TE Fernando ay ta xiwel jtebuk, * melel chaʼtul ancianoetik ya skʼan ya sjukik ta kʼop. Te jujun buelta ya xlaj te ulaʼtayel yuʼun te superintendente yuʼun circuito te ancianoetik ya yalbeyik te Fernando te bin ya skʼan ya spas yuʼun ya yichʼxan yaʼtel ta congregación. Ta skaj-abi, te Fernando ya sjojkʼoybey sba teme ya sta yorail te ya x-och ta anciano. Te bitʼil kʼaxelto te ulaʼtayel yuʼun te superintendente yuʼun circuito ta scongregacion, ¿binwan ya xchaʼalbot yuʼun te ancianoetike?

Jtul anciano ya skʼoponbey yaʼiy te 1 Timoteo 3:1, sok ya yalbey te la yichʼix yaʼtel bitʼil anciano. Te Fernando ma schʼuun yoʼtan, jaʼ yuʼun jich la yal: «¿Binlaj-a?». Albot te ya x-och ta ancianoile sok kʼax tseʼel yoʼtan ya yaʼiy sba te Fernandoe. Ta patil, te kʼalal la yichʼ alel ta congregación, spisil tseʼel yoʼtanik yuʼun.

¿Chopolbal te ya jkʼan ya kichʼ kaʼteltik ta congregacione? Maʼuk, melel te jpuk-kʼop Pablo jich la stsʼibay: «Teme ay machʼa yoʼtanuc ya yichʼ yaʼtel ta anciano, buen lec aʼtel te ya scʼane» (1 Tim. 3:1). Ta swenta te bin ya yal te versículo ini, bayal j-abatetik yuʼun Dios ya spasik tulan yuʼun ya x-ochik ta anciano. Jaʼ yuʼun, ta lum yuʼun te Dios ay bayal ta mil ancianoetik sok siervo ministerialetik te pʼijubenik ta lek. Pero, ta skaj te bayalxan ta mukʼubel te congregacionetik, ya skʼan te bayalxan hermanoetik ya spasik tulan yuʼun ya yichʼ yaʼtelik bitʼil siervo ministerial sok anciano. ¿Bin-utʼil ya staik? ¿Lekbal teme jaʼ baem ta yoʼtanik snopel te binwan-ora ya staik jich bitʼil la spas te Fernandoe?

Te kʼopetik «yoʼtanuc ya yichʼ» te xchie talem ta griego kʼop te ya skʼan ya yal te ay machʼa ay bin ya skʼan ya sta o ya spas tulan ta stael. Ya yakʼ xtal ta koʼtantik jtul ants winik te ya xachʼ sba yuʼun ya stul jpʼij sit teʼ. Pero te Pablo ma jaʼuk la skʼan la yal te yakuk skʼanik yaʼtelik ta siervo ministerial o anciano swentanax ya stoy sbaik. Melel te machʼatik ya skʼan ya yichʼ yaʼtelik bitʼil anciano, jaʼ ta swenta te ya skʼan ya spasik «buen lec aʼtel», ma jaʼuk te mukʼ skʼoplal ya skʼan ya xkʼotike.

Te taleliletik ya skʼan ya yakʼik ta ilel swenta ya spasik «buen lec aʼtel» ya jtatik ta 1 Timoteo 3:2-7 sok Tito 1:5-9. Te Raymond te pʼijubenix bitʼil anciano jich la yal ta swenta te textoetik-abi: «Te bin mukʼ skʼoplal ya kil te joʼone, jaʼ te bin yilel jtaleltike. Mukʼ skʼoplal te ya jnaʼtik kʼop sok pʼijubteswanej, pero jaʼnix jich mukʼ skʼoplal te lek bin ya yichʼ alel ta jtojoltik, te ya jtsajtay jbatik, te ya xjuʼ jkomel jbatik, te lekuk koʼtantik sok te lamaluk koʼtantik».

Ya xchiknaj ta ilel te lek stalel jtul hermano te kʼalal maba ya spas te bin ma lek sok maba ya yaʼiy lot o ya xloʼlaywan. Te bitʼil ya snaʼ stsajtayel sba, ya snaʼ pensar, lamal yoʼtan sok lek stalel; te hermanoetik ay smukʼul yoʼtanik te lek ya swentain te congregación sok te ya xkoltayotik yuʼune. Te bitʼil ay slekil yoʼtane ya yakʼbey smukʼul yoʼtan te jchʼieletik sok te machʼatik yachʼilikto ta congregación. Ya smulan skoltayel sok yakʼbeyel yip yoʼtan te machʼatik ayik ta chamel sok te machʼatik ayix yaʼbilalik. Ya yakʼ ta ilel te taleliletik-abi swenta ya skoltay te yantike, ma yuʼunuknax te ya skʼan ya yichʼ yaʼtel ta congregación. *

Te ancianoetik ta jun congregación ya xjuʼ ya yakʼbeyik consejo sok smukʼul yoʼtan te machʼatik ya skʼan ya yichʼxan yaʼtelik ta congregación. Pero, te machʼa ya skʼan ya schʼites te taleliletik jaʼ te hermano te ya skʼan ya sta yaʼtele. Te Henry te ayix bayal jaʼbil bitʼil anciano, jich ya yal: «Teme ya akʼan ya awichʼxan awaʼtele, pasa tulan ta schʼitesel lekil taleliletik». Sok jich ya yalxan ta swenta te Eclesiastés 9:10: «‹Spisil te bintic yac apas, pasa soc spisil awip›. Teme ay bin ya yakʼbat apas te ancianoetik, pasa ta lek. Mulana spasel spisil te aʼtelil ya yakʼbatik ta congregación, jich bitʼil te smesel te sNail Tsoblej. Ichʼbilme ta wenta spisil te bintik yak apase». Jich yuʼun, teme ya akʼan ya sta yorail te ya x-ochat ta anciano, mulana sok pasa ta lek spisil te aʼtelil ya yichʼ pasel ta stojol Dios. Te bin ya skʼan awakʼxan ta ilel jaʼ te pekʼel awoʼtane, ma jaʼuk te toybaile (Mat. 23:8-12).

Ay hermanoetik te ay bin lek ya yalik o ya spasik ta stojol te ancianoetik yuʼun-nax ya yichʼik akʼbeyel yaʼtelik ta congregación. Ay yantik te ya yilintayik te ancianoetik ta skaj te ya xtojobtesotik yuʼune. Te hermanoetik-abi ya skʼan ya sjojkʼoybey sbaik ini: «¿Jaʼnaxbal yakon ta sleel kutsil jlekil, o yuʼun-nixbal ya jkʼan ya jkanantay-a te tuminchijetik yuʼun te Jehová?».

Te binxan ya skʼan ya spasik te ancianoetik jaʼ te ya yakʼik ta ilel lekil ejemplo ta congregación (1 Ped. 5:1-3). ¿Bin-utʼil? Chikan teme yichʼojix yaʼtel ta congregación o mato, ya skʼan ya spʼaj te bintik ya yichʼ nopel o pasel te ma stojiluke, sok te yakuk yakʼ ta ilel slamalil yoʼtan. Te machʼa ya x-och ta anciano ma skʼan ya yal te maʼyukix bin-ora ya xchʼaye (Núm. 12:3; Sal. 106:32, 33). Jaʼnix jich, ayniwan jtul hermano te ya skuy te spisil lek te bin yak ta spasele, pero maniwan jichuk ya yilik te yantike sok ayniwan bin staojik ta ilel (1 Cor. 4:4). Jaʼ yuʼun, teme ya stojobtesat sok te Biblia te ancianoetike, ichʼa ta wenta sok mame x-ilinat. Jaʼnix jich pasa ta akuxlejal te bin la yalbatike.

Ay bayal hermanoetik te jalajikix ta smaliyel ya yaʼiyik. Teme bayalix jaʼbil yakat ta spasel tulan yuʼun ya awichʼ awaʼtel ta congregación, ¿lujbatixbal ta smaliyel ya awaʼiy? Teme jiche, juluk ta awoʼtan te bin ya yal te Proverbios 13:12 te jich ya yal: «Teme ma xtal te bin ay ta mahliyel, ya xwocolij oʼtanil yuʼun, yan teme ya xcʼoht ta pasel te bin la scʼan yoʼtan, ha teʼ scuenta cuxlejal».

Te kʼalal ma jtatik yilel te bin yakotik ta spasel tulan ta stael, bayalniwan ya jmel koʼtantik yuʼun. Jich kʼot ta pasel ta stojol te Abrahán. Albot yuʼun Jehová te ya x-akʼbotik jtul yal snichʼanik, pero kʼax bael te tiempo sok mato staojik-a (Gén. 12:1-3, 7). Te kʼalal mamalix-ae, jich la yal te Abrahán: «Cajwal Jehová, ¿bin yac awaʼbon te bin utʼil mayuc jnichʼan? [...] Ma ba awaʼbeyejon jnichʼan». Manchukme te Jehová la schaʼyalbey te yananix yakʼbey-a te snichʼane, kʼax 14 jaʼbil yuʼun ya skʼotes ta pasel (Gén. 15:2-4; 16:16; 21:5).

Pero, ¿chʼaybal stseʼelil yoʼtan ta skaj te maba kʼot ta pasel ta ora te bin yak ta smaliyel-ae? Maʼuk. Snaʼoj ta lek-a te yananix xkʼot ta pasel-a te bin yaloj te Jehovae, jaʼ yuʼun la smaliyxan. Te jpuk-kʼop Pablo jich la stsʼibay: «Te bin utʼil te Abraham jun yoʼtan la smahliy, la sta te bin halbote» (Heb. 6:15). Te Jehová la yakʼbey bayal bendicionetik te ma smaliyoj-ae. ¿Bin ya yakʼ jnoptik te ejemplo yuʼun te Abrahán?

Teme ya akʼan ya x-ochat ta anciano pero bayalix jaʼbil yakat ta smaliyel, mame xchebaj awoʼtan; akʼa smukʼulin awoʼtan te Jehová. Abatinanxan sok stseʼelil awoʼtan ta stojol. Te William te bayal hermanoetik skoltayojixe, jich ya yal: «Ya yichʼ bael tiempo yuʼun ya kakʼtik ta ilel te taleliletik ya skʼan ayuk yuʼun te ancianoetik sok te siervo ministerialetik. Kʼunkʼun ya xchiknaj ta ilel bin yilel stalel sok bin ya snaʼ spasel jtul hermano, jaʼ ta swenta te bintik ya spas sok te bitʼil ya spas te aʼtelil ya x-akʼbote. Ay machʼatik jaʼnax mukʼ skʼoplal ya yilik te ya yichʼik jun privilegio o jun aʼtelil ta congregación. Pero, mame jaʼuk te bin mukʼ skʼoplale sok ma lek te jaʼ ya xbajt ta koʼtantike. Te bin mukʼ skʼoplale jaʼ te jun koʼtantik ya x-abatinotik ta stojol te Jehová chikan banti ayotik o chikan bin-a te aʼtelil ya jpastike».

Jtul hermano la smaliy lajuneb jaʼbil yuʼun ya x-och ta anciano. La yal te jaʼ koltayot te bin la snop ta capítulo 1 ta libro yuʼun Ezequiel, jich la yal: «Te Jehová jich yipal ya stij te scarro, te jaʼ te organización yuʼune, te bitʼil ya skʼan stukele. Ma jaʼuk ya xkʼot ta pasel te bin-ora ya jkʼantike, jaʼ te bin-ora lek ya yil stukele. Manchukme spisil koʼtan ya jkʼan ya x-ochon ta anciano, ma jaʼuk mukʼ skʼoplal te bin ya jkʼan o te bin lek ya kile. Melel te bin ya jkʼane maniwan jaʼuk te bin ya xtuun kuʼun ya yil te Jehovae».

Teme ya akʼan ya apas te «buen lec aʼtel» ya spas jtul anciano, koltaywanan yuʼun tseʼel yoʼtan te congregación. Teme jich ya awaʼiy te yak ta jalajele, mame xlujbat ta smaliyel. Te Raymond te la kalbeytikix skʼoplale, jich ya yal: «Teme jaʼnax ya akʼan te ay mukʼ awaʼtel, mame ya ata stseʼelil awoʼtan. Teme jaʼnax baem ta awoʼtan te ya akʼan ya x-ochat ta ancianoe, ya schʼay te stseʼelil awoʼtan ya yakʼ te abatinel ta stojol te Jehová». Jaʼ yuʼun pasa tulan ta yakʼel ta ilel te sit ya yakʼ te chʼul espíritu yuʼun Dios, kʼaxtoxan-a te snaʼel smaliyele. Nopaxan te Biblia yuʼun ya stsakxan yip te schʼuunel awoʼtane. Cholaxan te skʼop Dios sok otsesa jnopojeletik. Koltaya te afamilia ta abatinel ta stojol te Jehová sok pasa te yichʼel ta mukʼ Dios ta sjunal na. Mulana sjokinel te hermanoetike. Te bitʼil yakat ta spasel tulan ta yichʼel te awaʼtel bitʼil anciano, mulana te abatinel ta stojol te Jehová.

Te jayeb tiempo ya amaliy yuʼun ya awichʼ awaʼtel ta congregación, jichuk xa awil te jaʼ jun tiempo te ya yakʼbat te Jehová yuʼun ya achʼites lekil taleliletik sok yuʼun ya akoltay te congregación; melel te Jehová sok te organización yuʼun jaʼ ya skʼanik te tseʼeluk awoʼtan, ma jaʼuk te ya amel awoʼtane. Te machʼatik ya x-abatinik ta stojol Dios sok spisil yoʼtanik ya xkoltayotik sok ya x-akʼbotik bendición. Sok julukme ta awoʼtan te «ma ba ya yacʼ mel-oʼtan» te bendicionetik yuʼune (Prov. 10:22).

Manchukme bayalix tiempo yakat ta smaliyel te ya awichʼ awaʼtel ta congregación, ya xjuʼ ya awakʼbeyxan stsak yip te schʼuunel awoʼtane. Te Jehová maba ya xchʼay ta yoʼtan te ya apas tulan ta schʼitesel lekil taleliletik, te tulan ya x-aʼtejat ta congregación sok te ya akanantay te afamiliae. Sokuk stseʼelil awoʼtan ya x-abatinat ta stojol te Jehová chikan bin aʼtelil ya awichʼ akʼbeyel.