FERNANDO a waar nerwees. Tswaay elteste hon kesaat tas se wolte mit tëm aleen xpreche. Noo phaar pesuuche fom sirkuyt superintentent, hon ti elteste tëm aus keleet was eyer mache must fer een elteste sin. Awer mit te tsayt, hot Fernando aan kefang sich frooe: ‘Meecht ich eene taach tiise priwilëj kriin?’ Te sirkuyt superintentent hat khërtslich sayn kemaynt noch mool pesuucht. Warom wolte ti elteste mit tëm yets xpreche?

Fernando hot kehoricht wii eene fon te elteste mit tëm kexproch hot. Te pruuter hot iwer 1 Timoteus 3:1 mit tëm kexproch un hot kesaat tas ti elteste hate een priif kriit. Te priif hot kesaat tas Fernando wii elteste in kesetst waar. Fernando hot sich ferwunert! “Hon ich tas richtich keheert?” — hot eyer kefroot. Te elteste hot tas noch mool kesaat un Fernando is aarich froo kep. Xpeeter sin ti priiter fon te kemaynt aach froo kep wii se ti pekhantmachung too triwer keheert hon.

Is es ferkheert te wunx hon fer priwilëje in te kemaynt kriin? Kewis net. Tëm noo 1 Timoteus 3:1, “wën eene man sich aan xtrengt fer superintentent sin, tuut eyer een kuut aarwayt winxe”. Tiise wersikel tuut fiile mëner uf muute xtram xafe fer een elteste in te kemaynt wëre. Was is te resultaat? Kot sayn folek kriit fiil nutse, wayl es kept fiile elteste un ministeryaale tiiner in te kemaynt. Awer wayl ti kemaynte imer mee wakse, is es neetich tas mee priiter sich aan xtrenge fer elteste un ministeryaale tiiner wëre. Wii khene se tas mache? Un, soo wii Fernando, sole tii woo sich aan xtrenge fer elteste sin, sich ketanke mache iwer wanee tas pasiire tuut?

Tas kreekix wort woo in 1 Timoteus 3:1 iwersetst is “sich aan xtrengt”, petayt sich xtreke fer etwas erayche. Es is soo wii ti aanxtrengung woo mer mache wën mer fersuuche een frucht hooch in een paam erayche. Awer es wil net saan tas mer wole een elteste wëre fer “important” sin. Warom net? Wayl tii woo sich aan xtrenge fer superintentente sin, sole tas mache wayl se wole een “kuut aarwayt” mache, net weeche te wunx fer iwer ti anere xike.

In 1 Timoteus 3:2-7 un Titus 1:5-9, leese mer iwer was eene pruuter mache sol fer een elteste sin. Een speryent elteste, woo Raymond heest, saat soo iwer tiise wersikele: “Fer mich, was wichticher is, is ti sort persoon woo mer sin. Es is important kuut xpreche un in lërne; awer tas is net wichticher wii moos in te kewoonheete hon, unxultich, ferninftich, kexayt, fraayntlich mit ale kaar un net xtreng sin.”

Eene pruuter woo wil wërklich ti anere tiine, mus unxultich sin: tee is eerlich un halt sich wayt wech fon imoraalixe tinge. Tee hot moos in sayn kewoonheete un is ferninftich, kexayt un net xtreng. Tes weeche, tuun ti priiter un xwestere uf tëm traue fer ti kemaynt fiire un tëne helfe mit sayn propleeme. Wayl eyer fraayntlich mit ale kaar is, khan eyer ti yunge un tii woo nay in te woerheet sin, uf muute. Eyer kept troost un hilef fer tii woo alt un krank sin. Tee macht tas ales, wayl eyer wil tas kuutes mache, net wayl eyer wil een superintentent sin. b

Opwool ti elteste tich aan reete un uf muute khene, es is tayn flicht se mache was ti Piipel saat neetich is fer een elteste sin. Henry, woo xon een elteste een lang tsayt is, saat: “Wëns tuu wilst wii een elteste tiine, tuu xtram xafe fer se tsayche tas tuu fërtich pist.” Tee xprecht iwer Eklesyastes 9:10 un saat: “‘Ales was tuu mache khanst, mach tas mit tayn kans kraft.’ Ekaal ti inxtelung woo ti elteste tich kepe, mach tayn pestes. Mach mit liip yeete flicht woo se tich in te kemaynt kepe, soo kaar te pootem kheere. Mit te tsayt, tuun ti anere tayn kuut aarwayt mërke.” Wëns tuu wilst wii een elteste tiine, say flaysich un yemant woo ti anere traue khene in ales was tuu fer Kot machst. Es sol taytlich fer ti anere sin tas tuu teemuutich pist, net hoochmuutich orer een persoon woo wil iwer ti anere xike. (Mat. 23:8-12)

Etliche priiter fersuuche ti elteste khërperxaft influentsiire torich etwas woo se saan orer mache. Anere kepe pees wën ti elteste tëne aanreete kepe. Tiise priiter sole sich frooe: ‘Wil ich een elteste wëre wayl ich wil important sin, orer wayl ich wil Yeehoowa sayn xeef mit teemuut uf phase?’

Tii woo wole elteste sin, sole sich erinere tas tii mise “payxpiile fer ti trop” sin. (1 Phe. 5:1-3) Wën eene pruuter een payxpiil fer ti kemaynt is, tuut eyer net ti anere hiner keen. Tee is ketultich un macht was richtich is, ekaal ep tee een elteste is orer net. Wën eene pruuter een elteste wërt, lost eyer net noo imperfekt sin. (Nuu. 12:3; Psal. 106:32, 33) Fiilaycht tenkt eene pruuter tas niks keeche tëm is, awer im xtant, hon ti anere uersache fer een xlecht mënung iwer tëm hon. (1 Kor. 4:4) Tes weeche, wën ti elteste tich aanreete fon te Piipel kepe, horich tëne un kep net pees. Tan xtreng tich aan fer sayn aanreete aan wëne.

Etliche priiter tenke tas se xon een lang tsayt kewaart hon fer een elteste sin. Wëns tuu tich xon phaar yoore “aan [xtrengst] fer superintentent sin”, wërst tuu als mool ëngstlich too triwer? Wën yaa, tenk aan tiise inspiriirte wërter: “Ti hofnung woo sich net klaych erfiilt, macht tas hërts krank, awer een wunx woo woer wërt, is een paam fon leepe.” (Xpr. 13:12)

Een persoon khan sich traurich xpiire wën se tenkt tas etwas woo se waart, net pasiire tuut. Apraham hot sich soo kexpiirt. Yeehoowa hat een soon tëm ferxproch, awer noo phaar yoore, hate Apraham un Sara noch khee khint. (Xee. 12:1-3, 7) Wii eyer xon alt waar, hot Apraham kesaat: “Soweraan Hër Yeehoowa, was tuust tuu mich kepe, wayl ich noch khee khiner hon? (…) Tuu host mich khee nookhomer kep.” Yeehoowa hot tëm sicher kelos tas sayn ferxpreche iwer een soon sich erfiile teet. Awer ferweenichst 14 yoore sin rom kang pis Yeehoowa tiise ferxpreche erfiilt hot. (Xee. 15:2-4; 16:16; 21:5)

Wii Apraham am waarte waar, meecht eyer ti frooheet in Yeehoowa sayn tiinst ferliirt hon? Nee. Tee hot wayter mit hofnung kewaart ti erfiilung fon tiise ferxpreche. Te aphostel Phaul hot kexrip: “Apraham, noo tas eyer ketult ketsaycht hot, hot tiise ferxpreche kriit.” (Hep. 6:15) Am ën, hot Yeehoowa tsu Apraham kep fiil mee wii eyer kewaart hot. Was khanst tuu mit Apraham lërne?

Wëns tuu wilst wii een elteste tiine, awer noo phaar yoore is tas noch net pasiirt, trau wayter uf Yeehoowa. Ferliir net ti frooheet in tëm sayn tiinst. Warren, woo xon fiile priiter keholef hot kaystlich foran keen, leet aus: “Es nëmt tsayt fer eene pruuter fërtich sin fer een elteste wëre. Ti aat wii eene pruuter sich aan xtelt un sayn inxtelunge uf phast, tsaycht ep tee fërtich is fer een elteste wëre. Etliche priiter tenke tas, wën se net elteste sin, khene se net Yeehoowa kuut kenuuch tiine. Soo se tenke is ferkheert un xteelt ti frooheet. Wëns tuu Yeehoowa wayter troy tiinst, ekaal woos tuu pist un was tuu machst, khanst tuu froo sin.”

Eene pruuter hat xon mee wii 10 yoore kewaart, pis eyer wii elteste in kesetst kep is. Tee saat was eyer mit Esekyël, kapitel 1, kelërnt hot: “Yeehoowa fiirt sayn Orkanisatsyoon un ëntxlist wanee sole ti tinge kemacht wëre. Tas wichtiches is net wanee ich tenke tas ich fërtich sin fer een elteste wëre, awer wanee Yeehoowa tenkt tas ich fërtich sin. Es is net wichtich was ich wil, awer was Yeehoowa wees tas ich prayche.”

Wëns tuu wilst een elteste eene taach wëre, xtreng tich aan fer ti anere in te kemaynt helfe. Wëns aus siit tas tuu xon een lang tsayt am waarte pist, ferliir net ti ketult. Raymond, iwer weem mer foner traan kexproch hon, saat: “Wëns tuu wilst important sin un iwer ti anere xike, khanst tuu net froo wëre. Es is xweyer frooheet in Yeehoowa sayn tiinst hon, wëns tuu imer ëngstlich pist fer een elteste sin. Tuu ti frucht fom Kot sayn kayst peser ëntwikele, hauptseechlich ti ketult. Xtutiir ti Piipel fer tayn fraayntxaft mit Yeehoowa ferxtërke. Preetich ti kuute notisye un xtutiir ti Piipel mit tëne woo interes hon. Say eene kuute payxpiil fer tayn familye soo lang wiis tuu preetichst, tsu te fersamlunge keest un ti familye aanpeetung mit tëne machst. Fertrayp tsayt mit tayn priiter un xwestere. Soo lang wiis tuu xtram xafst fer een elteste sin, tuust tuu frooheet in Yeehoowa sayn tiinst hon.

Sich aan xtrenge fer fërtich sin fer priwilëje in te kemaynt kriin, is een xeen keleechenheet woo Yeehoowa uns kept. Yeehoowa wil hon tas ti priiter elteste wëre; awer, tee un sayn Orkanisatsyoon wole net hon tas tuu traurich orer oone muut playpst wëns tuu xafst fer tiise tsiil trefe. Yeehoowa helft un phast uf al tii woo tëm tiine mit te richtich motiwatsyoon. Un in ales was Eyer uns kept, ’tuut eyer khee xwiirichkheet tepay setse’. (Xpr. 10:22)

Soo kaar wëns tuu tich xon een lang tsayt aan kextrengt host fer een elteste wëre, kepts imer mee woos tuu mache khanst fer tayn fraayntxaft mit Yeehoowa ferxtërke. Soo lang wiis tuu xtram xafst fer een elteste wëre, ti kemaynt helfe un tayn familye uf phase, say tich sicher tas Yeehoowa ferkes sich net ales was tuu machst fer tëm tiine. Een tuun was Yeehoowa tich ferlangt, say imer froo in Tëm sayn tiinst.