FERNANDO a be ia gari. Elda rua idia ura ia do idia hereva henia. Guna, sekit naria tauna ia vadivadi murinai, elda taudia ese Fernando idia hadibaia dahaka ia karaia diba unai amo do ia hegeregere kongrigeisen lalonai maduna haida ia huaia totona. Nega ia hanaia lalonai, Fernando ia laloa ia do idia abia hidi elda tauna ai do ia lao eiava lasi. Sekit naria tauna be vanegai kongrigeisen ma ia vadivadi henia lou. Hari, elda taudia be dahaka do idia hereva?

Unai elda ta ese Fernando ia hereva henia neganai, Fernando ia kamonai. Elda tadikaka ese 1 Timoteo 3:1 ia herevalaia bona Fernando ia hadibaia, elda oreana be revareva ia abia bona Fernando idia abia hidi elda tauna ai ia lao totona. Fernando be ia hoa bada dainai unai elda tauna ia nanadaia, “Dahaka oi gwau?” Tadikaka ese matamanai ia gwauraia hereva ma ia gwauraia lou, bona Fernando ia kiri. Kongrigeisen idia hadibaia Fernando be elda maduna ia abia neganai, ibounai idia moale.

Bema ta ia ura kongrigeisen lalonai maduna ia abia, unai be kerere, a? Lasi. Timoteo Ginigunana 3:1 ia gwau, “Bema ta ia ura naria tauna ena maduna ia [“tahua,” BHḡ], ia be gaukara namona ia ura henia unai.” Keristani tatau momo be unai hagoadaia herevana idia badinaia, bona idia gaukara goada ela bona idia hegeregere kongrigeisen lalonai maduna idia huaia totona. Unai dainai tanobada hegegemadai, elda bona hesiai taudia namodia tausen momo idia noho. To, tanobada hegegemadai kongrigeisen momo idia hamatamaia dainai, tadikaka momo ese unai maduna idia tahua be namo. To, edena dala ai unai maduna do idia abia? Bona Fernando bamona, idia ura elda maduna idia abia tadikaka ese unai maduna do idia abia negana idia laloa momo be maoro, a?

Baibel ai inai hereva “tahua” be Greek herevana ta amo idia hahanaia, bona ia be ta ese gau ta ia ura henia dikadika bona unai gauna ia abia totona ia gaukara goada karana ia herevalaia. Unai oi laloa neganai, reana oi be tau ta ese au huahua namo hereana  ta ia abia totona, ena imana ia halataia karana oi laloa. To, namo lasi ta be mai mataganigani ida “naria tauna ena maduna” ia tahua. Dahaka dainai? Badina elda maduna idia ura abia taudia be ladana bada idia tahua lasi, to edia ura be “gaukara namona” do idia karaia.

Unai gaukara namona ena taravatu idauidau be 1 Timoteo 3:2-7 bona Tito 1:5-9 ai idia noho. Raymond, lagani momo elda maduna ia huaia tadikaka ta, ia gwau: “Lau laloa mai anina bada gauna be, ita be edena bamona taudia. Momokani, ma haida ita hereva henia bona hadibaia karana be mai anina bada, to namona be kerere ita karaia lasi, eda kara ita biagua, ita laloa namonamo, dala maorona ita badinaia, bona heabidae karana ita hahedinaraia.”

Namona be elda maduna ia tahua tadikaka ese koikoi bona kara mirodia ibounai ia dadaraia, unai amo ia hahedinaraia ia be kerere ta lasi. Ia ese ena kara ia biagua, ia laloa namonamo bona dala maorona ia badinaia; unai dainai kongrigeisen taudia idia itaia ia be hegeregere idia do ia gunalaia bona edia hekwakwanai negadiai ia durudia totona. Ena heabidae karana amo ia ese matamata taudia bona vanegai sibona hereva momokani lalonai idia vareai taudia ia hagoadaia. Ia be kara namodia ia ura henia bada dainai, idia gorere bona buruka taudia ia durua bona hagoadaia. To, namo lasi tadikaka be elda maduna sibona ia ura abia dainai unai kara namodia ia karaia. Namona be unai ia karaia badina ia ura ma haida ia durua. b

Elda oreana be mai moale ida elda maduna ia tahua tadikaka ia durua bona hagoadaia, to unai tadikaka sibona ese Baibel ena taravatu ia badinadia be namo. Henry, lagani momo elda maduna ia huaia tadikaka ta, ia gwau: “Bema oi ura elda tauna ai oi lao, namona be oi hahedinaraia oi be hegeregere unai maduna oi abia totona.” Hadibaia Tauna 9:10 ia herevalaia, ia gwau: “‘Oiemu imana ese ia davaria gaukara ibounai, be do oi karaia mai oiemu goada ibounai danu.’ Elda taudia ese oi dekenai gaukara idia henia neganai, oi karaia namonamo. Kongrigeisen dekenai oi idia henia gaukara ibounai, hegeregere Kingdom Hall daroa gaukarana, oi moalelaia be  namo. Nega korikori ai, emu gaukara bona hekwarahi ese anina do ia havaraia.” Bema oi ura nega vaira ai elda maduna oi abia, namona be hari oi gaukara goada bona mai momokani ida hesiai gaukara idauidau oi karaia. Namona be oi hekokoroku lasi, to manau karana oi hahedinaraia.​—⁠Mat. 23:8-12.

Haida be hunia dalanai o elda oreana ena lalona idia veria toho idia do ia abia hidi elda maduna idia abia totona. Haida be elda ese idia sisiba henia neganai idia badu. Unai bamona taudia ese sibona inai henanadai idia henia be namo: ‘Lau be sibona egu namo lau laloa, eiava lau ura mai manau ida Iehova ena mamoe do lau naria?’

Danu, bema ta ia ura elda maduna ia tahua, namona be ia laloatao, Baibel ia gwau elda taudia ese “mamoe oreana dekenai haheitalai namona do [idia] hahedinaraia” be namo. (1 Pet. 5:1-3) Lalohadai bona kara koikoidia ia dadaraia tauna be haheitalai namona ia hahedinaraia kongrigeisen taudia vairanai. Ena be ia idia abia hidi vadaeni, eiava lasi, to ia haheauka noho. To ta be elda tauna ai ia lao neganai, unai ese ia hahedinaraia lasi ia be goevadae tauna. (Num. 12:3; Sal. 106:32, 33) Danu, reana tadikaka ta be do ia laloa ‘ia be kerere ta ia karaia lasi,’ to reana haida be badina haida dainai do idia gwau ia be mai ena kerere. (1 Kor. 4:4, BHḡ) Unai dainai, bema elda ese Baibel amo oi idia sisiba henia, namona be oi kamonai, oi badu haraga lasi bona oi gaukara goada edia sisiba oi badinaia totona.

Tadikaka haida be idia naria daudau murinai elda maduna idia abia. Bema oi be lagani haida lalonai ‘naria tauna ena maduna oi tahua’ noho, nega haida oi lalomanoka, a? Bema oibe, namona be Baibel ena hereva oi laloatao, ia gwau: ‘Bema tau ta ia laloa gau namona ta do ia abia to nega daudau ia naria, do ia lalohisihisi, to bema ia ura henia gauna ia abia, moale momokani do ia davaria.’​—⁠Aon. 13:12.

Bema ta ese ena tahua gauna ia abia haraga lasi, reana do ia lalohisihisi. Aberahamo be unai bamona ia mamia. Iehova ia gwauhamata Aberahamo dekenai natuna mero ta do ia henia, to lagani momo lalonai Aberahamo bona Sara be natuna ta idia havaraia lasi. (Gen. 12:1-3, 7) Aberahamo be ia buruka neganai, Iehova dekenai ia guriguri: “Egu Lohiabada Dirava e, lau be natuna lasi. Edena bamona lau dekenai hanamoa do oi habadaia? . . . Oi be natuna ta lau dekenai oi henia lasi.” Iehova ese Aberahamo ia hamaoroa Iena gwauhamata do ia hagugurua. Bena lagani 14 murinai, unai gwauhamata ia guguru.​—⁠Gen. 15:2-4; 16:16; 21:5.

Aberahamo be Iehova ia naria noho lalonai, ena hesiai gaukara ia hesikulaia, a? Lasi. Ia abia dae momokani Dirava ese ena gwauhamata do ia hagugurua. Ia be mai moale ida unai gwauhamata do ia guguru negana ia naria noho. Aposetolo Paulo ia gwau: “Aberahamo ia haheauka dainai, unai gwauhamata ia davaria.” (Heb. 6:15) Dokonai, Iehova, Siahu Ibounai Diravana ese unai abidadama tauna Aberahamo ia hanamoa bada. Aberahamo ena sivarai amo dahaka oi dibaia?

Bema oi be elda maduna oi tahua, to lagani haida oi naria bona unai ia do vara lasi, namona be Iehova oi abidadama henia noho. Namona be emu hesiai gaukara oi moalelaia noho. Warren be tadikaka momo ia durua idia goada idia lao totona, bona ia gwau: “Oi idia do abia hidi lasi neganai, kara haida do oi karaia ela bona do oi hegeregere elda tauna ai  oi lao totona. Nega ia hanaia lalonai, tadikaka ena kara bona elda ese idia henia gaukara idauidau ia karaia dalana ese idia hahedinaraia ia be edena bamona tauna. Haida idia laloa do idia kwalimu, bema idia ese unai hahenamo eiava maduna idia abia. To, unai be lalohadai kererena. Herevana edeseni oi noho bona dahaka oi karaia, to bema mai abidadama ida Iehova oi hesiai henia, do oi kwalimu.”

Tadikaka ta be lagani 10 mai kahana ia naria murinai elda maduna ia abia. Ia be Esekiela karoa 1 ai ia noho sivaraina ta amo ia dibaia gauna ia herevalaia, ia gwau: “Iehova ese ena ura hegeregerena ena kariota, ena orea unai, ia haheaua noho. Unai dainai mai anina bada gauna be Iehova ena nega, iseda nega lasi. Bema lau ura elda maduna lau abia, sibona do lau laloa bada lasi be namo​—⁠lau ura henia gaudia o dagi do lau laloa bada lasi. Badina reana egu ura gauna be Iehova ese lau totona ia laloa gauna ida ia hegeregere lasi.”

Bema oi ura nega vaira ai Keristani elda tauna ta ai oi lao, namona be oi gaukara goada kongrigeisen lalonai moale ia noho totona. Bema oi naria daudau vadaeni, namo lasi oi lalometau bona hesiku. Raymond, matamanai ita herevalaia tauna, ia gwau: “Bema oi be dagi oi ura henia dikadika, emu hesiai gaukara do oi moalelaia lasi. Dagi abia totona idia lalohekwarahi taudia be Iehova hesiai henia karana amo ia mai moalena idia davaria lasi.” Namona be Dirava ena lauma ena huahua, hegeregere haheauka oi hahedinaraia. Namona be Baibel oi stadilaia, unai amo lo tauna ai oi lao diba. Emu haroro gaukara oi habadaia bona kamonai taudia ida Baibel oi stadilaia. Ruma bese ena tomadiho bona Dirava ena hesiai gaukara idauidau lalonai emu famili oi gunalaia. Tadikaka taihu edia hebamo karana oi moalelaia. Unai amo elda maduna oi tahua noho lalonai, emu hesiai gaukara do oi moalelaia.

Kongrigeisen lalonai maduna oi abia totona oi gaukara goada karana be hahenamo ta Iehova amo; Iehova bona ena orea idia ura lasi elda maduna ia tahua tadikaka do ia lalohisihisi bona ena hesiai gaukara do ia moalelaia lasi. Dirava ese badina maorodia dainai ia idia hesiai henia taudia ia durua bona hanamoa. Bona ia amo idia davaria hahenamo “ese lalohisihisi sisina [idia] dekenai do ia henia lasi.”​—⁠Aon. 10:22.

Bema lagani momo lalonai oi hekwarahi elda maduna oi abia totona, to oi idia do abia hidi lasi, namo lasi oi lalomanoka. Namona be oi gaukara goada, emu hetura karana Iehova ida oi hagoadaia totona. Bema oi gaukara goada kara namodia oi hahedinaraia, bona oi hekwarahi emu kongrigeisen bona famili oi durudia totona, Iehova ese emu hesiai gaukara ibounai do ia laloaboio lasi. Herevana kongrigeisen lalonai dahaka gaukara oi karaia, to namona be mai moale ida Iehova oi hesiai henia.