilic i chaʼan. ¿Chuqui miʼ cʌntesañonla jiñi ejemplo?

Mi jatet añix cabʌl jab a wom ochel bajcheʼ anciano i maxto a taja, mach yomic maʼ lujbʼan. Chʌn ñopo ti Jehová. Mach a sʌt a tijicñʌyel. Juntiquil hermano i cʼabaʼ William am bʌ i wen colta cabʌl hermanojob chaʼan miʼ colelob tiʼ chaʼan bʌ Dios, miʼ tsictesan: «Chaʼan juntiquil hermano miʼ mejlel i tsʼʌctesan jiñi principio tac chaʼan miʼ taj i yeʼtel, mucʼʌch i ñumel cabʌl ora. Yaʼʌch tiʼ melbal muʼ bʌ caj i pʌs jiñi yujil bʌ i melol yicʼot bajcheʼ miʼ qʼuel i yeʼtel. An muʼ bʌ i ñaʼtañob chaʼan yaʼan i ñuclelob cheʼ añob i yeʼtel ti congregación. Ili pensar mach weñic, i maʼañic ba ora mi caj i yʌcʼonla ti ajñel ti wen. Tiʼ sujm, jiñi ñumen wem bʌ jiñʌch cheʼ xucʼul mi lac melben i yeʼtel Jehová, mach yʌlʌyic baqui añonla o chuqui mi lac mel».

Juntiquil hermano ñumen ti 10 jab tsiʼ pijta chaʼan miʼ taj i yeʼtel bajcheʼ anciano. Tsiʼ taja ti tan muʼ bʌ i yʌjlel ti Ezequiel capítulo 1, i miʼ yʌl chuqui tsiʼ cʌñʌ: «Jehová miʼ ñijcan i carro, jiñi i yorganización, i jiñʌch yujil mi ora yom miʼ majlel. Mach cheʼic miʼ yujtel cheʼ bajcheʼ ñaʼtʌbil lac chaʼan, jiñʌch cheʼ bajcheʼ ñaʼtʌbil i chaʼan Jehová. Anquese wen com sujtel bajcheʼ anciano, jiñi ñumen ñuc bʌ i cʼʌjñibal mach jiñic jiñi com bʌ o muʼ bʌ i mejlel c mel. Tajol Jehová yujil chaʼan jiñi com bʌ mach jiñic ñumen ñuc bʌ i cʼʌjñibal c chaʼan».

Mi a wom ochel bajcheʼ anciano, chaʼlen wersa a wʌqʼuen i tijicñʌyel jiñi congregación. Mach a cʌlʌx pensarin mi mach orajic maʼ taj a weʼtel, bej pijtan majlel. Jiñi hermano Raymond, tsaʼix bʌ lac taja ti tʼan, tsiʼ yʌlʌ: «Mi jin jach maʼ wʌcʼ ti a ñaʼtʌbal jiñi a wom bʌ, maʼañic mi caj i yʌqʼueñet a tijicñʌyel cheʼ maʼ taj. Mi jin jach maʼ pijtan jiñi a wom bʌ, mi caj a sʌt a tijicñʌyel tiʼ melol i yeʼtel Jehová». Jin chaʼan, yom maʼ ñumen pʌs jiñi melbalʌl tac muʼ bʌ i yʌcʼ jiñi espíritu, pero ñumento jiñi pijt. Pʼʌtʼesan jiñi a ñopoñel cheʼ maʼ wen pejcan jiñi Biblia. Ñumen chaʼlen subtʼan yicʼot a sujtesan ti xcʌntʼan yañoʼ bʌ. Coltan a familia chaʼan miʼ melob i chaʼan bʌ Dios yicʼot mele jiñi a chʼujutesaya ti familia. Locʼsʌben i wenlel cheʼ añet yicʼot jiñi hermanojob. Mi cheʼʌch maʼ mel, tijicña mi caj a wubin cʼʌlʌl cheʼ maʼ taj a weʼtel.

Qʼuele bajcheʼ jumpʼejl majtañʌl tilem bʌ ti Jehová jiñi principio tac yom bʌ maʼ tsʼʌctesan chaʼan maʼ wochel bajcheʼ anciano, come mi caj i coltañet a taj wem bʌ a melbal yicʼot mi caj a coltan jiñi congregación. Jehová yicʼot i yorganización mach yomic chaʼan maʼ taj a chʼijyemlel o maʼ lujbʼan. Mucʼʌch i coltan yicʼot miʼ yʌqʼuen i bendición jiñi muʼ bʌ i melbeñob i yeʼtel ti wen. Cheʼ jaʼel, yom maʼ cʼajtesan chaʼan jiñi i bendición Jehová maʼañic miʼ yʌcʼ chʼijyemlel (Pr. 10:22).

Anquese añix ora i cajel a chʌn pijtan, bej chaʼlen wersa a colel tiʼ chaʼan bʌ Dios. Jehová maʼañic miʼ ñajʌtesan jiñi muʼ bʌ a mel chaʼan maʼ taj wem bʌ a melbal yicʼot cheʼ maʼ chaʼlen tsʌts bʌ eʼtel ti congregación i maʼañic maʼ bajñel cʌy a familia. Melben i yeʼtel Jehová yicʼot a tijicñʌyel, mach yʌlʌyic chuqui ti eʼtel maʼ wʌqʼuentel.