KAYPI tʼukuriy. Fernandoqa * mancharisqa kashan, iskay ancianos paywan parlariyta munasqankuta nisqankurayku. Qotuchakuykunata waturej hermano sapa jamusqantawan, ancianosqa ñauparinanpaj imaspichus kallpachakunan kasqanta nillankupuni. Chayraykutaj Fernandoqa maykʼajllapis anciano kayta atinantachus manachus tapukun. Kunantaj waturej hermanoqa qotuchakuyninta waturillanñataj. ¿Imatá ancianos Fernandoman kay kutipi nenqankurí?

Ujnin ancianoqa 1 Timoteo 3:1 nisqanmanta parlariytawan, Fernandoman anciano sutichasqa kasqanta willarin. Fernandoqa tʼukulla uyarisharqa, mana creeyta atispataj nin: “¿Noqa?”, nispa. Ancianotaj cheqapuni kasqanta nin. Chayta uyariytawan, Fernandoqa kusikun. Qotuchakuypi willakojtintaj, tukuy hermanos kusikunku.

Qotuchakuypi astawan ruwayta munay, ¿juchachu? Mana. Apóstol Pablo nerqa: “Kuraj qhawaj kayta munajqa allin ruwanatapuni ruwayta munan”, nispa (1 Tim. 3:1). Ashkha cristianos chay yuyaychayta kasukuspa, Diospa llajtanpi astawan ñauparinku. Chayraykutaj ashkha wakichisqa ancianos, siervos ministeriales ima tiyan. Chaywanpis qotuchakuykunaqa yapakushallanpuni. Chayrayku “kuraj qhawaj” kanankupaj kallpachakoj hermanos, astawan necesitakun. ¿Imatá chaypaj ruwankuman? ¿Allinchu kanman Fernando jina anchata chayllapi yuyananku?

Kay 1 Timoteo 3:1 versiculopi “kayta munaj[...]” ninapaj oqharikusqan palabraqa, griegopi “imallatapis taripanapaj aysakuy” niyta munan. Imaynatachus uj sachʼaj poqoyninta munaspa taripanapaj aysakunchej, ajinata. Chaywanpis Pabloqa mana nisharqachu “kuraj qhawaj kayta” munapayaywan maskʼanata. Imaraykuchus anciano kayta munajqa, “allin ruwanatapuni” ruwayta munasqankurayku “kuraj qhawaj kayta” munanan tiyan, nitaj wajkunawan qhawachikunanpajchu.

 Anciano kanapaj imastachus ruwana kasqanta, 1 Timoteo 3:2-7; Tito 1:5-9 versiculospi tarinchej. Chaymanta parlaspa Raymundo, pichus unayña anciano nin: “Noqapajqa aswan allin imaynachus sonqonchejpi kasqanchej. Parlayta yachay, sumaj yachachejkuna kaypis may allin. Jinapis mana kʼaminas, aychanchejpa munayninwan mana atipachikojkuna, allinpaj qhawasqas, sumaj yuyayniyojkuna, wasiman wajyarikojkuna, llampʼu sonqos ima kanallanchejtaj tiyan”, nispa.

Anciano kananpaj kallpachakoj hermanoqa, mana kʼamina kasqanta rikuchin, millay kausayta qhesachan, cheqantataj kausakun. Chantapis aychanpa munayninwan mana atipachikunchu, sumaj yuyayniyoj, manataj munaynillantachu ruwan. Chayrayku hermanosqa qotuchakuyta allinta qhawananpi, paykunata yanapananpi ima atienekunku. Wasinman wajyarikuyta yachasqanraykutaj waynasta, sipaskunata, kunallanraj bautizakojkunata kallpacharin. Allin kajta ruwayta munasqanraykutaj onqosqasta, machitu hermanostapis yanaparin, sonqocharin ima. Tukuy chaytataj ruwan, wajkunata yanapayta munasqanrayku, nitaj anciano kayta munasqanraykullachu. *

Ancianosqa “kuraj qhawaj kayta” munaj hermanota yuyaychankuman, kallpachankumantaj. Chaywanpis chay hermanomanta kashan kallpachakunanqa. Uj hermano Henry sutiyoj unayña anciano, pay nin: “Kuraj qhawaj kayta munaspaqa Bibliaj nisqanta juntʼanaykipaj tukuy atisqaykita ruway”, nispa. Chantá Eclesiastés 9:10 versiculota oqharispa nin: “‘Imachus ruwanaykipaj tiyan, chayta tukuy kallpaykiwan ruway’. Ancianos imallatapis kamachisojtinku, tukuy sonqo ruwanaykipaj kallpachakuy. Qotuchakuypi imata ruwanaykita nisojtinkupis kusiywan juntʼay, pichanaykita nisojtinkupis. Chaytaj mana qhasipajchu kanqa”, nispa. Anciano kayta munanki chayqa, Diosta yupaychaypi imatapis mana qhellakuspa ruway, atienekunapaj jinataj kay. Kʼumuykukoj runata jina rejsisunanku tiyan, nitaj jatunchakojta jinachu (Mat. 23:8-12).

Wakinkunaqa anciano kayta munaspa, waj hermanosman ninku: “Unayña bautizasqa kani, imarayku niraj ancianochu kani”, nispa. Wakinkunataj ancianosman llunkʼukunku. Wakintajrí ancianos yuyaychajtinku jistunku. Chay hermanosqa tapurikunanku kanman: “¿Imaraykú anciano kayta munani? ¿Jehovaj ovejitasninta qhawayta munasqayraykuchu, chayri munayniyta maskʼasqayraykuchu?”, nispa.

Chantapis anciano kayta munajqa, “kʼachata kawsa[nan]” tiyan, wajkuna pay jina kausakunankupaj (1 Ped. 5:1-3). ¿Imaynatá chayta ruwanman? Sajra yuyaykunata, ruwaykunatawan qhesachaspa. Pacienciayoj kananpaj, sinchʼita sayananpaj ima kallpachakuspa. Chaytataj anciano kaspa chayri manapis ruwanapuni tiyan. Chantapis ni pipis anciano kaytawan juntʼa runaman tukunchu (Núm. 12:3; Sal. 106:32, 33). Mana chayllachu, ichapis uj hermano ninman: “Sonqoyqa mana imamantapis juchachawanchu”, nispa. Wajkuna reparasqankuman jinataj, ichá mana jinachu kanman (1 Cor. 4:4). Chayrayku ancianos allinniykipaj Bibliawan yuyaychasunku chayqa, ama phiñakuychu. Yuyaychasusqankuman jina ruwanaykipajtaj kallpachakuy.

Wakin hermanosqa, anciano kanankupaj unaytaña suyashasqankuta yuyanku. ¿Jinallatatajchu yuyanki? Jina kajtin, kayta yuyarikuy: “Imatapis suyasqa mana juntʼakojtenqa, sonqoqa llakisqa qhepakun; ima munasqapis juntʼakojtinrí, chayqa kawsay sachʼa jina” (Pro. 13:12).

Uj imata ruwayta munasqanchejta mana usqhayta japʼejtinchejqa, sonqonchej llakikunman. Abraham jinapi rikukorqa. Jehovaqa Abrahamwan Sarawan wawayoj kanankuta nerqa. Chaywanpis paykuna machuyasharqankuña, nitaj wawayojchu karqanku (Gén. 12:1-3, 7). Chayrayku Abraham nerqa: “Tukuyta Kamachej Tata Dios, imatataj qowankiri? Qan yachashanki waway mana kasqanta, [...] qan mana qowankichu uj wawallatapis”, nispa. Jehová nisqanta juntʼanantapuni nejtinpis, 14 watasninmanraj wawayoj karqanku (Gén. 15:2-4; 16:16; 21:5).

Abrahamqa unayta suyakuspapis, Jehovata kusiyllawanpuni yupaycharqa. Imaraykuchus Jehová nisqanta juntʼananpi atienekorqa. Pablo nerqa: “Abrahamqa chay jina unayta pacienciawan suyakuspa, imatachus Dios qonanta nerqa, chayta japʼerqa”, nispa (Heb. 6:15). Arí, Tukuy Atiyniyoj Diosqa suyakusqanmanta astawanraj bendicerqa. ¿Imatá Abrahammanta yachakusunman?

Anciano kayta munanki chay, unaytañataj suyakushanki chayqa, Jehovapi atienekullaypuni. Ama suyakuspa saykʼuychu, kusiywantaj Jehovata yupaychay. Williamqa ashkha hermanosta ñauparinankupaj yanaparqa. Pay nin: “Uj hermano anciano kananpaj wakichisqa kasqanta reparanapaj tiempo necesitakun. Imaraykuchus imaynachus  kasqan, imastachus ruwayta yachasqan, ruwasqanpi, kamachisqankuta imaynatachus juntʼasqanpi ima, pisimanta pisi rikukun. Wakenqa qotuchakuypi sumaj ruwaykunata japʼispalla kusisqa kanankuta yuyanku. Jinata yuyaspa pantanku, niñataj imawanpis kusisqa kayta atinkuchu. Imaraykuchus cheqamanta kusisqa kananchejqa, Jehovata mayllapipis, imaynallamantapis tukuy sonqo sirvinanchejmanta kashan”, nispa.

Uj hermano anciano sutichasqa kananpaj chunka watata suyakorqa. Payqa Ezequiel libroj ñaupaj capitulonta oqharispa imatachus yachakusqanta nin: “Jehovaqa llajtanwan ninakoj carretanta munasqanman jina purichin. Nitaj imapis noqanchej munajtinchejchu ruwakun, manaqa Jehová maykʼajchus ruwakunanta nejtillan. Paylla yachan maykʼajchus wakichisqa kasqanchejta. Chayrayku mayta anciano kayta munajtiypis, mana munasqayman jinachu karqa”, nispa.

Maykʼajllapis uj anciano jina “allin ruwanatapuni” ruwayta munanki chayqa, qotuchakuyta yanapayta munasqaykirayku kachun. Unaytaña suyasqaykita yuyanki chaytaj, ama llakiywan atipachikuychu, nitaj suyakuspa saykʼuychu. Raymundo pimantachus parlarqanchejña nin: “Imallatapis anchata munapayaspaqa, ni jaykʼaj sonqo juntʼasqachu kanki, chay yuyaylla kaspa, ni Jehovata sirvispapis kusiyta tarinkichu”, nispa. Chayrayku Diospa espiritunpa poqoyninta astawan rikuchinaykipaj kallpachakuy, astawanqa pacienciata. Jehovaman astawan qayllaykuy Bibliata ukhunchaspa. Willayman astawan llojsiy, runasmanpis Bibliamanta yachachiy. Familiapi Diosta yupaychana tantakuyta ruwaspa familiaykita yanapay. Qotuchakuypi hermanoswan hermanaswan kaspa kusikuy. Jinamanta anciano kanaykipaj kallpachakuspa mana saykʼunkichu.

Ni Jehovapis, ni llajtanpis anciano kayta suyakuspa llakisqa chayri sonqo pʼakisqa kanaykita munanchu. Astawanpis munanku tukuy chay tiempopi sumaj cristiano kanaykipaj, hermanosta yanapanaykipaj ima kallpachakunaykita. Diosqa llimphu sonqowan payta sirvejkunata yanapan, bendecin ima. “Nitaj ima llakiytapis chay bendición apamunchu” (Pro. 10:22).

Anciano kayta unaytaña suyashanki chayqa, Diospa llajtanpi ñauparillaypuni. Jehovaqa ni jaykʼaj qonqanqachu, aswan sumaj cristiano kanaykipaj, qotuchakuypaj llankʼanaykipaj, familiaykita yanapanaykipaj ima kallpachakusqaykita. Imata kamachisojtinkupis, Jehovata tukuy sonqo sirvillaypuni.