FERNANDO pekuama tsinu. * Chatiy lakgkgolotsin wanikgonit pi tachuwinamputunkgo. Nina makgas, akxni makgatunu titaxtunita superintendente de circuito, lakgkgolotsin xalak congregación wanikgonit tuku xlitlawat xlakata tlakg lhuwa tuku nalakgataya kcongregación. Chuna la titaxtu kilhtamaku, Fernando tsukunit lakpuwan komo nachan kilhtamaku akxni kgolotsin nawan kcongregación. La uku superintendente de circuito aku lakgapaxialhnampa congregación. ¿Tuku nawanikgo lakgkgolotsin?

Fernando lu kuenta tlawa akgatunu tachuwin nema wani chatum kgolotsin xalak congregación. Tala lichuwinan 1 Timoteo 3:1 chu wani pi makglhtinankgonit carta niku wan pi kgolotsin nalitaxtu. Fernando kaks lilakawan chu wan: «¿Xlikana tuku kilawanimaw?». Tala wanipara, chu Fernando lakalitsin. Alistalh, akxni makatsinikan congregación pi kgolotsin nalitaxtu, putum natalan lipaxuwakgo.

¿Ni xlilat wi tuku nalakgatayaputunkan kcongregación? Apóstol Pablo tsokgli: «Lapi wi nti [lakgchamputun] xtaskujut Dios, lu[...] tlan taskujut ntu mpuwaniy natlaway» (1 Tim. 3:1). Xlakata lu kamakgpuwantininit uma texto, lhuwa natalan lakapala taliwakanit xtakanajlakan. Xlakata uma, kxkachikin Dios wilakgo lhuwa mil lakgkgolotsin xalak congregación chu siervos ministeriales. Pero xlakata talhuwimakgolh congregaciones, tlakg talakaskin tiku «[nalakgchamputunkgo] xtaskujut Dios». ¿La xlitlawat tiku wi tuku lakgatayaputun? Nachuna, tiku kgolotsin litaxtuputun, ¿xlilat putum kilhtamaku kajwatiya nalilakpuwan uma, chuna la tlawalh Fernando?

Tachuwin, “nalakgchipimputuna” ktachuwin xagriego wamputun wi tuku lu nalakgatikan chu natastonkga xlakata namakachipiniya. Kinkamalakpuwaniyan akxni wi tiku tastonkga xlakata namakachani kgama tawakat nema waka kkiwi. Pero Pablo ni xwamputun pi lu nalakgkatsalakankan kgolotsin nalitaxtuputunkan kcongregación. ¿Tuku xlakata? Xlakata, wa tuku xlakaskinka xliʼakxilhatkan tiku xlikana kgolotsin litaxtuputunkgo wa pi natlawakgo «lu[...] tlan taskujut», chu ni kaj xlakata xlakaskinka litaxtuputunkgo.

Lhuwa tuku kaskinikan tiku tlawaputunkgo uma lu tlan taskujut, tatsokgnit 1 Timoteo 3:2-7 chu Tito 1:5-9. Akxni xlichuwinama uma, Raymond, chatum tala  tiku lhuwa kata kgolotsin litaxtunit, wa: «Tuku tlakg xlakaskinka kakxilha, wa tuku ktlawayaw. Xlakaskinka pi nakkatsiniyaw la nakchuwinanaw chu la nakmasiyayaw, pero na ni naktlawayaw tuku natlawa nitlan nakinkalichuwinankanan, ni nakmalakatsaliyaw la klinaw kilatamatkan, aktanks naklakapastaknanaw, ni akglakgwa naklatamayaw, tlan nakkamakgamakglhtinanaw amakgapitsin chu ni naklakpuwanaw pi putum kilhtamaku natlawakan la nakwanaw».

Chatum tala tiku xlikana kgolotsin litaxtuputun, ni tlawa tuku xalixkajnit xlakata talakgxtumit chu ni tlawa tuku ni xaʼakgstitum, nema natlawa pi nitlan nalichuwinankan. Ni malakatsali la lin xlatamat, aktanks lakapastaknan chu ni lakpuwan pi xlitatlawat putum tuku wan, chu ni akglakgwa latama; wa xlakata xnatalan lipawankgo pi nakamakgtayakgo komo nakgalhikgo taʼakglhuwit chu lu tlan napulalin congregación. Xlakata tlan kamakgamakglhtinan amakgapitsin, kamakgpuwantini tiku kamananku chu tiku xalaksasti kcongregación. Chu xlakata lakgati tlawa tuku tlan, kamatliwakglha chu kamakgtaya tiku tatatlakgo chu tiku linkgoya kata. Liskuja nakgalhi umakgolh laktlan tayat xlakata nakaskujnani xnatalan, ni xlakata kgolotsin litaxtuputun. *

Putum lakgkgolotsin tiku pulalinkgo congregación tlan nakastakyawakgo chu nakamakgtayakgo tiku wi tuku lakgatayaputunkgo, pero xlakan xliskujatkan xlakata namakgatsikgo tuku taskin kBiblia. Henry, tiku lhuwata kata kgolotsin litaxtunit kcongregación, wan: «Komo lakaskina wi tuku nalakgayawakana, tlakg kaliskujti xlakata namakgantaxtiya tuku taskin». Akxni xlichuwinama tuku wan Eclesiastés 9:10, wa: «“Putum tuku tlan litlawaya mimakan, xliputum militliwakga kalitlawa”. Putum taskujut tuku lakgayawakgoyan lakgkgolotsin, kaliskujti xlakata lu tlan natlawaya. Xliputum minaku kaliskujti tuku nalakgayawakana, asta akxni nakapalhnana. Natitaxtu kilhtamaku, naʼakxilhkan taskujut nema tlawaya». Komo lakaskina pi nachan kilhtamaku kgolotsin nalitaxtuya, palha kaliskujti chu xaʼakgstitum katlawa putum taskujut nema tlawaya kxkachikin Jehová. Talakaskin pi nalilakgapaskana xlakata taktujuya, chu ni xlakata lanka makgkatsikana o xlakata xlakaskinka litaxtuputuna (Mat. 23:8-12).

Makgapitsi tiku lu lakaskinkgo wi tuku kakalakgayawaka kcongregación, max asta nawankgo tuku nalimasiyakgo pi kgolotsin litaxtuputunkgo o max wi tuku nawankgo o natlawakgo xlakata lakgkgolotsin kalakpuwankgolh pi xlilat wi tuku nakalakgayawakan. Amakgapitsi lisitsikgo akxni kastakyawakgo lakgkgolotsin. Tlan nawan komo xakstukan nakakgalhskinkan: «¿Wa kputsama pi xlakaskinka naklitaxtu, o xliputum kinaku kkuentajtlawaputun xborregos Jehová?».

Atanu tuku na xlilakapastakatkan tiku wi tuku lakgatayaputunkgo, wa pi lakgkgolotsin kaskinikan «xaliukxilhtit nawan[kgo] [...] nkgamputum x[borrego] Dios» (1 Ped. 5:1-3). Tiku liʼakxilhtit litaxtu kcongregación, lakgmakgan talakpuwan chu tatlaw nema ni xaʼakgstitum. Maski wi tuku lakgayawakanit o ni, liskuja xlakata ni lakapala nasitsi chu natayani. Akxni wi tiku kgolotsin litaxtu ni wamputun pi nialh lakgalhina nawan (Núm. 12:3; Sal. 106:32, 33). Nachuna, max wi tiku “xtalakapastakni ni [namakatsini] pala tlawanit” tuku nitlan, pero max amakgapitsi wi tuku xlakata chuna lakpuwankgo (1 Cor. 4:4, Hua Xasasti Talaccaxlan, TXS, 1999). Wa xlakata, komo lakgkgolotsin nalistakyawakgoyan Biblia, kakakgalhakgaxpatti chu ni kasitsi. Alistalh kaliskujti chu kamakgantaxti kmilatamat.

Lhuwa natalan makgkatsikgo pi ni tunkun chin ama kilhtamaku akxni wi tuku nakalakgayawakan. Komo wix “lakgchipimputumpat” uma chu titaxtunita lhuwa kata, ¿min kilhtamaku lilipuwana? Komo chuna, kalilakpuwanti uma tuku wan Biblia: «Takgalhkgalhin nema ni tunkun kgantaxtu makgatatatla naku, pero akxni kgantaxtu tuku lakaskinaw uma la kgantum kiwi nema masta latamat» (Prov. 13:12).

Akxni wi tuku lu lakaskinkan chu ni tunkun kgantaxtu, max lu nalilipuwankan. Abrahán chuna titaxtulh. Jehová wanilh pi xʼama kgalhi xkgawasa, pero titaxtulh lhuwa kata ni kgalhikgolh xkgawasakan (Gén. 12:1-3, 7). Akxni lhuwa kata xkgalhiya, wa: «Jehová, malana tiku lakgchan namapakgsinan, ¿tuku nakimaxkiya, akxni chuntiya ni kkgalhi kinkgawasa[?] [...] Ni kimaxkinita chatum kinkgawasa». Jehová wanilh pi tuku xwaninit xʼama kgantaxtu. Pero max akgkutati kata titaxtuparakgolh asta akxni Jehová makgantaxtilh tuku xwaninit (Gén. 15:2-4; 16:16; 21:5).

Pero putum uma kilhtamaku akxni xkgalhkgalhinama, ¿nialh xatapaxuwan skujnanilh Jehová? Ni chuna. Nikxni lakpuwa pi Jehová ni xʼama makgantaxti tuku xwaninit. Wata xʼakxilhlakachan tuku lu tlan xʼamaka maxkikan. Apóstol Pablo tsokgli: «Lipaxuw xkgalhkgalhima [Abrahán] asta akxni [...] makglhtinalh wantu Dios xmalaknuninit namaxkiy» (Heb. 6:15, TXS, 1999). Alistalh, Dios tiku kgalhi xliputum litliwakga, sikulunatlawalh chuna la nipara xlakpuwan uma chixku tiku ni xmakgatsankganani. ¿Tuku kinkamasiyaniyan xliʼakxilhtit Abrahán?

Komo kgolotsin litaxtuputuna, pero ni lakgayawakanita maski titaxtunit lhuwa kata, chuntiya kalipawanti Jehová. Ni kamasta talakaskin pi uma natlawa nialh napaxuwaya. William, chatum tala tiku kamakgtayanit lhuwa natalan xlakata tlan wi tuku nalakgatayakgo, wan: «Xlakata tlan namakgatsiya tuku taskin,  talakaskin chuntiya naliskujtilhaya. Chuna la titaxtutilha kilhtamaku, tsinu tsinu tasiyatilha xtayat chu tuku tlan tlawa chatum tala xlakata la lin xlatamat chu la makgantaxti tuku skinikan natlawa. Makgapitsi lakpuwankgo pi lu tlan kakitaxtunima komo wi tuku kalakgayawakan o komo kamaxkikan akgtum taskujut. Uma talakpuwan nixatlan chu max natlawa pi xafuerza nalakaskin wi tuku nalakgayawakan. Tuku lu tlan nakgalhikan, wa uma: wa pi xaʼakgstitum naskujnaniya Jehová, chu ni wa xlakaskinka naʼakxilha niku skujnanipat chu tuku lakgayawakanita».

Chatum tala kgalhkgalhilh liwaka akgkaw kata xlakata kgolotsin xlitaxtulh. Akxni xlichuwinama tuku wan capítulo 1 xla Ezequiel, wan tuku masiyanilh: «Jehová lin xputlaw, xkachikin, chuna la xlilakapala lakaskin. Tuku xlakaskinka wa akxni Jehová akxilha pi xlilat wi tiku nalaksaka chu ni akxni akinin nalakaskinaw. Komo akit kgolotsin xalak congregación klitaxtuputun, ni wa xlakaskinka tuku akit klakaskima. Max tuku klakaskima ni wa tuku Jehová katsi pi kmaklakaskin».

Komo lakaskina pi nachan kilhtamaku natlawaya xatlan taskujut nema tlawa chatum kgolotsin, kamakgtayananti xlakata congregación napaxuwa. Komo makgkatsiya pi ni tunkun kgantaxtu tuku lakaskina, kaliskujti xlakata ni lu nalilipuwana chu ni lakapala nasitsiya. Raymond, tiku lichuwinawa, wan: «Akxni wi tuku lu kgalhiputuna, uma tlawa pi ni napaxuwaya. Tiku wi tuku lu kgalhiputunkgo nialh paxuwakgo akxni skujnanikgo Jehová». Tlakg kaliskujti nakgalhiya tayat nema masta espíritu santo, chu tuku tlakg xlakaskinka wa xatapaxuwan nakgalhkgalhinana. Kalikgalhtawakga Biblia xlakata nastaka mintakanajla. Tlakg kalichuwinanti xalakwan xalaksasti tamakatsin chu kakamasiyani amakgapitsin xlakata Biblia. Kakamakgtaya mifamilia xlakata natlawayatit tuku namastakakgo mintakanajlakan chu makxtum kakakninanitit Dios. Kalipaxuwa kilhtamaku akxni katatawilaya natalan xalak congregación. Chuna la natitaxtu kilhtamaku, napaxuwaya maski nina makglhtinana tuku lakgatayaputuna.

Kaʼakxilhti kilhtamaku la akgtum tasikulunalin xlakata tlan namakgatsiya tuku taskin; Jehová chu xkachikin ni lakaskinkgo pi lu nalilipuwana o xakiklhwa naliwana kxtaskujut. Dios kamakgtaya chu kasikulunatlawa putum tiku palha skujnanikgo xliputum xnakujkan. Chu kalakapastakti pi akxni Jehová kinkamaxkiyan tasikulunalin «xla ni kinkatamaxkiyan takatsanajwat» (Prov. 10:22).

Maski lhuwa kata titaxtunit la kgalhkgalhipat wi tuku nalakgayawakana, chuntiya tlakg tlan katalalipi Jehová. Xla naʼakxilha tuku tlawapat xlakata nakgalhiya laktlan tayat nema talakaskin chu xlakata lu skujpat kcongregación chu kuentajtlawapat mifamilia. Putum kilhtamaku xatapaxuwan kaskujnani Jehová, chu ni wa xlakaskinka kaʼakxilhti tuku nalakgayawakana.