Ashkha runas Diospa Reinon yanapanawanchejta suyashanku, Jesuspa nisqantataj kasukushanku. Payqa yachachisqasninman kayta mañakunankuta nerqa: “Reinoyki jamuchun, munayniykitaj ruwasqa kachun, imaynachus janaj pachapi, ajinallatataj kay pachapipis”, nispa (Mateo 6:10).

Ashkha runas Diospa Reinonmanta yachakuyta munanku chaypis, may chhika religiones pisipaj qhawanku. Uj yachayniyoj runa H. G. Wells sutiyoj nerqa: “Jesusqa Janaj pacha Reinomanta maytapuni yachacherqa, ashkha iglesiastaj Diosta yupaychashaspa chayri yachachishaspa Reinomanta pisillata yachachinku”, nispa.

Waj religionesmanta nisqa, Jehovaj testigosnenqa Diospa Reinonmantapuni parlanku. Sutʼincharina, kay japʼishanki chay revistaqa 220 parlaykunapi tiyan. Chantapis sapa killa 46 millonesta orqhokun. Chayrayku Jallpʼantinpi may rejsisqa. Chantá, ¿imamantá kay revista parlan? Titulonta qhawariy, chaypi nin: “Torremanta Qhawaj. Jehová Diospa Reinonmanta willashan ”, nispa. *

¿Imaraykú Jehovaj testigosnin Reinomanta willamunankupaj mayta kallpachakunku? Imaraykuchus Bibliaqa chaymantapuni astawan parlan. Chantapis, Diospa Reinollan runaj chʼampaykunasninta allinchananta yachanku.

Jehovaj testigosnenqa Jesús jinallataj ruwayta munanku. Payqa Diospa Reinonta ñaupajman churarqa, runasmanpis chay Reinomantapuni willarqa (Lucas 4:43). ¿Imaraykú Reinomanta maytapuni parlarqa? ¿Diospa Reinon yanapasunkimanchu? Biblia imatachus chay tapuykunaman kutichisqanta yachanaykipaj, qhepan yachaqanasta leeriwaj.