E mirioni taata na te ao nei e tiaturi i te Basileia o te Atua. Te pee nei ratou i te hiˈoraa o Iesu tei haapii i ta ˈna mau pǐpǐ ia pure: ‘Ia tae mai to oe ra Basileia. Ia haapaohia to oe hinaaro i te fenua nei.’—Mataio 6:10.

Mea maere roa ia ite e rave rahi taata tei haafaufaa i te Basileia o te Atua, area te rahiraa o te mau haapaoraa, aita roa ïa. Ia au i te taata tuatapapa ra o H. G. Wells, ua haafaufaa rahi o Iesu i te haapiiraa o te Basileia o te raˈi. Noa ˈtu râ, aita roa te rahiraa o te mau haapaoraa Kerisetiano i haafaufaa aˈe i te reira.

Mea taa ê roa râ te mau Ite no Iehova i tera mau haapaoraa, te haafaufaa mau nei hoi ratou i te Basileia o te Atua. A feruri na, ua piahia teie vea faufaa mau ta oe e taio ra na roto 220 reo. Fatata 46 mirioni vea taitahi tei neneihia. Tera ïa te vea opere-roa ˈˈe-hia na te ao. Eaha te poroi tumu o teie vea? A hiˈo na i te upoo parau taatoa: Te Pare Tiairaa e faaite ra i te Basileia o Iehova.  *

No te aha te mau Ite no Iehova e tutava ˈi i te faaite, aore ra i te poro, i te Basileia o te Atua? Na mua roa, te tiaturi nei matou o te Basileia o te Atua te poroi tumu o te buka faufaa roa ˈˈe na te ao, te Bibilia. Te tiaturi papu atoa nei matou o te Basileia o te Atua te ravea hoê roa no te faaafaro i te mau fifi ta te taata e faaruru nei.

Te tutava nei te mau Ite no Iehova i te pee i to Iesu hiˈoraa ia ite te taata eaha te Basileia o te Atua. I te fenua nei, o te Basileia o te Atua ta Iesu i haafaufaa roa ˈˈe i roto i to ˈna oraraa e ta ˈna taviniraa. (Luka 4:43) No te aha e mea faufaa mau ai te Basileia no Iesu? E nafea oe e faufaahia ˈi i te reira? Te faaitoito nei matou ia oe ia hiˈopoa i te mau pahonoraa i roto i te tumu parau i muri nei.