LO KOUVERTIR | RWAYONM BONDYE—AKOZ I ENPORTAN POUR OU?

Rwayonm Bondye—Akoz i enportan pour ou?

Apre ki ou’n lir sa bann lartik presedan petet ou’n konpran ki Rwayonm Bondye i vreman enportan pour Temwen Zeova. Probableman sa bann benediksyon pour Rwayonm Bondye a lavenir ki’n ganny diskite in enteres ou. An menm tan, ou kapab demann ou lekor si sa bann promes pou vreman vin vre.

Olye krwar nenport kwa ki ou tande, i pli byen ki ou fer byen atansyon. (Proverb 14:15) Dan en sans, ler ou fer atansyon, ou kapab ganny konpare avek bann Bereen lepase. * Kan zot ti tann sa bon nouvel Rwayonm pour premye fwa, bann Bereen ti aksepte sa ki zot ti tande, me pa zis akoz zot ti anvi ki i vin vre. O kontrer zot ti egzamin byen lekritir “pour war si sa ki Pol ti dir zot ti vre.” (Akt 17:11) Andotmo, bann Bereen ti konpar sa bon nouvel ki zot ti tande avek sa ki Lekritir i dir. Avek letan zot ti konvenki ki sa bon nouvel ti vreman baze lo Parol Bondye.

Temwen Zeova i envit ou pour fer menm parey. Atraver en letid gratwit baze lo Labib, nou ofer ou sa loportinite pour konpar krwayans Temwen Zeova lo Rwayonm Bondye avek sa ki Labib i ansennyen.

An plis ki sa ki ou pou aprann lo Rwayonm Bondye, ou letid Labib i kapab ed ou trouv larepons pour bann kestyon pli enportan dan lavi.

 • Kote nou sorti?

• Ki bi lavi?

• Akoz Bondye i permet soufrans?

• Ki arive avek nou ler nou mor?

• Eski later pou ganny detri en zour?

• Kwa ki kapab fer ou lavi fanmir ere?

Pli enportan ankor, etidye Labib pou ed ou pour “apros avek Bondye.” (Zak 4:8) An retour, pli ou apros avek Bondye, pli ou pou vwar byenfe ki Rwayonm Bondye i anmennen pour ou, pa zis la konmela me pour touzour. Zezi li menm ti dir dan son lapriyer avek son Papa: “Ou’n donn li pouvwar lo tou dimoun pour donn lavi eternel tou bann ki ou’n donn li. Savedir ki zot konn ou konman sel vre Bondye, ek Zezi-Kri ki ou’n anvoye.”​—Zan 17:2, 3.

Temwen Zeova i kapab servi sa piblikasyon pour etidye avek ou.

Pour demann en letid Labib gratwit, demann nenport ki Temwen Zeova oubyen ranpli sa form ki lo www.pr418.com. (Klik lo LETID LABIB lo paz lakey)

[Not anba lo paz]

[Bwat lo paz 9]

Akoz Rwayonm Bondye i enportan pour li?

Resaman en pti fiy di-z-an ki apel Folake ti ganny demande pour ekri en ekspoze pour lekol lo “Kwa ki mon pli kontan dan sa lemonn.” Folake ti swazir pour ekri lo akoz i kontan pour koz avek lezot lo Rwayonm Bondye.

Folake ti eksplike, “Rwayonm Bondye i en vre gouvernman. Me i envizib alor ou pa kapab vwar li menm si ou met linet!”

Apre Folake ti ekri konsernan bann benediksyon lo sa Rwayonm ki i enpasyan pour vwar. Ler i ti mansyonn serten problenm ki sa Rwayonm pou rezourd i ti ekri, “Mon sagren letan mon vwar dimoun ki napa lakaz pe dormi lo semen” e osi “bann manrmay pe mor lafen dan plizyer pei.” I ti azoute, “Me mon kontan ler mon lir Izai 65:21.” Konsernan bann imen ki pou viv anba dominasyon Rwayonm Bondye, sa verse i promet ki, “Zot pou konstri lakaz e zot pou reste ladan; zot pou plant pye rezen e zot pou manz son fri.”

Folake i dir ki i pe esper sa letan ler Bondye pou retir tou maladi par mwayen son Rwayonm. Dan son ekspoze, i ti mansyonn Revelasyon 21:4 kot i dir ki Bondye “pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.” Dan son konklizyon i ti repete ki koz “lo Zeova ek son Rwayonm i sa keksoz ki i pli kontan dan sa lemonn.” I kler alor, ki Rwayonm Bondye i vreman spesyal pour sa pti fiy.