Jehová Diosan Qhanañchirinakapajj Diosan Reinoparojj wali askitwa uñjapjje, uk nayrïr yatichäwinakan amuyaniwaypachätawa. Diosan Reinopajj kuna bendicionanaktï jutïrin apankani ukanakat inas mä qawqhanakat yatjjatañ munsta. Ukampis Diosan arsuta bendicionanakajj wali sumapunirakisä, ukajj ¿cheqapunïpachati? sasin inas jisktʼasiraksta.

Cheqas janiw kuntï istʼktan taqe ukanak creyiñasakïkiti, antisas amuytʼasirïñasawa (Proverbios 14:15). Nayra Berea * markankïr cristianonakajj ukwa lurapjjatayna. Diosan Reinopat suma yatiyäwinak nayrïr kuti istʼapkäna ukhajja, janiw uka arunakarojj jankʼak creyipkänti. Antisas “uka arunakajj ¿cheqapunïpachati janicha?” uk sum yatjjatapjjäna (Hechos 17:11). Mä arunjja, kuntï istʼapkäna ukajj Diosan Aruparjamat janicha ukwa yatjjatapjjäna, ukatsti cheqapunïskatapwa yatjjapjjäna.

Jehová Diosan Qhanañchirinakapajja, Berea markankir cristianonakjam yatjjatañamatakiw chʼamañchtʼapjjsma. Jan qollqe mayisaki Bibliat yatichapkta ukaw kuntï Diosan Reinopat nanakajj amuyapkta ukajj Diosan Aruparjamati mä arunjja, Biblian yatichäwiparjamati janicha uk amuyañatak yanaptʼätamjja.

Janiw Diosan Reinopatak yatjjatkätati, jan ukasti aka wakiskir jisktʼanakan qhanañchäwipsa yatjjatarakïtawa.

• ¿Kawkitsa juttanjja?

• ¿Kunatakis aka Oraqen jakpachätanjja?

•   ¿Kunatsa Diosajj tʼaqhesiñanak jan jankʼak tukjkpacha?

• ¿Kamachis jiwjjtan ukhajja?

• ¿Aka Oraqejj tukjatäpachäniti?

• ¿Kunjamatsa familianakajj kusisitäpjjaspa?

Janiw ukakïkiti, Bibliat yatjjatañajj ‘Diosar jakʼachasiñamatakiw’ mä arunjja, Diosamp sum apasiñamatakiw yanaptʼätam (Santiago 4:8). Diosampi jukʼamp sum apasisajja, kuntï Diosan Reinopajj jichhürunsa, jutïrinsa juma layku lurkaspa uk amuyañajj janiw jumatakejj chʼamäkaniti. Jesusajj akham sasaw Awkipar mayïna: “Aka wiñay jakañajj juma sapa cheqpach Diosar uñtʼañanwa utji, ukhamarak Jesucristoru kawkïrirutejj jumajj khitankta ukaru” sasa (Juan 17:3).