ISKAY punta apaqkuna rimanankupaq Fernandota * niykuptinmi payqa mancharisqa hina kachkan. Llaqtan-llaqtan watukuq iñiqmasinchik sapa kuti hamuptinmi punta apaqkuna Fernandota nirqaku imakunapi astawan kallpanchakunanpaq. Chaymi tiempopa pasasqanman hina Fernandoqa sunqunpi tapukurqa haykapi punta apaq kananpaq ninankumanta. ¿Kunanqa punta apaqkunaqa niykunqakuchu paypas punta apaqña kananpaq?

Huknin punta apaqmi 1 Timoteo 3:1 leespan willaykurqa punta apaqña kasqanmanta. Hinaptinmi Fernandoqa nirqa: “Wawqillay, ¿ima ninkim? ¿Ciertochu chayqa?”, nispa. Hinaptinmi huknin punta apaqqa kaqmanta nirqa: “Arí”, nispa. Chaymi Fernandoqa kusikuymanta asirirqa. Huñunakuypi llapallan iñiqmasinchikunapa qayllanpi Fernando punta apaqña kasqanmanta willamuptinmi llapallanku kusikurqaku.

¿Diospa llaqtanpi astawan yanapakunapaq kallpanchakuyqa allinchu? Arí, allinmi. Apostol Pablom qillqarqa: “‘Iñiqkunamanta nanachikuq’ kananpaq pipas kallpanchakuqqa, allin llamkaytam munachkan”, nispa (1 Tim. 3:1). Pablopa kayna nisqanraykum achka iñiqmasinchikkuna allinta kallpanchakunku astawan Diospa llaqtanpi yanapakunankupaq. Chaymi wara-waranqantin punta apaqkuna hinaspa punta apaqkunapa yanapaqnin kanku. Ichaqa iñiqmasinchikkuna yapakusqanraykum “iñiqkunamanta nanachikuq” kanankupaq astawan kallpanchakunanku. ¿Imakunapiraqtaq astawanqa kallpanchakunanku? Chaymantapas, ¿punta apaq kayta munaqkunaqa chaypi umayuqllañachu Fernando hina kananku?

“Haypanaykipaq kallpanchakuy” nisqanmantam griego rimaypi nin imatapas haypayta munaspaqa chutarikusqanchikmanta, imaynam ima frutapas kallmanpi altopiraq kaptin haypayta munaspa chutarikusqanchikman hina. Chayna kaptinpas Pabloqa manam nirqachu iñiqkunamanta nanachikuq kaytaqa llumpa-llumpayta munapayanapaqqa. ¿Imanasqa? Sunqumanta punta apaq kayta munaqkunaqa allin llamkaqmi kananku, manam punta apaqmi payqa ninallankupaqchu.

Iñiqkunamanta nanachikuq kanankupaq yanapakuykunam kachkan 1 Timoteo 3:2-7 hinaspa Tito 1:5-9. Chaykunamantam achka watakunaña punta apaq kaq iñiqmasinchik Raymond nin: “Ñuqapaqqa imamantapas aswan allinqa imayna kasqanchikmi. Punta apaqkunaqa kananchik allin yachachiqmi hinaspa allin rimaqmi, ‘mana pipapas anyananmi, imapipas controlakuqmi, allin yuyaywan imapas ruwaqmi, mana ukunpi-hawanpi imapas ruwaqmi hinaspa samaykachikuqmi’”, nispa.

Punta apaq kayta munaqkunaqa yuyaywanmi imatapas ruwananku, mana allinkunamantapas ayqikunankum, chayna kaspankuqa mana pipapas anyananmi kanqaku. Hinaspapas controlakuqmi, yachaywan imatapas ruwaqmi kananku, chaymi iñiqmasinchikkunaqa ima sasachakuyninkupipas yanapaykunankuta yachaspanku confianzapaq hapinqaku. Chayna kaspankuqa Diospi iñiqkunamantam allinta nanachikunqaku. Samaykachikuq kasqanraykutaqmi musu-sipaskunata hinaspa chayllaraq bautizakuq iñiqmasinchikkunatapas kallpanchaykunqaku. Chaynallataqmi llampu sunqu kaspan unquqkunata hinaspa yuyaq iñiqmasinchikkunata consuelaykuspa yanapaykunqaku. Qampas iñiqmasinchikkunata yanapanaykipaqyá kallpanchakuy, amayá imatapas chaskiyta munaspallachu. *

Punta apaqkunaqa yanapaspam kallpanchanku “iñiqkunamanta nanachikuq” kanankupaq kallpanchakuqkunataqa. Chayna kaptinpas punta apaqkuna yanapaqnin kayta munaqmi astawanqa kallpanchakunan. Achka watakunaña punta apaq kaq Henry sutiyuq iñiqmasinchikmi nin: “Iñiqkunamanta nanachikuq kanaykipaqqa, kallpanchakuy imatapas yachaywan hinaspa yuyaywan ruwanaykipaq”, nispa. Hinaspam Eclesiastes 9:10, niqta leespan ninraq: “‘Ruwanayki kaqtaqa, kallpanchakuspayá chaylla ruway’ bibliapi nispanqa nichkan tukuy kallpanchikwan imatapas ruwanapaqmi. Chayrayku punta apaqkuna imatapas kamachisuptikiqa chaylla kasukuy hinaspa congregacionpi imapas kaqkunata ruway, pichana kaptinpas pichay. Tukuy imapaq kallpanchakusqayki hinaspa allinta llamkasqaykiqa manam yanqapaqchu kanqa”, nispa. Punta apaq kayta munaspaykiqa Jehova Diospaq hina tukuy imata ruway hinaspapas ama hatun tukuychu (Mat. 23:8-12).

Wakinkuqa congregacionpi astawan yanapakuyta munaspankum punta apaqkunata hikutanmanku nombranankupaq. Wakin punta apaq kayta munaqkunañataqmi rimapayaykuptinku chaylla piñakunku, chayna kaq iñiqmasinchikkunaqa kaynatam tapukunmanku: “¿Kikillaypaqchu imatapas maskachkani icha iñiqmasiykunata sunqumanta yanapanaypaqchu?”, nispa.

Punta apaqkunaqa kananku ‘qatipakunapaq hinam’ (1 Ped. 5:1-3). ¿Imaynatam qampas qatipakunapaq hina kawaq punta apaqña utaq manaraq kaspaykipas? Chaypaqqa mana allin kaqkunatam qipanchanayki, pacienciakuqmi kanayki, sasachakuy kaptinpas hinallam Diospi hapipakunayki. Punta apaqkunaqa pantankum (Num.12:3; Sal. 106:32, 33). Chaymi allin kaqta ruwayta munaspankupas mana tukuypichu allinta ruwanku, chaymi wakinpiqa imapas tantiasqankuta mana allinpaqchu qawachwan (1 Cor. 4:4). Chayna wakinpi tarikuspanchikqa bibliawan rimapayaykuwasqanchikta mana piñakuspalla uyariykusun hinaspapas kallpanchakusun niwasqanchikman hina imatapas ruwananchikpaq.

Wakin iñiqmasinchikkunaqa hukmanyankum achka watakunaña ‘punta apaq kanankupaq’ suyasqankuwan. Yaqapaschá qampas unay watakunaña ‘iñiqmasikikunamanta nanachikuq kanaykipaq’ kallpanchakuchkanki. ¿llumpayta suyasqaykitachu piensanki? Chayna kaptinqa, bibliapi kayna nisqanta yuyariy: ‘Runapa imapas suyasqan unamuptinmi sunqun hukmanyarun. Suyasqan rikurimuptinmi ichaqa kawsay qukuq sacha hinaraq rikurirun’, nisqanta (Prov. 13:12).

Imapas suyasqayki mana haypay atina hina kasqanta piensaspaqa sunquykipim hukmanyaruwaq. Chaymi Abrahantapas pasarurqa, Jehova Diosmi paytawan warmin Sarata nirqa mirayniyuq kanankupaq, ichaqa unay watakuna pasaruptinpas hinallam mana mirayniyuq karqaku (Gen. 12:1-3, 7). Chaymi machuyaruspan Abrahan nirqa: ‘Señor Dios ¿imapaqtaq imatapas quwankiman mana churiyuq kachkaptiyqa’, nispa. Jehova Diosqa churiyuq kananmantam nirqa ichaqa chunka tawayuq watamantañam churiyuqqa karqa (Gen. 15:2-4; 16:16; 21:5).

Chaynaqa, ¿achka watakuna suyasqanraykuchu Abrahanqa hukmanyasqa karqa? Manam. Payqa manapunim iskayrayarqachu Jehova Dios nisqanta cumplinamantaqa. Chaymi hawkalla kaspan hinalla suyarqa. Chaymi apostol Pablopas kaynata qillqarqa: ‘Abrahanqa pacienciawan suyaspanmi, Diospa prometesqanta chaskirqa’, nispa (Heb. 6:15). Mana hukmanyaspa suyasqanraykum Jehova Diosqa suyasqanmantapas aswan mastaraq Abrahanman quykurqa. ¿Abrahanpa chayna kasqanqa imapitaq yanapawanchik?

Unay watakunaña punta apaq kanaykipaq suyaspaqa amayá pisiparuychu, aswanqa Jehova Diospiyá hinalla hapipakuy. Hinaspa paymanta kusikuywan hinalla willakuy. William sutiyuq iñiqmasinchikmi achka iñiqmasinchikkunata yanaparqa iñiyninkupi astawan ñawparinankupaq, paymi nin: “Iñiqkunamanta nanachikuq kanapaqqa manam chayllachu tukuyta yacharunchik, aswanqa unay watakunapim. Yachaywan hinaspa yuyaywan iñiqmasinchikkunapa ruwasqanqa watakunapa risqanman hinam qawakun. Chayna kaptinpas wakinkuqa piensankum imatapas haypasqankuraykulla kusisqa kanankumanta. Chayna piensayqa manam allinchu, chaypi umayuqllañam rikuriruchwan. Kusisqaqa kanchik maypiña kaspapas Jehova Diospa munayninta ruwaspam”, nispa.

Huk iñiqmasinchikmi chunka wata masnin punta apaq kananpaq suyarqa. Paymi Ezequiel qillqapa punta kaq capitulon imakunata yachachisqanmanta kaynata nirqa: “Jehova Diosmi carrontaqa apan chaymi serviqninkunatapas munasqanman hina yachachin, payqa yachanmi imakuna llaqtanpaq allin kasqanta. Chaywanmi allinta yachanchik imapas mana ñuqanchikmanta kasqanta. Maynataña punta apaq kayta munaptiypas, manam imapas ñuqapa munasqayman hinachu. Jehova Diosllam yachan imakuna allinniypaq kasqantaqa”, nispa.

Punta apaq kaspa “allin kaqkunata” ruwayta munaspaykiqa, kunanmanta kallpanchakuy congregacionpi kaq iñiqkunata yanapanaykipaq hinaspa kallpanchanaykipaq. Llumpayta imapas unamuptinqa ama hukmanyaychu aswanqa pacienciakuspa hawkalla suyay. Qallariypi rimamusqanchik Raymondmi nin: “Llumpayta imatapas munapayaspaykiqa, manam haykapipas hawkachu kanki. Munasqayki chaylla ruwakunanta munaspaqa manam Jehova Diostapas kusisqañachu servinki”, nispa. Chaynaqa bibliapi nisqanman hinayá hawkalla hinaspa pacienciakuq kay. Hinaspapas Diospa nisqanman hina kawsakunaykipaq bibliata astawan estudiay. Chaynallataq iñiqmasikikunawan kuska Jehova Diosmanta runamasinchikkunaman willay hinaspa yachachiy. Aylluykiwanpas kuskaykichik Diosmanta yachaychik. Iñiqmasinchikkunawan parlanaykipaqpas astawan kallpanchakuy, chaykunata ruwaspaykiqa kusisqam kawsakunki.

Imatapas haypanaykipaq kallpanchakusqaykiqa yanapasunkim Jehova Diosmanta astawan yachanaykipaq hinaspa congregacionpi yanapakunaykipaqpas. Jehova Diosqa manam munanchu hukmanyanaykita nitaq llakikunaykitaqa. Tukuy sunqunwan yupaychaqninkunataqa Jehova Diosqa yanapaykuspanmi bendeciykun. Hinaspapas yuyariy: “Tayta Diospa bendicionninqa manam apamunchu llakikuytaqa”, niqta. (Prov. 10:22).

Unay watakunaña suyaspaykipas hinalla kallpanchakuy iñiynikipi ñawparinaykipaq. Jehova Diosqa manam haykapipas qunqanqachu aylluykita yanapaspa munasqanman hina kawsakunaykipaq kallpanchakusqaykitaqa, nitaq congregacionpi iñiqmasikikunata yanapasqaykitapas. Chaynaqa imapi yanapakuspaykipas kusisqayá Jehova Diosta tukuypi kasukuy.