FERNANDO * sta nervozu. Dôs ansion pidi pa pâpia ku el apárti. Dipôs di kes últimu vizita di Enkaregadu di grupu di kongregason, ansions splika-l kuzê ki el meste fazeba pa el pode sta priparadu pa resebe más priviléjiu na kongregason. Ku ténpu, Fernando kumesa ta pergunta si algun dia el ta diziginadu pa ser ansion. Ka dura li Enkaregadu di grupu di kongregason vizita se kongregason más un bês. Kuzê ki ansions ta fla di es bês?

Fernando ba ta obi ku atenson timenti un di kes ansion ta papiaba ku el. Kel irmon pâpia di 1 Timóteo 3:1 i el fla ma ansions na kongregason resebe konfirmason ma el diziginadu pa ser ansion. Fernando fika spantadu i el fla: “Bu pode ripiti kuzê ki bu fla?” Kel irmon ripiti kuzê ki el flaba i Fernado fika kontenti. Dipôs, kantu dadu avizu na kongregason sobri se diziginason, tudu algen fika kontenti tanbê.

É eradu sforsa pa ten priviléjius na kongregason? Klaru ki nau. 1 Timóteo 3:1 ta fla: ‘Si un ómi sta ta sforsa pa ser enkaregadu, el sta ta dizeja un bon trabadju.’ Kel testu li nkoraja txeu irmon pa es trabadja duru pa es pode ser ansion na kongregason. Kel-li é un benson pa povu di Deus pamodi es ta ten más ansion i ajudantis di kongregason pa djuda-s. Má, pamodi kongregason sta ta omenta, ta mestedu di más irmons pa ten kes priviléjiu li. Modi ki es pode faze kel-li? Kes ki krê bira ansion debe fika ta pensa tudu óra na ki ténpu ki es ta resebe kel priviléjiu li, sima Fernando faze?

Na Bíblia “sforsa” ta ben di un vérbu gregu ki ta da ideia di krê un kuza tantu txeu, ki bu ta stika pa tene-l. Kel-li talvês ta pô-u pensa na un algen ki sta ta sforsa pa panha un fruta ki el krê ki sta prindadu la di riba na un arvi. Má kel-li ka krê fla ma un algen ta ser ansion sô pa el pode ‘ser un algen inportanti.’ Pamodi? Pamodi kes ki krê ser ansion, ka ta faze kel-li pamodi es krê manda na otus má pamodi es krê faze ‘un bon trabadju’.

Na 1 Timóteo 3:2-7 i Tito 1:5-9 nu ta lé kuzê ki un irmon meste faze pa el bira un ansion. Un ansion ki ten txeu spiriénsia, ki txoma Raymond fla sobri kes versíklu li: “Pa mi, kuzê ki é más inportanti é kel ki nos é di pa déntu. Sabe pâpia i inxina é inportanti, má kes kapasidadi li é ka más inportanti di ki ser ekilibradu na ábitus, ka faze nada pa txomadu atenson, ten bon juís, konporta dretu, gosta di resebe algen i ser ekilibradu.”

Un irmon ki sta ta sforsa pa ten priviléjius é un algen ki ka ta faze nada pa el txomadu atenson, el ta faze tudu kuza ku onestidadi i el ta ivita tudu tipu di kuzas mariadu. El é ikilibradu na ses ábitu, el ten bon juís, el ta konporta dretu i el é ikilibradu. Pur isu, irmons ta kunfia na el i el ta resebe más responsabilidadi pa el pode djuda irmons na kongregason ku ses prublémas. I pamodi el é un algen ki gosta di resebe otus, el ta nkoraja kes más jóven i kes ki é novu na verdadi. El ta konsola i el ta djuda kes ki sta duenti i kes algen ki sta grandi pamodi el ta ama bondadi. El ta sforsa pa ten kes kualidadi li, ka pamodi el krê bira ansion, má pamodi el krê djuda otus. *

Mésmu ki ansions na kongregason da un irmon konsedju i nkoraja-l, é responsabilidadi di kel irmon faze kel ki Bíblia ta fla pa el pode bira un ansion. Henry, ki dja dura ta sirbi kómu ansion fla: “Si bu krê sirbi kómu ansion, trabadja duru pa bu mostra ma bu sta prontu pa faze kel-li.” Ta pâpia sobri Eclesiastes 9:10, el fla: “‘Tudu ki bu mô atxa pa faze, faze-l ku tudu bu forsa’. Faze bu midjór na kalker trabadju ki ansions da-u pa bu faze. Da valor pa tudu trabadju ki bu ten ki faze na kongregason, sikrê é bare txon. Ku ténpu, otus ta rekonhese kel bon trabadju i sforsu ki bu sta faze.” Si algun dia bu krê ser ansion, trabadja duru i ser di kunfiansa na kalker sirvisu ki bu ta faze pa Deus. Debe fika klaru pa tudu algen ma bo é ka orgulhozu i nen ma bu ka krê manda na otus algen. — Mat. 23:8-12.

Alguns irmon na kongregason ki krê ten más priviléjiu pode xinti tentadu na fla ô faze kuzas pa poi ansions ta pensa má es sta kualifikadu. Otus ka ta fika kontenti óras ki ansions ta da-s konsedju. Es debe pergunta ses kabésa: “N krê bira un ansion pamodi N krê ser un algen inportanti ô pamodi N krê kuida ku umildadi di kes ovelha di Jeová?”

Kes irmon ki krê ser ansion meste lenbra ma es debe ‘bira izénplu pa ribanhu’. (1 Ped. 5:1-3) Si un irmon é izénplu na kongregason el ka ta ngana otus algen. El ten paxénxa, el ta faze kel ki é dretu ka ta nporta si el é ansion ô nau. Sikrê un algen é ansion inda el ta kontinua ta ser un algen inperfeitu. (Núm. 12:3; Sal. 106:32, 33) Tanbê, un irmon pode ‘ka da kónta di nada kóntra se kabésa’, má otus algen pode ten opinion diferenti sobri el. (1 Cor. 4:4) Pur isu, si ansions da-u algun konsedju ku bazi na Bíblia, sforsa pa obi sen fika xatiadu. Dipôs trabadja duru pa faze sima es fla-u.

Alguns irmon pode xinti ma dja es spéra txeu ténpu pa es resebe un diziginason. Si dja bu ten txeu anu ta sforsa pa “ser enkaregadu”, alvês bu ta fika preokupadu? Si kel-li sta ta kontise pensa na kel testu li: ‘Un speransa ki dimora pa realiza, ta poi korason ta fika duenti, má un dizeju realizadu é un arvi di vida.’ — Pro. 13:12.

Un algen pode xinti tristi óras ki ta parse ma un kuza ki el sta ta spéra ka sta ta kontise. Abraon xinti mésmu kuza. Jeová promete ma el ta daba el un fidju, má pasa txeu anu i inda el ku Sara ka tinha un fidju. (Gén. 12:1-3, 7) Kantu el staba algen grandi, Abraon fla: ‘Jeová, kel Sinhor Más Grandi, kuzê ki nho ta ben da-m, dja ki inda N ka ten fidju’. Dipôs el fla: ‘Nho ka da-m ninhun disendenti’. Jeová da-l sertéza ma kel promésa ki el fazeba el, ta ben kunpriba. Má dipôs di kel-li pasa más 14 anu pa Jeová ben kunpri kel promésa li. — Gén. 15:2-4; 16:16; 21:5.

Má timenti el staba ta spéra, Abraon perde alegria na sirbi Jeová? Nau. Nunka el ka duvida di promésas di Deus. El kontinua ta spéra pa kes promésa kunpri. Apóstlu Paulu skrebe: ‘Dipôs di Abraon mostra paxénxa, el resebe es promésa’ (Heb. 6:15) Dipôs Deus da Abraon mutu más di ki kel ki el staba ta spéra. Kuzê ki bu pode prende ku Abraon?

Sikrê dja bu ten txeu ténpu ta sirbi Jeová má inda bu ka skodjedu pa ser un ansion, kontinua ta kunfia na Jeová. Ka bu perde alegria na sirbi-l. Warren, ki dja djuda txeu irmon bira ajudanti di kongregason i ansions, fla pamodi ki faze kel-li é inportanti: “Ta leba ténpu pa un irmon sta priparadu pa ser ansion. Manera ki un irmon ta konporta i manera ki el ta kuida di se diziginasons ta mostra si el sta ô nau priparadu pa ser un ansion. Alguns irmon ta kridita ma si es ka ser ansion es ka sta ta sirbi Jeová di midjór manera. Kel-li é un manera di pensa mariadu i ki ka ta dexa un algen ser filís. Si bu sta ta sirbi Jeová di manera fiel ka ta nporta undi ki bu sta ô kuzê ki bu sta ta faze, bu pode ser filís.”

Un irmon tevi di spéra más di 10 anu pa el pode bira un ansion. El pâpia di un lison ki el prende, ki sta na kapítlu 1 di livru di Ezekiel: “Jeová ki ta kontrola se organizason i el ta disidi ki ténpu ki kuzas debe ser fetu. Ka ta nporta ki ténpu ki N ta atxa ma N sta prontu pa N ser ansion, má ki ténpu ki Jeová sabe ma N sta prontu. Más inportanti é ka kel ki N krê má kel ki Jeová sabe ma N meste.”

Si un dia bu krê ser un enkaregadu ki ta faze un bon trabadju, sforsa pa djuda otus na kongregason ser filís. Si ta parse ma dja bu dura ta spéra, kontinua ta ten paxénxa. Raymond, ki dja nu papiaba di el antis fla: “Si bu krê ser inportanti i ten puder bu ka ta konsigi ser filís. É difísil bu sirbi Jeová ku alegria si sénpri bu ta sta preokupadu pamodi ti inda bu ka bira ansion.” Kontinua ta dizenvolve kes kualidadi ki ta faze párti di frutu di spritu santu di Deus, prinsipalmenti paxénxa. Studa Bíblia pa bu bira bu amizadi ku Deus más fórti. Sforsa pa bu faze más na pregason i pa faze studu di Bíblia pa kes algen ki mostra interesi. Mostra bu família ma bu amizadi ku Jeová sta na primeru lugar i ka bu dexa di faze adorason na família. Pruveta tudu oportunidadi pa sta ku irmons. I sima bu ta ba ta sforsa pa bira un ansion, bu ta xinti alegria na sirbi Jeová.

Jeová krê pa irmons sforsa pa bira ansion, má nen el nen se organizason ka krê pa bu fika tristi ô dizanimadu timenti bu sta ta sforsa pa bu alkansa bus méta. Jeová ta djuda i kuida di tudu kes ki krê sirbi-l di korason. Tudu kes benson ki Jeová ta da-nu, ‘el ka ta da-nu el ku ninhun dór.’ — Pro. 10:22.

Sikrê dja ten txeu ténpu ki bu sta ta sforsa pa bira un ansion, inda ten txeu kuza ki bu pode faze pa bira bu amizadi ku Jeová más fórti. Sima bu ta ba ta sforsa pa bu bira un ansion i djuda otus na kongregason, bu meste kontinua ta kuida di bu família. Si bu faze si, bu pode ten sertéza ma Jeová ka ta skese ti tudu kes kuza ki bu ta faze pa bu sirbi-l. Ka ta nporta ki diziginason bu resebe, kontinua ta xinti alegria na sirbi Jeová.