FERNANDO * ehao fioo. Asafoŋ onukpai enyɔ tsɛ lɛ kɛtee sɛɛ akɛ amɛmiitao ni amɛkɛ lɛ awie fioo. No mli lɛ, kpokpaa nɔkwɛlɔ lɛ ebasara amɛsafo lɛ shii abɔ, ni asafoŋ onukpai lɛ etsɔɔ Fernando nibii komɛi ni esa akɛ efee koni efee mɔ ni sa kɛhã sɔɔmɔ hegbɛi krokomɛi yɛ asafo lɛ mli. Be ni be saŋŋ shwie mli lɛ, Fernando yiŋ etɛ̃ɛɛ lɛ yɛ nɔ hewɔ ni ahalako lɛ akɛ asafoŋ onukpa lolo lɛ he. Amrɔ nɛɛ, kpokpaa nɔkwɛlɔ lɛ ebasara amɛsafo lɛ ekoŋŋ ni etee. Mɛni asafoŋ onukpai lɛ baakɛɛ lɛ ekoŋŋ?

Be ni asafoŋ onukpai lɛ ateŋ mɔ kome bɔi wiemɔi lɛ, ebo toi keŋŋ. Nyɛmi nuu lɛ damɔ wiemɔi ni yɔɔ 1 Timoteo 3:1 lɛ nɔ ekɛɛ lɛ akɛ, asafoŋ onukpai lɛ anine eshɛ wolo nɔ ni tsɔɔ akɛ, ahala lɛ akɛ asafoŋ onukpa. Fernando naa kpɛ ehe amrɔ, ni ebi akɛ, “Mɛni okɛɛ lɛ?” Nyɛmi nuu lɛ tĩ nɔ ni ekɛɛ Fernando lɛ mli ekoŋŋ, ni Fernando ŋmɔ mugɛɛ. No sɛɛ be ni atswa ehalamɔ lɛ he adafi yɛ asafo lɛ mli lɛ, asafoŋbii lɛ fɛɛ ná miishɛɛ.

Ani tɔmɔ yɛ he akɛ mɔ ko aaatao sɔɔmɔ hegbɛi yɛ asafo lɛ mli? Dabi kwraa. Taakɛ 1 Timoteo 3:1 lɛ wie lɛ, “kɛ́ mɔ ko miitao nɔkwɛmɔ nitsumɔ lɛ, eetao nitsumɔ kpakpa.” Kristofoi hii babaoo damɔɔ hewalɛwoo ni ŋmalɛ nɛɛ kɛhãa lɛ nɔ amɛyaa amɛhiɛ koni amɛfee mɛi ni sa kɛhã sɔɔmɔ hegbɛi yɛ asafo lɛ mli. Enɛ hewɔ lɛ, ayɛ hii akpei nyɔŋmai abɔ yɛ Nyɔŋmɔ webii ateŋ ni miisɔmɔ akɛ asafoŋ onukpai kɛ asafoŋ sɔɔlɔi. Shi akɛni aatotoi asafoi babaoo hewɔ lɛ, ehe miihia ni nyɛmimɛi hii babaoo aya amɛhiɛ ní amɛbatsɔmɔ asafoŋ onukpai kɛ asafoŋ sɔɔlɔi. Mɛni ji gbɛ ni hi ni esa akɛ atsɔ nɔ afee enɛ? Ni ani esa akɛ mɛi ni miitao amɛtsɔmɔ nɔkwɛlɔi lɛ afee yeyeeye taakɛ Fernando fee lɛ?

Ajie wiemɔ ni atsɔɔ shishi yɛ Biblia lɛ mli akɛ “miitao” lɛ kɛjɛ Hela feemɔwiemɔ ko ni tsɔɔ nɔ ko ni mɔ ko miishwe waa ni ená, loo mɔ ko ni miikpã emli ní enine ashɛ nɔ ko nɔ lɛ mli. Ekolɛ nɔ ni enɛ kɛbaa ojwɛŋmɔŋ ji, aduawa ko ni ŋɔɔ ni mɔ ko  miikpã emli ní etse kɛjɛ tso ko nɔ. Shi kɛ́ akɛɛ mɔ ko miitao “nɔkwɛmɔ nitsumɔ lɛ,” etsɔɔɔ akɛ mɔ lɛ miitao sɔɔmɔ hegbɛ tamɔ akɛ hiŋmɛitsuu tseɔ aduawa ko lɛ. Mɛni hewɔ? Ejaakɛ esa akɛ oti ni ma mɔ ni taoɔ akɛ esɔmɔ akɛ asafoŋ onukpa lɛ hiɛ lɛ afee akɛ, eetao etsu “nitsumɔ kpakpa,” shi jeee ni eetao gbɛnaa ko.

Taomɔ nii ni esa akɛ mɔ ko ashɛ he koni enyɛ etsu nitsumɔ kpakpa nɛɛ ateŋ babaoo yɛ 1 Timoteo 3:2-7 kɛ Tito 1:5-9 lɛ. Asafoŋ onukpa ko ni atsɛɔ lɛ Raymond, ni kɛ afii babaoo esɔmɔ lɛ wie taomɔ nii nɛɛ ahe akɛ: “Mi lɛ, nɔ ni minaa akɛ ehe hiaa waa ji bɔ ni mɔ ko ji diɛŋtsɛ. Wiemɔhamɔ kɛ nitsɔɔmɔ he hiaa moŋ, shi esaaa ni wɔkuɔ wɔhiɛ wɔshwieɔ taomɔ nii krokomɛi ni he hiaa tamɔ, mɔ lɛ afee mɔ ni anaŋ ehe sane ko atã, ehiɛ kã shi, ejwɛŋmɔ mli tse, ebaa ejeŋ jogbaŋŋ, efeɔ mɛi gbɔ, ni ehe jɔ lɛ anɔ.”

Nyɛmi nuu ko ni miitao nɔkwɛmɔ nitsumɔ lɛ hãaa aná ehe sane ko atã ejaakɛ etsiɔ ehe kɛjeɔ anɔkwa ni ayeee kɛ muji nii fɛɛ he. Ehiɛ kã shi, ejwɛŋmɔ mli tse, ebaa ejeŋ jogbaŋŋ, ni ehe jɔ; no hewɔ lɛ, asafoŋbii lɛ baanyɛ amu afɔ̃ enɔ akɛ ebaanyɛ ekɛ gbɛtsɔɔmɔ ahã asafo lɛ ni eye ebua amɛ kɛtsu amɛnaagbai ahe nii. Akɛni efeɔ mɛi gbɔ hewɔ lɛ, enyɛɔ ewoɔ oblahii kɛ oblayei kɛ mɛi ni ba asafoi lɛ mli etsɛko lɛ hewalɛ. Esumɔɔ ekpakpa, no hewɔ lɛ eshɛjeɔ mɛi ni bɛ hewalɛ kɛ mɛi ni egbɔlɔ lɛ amii, ni eyeɔ ebuaa amɛ. Jeee akɛni eetao ahala lɛ akɛ nɔkwɛlɔ lɛ hewɔ ejieɔ sui nɛɛ akpo lɛ, shi moŋ akɛni eetao eye ebua mɛi krokomɛi lɛ hewɔ. *

Eyɛ mli akɛ asafoŋ onukpai lɛ sumɔɔ akɛ amɛwo mɔ ko ni miitao nɔkwɛmɔ nitsumɔ lɛ hewalɛ loo ŋaa yɛ hei komɛi ni esa akɛ eya ehiɛ yɛ lɛ moŋ, shi eji mɔ lɛ diɛŋtsɛ sɔ̃ akɛ eshɛ Ŋmalɛ naa taomɔ nii nɛɛ ahe. Asafoŋ onukpa ko ni yɔɔ niiashikpamɔ ni atsɛɔ lɛ Henry lɛ wie akɛ: “Kɛ́ ootao nɔkwɛmɔ nitsumɔ lɛ, miamɔ ohiɛ ni ohã ana akɛ oshɛ taomɔ nii lɛ ahe.” Etsɛ wiemɔi ni yɔɔ Jajelɔ 9:10 lɛ yisɛɛ ni etsɔɔ mli akɛ: “‘Nɔ fɛɛ nɔ tsumɔ ni onine aaashɛ nɔ lɛ, okɛ ohewalɛ atsũ.’ Nitsumɔ fɛɛ nitsumɔ ni asafoŋ onukpai lɛ kɛbaawo odɛŋ lɛ, okɛ onyɛmɔ fɛɛ atsu. Ná nitsumɔ fɛɛ nitsumɔ ni akɛbaawo odɛŋ yɛ  asafo lɛ mli, ní bɛɛmɔ po fata he lɛ he miishɛɛ. Be ni be shwieɔ mli lɛ, abaana omɔdɛŋbɔɔ lɛ faŋŋ.” Kɛ́ oosumɔ ni osɔmɔ akɛ asafoŋ onukpa wɔsɛɛ ko lɛ, miamɔ ohiɛ waa ni ofee mɔ ko ni anyɛɔ amuɔ afɔ̃ɔ enɔ yɛ sɔɔmɔ nitsumɔ lɛ fãi lɛ fɛɛ mli. Esa akɛ ale bo akɛ mɔ ko ni baa ehe shi, jeee mɔ ko ni kɛ hiŋmɛitsuu miitao hegbɛ.—Mat. 23:8-12.

Ekolɛ mɛi ni miitao sɔɔmɔ hegbɛi yɛ asafo lɛ mli lɛ ateŋ mɛi komɛi baawo asafoŋ onukpai lɛ ekomɛi ayiŋ loo amɛbaafee nibii ni baahã onukpai akuu lɛ asusu akɛ amɛsa kɛhã sɔɔmɔ hegbɛi. Mɛi komɛi hu lɛ, kɛ́ onukpai lɛ wo amɛ ŋaa yɛ nɔ ko he lɛ, kɛkɛ lɛ amɛmli efu. Esa akɛ mɛi ni tamɔ nɛkɛ lɛ abi amɛhe akɛ, ‘Ani miitao mafee nɔ ni mi diɛŋtsɛ misumɔɔ, aloo miisumɔ ni mikɛ heshibaa akwɛ Yehowa tooi lɛ?’

Nɔ ko hu yɛ ni esaaa ni mɛi ni taoɔ nɔkwɛmɔ nitsumɔ lɛ hiɛ kpaa nɔ, no ji, esa akɛ asafoŋ onukpai lɛ afee “mɛi ni toɔ okadii amɛhãa asafoku lɛ.” (1 Pet. 5:1-3) Mɔ ni toɔ okadi ehãa asafo lɛ ehiɛɛɛ yiŋtoo gbonyo ko, ni efeee enii yɛ dujiaŋ. Kɛ́ ahala lɛ jio, ahalako lɛ jio lɛ, etoɔ etsui shi. Kɛ́ mɔ ko batsɔ asafoŋ onukpa lɛ, no hãaa eye ehe kɛjɛ emuu ni eyeee lɛ he. (4 Mose 12:3; Lala 106:32, 33) Agbɛnɛ hu, nyɛmi nuu ko nyɛŋ ‘ale nɔ ko yɛ lɛ diɛŋtsɛ ehe,’ shi ekolɛ mɛi krokomɛi baana nibii komɛi ni baahã amɛná ehe sane ko amɛtã. (1 Kor. 4:4) No hewɔ lɛ, kɛ́ asafoŋ onukpai lɛ jɛ Biblia lɛ mli amɛwo bo ŋaa lɛ, omli akafu. Bo toi, ní okɛtsu nii.

Bei komɛi lɛ, nyɛmimɛi hii komɛi nuɔ he akɛ amɛmɛ be kplaŋŋ dani ahala amɛ. Kɛ́ okɛ afii babaoo ‘etao nɔkwɛmɔ nitsumɔ lɛ,’ ani bei komɛi lɛ, onijiaŋ jeɔ wui? Kɛ́ nakai lɛ, belɛ kadimɔ akɛ Biblia lɛ wieɔ akɛ: “Hiɛnɔkamɔ ni baaa mli mra lɛ, ewoɔ mɔ tsui hela; shi kɛ́ nɔ ni ashweɔ lɛ ba lɛ, wala tso ni.”—Abɛi 13:12.

Kɛ́ mɔ ko miishwe nɔ ko waa, ni be kplaŋŋ ho ni ebako mli lɛ, enyɛɔ ewoɔ etsui hela. Nakai ji bɔ ni Abraham nu he. Yehowa wo lɛ shi akɛ ebaahã lɛ binuu, shi afii babaoo ho ní ekɛ Sara fɔko bi kome po. (1 Mose 12:1-3, 7) Be ni Abraham gbɔ lɛ, ebi Yehowa akɛ: “Nuŋtsɔ Yehowa! Mɛni ooohã mi, mi ni minyiɛ ni mibɛ bi . . . Naa, mi lɛ ohãko mi seshi ko.” Yehowa ma nɔ mi ehã lɛ akɛ, shi ni ewo lɛ akɛ ebaahã lɛ binuu lɛ baaba mli. Shi kɛ́ hooo kwraa lɛ, afii 14 sɔŋŋ ho dani Nyɔŋmɔ shiwoo lɛ ba mli.—1 Mose 15:2-4; 16:16; 21:5.

Be ni Abraham mɛɔ lɛ, ani miishɛɛ ni ekɛsɔmɔɔ Yehowa lɛ tã? Dabi. Ejeee Nyɔŋmɔ shiwoo lɛ he ŋwane kɔkɔɔkɔ. Etee nɔ ekɛ ehiɛ fɔ̃ shiwoo lɛ nɔ akɛ ebaaba mli. Bɔfo Paulo ŋma akɛ: “Akɛni [Abraham to] etsui shi hewɔ lɛ, enine shɛ shiwoo lɛ nɔ.” (Heb. 6:15) Naagbee mli lɛ, Nyɔŋmɔ Ofe lɛ jɔɔ nakai nuu anɔkwafo lɛ fe bɔ ni ekpaa gbɛ kwraa. Mɛni wɔbaanyɛ wɔkase yɛ Abraham dɛŋ?

Kɛ́ oosumɔ ni osɔmɔ akɛ asafoŋ onukpa, ni omɛ afii babaoo shi ahalako bo lolo lɛ, yaa nɔ okɛ ohiɛ afɔ̃ Yehowa nɔ. Kaahã miishɛɛ ni okɛsɔmɔɔ Yehowa lɛ miitã. Mɛni hewɔ? Nyɛmi nuu ko ni atsɛɔ lɛ Warren, ní eye ebua nyɛmimɛi hii babaoo ni amɛtee amɛhiɛ yɛ mumɔŋ lɛ tsɔɔ nɔ hewɔ lɛ mli akɛ:  “Eheɔ be dani mɔ ko bafeɔ mɔ ni sa kɛhã sɔɔmɔ hegbɛ. Be ni be shwieɔ mli lɛ, anaa nyɛmɔi kɛ sui ni nyɛmi nuu ko yɔɔ lɛ fiofio yɛ bɔ ni efeɔ enii ehãa kɛ bɔ ni etsuɔ nitsumɔi ni akɛwoɔ edɛŋ lɛ ahe nii ehãa lɛ mli. Mɛi komɛi susuɔ akɛ kɛ́ ahala amɛ loo amɛnine shɛ sɔɔmɔ hegbɛ ko nɔ lɛ, no ji nɔ ni tsɔɔ akɛ amɛye omanye. Oshara yɛ susumɔ ni tamɔ nakai lɛ he waa, ni ebaanyɛ ehã mɔ lɛ afee yeyeeye. Kɛ́ oye Yehowa anɔkwa yɛ he fɛɛ he ni oyɔɔ kɛ nɔ fɛɛ nɔ ni otsuɔ lɛ mli lɛ, no ji nɔ ni tsɔɔ akɛ oye omanye.”

Nyɛmi nuu ko mɛ nɔ ni fe afii nyɔŋma dani ahala lɛ akɛ asafoŋ onukpa. Etsɛ sane ko ni ale waa ni yɔɔ Ezekiel yitso 1 lɛ yisɛɛ, ni ekɛtsɔɔ nɔ ni ekase yɛ mli lɛ mli akɛ: “Yehowa kudɔɔ eshwiili lɛ, ni ji egbɛjianɔtoo lɛ, yɛ bɔ ni esumɔɔ ni ehiɛ foi ehã lɛ naa. Nɔ ni he hiaa waa ji be ni Yehowa eto, jeee be ni wɔ wɔto. Yɛ asafoŋ onukpa ni mitaoɔ matsɔ lɛ gbɛfaŋ lɛ, jeee nɔ ni mitaoɔ loo mɔ ni mitaoɔ matsɔ lɛ ji nɔ ni he hiaa. Ekolɛ nɔ ni Yehowa le akɛ ehe hiaa mi lɛ, jeee no ji nɔ ni mitaoɔ lɛ.”

Kɛji oosumɔ ni wɔsɛɛ ko lɛ osɔmɔ akɛ asafoŋ onukpa lɛ, yaa nɔ otao nɔkwɛmɔ nitsumɔ nɛɛ kɛtsɔ nibii ni kɛ miishɛɛ baaba asafo lɛ mli ní ooofee lɛ nɔ. Kɛ́ efee tamɔ nɔ ni nibii asɛɛ miigbala shi fe bɔ ni okpaa gbɛ lɛ, too otsui shi, ni kaafee yeyeeye. Raymond ni atsĩ etã kɛtsɔ hiɛ lɛ wie akɛ: “Kɛ́ mɔ ko kɛ hiŋmɛitsuu miitao nɔ ko lɛ, etsui enyɔɔɔ emli. Mɛi ni feɔ yeyeeye be fɛɛ be lɛ náaa miishɛɛ yɛ Yehowa sɔɔmɔ mli.” Wo Nyɔŋmɔ mumɔ lɛ yibii lɛ, titri lɛ, tsuishitoo. Bɔɔ mɔdɛŋ ni owaje okɛ Yehowa teŋ wekukpaa lɛ kɛtsɔ Ŋmalɛ lɛ ni ookase lɛ nɔ. Okɛ be babaoo ashiɛ sane kpakpa lɛ, ní okɛ mɛi ni yɔɔ wiemɔ lɛ he miishɛɛ lɛ akase Biblia lɛ. Nyiɛmɔ oweku lɛ hiɛ yɛ teokrase nifeemɔi kɛ weku jamɔ mli. Okɛ hegbɛ fɛɛ hegbɛ ni onáa ni okɛ nyɛmimɛi hii kɛ yei lɛ sharaa lɛ akashwɛ kwraa. Be ni oyaa ohiɛ kɛshɛɔ oti ni ma ohiɛ lɛ he lɛ, omii baashɛ ohe waa.

Eji Yehowa dɛŋ jɔɔmɔ akɛ mɔ ko aaafee nibii ni baahã efee mɔ ni sa kɛhã sɔɔmɔ hegbɛi; Yehowa kɛ egbɛjianɔtoo lɛ fɛɛ sumɔɔɔ ni mɛi ni taoɔ nɔkwɛmɔ nitsumɔ lɛ feɔ basaa, ní miishɛɛ ni amɛkɛsɔmɔɔ lɛ lɛ tãa. Nyɔŋmɔ yeɔ ebuaa mɛi fɛɛ ni sɔmɔɔ lɛ kɛ jwɛŋmɔ ni ja lɛ, ni ejɔɔ amɛ. Taakɛ eji yɛ jɔɔmɔi fɛɛ ni ekɛduroɔ wɔ lɛ agbɛfaŋ lɛ, “ekɛ piŋmɔ ko fataaa he.”—Abɛi 10:22, NW.

Kɛji okɛ be saŋŋ etao nɔkwɛmɔ nitsumɔ lɛ, nibii babaoo yɛ ni obaanyɛ ofee kɛwaje okɛ Yehowa teŋ wekukpaa lɛ. Be ni obɔɔ mɔdɛŋ ni oshɛ taomɔ nii lɛ ahe, ní otsuɔ nitsumɔi fɛɛ ni akɛwoɔ odɛŋ yɛ asafo lɛ mli lɛ jogbaŋŋ, ní oyeɔ obuaa oweku lɛ koni amɛ kɛ Yehowa teŋ wekukpaa lɛ mli awa lɛ, ná nɔmimaa akɛ Yehowa hiɛ kpaŋ osɔɔmɔ lɛ nɔ kɔkɔɔkɔ. Eba akɛ obaaná miishɛɛ yɛ Yehowa sɔɔmɔ lɛ mli be fɛɛ be, ekɔɔɔ he eko nitsumɔi ni akɛbaawo odɛŋ.