FERNANDO * ben e senwe. Tu owruman ben wani taki nanga en. A kring-opziener ben kon na a gemeente wan tu leisi kaba, èn ibri leisi den owruman ben sori Fernando san a ben musu du fu kan kisi moro grani na ini a gemeente. Ma fu di noti ben pasa wan heri pisi ten, Fernando ben aksi ensrefi efu oiti a ben o tron wan owruman. Now a kring-opziener ben kon na a gemeente baka. San den owruman ben o taigi en disi leisi?

Fernando ben e arki di wan fu den owruman ben e taki nanga en. A brada ben taki fu 1 Timoteyus 3:1 èn a taigi en taki den owruman fu a gemeente kisi boskopu taki a kan dini leki owruman. Fu di Fernando no ben fruwakti disi, meki a taki: „San yu taki?” Na owruman taigi en a srefi sani baka, dan Fernando bigin lafu. Bakaten den meki bekènti na ini a gemeente taki Fernando tron owruman. Ala sma ben breiti.

A fowtu te wan brada wani kisi moro frantwortu na ini a gemeente? Nôno. Na ini 1 Timoteyus 3:1 skrifi: „Efu wan man e suku fu tron wan sma di e teki fesi na ini a gemeente, dan a e suku fu du wan tumusi bun wroko.” Furu Kresten brada wani du san a tekst disi e taki. Fu dati ede den e du muiti fu go na fesi, so taki den kan kisi moro frantwortu na ini a gemeente. A bakapisi na taki Gado pipel abi moro leki wán hondro dusun lepi owruman nanga dinari ini a diniwroko di de wan blesi gi den gemeente. Ma fu di moro nanga moro sma e kon na ini den gemeente, meki a de fanowdu taki moro brada e du muiti fu kisi moro frantwortu na ini a gemeente. San na a yoisti fasi fu du disi? A de so taki den brada di wani tron owruman musu denki a sani dati doronomo, neleki Fernando?

A Griki wortu di vertaal nanga „suku fu” e sori taki wan sma e angri trutru fu kisi wan sani èn a e du muiti fu kisi a sani dati. A de neleki wan sma di  e langa en anu fu piki wan froktu na ini wan bon. Ma wan brada no musu feti fu tron owruman, soso fu kisi biginen. A moro prenspari sani di musu meki taki a wani tron owruman, na fu di a wani du „wan tumusi bun wroko”.

Furu fu den sani di wan brada musu du fu kisi a grani fu teki fesi na ini a gemeente, skrifi na 1 Timoteyus 3:2-7 nanga Titus 1:5-9. Raymond di de wan owruman langa ten kaba, taki fu den tekst disi: „San moro prenspari gi mi, a no san wi e du, ma na den fasi di wi abi. A prenspari fu de wan bun takiman èn wan bun leriman, ma disi no prenspari moro den tra sani di wi musu du. Wan owruman musu de wan sma di trawan no man feni fowtu na en tapu, a no musu du sani pasa marki, a musu de nanga krin frustan, en libi musu orga bun, a musu lobi fu teki trawan na ini oso èn a musu fiti ensrefi makriki na trawan.”

Efu wan brada e du muiti trutru fu kisi moro frantwortu na ini a gemeente, dan trawan no musu feni fowtu na en tapu. Sobun, a musu libi wan krin libi èn a no musu du kruka sani. Den brada nanga sisa de seiker taki a man teki fesi èn taki a man yepi den nanga den problema fu den, fu di a no e du sani pasa marki, a de nanga krin frustan, en libi orga bun èn a e fiti ensrefi makriki na trawan. Fu di a lobi fu teki trawan na ini oso èn a abi switifasi, meki a de wan deki-ati gi den yonguwan nanga den sma di de nyun na ini na anbegi. Fu di a lobi du bun, meki a e trowstu den sikiwan nanga den owruwan, èn a e yepi den. A e du muiti fu abi den fasi disi fu di a wani yepi trawan, no fu di a wani kisi grani. *

Den owruman fu a gemeente de klariklari fu gi wan brada rai nanga deki-ati, ma na a brada srefi musu meki muiti fu abi den fasi di Bijbel e taki dati wan owruman musu abi. Henry, wan lepi owruman, taki: „Efu yu wani kisi grani, dan yu musu du ala muiti fu sori taki yu lepi nofo fu tyari frantwortu.” Henry sori fa wan brada kan du san Preikiman 9:10 e taki. A taki: „’Ala san yu anu feni fu du, du dati nanga ala yu krakti.’ Awinsi sortu wroko den owruman gi yu, pruberi fu du en bun. Yu musu lobi iniwan wroko di den gi yu fu du na ini a gemeente, awinsi na sibi yu musu sibi a konmakandra presi. Te fu  kaba den owruman o si a wroko di yu e du èn a muiti di yu e meki.” Efu yu wani dini leki owruman wan dei, dan wroko tranga ala ten. Den brada musu man abi a frutrow taki yu e du ala sani di wan Kresten musu du. Yu no musu de wan sma di e suku fu kisi biginen, ma yu musu abi sakafasi.—Mat. 23:8-12.

A kan taki son brada e gi den owruman wan pingi taki den wani tron owruman, noso kande den e du ala sortu bun gi den owruman, soso fu di den wani taki den owruman gi den a grani disi. Trawan no lobi en te den owruman e gi den rai. Den brada disi musu aksi densrefi: ’Fu san ede mi wani a grani disi? Na fu di mi abi sakafasi èn fu di mi wani sorgu gi den skapu fu Yehovah, noso na wini mi e suku gi misrefi?’

Brada di wani kisi grani na ini a gemeente no musu frigiti wan tra sani di owruman musu du. Den musu „tron eksempre gi den skapu” (1 Petr. 5:1-3). Wan sma di wani de wan eksempre gi a gemeente no musu abi kruktu denki èn a no musu hoigri. A musu abi pasensi èn a musu horidoro awinsi a tron owruman no so langa pasa noso awinsi a no de wan owruman ete. A no te yu tron owruman, dan wantronso yu no o abi swakifasi moro (Num. 12:3; Ps. 106:32, 33). Wan brada kan feni taki a „abi wan krin konsensi na ini ala sani”, ma kande a e du sani di e meki taki trawan no e denki bun fu en (1 Kor. 4:4). Sobun, efu den owruman e gi yu rai fu Bijbel fu di den e broko den ede nanga yu, dan pruberi fu arki den sondro fu ati bron. Du ala muiti fu du san den taki.

Son brada feni taki den e wakti langa fosi den tron owruman. Yu e firi brokosaka son leisi fu di omeni yari langa yu e „suku fu tron” owruman? Efu dati de so, dan prakseri san Bijbel e taki: „Te wan sma no man kisi san a e fruwakti, dan en ati o kon siki, ma te a kisi a sani di a ben wani trutru, dan dati na wan bon di e gi libi.”—Odo  13:12.

Te wan sma e wakti tumusi langa fu kisi wan sani di a wani trutru, a kan firi brokosaka. Na so Abraham ben e firi. Yehovah ben pramisi en taki a ben o kisi wan manpikin, ma omeni yari langa en nanga Sara no ben abi pikin (Gen. 12:1-3, 7). Di Abraham ben kon moro owru, a taki: „Moro Hei Masra Yehovah, san yu o gi mi? Luku, te now ete mi no abi pikin . . . . Yu no gi mi pikin.” Yehovah gi Abraham a dyaranti taki a ben o gi en wan pikin, soleki fa A pramisi en. Ma a teki sowan 14 yari fosi Yehovah gi en wan pikin trutru.—Gen. 15:2-4; 16:16; 21:5.

Yu denki taki Abraham no ben e prisiri moro fu dini Yehovah fu di a ben musu wakti? Nôno. Noiti a ben tweifri taki Gado ben o du san a pramisi. A tan prakseri a moi pramisi dati. Na apostel Paulus ben skrifi: „Baka di Abraham hori pasensi, a kisi a sani di Gado pramisi en” (Hebr. 6:15). Te fu kaba na Almakti Gado blesi a reti-ati man dati moro leki san a ben e fruwakti. San yu kan leri fu Abraham?

Efu yu wani dini leki owruman, ma yu no kisi a grani disi ete aladi furu yari pasa kaba, dan tan frutrow tapu Yehovah. Tan dini en nanga prisiri. Warren di yepi furu brada fu go na fesi e taki fu san  ede disi de prenspari. A taki: „Ten musu pasa fosi a kon na krin efu wan brada kon lepi nofo fu tron owruman. A fasi fa wan brada e tyari ensrefi èn fa a e du son wroko o tyari kon na krin safrisafri sortu fasi a abi èn san a man du. Son brada feni taki den no man dini Yehovah nanga prisiri, solanga den no tron owruman. A denki disi no bun èn a kan meki taki wan brada no e prakseri nowan tra sani. Efu yu e tan dini Yehovah fayafaya awinsi pe yu de èn awinsi san yu e du, dan disi musu gi yu prisiri kaba.”

Wan brada ben musu wakti moro leki tin yari fosi a tron owruman. A taki san a leri fu wan tekst na ini Esekièl kapitel 1 di furu sma sabi. A taki: „Yehovah e rèi a hemel wagi fu en, sobun a e tiri na organisâsi fu en soleki fa en wani. Yehovah e du sani na en eigi ten. Sani no abi fu pasa o ten wi wani. Sobun, awinsi mi wani tron owruman, san mi wani no prenspari. Kande san mi wani, a no san mi abi fanowdu, èn Yehovah sabi dati.”

Efu yu wani tron owruman wan dei, dan tan du sani di o meki taki prisiri de na ini a gemeente. Efu yu feni taki a e teki tumusi langa, dan no broko yu ede tumusi èn no lasi pasensi. Raymond taki: „Wan sma di e feti fu kisi biginen no man de koloku. Sma di e broko den ede tumusi nanga sani, no man dini Yehovah nanga prisiri.” Du muiti fu abi den fasi di a yeye fu Gado e meki sma kisi, spesrutu pasensi. Studeri Bijbel so taki yu tron wan moro bun mati fu Yehovah. Du moro na ini a preikiwroko èn pruberi fu yepi moro sma fu sabi san Bijbel e leri. Yepi yu osofamiri fu du sani di abi fu du nanga na anbegi, èn teki fesi na a Osofamiri Anbegi. De nanga prisiri te yu de nanga den brada nanga sisa fu yu. Na so yu o dini Yehovah nanga prisiri aladi yu e wakti fu tron owruman.

Yehovah gi brada a moi okasi fu kisi grani na ini a gemeente. Fu dati ede, den e kisi a deki-ati fu du muiti fu kisi den grani disi. Yehovah nanga na organisâsi fu en no wani taki den brada disi lasi-ati noso taki den lasi prisiri na ini a diniwroko. Gado e blesi ala sma di e dini en nanga wan krin ati èn a e horibaka gi den. Te Yehovah e blesi sma, „a no e meki den firi sari” noiti.—Odo 10:22.

Kande yu du muiti langa ten kaba fu tron owruman, ma yu no kisi a grani disi ete. Awinsi dati de so, toku yu kan tan meki muiti fu tron wan moro bun mati fu Yehovah. Tan meki muiti fu kisi den fasi di owruman musu abi, wroko tranga na ini a gemeente, èn tan poti prakseri na yu osofamiri. Te yu e du dati, dan Yehovah no sa frigiti ala den sani di yu du gi en. Awinsi sortu wroko yu e kisi fu du, tan dini Yehovah nanga prisiri.