FERNANDO * o be a tšhogile. Bagolo ba babedi ba be ba kgopetše go bolela le yena ka sephiring. Ka morago ga gore molebeledi wa tikologo a etele phuthego ya gabo bona ka makga a mmalwa, bagolo ba ile ba hlalosetša Fernando seo a swanetšego go se dira gore a swanelegele ditokelo tše di oketšegilego ka phuthegong. Ge nako e dutše e eya, Fernando o ile a thoma go ipotšiša ge e ba a tla tsoga a kgethilwe gore e be mogolo. Morago bjale molebeledi wa tikologo o be a etetše phuthegong ya gabo gape. Ke’ng seo bagolo ba ba nyakago go se botša Fernando?

Fernando o ile a theetša ge yo mongwe wa bagolo bao a bolela le yena. Ngwanabo rena o ile a tsopola 1 Timotheo 3:1 gomme a re bagolo ba phuthego ba amogetše lengwalo la gore o kgethilwe gore e be mogolo. Fernando o ile a tlabega gomme a botšiša gore: “Na ke le kwa gabotse?” Ngwanabo rena o ile a bušeletša seo a bego a sa tšwa go se bolela, ke moka Fernando a thoma go myemyela. Ka morago ga moo, phuthego e ile ya tsebišwa ka go kgethwa ga Fernando, gomme bohle ba thaba kudu.

Na go fošagetše go kganyoga ditokelo ka phuthegong? Le gatee. Go ya ka 1 Timotheo 3:1, “ge e ba motho le ge e le ofe a katanela go fihlelela bolebeledi, o kganyoga modiro o mobotse.” Banna ba bantši ba Bakriste ba diriša keletšo yeo gomme ba dira tšwelopele ya moya gore ba swanelegele ditokelo ka phuthegong. Mafelelo a go diriša keletšo ye ke gore batho ba Modimo ba šegofatšwa ka bagolo le bahlanka ba bodiredi ba dikete bao ba swanelegago. Eupša ka ge diphuthego di gola, go nyakega bana babo rena ba oketšegilego gore ba katanele go fihlelela boikarabelo bja go di hlokomela. Tsela ya maleba ya go dira seo ke efe? Le gona na bao ba kganyogago go hlankela e le balebeledi ba swanetše go hlwa ba ipotšiša gore ba kgethwa neng, go etša Fernando?

Polelwana ya ka Beibeleng yeo e rego go “katanela go fihlelela,” e fetolela lediri la Segerika leo le nago le kgopolo ya go kganyoga selo ka phišego, go obelela. Mohlomongwe se se dira gore o nagane ka motho yo a obelelago go kga seenywa se se kgahlišago seo se  lekelelago sehlareng. Eupša go katanela go fihlelela ditokelo ga go bolele go obelela ka megabaru tokelo ya go ba ‘molebeledi.’ Ka baka la’ng? Ka gobane morero wa bao ba ratago go hlankela e le bagolo e swanetše go ba go dira “modiro o mobotse,” e sego go rata go ba le maemo.

Tše dintši tša ditshwanelego tšeo di sepedišanago le modiro wo o mobotse di lokeleditšwe go 1 Timotheo 3:2-7 le Tito 1:5-9. Ge mogolo yo mongwe wa kgale yo a bitšwago Raymond a bolela ka ditshwanelego tšeo tše phagamego, o re: “Sa bohlokwa kudu go nna ke seo re lego sona ka gare. Ke therešo gore go nea dipolelo le go ruta ba bangwe go bohlokwa, eupša seo ga se tšeele legato taba ya gore re hloke bosodi, re be bao ba lekanetšego mekgweng, bao ba hlaphogetšwego monaganong, bao ba nago le thulaganyo, bao ba amogelago baeng le bao ba nago le tekatekano.”

Ngwanabo rena yo a katanelago go fihlelela ditokelo o ipontšha a se na bosodi ka go phema go se botege le ge e le gofe goba go se hlweke ga mohuta le ge e le ofe. O lekanetše mekgweng, o hlaphogetšwe monaganong, o na le thulaganyo le tekatekano; ka go re’alo barapedigotee le yena ba a mmota gore a ka ba hlahla ka phuthegong le go ba thuša ka mathata a bona. Ka ge a amogela baeng, o kgona go kgothatša bafsa le bao ba sa tšwago go amogela therešo. Le gona ka ge a rata go loka, o homotša bao ba babjago le batšofadi gotee le go ba thuša. O hlagolela dika tše gore a tle a hole ba bangwe, e sego go lwela gore a tle a kgethwe. *

Sehlopha sa bagolo se thabela go eletša le go kgothatša motho yo a katanelago go fihlelela tokelo e itšego, eupša go fihlelela ditshwanelego tša Mangwalo ke boikarabelo bja gagwe. Henry, e lego molebeledi yo a nago le phihlelo o re: “Ge e ba o katanela go fihlelela tokelo e itšego, šoma ka thata go bontšha gore o a swanelega.” O tsopotše Mmoledi 9:10 ka gore: “‘Tšohle tšeo seatla sa gago se kgonago go di dira, di dire ka matla a gago ka moka.’ Kabelong le ge e le efe yeo bagolo ba go neago yona, ntšha ka ga tšhwene. Rata mešomo ka moka yeo o e newago ka phuthegong, go akaretša le go fsiela lebato. Ge nako e dutše e eya, ba tla lemoga maiteko le boitapišo bja gago.” Ge e ba o kganyoga go ba mogolo ka letšatši le lengwe, šoma ka thata gomme o botege dikarolong ka moka tša tirelo e  kgethwa. O swanetše go tsebja ka boikokobetšo, e sego ka go rata maemo.—Mat. 23:8-12.

Ba bangwe bao ba kganyogago ditokelo ka phuthegong ba ka fela ba bolela gore ba nyaka go ba bagolo goba ba leka go foraforetša sehlopha sa bagolo. Ba bangwe ba a tenega ge bagolo ba ba eletša. Batho ba bjalo ba swanetše go ipotšiša gore: ‘Na ke nyaka go tlo ikhola, goba na ke nyaka go tlo hlokomela dinku tša Jehofa ka boikokobetšo?’

Bao ba katanelago go fihlelela ditokelo ga se ba swanela go lebala selo se sengwe seo se letetšwego go bagolo, e lego ‘go ba mohlala go mohlape.’ (1 Pet. 5:1-3) Motho yo e lego mohlala ka phuthegong o phema go nagana dilo tše mpe le ditiro tša boradia. O hlagolela go se fele pelo go sa šetšwe gore o šetše a kgethilwe goba go se bjalo. Go ba mogolo ga go bolele gore motho ga a sa tlo ba le mafokodi. (Num. 12:3; Ps. 106:32, 33) Le gona ngwanabo rena a ka fo se ‘lemoge selo se sebe ka yena,’ eupša ba bangwe ba ka bona mafokodi a gagwe. (1 Bakor. 4:4) Ka gona ge bagolo ba go nea keletšo yeo e theilwego Beibeleng, katanela go ba theetša go e na le go tenega. Ka morago ga moo, katanela go diriša keletšo ya bona.

Bana babo rena ba bantši ba nagana gore ba leta nako e telele kudu pele ba ka kgethwa. Ge e ba e le kgale o “katanela go fihlelela bolebeledi,” na ka dinako tše dingwe o a tshwenyega? Ge e ba go le bjalo, ela hloko mantšu a ao a buduletšwego: “Go diega ga selo seo se letetšwego go bolaiša pelo, eupša ge seo se letetšwego se fihla, e ba sehlare sa bophelo.”—Die. 13:12.

Ge motho a bona eka pakane yeo a e ratago kudu ga e fihlelelege, a ka nyama kudu. Aborahama o ile a ikwa bjalo. Jehofa o ile a mo holofetša morwa, eupša gwa feta nywaga e mentši yena le Sara ba sa be le bana. (Gen. 12:1-3, 7) Ge Aborahama a šetše a tšofetše, o ile a lla ka gore: “Mmuši Morena Jehofa, o tla nnea eng ka ge e le mo ke se na bana? . . . Ga se wa nnea peu.” Jehofa o ile a mo kgonthišetša gore kholofetšo ya Gagwe ya gore o tla mo nea morwa e tla phethagala. Eupša go ile gwa feta nywaga ya ka godimo ga e 14 pele Modimo a ka phethagatša kholofetšo yeo.—Gen. 15:2-4; 16:16; 21:5.

Ge Aborahama a be a sa letile seo, na o ile a se sa thabela go hlankela Jehofa? Aowa. Ga se a ka a belaela kholofetšo ya Modimo. O ile a dula a holofetše tše dibotse. Moapostola Paulo o ngwadile gore: “Eitše ge Aborahama a bontšhitše go se fele pelo, a hwetša kholofetšo ye.” (Baheb. 6:15) Mafelelong, Modimo Ramatlaohle o ile a šegofatša monna yo yo a botegago go feta ka mo a bego a nagana ka gona. O ka ithuta’ng go Aborahama?

Ge e ba go fetile nywaga e mentši o katanela go ba mogolo eupša seo se sa direge, tšwela pele o botile Jehofa. O se ke wa lahlegelwa ke lethabo tirelong ya gagwe. Warren, yo a thušitšego bana babo rena ba bantši go dira tšwelopele moyeng, o hlalosa lebaka la gore go fete nywaga e mentši motho a sa kgethwe ka gore: “Go tšea nako gore go bonagale gore ngwanabo rena o swanelega go ka kgethwa. Ge nako e dutše e eya, dika tša ngwanabo rena yoo le boemo bja gagwe bja kgopolo di utologa ganyenyane-ganyenyane tseleng yeo a  itshwarago ka yona le tseleng yeo a phethago dikabelo tša gagwe. Ba bangwe ba nagana gore ge ba ka kgethwa gore e be bagolo, ke gona ge ba atlegile tirelong ya Jehofa. Boemo bjo bjalo bja kgopolo bo fošagetše e bile bo ka lwatša motho. Ge e ba o hlankela Jehofa ka potego kae goba kae le kabelong le ge e le efe, o atlegile.”

Ngwanabo rena yo mongwe o ile a leta nywaga ya ka godimo ga e lesome pele a ka kgethwa gore e be mogolo. Ge a bolela ka tlhaloso e tsebjago kudu ka pukung ya Hesekiele kgaolo 1, o hlalosa thuto yeo a ithutilego yona ka gore: “Jehofa o otlela koloi ya gagwe, e lego mokgatlo wa gagwe, ka lebelo leo a le nyakago. Sa bohlokwa ga se nako ya rena, eupša ke ya Jehofa. Ge o nyaka go ba mogolo, ga go lebelelwe seo wena o bonago se le bohlokwa—seo o se nyakago goba seo o kganyogago go ba sona. Jehofa a ka bona seo wena o se nyakago o sa se hloke.”

Ge e ba o kganyoga go ipona ka letšatši le lengwe o dira modiro o mobotse o le molebeledi wa Mokriste, katanela go fihlelela seo ka go hlankela phuthego. Ge e ba o bona eka ga o kgethwe ka pela, lwantšha dipelaelo le go fela pelo. Raymond yo go boletšwego ka yena pejana o re: “Ge e ba o kitimiša go fihlelela maemo a itšego, o ka se tsoge o kgotsofetše. Bao ba dulago ba tshwenyegile ka go fihlelela maemo ba fetwa ke lethabo le legolo leo le tlišwago ke go hlankela Jehofa.” Hlagolela kutšwanyana dika tšeo di enywago ke moya wa Modimo, kudukudu go se fele pelo. Katanela go kaonefatša bomoya bja gago ka thuto ya gago ya motho ka noši. Tšea karolo ka botlalo tšhemong le go ithuta Beibele le batho bao ba thabelago. Etelela pele lapa la gago dilong tša moya le borapeding bja lapa. Diriša sebaka se sengwe le se sengwe go ba le bana beno le dikgaetšedi. Ge o dutše o katanela go fihlelela pakane ya gago, o tla ipshina ka go hlankela Jehofa.

Go katanela go fihlelela ditokelo ka phuthegong ke pakane e botse yeo re e beetšwego ke Jehofa; le gona yena le mokgatlo wa gagwe ga ba nyake gore bao ba katanelago ditokelo tšeo ba fele matla le go nyama tirelong ya gagwe. Modimo o thekga bohle bao ba mo hlankelago ka maikemišetšo a mabotse e bile o a ba šegofatša. Go etša ge go le bjalo ka ditšhegofatšo tša gagwe ka moka, “ga a [di] okeletše ka bohloko.”—Die. 10:22.

Gaešita le ge e le kgale o katanela go fihlelela tokelo e itšego, o sa dutše o ka dira tšwelopele e botse moyeng. Ge o dutše o katanela go ba le dika tše di nyakegago le go šoma ka thata ka phuthegong gomme o sa hlokomologe lapa la gago, o tla itirela leina le lebotse le Jehofa. Tšwela pele o thabela go hlankela Jehofa, go sa šetšwe gore o newa kabelo efe.