¿Kʼusi tspas ta atojolal Li Ajvalilal yuʼun Diose?
MANTAL TA SLIKEBALTIK PAJINA: ¿KʼUSI TSPAS TA ATOJOLAL LI AJVALILAL YUʼUN DIOSE?
¿Kʼusi tspas ta atojolal li ajvalilal yuʼun Diose?
Jech kʼuchaʼal laj xa avil li ta yan mantaletike, li stestigotak Jeovae solel tsots skʼoplal chaʼiik li Ajvalilal yuʼun Diose. Jech xtok, xuʼ van oy lek chavaʼi jlomuk li kʼusitik tspas ta jelavel li Ajvalilale, pe yikʼal van toj vokol chavaʼi xchʼunel ti chkʼot ta pasele.
Lek ti jkʼel jbatike xchiʼuk ti mu jchʼuntik skotol li kʼusitik chij-albate (Proverbios 14:15). Jaʼ jech la spasik li yajtsʼaklomtak Cristo ta voʼneal lum Bereae. * Kʼalal laj yaʼiik ta sba velta li lekil aʼyej sventa Ajvalilal yuʼun Diose, mu ta jechuk noʼox la xchʼamik ta anil. La sabeik lek smelolal ta Vivlia sventa «tsqʼuelic me xcoʼlaj» (Hechos 17:11). Jaʼ xkaltik, li kʼusi laj yaʼiike la skoʼoltasik xchiʼuk li kʼusi chal Vivliae, vaʼun jaʼ jech laj yakʼik venta ti jaʼ melele.
Li stestigounkutik Jeovae ta jtijkutik avoʼontonik ti jech xapasik kʼuchaʼal la spasik li yajtsʼaklomtak Cristo ta baʼyel sigloe. Li matanal chanubtasel ta Vivlia chkakʼkutik ta naetike xuʼ skoltaot yoʼ xakoʼoltas li kʼusi chkalkutik ta sventa Ajvalilal yuʼun Dios xchiʼuk li kʼusi chal Skʼop Dios, li Vivliae.
Li chanubtasel ta Vivlia chkakʼkutike maʼuk noʼox chachanbe lek skʼoplal li Ajvalilal yuʼun Diose, yuʼun chatabe stakʼobil xtok li sjakʼobiltak ti tsotsik skʼoplal liʼe:
• ¿Bu likemutik talel?
• ¿Kʼusi stu ta melel li jkuxlejaltike?
• ¿Kʼu yuʼun yakʼoj to oyuk vokolil li Diose?
• ¿Kʼusi chkʼot ta jtojolaltik kʼalal mi lijchame?
• ¿Mi ta van xichʼ lajesel li Balumile?
• ¿Kʼuxi xuʼ xmuyubajik li kutsʼ kalaltike?
Pe li kʼusi mas tsots skʼoplal kʼalal ta jchantik li Vivliae, jaʼ ti chijnopaj-o ta stojolal li Diose (Santiago 4:8). Kʼalal mas lek xavil aba xchiʼuk li Diose, mas kʼun chavaʼi xchʼunel li kʼusitik lek tspas ta atojolal li Ajvalilal yuʼun Dios li avi xchiʼuk li ta jelavele. Li Jesuse xi laj yalbe li Stote: «Ti jech ta xcuxiic sbatel osile, yuʼun xayotquinicot ti atuc noʼox batsʼi cuxul Diosote, xchiʼuc xotquinic noxtoc li Jesucristo laj atac tale» (Juan 17:3).
Sventa tskoltaik ta xchanel Vivlia krixchanoetik li stestigotak Jeovae tstunesik li livro liʼe.
Mi chakʼan junuk chanubtasel ta Vivliae, jakʼbo junuk stestigo Jeova o kʼano ta www.pr418.com/tzo. (Akʼbo klik ti bu chal: «Kʼano chanubtasel ta Vivlia».)
[Tsʼib ta yok vun]
^ Li Bereae jaʼ toʼox jun jteklum ta voʼneal Macedonia.
[Rekuadro ta pajina 9]
Ti kʼu yuʼun tsots skʼoplal laj yaʼi Li Ajvalilal yuʼun Diose
Li achʼtik toe, oy jun tseb ti lajuneb sjabilal ti Folake sbi ti albat akʼo stsʼiba jlik vun ta sventa s-eskuelae, li sbi kʼusi la stsʼibae jaʼ: «Li kʼusi mas ta jkʼupin li ta Balumile». Li Folake la snop ti chalbe skʼoplal ti kʼu yuʼun tskʼupin tajek yalbel krixchano li Ajvalilal yuʼun Diose.
Xi laj yale: «Li Ajvalilal yuʼun Diose jaʼ jun melel ajvalil, pe mu xvinaj ta kʼelel; jaʼ yuʼun akʼo mi jlap jlentetik mu xkiltik».
Ta tsʼakale laj yalbe skʼoplal jaytosuk vokoliletik ti mas tsvul-o yoʼontone xchiʼuk laj yalbe smelolal kʼuxi tslajesbe skʼoplal li Ajvalilal yuʼun Diose. Xi laj yale: «Kʼalal ta jnopbe skʼoplal li krixchanoetik ti ta kaye nakalike chkat-o koʼonton» xchiʼuk «li ololetik ti chchamik ta viʼnal li ta junantik lumetike». Vaʼun xi to laj yale: «Pe chakʼbun muyubajel kʼalal ta jkʼel li Isaías 65:21». Li teksto taje chal ti kʼalal mi lik sventain Balumil li Ajvalilal yuʼun Diose, li krixchanoetike «chlic spas lec snaic, chlic naquiicuc stuquic; chlic stsʼunic lec stsʼusubic, ta sloʼbeic sat stuquic».
Jech xtok, laj yal ti smalaoj chkʼot yorail ti tslajes chameletik li Ajvalilal yuʼun Diose. Li ta vun la stsʼibae laj yalbe skʼoplal Apocalipsis 21:4, ti chal ti Diose ta skus lokʼel skotol yaʼlel jsatik, muʼyuk xa buchʼu chcham xchiʼuk muʼyuk xa buchʼu chil svokol. Xi laj yal li ta slajebal xae: «Li kʼusi mas ta jkʼupin li ta Balumile, jaʼ ti chkalbe krixchanoetik ta sventa Jeova xchiʼuk ta sventa li Ajvalilal yuʼune». Jech ta melel, li uni kʼox tsebe toj tsots skʼoplal chaʼi ta xkuxlejal li Ajvalilal yuʼun Diose.
Xuʼ van chakʼupin skʼelel xtok liʼe
LIVROETIK XCHIʼUK FOYETOETIK
¿Bu ta jtabetik stakʼobil li kʼusitik ta jakʼbe jbatike?
¿Mi jaʼ tstakʼ li sientifikoetike, li pastoretike o li Vivliae?
LI KʼUSITIK TSJAKʼILANIKE
¿Kʼu yelan li chanubtasel ta Vivlia chakʼik li stestigotak Jeovae?
Li ta matanal chanubtasel chakʼik li stestigotak Jeovae xuʼ xatunes li Vivlia oy avuʼune, xuʼ xavalbe ti xchiʼinot li avutsʼ avalale xchiʼuk avamigotak.
