Punta kaq yachatsikïkunachö rikanqëkinömi, Jehoväpa testïgunkunapaqqa Diospa Gobiernun alläpam precisan. Itsachi Diospa Gobiernun änikunqan bendicionkunapita mëqanllapis gustashunki, peru tsëkuna mana rasumpa kanqanta pensanki.

Manam llapan nimanqantsikkunamantsu creinantsik (Proverbius 14:15). Unë Berea * markapita cristiänukunapis manam llapan niyanqantatsu creiyaq. Diospa Gobiernumpita yachatsir qallayaptinqa manam rasllatsu creikurkuyarqan. Tsëpa rantinqa, Biblia “yachatsiconqan rasonpa canqanta musyayänanpaq[mi]” kikinkuna mas yachakuyarqan (Hëchus 17:11). Juk parlakïchöqa, yachatsiyanqantam igualatsiyarqan Diospa Palabran ninqanwan, y rasumpa kanqantam cuentata qokuriyarqan.

Jehoväpa testïgunkunaqa invitariyaq apostolkuna kawayanqan witsan cristiänukunanö rurayänëkipaqmi. Debaldilla Bibliata yachatsikuyanqämi, yanapayäshunki Diospa Gobiernumpita yachatsikuyanqäta Biblia ninqanwan igualatsinëkipaq.

Yachatsiyanqaqkunaqa manam Diospa Gobiernumpita masta musyanëkillapaqtsu yanapashunki. Jina, kë precisaq tapukïkunapa respuestanta tarinëkipaqpis:

• ¿Mëpitataq shamuntsik?

• ¿Imapaqtaq kawantsik?

•   ¿Imanirtaq sufrimientukuna kananta Dios permitin?

• ¿Imataq pasamantsik wanurishqa?

• ¿Patsa ushakanqatsuraq?

• ¿Imanötaq familiakuna kushishqa kawakïta puëdiyan?

Bibliata estudianqëkim Diosman mas wititsishunki (Santiägu 4:8, NM). Pëta reqinqëkimannömi, Diospa Gobiernun qampaq kanan tiempu y shamoq tiempuchö allikunata ruramunampaq kaqman mas creinki. Jesusqa Teytanta kënö nirqan: “Qamllam Dios canqui. Noqa Jesucristutam que patsaman cachamarqequi. Y ishcantsicta reqimarnintsicmi, nunacuna wiñe caweyoqna cayanqa” (Juan 17:3).