A rebetok el miliol el chad el meliuekl er a beluulechad a oumerang el kmo a Rengedel a Dios a mesterir a omelatk el kirel a ngar mederir el klebesei. Te oltirakl er a kerebil a Jesus er a lolisechakl er a rulebengkel el mo meluluuch el kmo: “A Rengedem le mei; bo le motaut a soam er a beluulchad.”​—Mateus 6:10.

Me alta e a rebetok el chad a semeriar el kirel a Rengedel a Dios, engdi a oumesingd el klechelid a diak el blechoel el mesaod er ngii. A chad er a reksi el H. G. Wells a miltebengii el kmo a Jesus a “kmal mle betok a omesodel . . . el kirel a osisecheklel el lulemekedong er ngii el kmo Rengedel a Eanged,” engdi tia el osisechakl a “ua lak el sal klou a belkul el . . . osisechakl er a chelsel a oumesingd el ikelesia.”

A Resioning er a Jehovah a kuk ngodech er aike el bebil er a klechelid e le te blak a rengrir el melisiich er a Rengedel a Dios. Ka di molatk, chelechang e ke menguiu er sel kot el klou a ultutelel el magazine el ki moltobed er ngii el ngar er a 220 el omelekoi. Ngbekord el 46 el miliol er tia el babier a motobed er a bek el buil, el rullii me ngkot el betok a ildisel el magazine el merous er a beluulechad er chelechang. E tia el babier ngera ngmelisiich er ngii? Ka momtab er a dai er ngii el kmo: A Ongkerongel Ouchais er a Rengedel a Jehovah.  *

Ngera uchul me kemam el Sioning er a Jehovah a mo er a tkurrebab el sebecham el ouchais el kirel a Rengedel a Dios? A ta er a uchul a kemam el oumerang el kmo a Rengedel a Dios a klou a belkul el klumech el ngar er a Biblia, el ngii a kot el klou a ultutelel el babier el ngar er ngii. Me a lmuut el tang, aki oumerang el kmo ngdi ta el Rengedel a Dios a sebechel el mo sumechokl a rokui el mondai el dechelebangel er chelechang.

A Resioning er a Jehovah a blechoel el mesaod el kirel a Rengedel a Dios e le ngkmal sorir el oltirakl er a kerebil a Jesus. Sera lengar tia el chutem e ngiluu a Rengedel a Dios el mo kot er a klengar er ngii me a dirrek el omesiungel. (Lukas 4:43) Ngera uchul me a Renged a kmal mle klou a ultutelel er a Jesus? E tiang ngera belkul el kirem? Ngsebechem el metik a nger er a Biblia el kirel aika el ker el ngar er a ongingil el suobel.