TWEE Eltestasch säden to Fernando, * daut see wullen oppoat met am räden. No de latste Besuchs von dän Kjreisoppsechta hauden de Eltestasch aul foaken met Fernando doaräwa jerät, waut hee noch doonen must toom Eltesta enne Vesaumlunk woaren. De Tiet vejinkj un Fernando funk aun to jreblen, aus hee noch jeemols wudd een Eltesta woaren. Nu wia de Kjreisoppsechta wada korz bie de Vesaumlunk jewast. Fernando wia gaunz nerwees; waut wudden de Eltestasch ditmol to am sajen?

Fernando horcht too, aus eent von de Eltestasch to am räd. De Brooda räd von 1. Timotäus 3:1 un säd, daut de Eltestasch von de Vesaumlunk hauden eenen Breef jekjräajen, wua daut säd, daut Fernando nu wia Eltesta jeworden. Fernando kunn daut schia nich jleewen un fruach: “Waut?” De Brooda säd daut nochmol un Fernando kjikjt sea schaftich. Lota aus daut enne Vesaumlunk bekaunt jemoakt wort, freiden aula sikj sea!

Es daut orrajcht, wan wäa dän Wunsch haft, Eltesta to woaren enne Vesaumlunk? Nä, daut es nich. En 1. Timotäus 3:1 (PB) sajcht daut: “Wäa doa sträft Jemeentenleida to woaren sträft no een goodet Aumt.” Dis Varsch jeft väl christelje Mana Moot, doano to sträwen, Eltestasch en de Vesaumlungen to woaren. Wäajens daut, jeft daut en Gott sien Volkj väl Eltestasch un Deenstaumthelpa, un daut es een Säajen. Oba wiels daut emma mea Vesaumlungen jeft, fält daut emma aun Breeda, waut doano sträwen, een Aumt to kjrieen. Woo kjennen dee daut doonen? Un sullen dee daut soo aus Fernando doamet schwoa haben, wanea daut woat bat doa sennen, daut dee Eltestasch woaren?

Daut griechische Wuat, waut en 1. Timotäus 3:1 met “sträft” äwasat es, meent, daut eena sikj “utrakjt”, om waut to nämen, krakjt soo aus eena daut deit, wan eena prooft, Frucht von eenen Boom to plekjen. Oba dit meent nich, daut wie bejierich sellen no een Aumt hinjaraun sennen toom wichtich sennen. Wuarom nich? Wäajens dee, waut aus Eltestasch deenen wellen, sullen daut doawäajen wellen, wiels daut een feinet Aumt es un nich wäajen dee wellen äwa aundre, waut to sajen haben.

En 1. Timotäus 3:2-7 un en Titus 1:5-9 kjenn wie läsen, waut een Brooda doonen mott, om daut dee kaun Eltesta woaren. Von soone Mana woat väl velangt. Een erfoarna Eltesta, waut Raymond heet, sajcht doatoo: “Waut bie mie daut mieeschte talt es, waut vonne Menschen wie sent. Jo, daut es wichtich, daut wie Räden hoolen un aundre belieren, oba noch wichtja es, daut bie ons nuscht uttosaten es, daut wie kloa denkjen kjennen, daut eena sikj beharschen kaun un ierenhauft, gaustfrie un frintlich es.”

Een Brooda, waut werkjlich siene Breeda deenen well, aun dän mott nuscht uttosaten sennen. Dee mott opprechtich sennen un von aulet schwiensche wajchbliewen. Dee mott kjennen kloa denkjen, ierenhauft sennen, sikj beharschen un frintlich sennen. Un soo woaren de Breeda un Sestren opp am vetruen, daut hee kaun enne Vesaumlunk veraun gonen un an met äare Trubbels halpen. Un wan hee gaustfrie es, dan kaun hee de Niee un de Junge en de Vesaumlunk Moot toospräakjen. Hee treest un halpt de kranke un de elre Menschen en de Vesaumlunk. Un hee deit daut aules, wäajen hee well aundre goots doonen un nich bloos wäajen hee prooft, een Eltesta to woaren. *

Wan de Eltestasch en de Vesaumlunk die uk kjennen Rot jäwen un Moot toospräakjen, es daut oba diene Veauntwuatunk daut notokomen, waut de Schreft sajcht, waut doa needich es toom een Eltesta woaren. Henry, waut aul lang es een Eltesta jewast, sajcht: “Wan du west aus Eltesta deenen, dan strenj die aun to wiesen, daut du aul reed best, eena to sennen.” Dan rät hee von dän Rot ut Liera 9:10 (PB) un sajcht: “‘Jeff die gaunz han, to daut waut du en diene Krauft doonen kaust’, krakjt endoont waut vonne Oppgow de Eltestasch die jäwen, doo dien gaunz bastet. Komm daut aula wellich no, waut dee die en de Vesaumlunk oppjäwen, mau rajcht uk utfäajen. Met de Tiet woaren aundre diene goode Oabeit seenen.” Wan dien Wunsch es, noch mol aus Eltesta to deenen, dan wies, daut opp die to veloten es un daut du flietich best en aules, waut du fa Gott deist. Daut saul fa aulem kloa to seenen sennen, daut du een deemootja Mensch best un nich een stolta, waut äwa aundre harschen well (Mat. 23:8-12).

Eenje Breeda sajen un doonen Sachen toom de Eltestasch proowen beräden, daut dee an uk aus Eltestasch aunstalen sellen. Aundre stieet daut, wan de Eltestasch an Rot jäwen. Oba dee, waut soo denkjen, sullen mol äwa dit nojreblen: “Well ekj een Eltesta woaren, wäajens ekj well wichtich sennen ooda well ekj daut toom mie deemootich om Jehova siene Schop kjemren?”

Dee, waut wellen Eltesta woaren, sellen doaraun denkjen, daut see sellen goode Väabilda sennen fa de Breeda un Sestren von de Vesaumlunk (1. Pet. 5:1-3). Woo kaun een Brooda daut doonen? Hee woat nich aundre hinjaret Licht fieren, hee woat jeduldich sennen un daut rajchte doonen, krakjt endoont aus hee een Eltesta es ooda nich. Un wan een Brooda ieescht een Eltesta woat, woat dee doawäajen noch Fäla moaken (4. Mo. 12:3; Psa. 106:32-33). Daut kaun uk sennen, daut een Brooda denkjt: “Ekj weet von nuscht jäajen mie”. Oba aundre Breeda haben veleicht wäajen irjentwaut nich eene goode Meenunk von dän (1. Kor. 4:4, PB). Soo, wan de Eltestasch die Rot ut de Schreft jäwen, dan sträw doano, dän notokomen, onen die to oajren.

Väl Breeda späat sikj daut soo, daut see motten lang wachten, bat see ieescht Eltestasch woaren. Sträfst du aul lang doano, “Jemeentenleida to woaren”? Woascht du eenjemol ojjeduldich? Wan jo, dan denkj aun dise Wieed ut de Schreft: “Eene Hopninj dee sikj vetrakjt, moakt eenem krank; wan daut oba kjemt, waut eena haben mucht, es daut een Läwensboom” (Spr. 13:12, PB).

Een Mensch kaun truarich woaren, wan dee opp irjentwaut hopt un dän sikj daut soo späat, daut et kjeenmol waut jeft. Abraham jinkj daut mol soo. Jehova vespruak am eenen Sän, oba doa vejinjen Joaren un hee un Sara hauden kjeene Kjinja (1. Mo. 12:1-3, 7). Aus Abraham ieescht oolt wia, säd hee: “Gott mien HAR, waut west du mie tookomen loten? Ekj hab kjeen Kjint  . . . Du hast mie kjeen Kjint tookomen loten”. Jehova säd dan wada to am, daut hee wudd eenen Sän haben, krakjt soo aus hee am vesproaken haud. Oba daut dieed nochmol oppet weinichste 14 Joa, ea Gott sien Vespräakjen erfeld (1. Mo. 15:2-4; 16:16; 21:5).

Aul dee Tiet, wua Abraham luaren must, velua hee oba nich siene Freid, Jehova to deenen. Hee haud kjeenen Twiewel doaraun, daut Jehova sien Vespräakjen erfellen wudd. De Apostel Paulus schreef: “Abraham wacht jeduldich doaropp, un soo kjrieech hee, waut am vesproaken wia” (Heb. 6:15, PB). Met de Tiet jeef Gott Abraham väl mea aus dee sikj jedocht haud. Waut kjenn wie von Abraham lieren?

Wan du wurscht jleichen, aus Eltesta to deenen, oba die es noch nich aus Eltesta aunjestalt worden, wan du uk aul fa Joaren hast Jehova jedeent, vetru bloos wieda opp Jehova. Velia nich diene Freid en Jehova sienen Deenst. Een Brooda, waut Warren heet un aul väl Breeda jeholpen haft, em jeisteljen verauntokomen, sajcht doatoo: “Daut brukt siene Tiet bat een Brooda soo wiet es, daut dee kaun Eltesta woaren. Woo een Brooda sikj oppstalt un woo dee sikj om siene Oppgowen kjemmat, woat daut wiesen, wanea dee reed es, Eltesta to sennen. Eenje Breeda jleewen, wan dee nich Eltesta sent, dan deenen dee Jehova nich goot jenuach. Oba soon Denkjen es orrajcht un wan dee soo denkjen, woaren dee nich schaftich sennen. Wan du Jehova tru deenst, dan kaust du schaftich sennen, krakjt endoont wua du best ooda waut du doonen kaust.”

Een Brooda must äwa tieen Joa luaren, bat hee ieescht kunn Eltesta woaren. Hee sajcht, waut hee von daut lieed, waut en Hesekiel, Kapitel 1 steit. “Jehova kontrolt siene Organisazion un sajcht, wanea waut jedonen saul. Daut es nich wichtich, wanea ekj denkj, daut ekj reed sie aus Eltesta to deenen, oba wanea Jehova weet, daut ekj reed sie. Daut es nich wichtich, waut ekj well, oba waut Jehova weet, waut mie fält.”

Wan du eenen Dach west Eltesta woaren, dan proow nu aul, aundre en de Vesaumlunk to halpen. Wan sikj die daut soo väakjemt, daut du aul sea lang jeluat hast, woa nich ojjeduldich. Raymond, von dän wie aul ea räden, sajcht: “Du woascht kjeenmol schaftich sennen, wan du bloos west wäa sennen un Macht haben. Un daut es uk sea schwoa, Jehova met Freid to deenen, wan du emma doaräwa sorchst, daut du noch nich best een Eltesta jeworden.” Proow, dolla de Frucht von Gott sienen Jeist to eewen, besonda de Jedult. Strenj die aun, em jeisteljen stoakja to woaren derch dien Bibel-Studium. Doo mea de goode Norecht prädjen un studia de Bibel, met soone, waut daut intressieet. Sie een goodet Biespel fa diene Famielje, wan daut om dän Prädichtdeenst un de Toopkomes jeit, un studia uk met dee toop de Bibel. Nutz jieda Jeläajenheit ut, met diene Breeda un Sestren toop to sennen, un soo woat die daut scheen gonen, Jehova to deenen, en dee Tiet, wua du doano sträfst, Eltesta to woaren.

Jehova well haben, daut de Breeda soo wiet komen, daut dee kjennen Eltestasch woaren. Oba Jehova un siene Organisazion wellen nich haben, daut dee sellen mootloos woaren en dee Tiet, waut dee doaropp schaufen. Jehova unjastett un säajent aul siene Deena, waut am utem rajchten Senn deenen. Bie aules, waut wie von am kjrieen, “deit hee kjeene Weedoag bie” (Spr. 10:22, NW).

Wan du uk aul lang doano sträfst, Eltesta to woaren, kaust du oba emma noch mea doonen toom em jeisteljen stoakja woaren. En dee Tiet, waut du doaropp schaufst, Eltesta to woaren, halp aundre en de Vesaumlunk un kjemma die goot om diene Famielje. Du kaust die secha sennen, daut Jehova daut nich vejäten woat, waut du aules jedonen hast toom am deenen. Muchst du emma Freid haben en dienen Deenst fa Jehova, krakjt endoont waut vonne Oppgow du kjrichst.